?I Gat Hamas Witnes Blong Jehova Long Fulwol?

?Olsem wanem yufala i kaontem ol memba blong yufala?

Mifala i kaontem nomo ol Witnes blong Jehova we oli prij evri manis. (Matiu 24:14) Hemia i minim olgeta we oli baptaes finis olsem ol Witnes, wetem olgeta we oli no baptaes yet be oli naf blong prij.

?Man i mas givim mane blong kam wan memba?

Nogat. Man i no nid blong givim mane blong hem i kam wan Witnes, no blong kasem wan spesel wok long oganaesesen blong mifala. (Ol Wok 8:18-20) Eniman nomo i save givim presen mane mo hem i no nid blong talemaot nem blong hem. Wan Witnes i save givim samting we hem nomo i naf blong givim olsem taem, paoa mo ol samting we hem i gat, blong givhan long wok blong prij long fulwol.—2 Korin 9:7.

?Olsem wanem yufala i save namba blong olgeta we oli prij oltaem?

Evri manis, ol Witnes oli fulumap ripot blong prij mo oli givim long kongregesen blong olgeta. Ol Witnes oli glad nomo blong givim ol ripot ya.

Ol kongregesen oli putum gud ol ripot ya, oli ademap ol total mo oli sanem ripot ya i go long branj ofis we i lukaot long olgeta. Biaen, branj ofis i sanem ol ripot ya i go long wol hedkwota blong ol Witnes.

Long en blong evri sevis yia,a oli kaontem total namba blong ol Witnes blong Jehova long evri ples. Oli ademap ol namba ya blong faenemaot total namba blong ol Witnes long fulwol. Ol ripot blong wanwan kantri i stap long websaet blong yumi long haf ya “Raon Long Wol.” Ol ripot ya oli leftemap tingting blong yumi olsem oli mekem long ol faswan Kristin.—Ol Wok 2:41; 4:4; 15:3.

?Yufala i kaontem olgeta tu we oli joen wetem yufala be oli no prij?

Mifala i no kaontem olgeta we oli no prij, be mifala i glad blong singaot olgeta blong oli kam long ol miting. Evri yia, plante long olgeta oli kam long Memoriol blong tingbaot ded blong Jisas. Mifala i faenemaot namba blong olgeta taem mifala i karem total namba blong evriwan we oli kam long Memoriol, mo long namba ya, mifala i tekemaot total namba blong ol Witnes long fulwol. Long 2024, i gat 21,119,442 man we oli kam long Memoriol.

Plante man we oli no kam long ol miting blong mifala, oli glad blong stadi Baebol. Long 2024, mifala i mekem samwe long 7,480,146 Baebol stadi evri manis, mo long olgeta ya i gat sam we oli stadi long wan grup.

?From wanem namba blong ol Witnes we gavman i givim i bigwan moa long namba we yufala i givim?

Sensas Ofis blong Gavman i faenemaot namba blong ol Witnes, taem i askem long ol man blong oli talemaot jej we oli stap go long hem. Eksampol, Ofis blong Sensas long Yunaeted Stet i talem se: “Oli kasem namba taem oli askem long ol man blong oli talem wanem jej we oli stap go long hem. Namba ya i no kamaot stret long ol Witnes, be long ol man olbaot nomo.” Be, mifala i kaontem nomo olgeta we oli prij mo oli givim ripot blong olgeta olsem ol Witnes blong Jehova, be i no olgeta we oli stap talem nomo se oli ol Witnes.