Wan Niuklia Wo—?Baebol i Talem Wanem?
Ol wol paoa oli stap gohed blong wokem ol niufala tul blong faet, mo hemia i mekem se wol i stap long denja. Ol man oli wari se from we i gat plante niuklia tul blong faet, bambae i isi blong wan niuklia wo i stat. Ol man oli fraet tu se sipos wan kantri i yusum wan smol niuklia bom nomo, be bambae i save statem wan niuklia wo we i spolem fulwol. Olsem ripot ya long Bulletin of the Atomic Scientists i talem, yumi stap laef “long wan taem we wan niuklia wo i save stat enitaem nomo.”
?I tru se bambae i gat wan niuklia wo? Sipos yes, ?bambae wol blong yumi i lus? ?Mo yumi save mekem wanem sipos yumi wari se bambae i gat wan niuklia wo? ?Baebol i talem wanem?
Long atikol ya
?Baebol i talemaot se bambae i gat wan niuklia wo?
Baebol i no talem stret se bambae i gat wan niuklia wo. Be ol man oli ting se i save gat wan niuklia wo, from ol nogud fasin blong ol man mo ol nogud samting we oli stap hapen, mo hemia ol samting we Baebol i bin talemaot.
Traem luk ol vas ya blong Baebol we oli laenap wetem ol samting we oli stap hapen long wol tede:
Vas blong Baebol: Ol disaepol blong Jisas oli askem se: “Wanem saen bambae i soemaot se yu yu stap, mo se hem i lashaf blong sistem blong wol ya?” Jisas i ansa se: “Ol nesen oli faet agensem ol narafala nesen, mo ol kingdom oli faet agensem ol narafala kingdom.”—Matiu 24:3, 7.
Samting we i stap hapen long wol: Ol kantri we oli stap wokem plante niuklia tul blong faet, olgeta nao plante taem oli stap yusum ol tul blong faet.
“Long ol yia we i pas, fasin blong ol man i stap kam moa nogud. Mo i gat plante moa faet.”—The Armed Conflict Location & Event Data Project.
Vas blong Baebol: “Long taem blong en, king blong saot bambae i kam atakem [king blong not], we bambae tufala i stap puspusum tufala.”—Daniel 11:40.
Samting we i stap hapen long wol: Ol nesen we oli stap faet agensem olgeta, oli stap puspusum olgeta o kompit blong faenemaot se hu nao i gat moa paoa, mo hemia i laenap wetem samting we Baebol i bin talem. Nating se tede ol kantri we oli stap wokem ol niuklia tul oli no stap faet agensem olgeta, be oli stap gohed blong wokem sam moa niuklia tul we oli moa denja.
“Long ol ten yia we i pas, namba blong ol faet bitwin ol kantri i kam antap bigwan. Mo ol kantri we oli gat paoa, olgeta tu oli stap sapotem ol faet ya.”—The Uppsala Conflict Data Program.
Vas blong Baebol: “Long ol las dei, laef bambae i strong tumas mo bambae i had blong winim ol trabol. Bambae ol man oli . . . no save agri long wan tingting, oli spolem nem blong narafala, oli no save bos long tingting, oli wael olgeta.”—2 Timoti 3:1-3.
Samting we i stap hapen long wol: Plante man tede oli no save agri long wan tingting. Mo hemia i sem mak long ol lida blong wol, olgeta tu oli no save agri long wan tingting. Taswe taem oli gat wan problem, oli no save stretem long kwaet fasin blong mekem se i gat pis, be bambae oli statem wan faet blong traem stretem problem blong olgeta. Mo ol samting olsem nao oli mekem se i save gat wan niuklia wo.
“Sipos ol man oli no traem faenem rod blong wok gud tugeta, bambae namba blong ol faet i kam antap bigwan.”—Samir Saran Mo Jane Harman, World Economic Forum.
?Bambae God i letem se i gat wan niuklia wo?
Baebol i no talem. Be hem i tokbaot se “ol man bambae oli luk plante samting we i mekem oli fraet,” mo ol samting ya bambae oli hapen long taem blong yumi. (Luk 21:11) Wan eksampol, hemia atomik bom we ol man oli bin sakem long taem blong Wol Wo Tu. Baebol i eksplenem from wanem God i letem se i gat ol wo. Blong lanem moa long saed ya, wajem video ya ?From Wanem God i Letem Ol Man Oli Safa?
?Bambae wol blong yumi i lus?
Nogat. Nating sipos ol man oli yusum ol niuklia tul bakegen, be God bambae i no letem samting ya i spolem wol ya fulwan. Baebol i talem se ol nogud samting we oli stap hapen, bambae oli no save spolem wol ya. Mo i talem tu se ol man bambae oli laef olwe long wol ya.
