?Ol Witnes Blong Jehova Oli Yusum Presen Mane Olsem Wanem?
Oganaesesen blong mifala i yusum presen mane blong sapotem wok blong halpem ol man blong kasem save long Baebol, mo blong givhan long taem blong disasta. Tufala wok ya i joen wetem bigfala wok we mifala i mekem, hemia blong pulum ol man oli kam disaepol blong Jisas.—Matiu 28:19, 20.
Ol Witnes oli no kam rij from ol presen mane. Ol elda mo ol narafala we oli gat wok long oganaesesen oli no kasem pei, mo ol Witnes oli no kasem pei taem oli go prij long ol haos wanwan. Olgeta we oli wok long ol branj ofis mo long wol hedkwota, wetem Hed Kampani tu, oli no kasem pei.
Ol Wok We Mifala i Mekem
Ol Buk Mo Websaet: Evri yia, mifala i transletem, printim, sanemaot, mo givimaot long ol man, plante milian Baebol mo Kristin buk we ol man oli no pem. Mo tu, long websaet ya jw.org mo JW Laebri, i gat ol buk we man i save ridim mo daonlodem fri, mo i no gat ol pablisiti blong winim mane from.
Bildim Mo Riperem Ol Haos Wosip: Mifala i bildim mo riperem ol haos wosip long fulwol, blong ol kongregesen oli save gat wan gudfala ples blong joen mo presem God. Mifala i mekem sem mak long ol branj ofis mo ol ofis blong translesen. Bighaf blong ol wokman oli volontia nomo, hemia i katem praes blong ol wok ya.
Olgeta We Oli Lukaot Long Ol Wok: Presen mane i sapotem wok we oli mekem long wol hedkwota, ol branj ofis, ol ofis blong translesen, mo wok blong olgeta we oli goraon blong visitim ol kongregesen.
Wok Blong Prij: Ol Witnes oli no kasem pei from wok blong talemaot gud nius mo tijim ol man long “tok blong God.” (2 Korin 2:17) Be samfala we oli kasem trening mo spenem bighaf blong taem blong olgeta long wok blong prij, oli kasem fri nomo, wan rum blong slip mo ol stamba samting we oli nidim blong laef, olsem ol Kristin long taem bifo.—Filipae 4:16, 17; 1 Timoti 5:17, 18.
Wok Blong Tij: Mifala i yusum presen mane blong mekem ol asembli, wokem ol CD mo video we oli tijim ol man long Baebol, mo mekem ol kos blong trenem ol elda mo olgeta we oli mekem wok blong God fultaem.
Givhan Long Taem Blong Disasta: Mifala i givim kakae, wota, mo ples blong slip, long olgeta we oli lusum olting blong olgeta long disasta. Wok ya i givhan long “olgeta we oli brata mo sista” blong mifala long saed blong bilif, mo long plante we oli no Witnes tu.—Galesia 6:10.