2023 i Wan Yia We i Mekem Plante Man Oli Wari—?Baebol i Talem Wanem?

Ol samting we oli hapen raon long wol long 2023, oli pruvum se yumi stap laef long “ol las dei,” olsem we Baebol i talem. (2 Timoti 3:1) Traem luk sam long ol trabol we oli stap hapen tede, we Baebol i bin tokbaot finis.

Samting we Baebol i talem mo ol samting we oli stap hapen long wol

“Ol faet mo . . . nius blong ol faet..”—Matiu 24:6.

• “Naoia i gat plante moa faet long ol defdefren ples long wol.”a

“Olbaot long wol . . . graon i seksek.”—Mak 13:8.

• “Long stat blong 2023, i gat 13 etkwek raon long wol we paoa blong olgeta i bitim 7.0. Hemia i soemaot se i gat plante moa etkwek long yia ya i bitim ol narafala taem we mifala i rikodem.”b

“Plante samting we i mekem [ol man] oli fraet.”—Luk 21:11.

• “Naoia wol i kam hot moa i bitim olgeta taem bifo.”—António Guterres, wan haeman blong Yunaeted Nesen.c

“Kakae i sot.”—Matiu 24:7.

• “Long 2023, plante man oli faenem i had blong kasem inaf kakae we famle blong olgeta i nidim.”d

‘Laef i strong tumas mo i had blong winim ol trabol.’—2 Timoti 3:1.

• “Naoia plante moa man oli kasem ol sik long tingting.”e

?Wanem bambae i hapen long 2024?

Yumi no save wanem samting bambae i hapen long 2024. Be ol samting we oli stap hapen long wol oli soemaot se i no longtaem, Kingdom blong God, hemia gavman blong God long heven, bambae i rulum wol. Kingdom ya bambae i finisim ol gavman blong man mo ol samting we oli stap mekem ol man oli wari mo harem nogud.—Daniel 2:44; Revelesen 21:4.

Be go kasem taem ya we Kingdom i rulum wol, i gud yumi lukluk i go long God blong i givhan long yumi taem yumi wari. Baebol i talem se:

“Taem mi fraet, mi trastem yu.”—Ol Sam 56:3.

?Yu save mekem wanem blong soemaot se yu trastem God? Mifala i glad blong givhan long yu blong kasem save moa long promes ya blong Baebol, se wan dei bambae ol man oli no moa safa. I gud yu traem fri Baebol kos ya blong faenemaot olsem wanem ol promes blong Baebol oli save givhan long yu mo famle blong yu.