Sam man oli stap tingbaot se long fiuja ol man bambae oli safa, from wol ya bambae i fulap long ol posen we i kamaot from niuklia wo. Nating se ol man oli yusum ol tul blong faet blong spolem wol ya, be Baebol i talem se God i naf blong fiksimap wol ya bakegen.
God i wantem se yumi laef long wan naesfala wol we i gat pis
Krieta blong yumi i wokem wol ya long wan fasin we i save riperem hem wan. Mo tu God bambae i yusum paoa blong hem, blong mekem wol ya i kam niuwan bakegen mo i kam wan naesfala ples blong ol man oli laef olwe long hem.—Ol Sam 37:11, 29; Revelesen 21:5.
?Yu save mekem wanem sipos yu wari se bambae i gat wan niuklia wo?
Sam man oli wari se bambae i gat wan niuklia wo mo oli wari tu long ol trabol we oli save kamaot from. Sipos yu tu yu gat tingting ya, ol promes mo ol advaes blong Baebol oli save halpem yu blong yu no wari tumas. ?Olsem wanem oli save halpem yu?
Baebol i tokbaot wan nambawan fiuja long saed blong wol ya mo ol man we oli laef long hem. Taem yu kasemsave long hop ya, hemia bambae i kam olsem ‘wan angka we i holem laef blong yu,’ mo bambae i mekem se yu no wari tumas. (Hibru 6:19, futnot) Mo tu, sipos yu tingbaot nomo ol samting we oli hapen long wan dei, hemia bambae i halpem yu blong no wari tumas long ol samting we maet oli save hapen long fiuja. Olsem we Jisas i talem: “Trabol blong wan dei hem i naf finis blong dei ya.”—Matiu 6:34.
I impoten tumas we yumi evriwan i lukaot gud long tingting mo filing blong yumi. Yumi mas lukaot gud blong no ridim, wajem, o lesin long ol infomesen we oli tokbaot ol niufala tul blong faet, from hemia i save mekem se yumi wari moa. Be, hemia i no min se yumi no wantem save long ol samting we oli stap hapen. Defren olgeta, yumi stap traehad blong no wari bitim mak long ol samting we yumi no save kontrolem mo maet bambae oli neva hapen.
Sipos yu putum tingting blong yu long ol gudfala samting we oli stap hapen long laef blong yu, hemia bambae i mekem se yu no gat taem blong tingbaot ol rabis nius.
Baebol i givim wan nambawan hop long saed blong fiuja, mo yumi save trastem
Taem yu lanem moa long saed blong ol promes blong God, hemia bambae i mekem se yu gat hop, yu glad, mo yu gat pis long tingting.
?Baebol i tokbaot se Amagedon i wan niuklia wo?
Sam man oli ting se Amagedon i wan niuklia wo we bambae i hapen long fulwol. Mo i klia se oli stap tingbaot wan niuklia wo we bambae i spolemgud evri samting long wol.
Be Baebol i yusum tok ya “Amagedon,” blong tokbaot wan wo bitwin God mo “ol king [long evri ples long wol]” o ol gavman blong man.a (Revelesen 16:14, 16) Faet blong Amagedon i no sem mak olsem wan niuklia wo we i save distroem olgeta samting long wol. Defren olgeta, long faet blong Amagedon, God bambae i spolem ol rabis man nomo, mo bambae i mekem se ol man oli gat pis mo oli sef.—Ol Sam 37:9, 10; Aesea 32:17, 18; Matiu 6:10.
?Olsem wanem God bambae i finis wo?
Jehovab God bambae i yusum paoa blong hem blong stopem ol nesen we oli stap faet agensem olgeta, mo bambae i spolem ol tul blong faet blong olgeta. Mo bambae hem i mekem olsem, taem hem i yusum Kingdom blong hem, we i wan gavman long heven, blong i rulum fulwol.—Daniel 2:44.
Kingdom blong God bambae i tijim ol man blong oli laef long pis mo oli joen gud. From we i gat wan gavman nomo we i rulum fulwol, bambae i no moa gat fasin ya we ol man oli no save agri long wan tingting. !Mo long taem ya, ol man bambae oli no moa lanem blong faet! (Maeka 4:1-3) ?Wanem bambae i kamaot from? “Olgeta man bambae oli stap gud, mo oli gat pis olwe. Bambae oli save stap gud long ol plantesen blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet.”—Maeka 4:4, Baebol Long Bislama.
a Yu luk atikol ya “?Wanem Ya Faet Blong Amagedon?”
b Jehova i prapa nem blong God. (Ol Sam 83:18) Yu luk atikol ya “?Hu Ya Jehova?”