?Fasin Blong Plei Laki i Wan Sin?

Ansa we Baebol i givim

Nating se Baebol i no tokbaot fulwan fasin blong plei laki, be folem ol rul blong Baebol, yumi save talem se long lukluk blong God, fasin blong plei laki hem i wan sin.—Efesas 5:17.a

• Griri fasin i pulum man blong plei laki, taswe God i no laekem nating fasin ya. (1 Korin 6:9, 10; Efesas 5:3, 5) Man blong plei laki, i wis se bambae i kasem mane blong ol narafala we oli lus, be Baebol i agensem fasin blong kavetem samting blong narafala.—Eksodas 20:17; Rom 7:7; 13:9, 10.

• Nating se man i plei laki jes blong kasem smol mane nomo, be hemia i save pulum hem blong i laekem mane tumas.—1 Timoti 6:9, 10.

• Ol man blong plei laki oli bilif strong long gudlak. Be long lukluk blong God hemia i sem mak olsem we man i wosipim aedol, mo hemia i no laenap nating wetem wosip blong hem.—Aesea 65:11.

• Baebol i enkarejem yumi blong wok had, i bitim we yumi wantem kasem samting we i blong nating nomo. (Prija 2:24; Efesas 4:28) Olgeta we oli folem advaes blong Baebol, oli save kakae ol kakae we olgeta nomo oli “wok had” from.—2 Tesalonaeka 3:10, 12.

• Fasin blong plei laki i save mekem se man i wantem tumas blong winim narafala, be Baebol i agensem fasin ya.—Galesia 5:26.