?I No Longtaem Bambae i Gat Wan Faet Long Fulwol?—?Baebol i Talem Wanem?

Long ol 30 yia we i pas, plante man oli ting se ol kantri oli joen gud moa i bitim bifo mo i gat pis. Be ol samting we oli jes hapen oli soemaot se maet hemia i no tru.

• “Naoia Isrel mo Hezbollah oli stap faet klosap long boda blong Lebanon mo hemia i mekem plante man oli wari se faet blong Gasa bambae i afektem ol narafala kantri.”—Ripot we i kamaot long Reuters, 6 Jenuware 2024.

• “Naoia ol narafala kantri oli fraet moa long Iran, hemia from we Iran i kontrolem ol grup we oli stap faet long ol defdefren ples mo i stat bakegen blong mekem ol bigfala bom. Mo tu, Rasia mo Jaena oli sapotem Iran.”—Ripot we i kamaot long The New York Times, 7 Jenuware 2024.

• “Rasia i stap gohed blong faet agensem Yukren mo mekem bigfala trabol long olgeta.”—Ripot we i kamaot long UN News, 11 Jenuware 2024.

• “Naoia Jaena i gat moa mane mo paoa mo i stap raorao wetem Yunaeted Stet. Antap long hemia, Taewan i no wantem stap aninit long paoa blong Jaena. Ol samting ya oli save mekem se bigfala faet i kamaot.”—Ripot we i kamaot long The Japan Times, 9 Jenuware 2024.

?Olsem wanem? ?Baebol i tokbaot ol trabol ya we yumi stap luk tede? ?Ol trabol ya bambae oli mekem se i gat wan faet long fulwol?

Baebol i tokbaot ol trabol we oli stap hapen tede

Baebol i no talem stret wanem kantri bambae i faet agensem narawan, be i talem se bambae i gat plante faet long taem blong yumi we bambae oli “tekemaot pis long wol.”—Revelesen 6:4.

Buk blong Daniel i talemaot se “long taem blong en,” ol wol paoa bambae oli “puspusum” olgeta, o faet blong kasem paoa. Oli mekem olsem taem oli traem blong soemaot se oli strong mo oli gat plante tul blong faet, mo oli yusum plante “gudfala samting,” o mane, blong mekem faet.—Daniel 11:40, 42, 43.

Wan bigfala faet we bambae i hapen i no longtaem

Baebol i talem se ol samting long wol bambae oli kam moa nogud. Jisas i bin talemaot se “bambae wan bigfala trabol i kam we i neva hapen bifo, stat long taem we God i mekem wol ya.” (Matiu 24:21) Long en blong “bigfala trabol” bambae i gat wan faet we Baebol i singaotem se Amagedon, o “faet long bigfala dei blong God Ya We i Gat Olgeta Paoa.”—Revelesen 16:14, 16.

Be faet blong Amagedon i blong sevem ol man, i no blong spolem ol man. Long faet ya, God bambae i finisim ol gavman blong man we oli stamba blong plante faet long wol. Blong faenemaot olsem wanem Amagedon bambae i mekem se i gat pis blong olwe, ridim tufala atikol ya:

• “?Wanem Ya Faet Blong Amagedon?”

• “!Amagedon—Wan Gudfala Nius!”