?Baebol i Tijim Se Man i Bon Bakegen Long Wan Narafala Bodi?
Ansa we Baebol i givim
No, tingting ya i no stap long Baebol. Bilif ya i stanap long tijing ya se sol i no save ded samtaem.a Be Baebol i tijim se God i mekem man long das, mo taem hem i ded, laef blong hem i finis. (Jenesis 2:7, futnot; Esikel 18:4) I no gat wan samting insaed long hem we i gohed blong laef.—Jenesis 3:19; Prija 9:5, 6.
?Olsem wanem tijing ya se man i bon bakegen long narafala bodi i defren long tijing blong laef bakegen?
Tijing blong Baebol long saed blong laef bakegen, i no stanap long bilif ya se sol i no save ded samtaem. Laef bakegen i min se paoa blong God bambae i mekem dedman i stanap i laef bakegen. (Matiu 22:23, 29; Ol Wok 24:15) Tijing ya blong laef bakegen i givim wan gudfala hop long man, se bambae hem i save kambak long wol ya we i kam paradaes, mo i gat janis blong no moa ded bakegen.—2 Pita 3:13; Revelesen 21:3, 4.
Rong tingting long samting we Baebol i talem long saed blong bon bakegen long defren bodi
Rong tingting: Baebol i talem se profet Elaejah i bon bakegen long bodi blong Jon Baptaes.
Trutok: God i talem se: “Bambae mi sanem profet ya Elaejah i kam long yufala,” mo Jisas i soemaot se Jon Baptaes i mekem profet tok ya i kamtru. (Malakae 4:5, 6; Matiu 11:13, 14) Be hemia i no min se Elaejah i bon bakegen long bodi blong Jon Baptaes. Jon i talem stret se hem i no Elaejah. (Jon 1:21) Be Jon i mekem wan wok we i olsem Elaejah, hemia blong talemaot tok blong God long ol man se oli mas tanem tingting blong olgeta. (1 King 18:36, 37; Matiu 3:1) Long saed blong Jon, Baebol i talem se “tingting blong hem mo paoa blong hem bambae i olsem blong Elaejah.”—Luk 1:13-17.
Rong tingting: Baebol i yusum tok ya “bon bakegen” blong minim bilif ya se man i bon bakegen long wan narafala bodi.
Trutok: Baebol i soemaot se tabu spirit i mekem se man i bon bakegen, taem hem i laef i stap yet. (Jon 1:12, 13) Hem i no bon bakegen long fasin ya from samting we hem i mekem finis long laef blong hem, be hemia wan blesing we God i givim, mo olgeta we oli kasem blesing ya oli gat wan spesel hop blong fiuja.—Jon 3:3; 1 Pita 1:3, 4.
a Bilif ya se sol i no save ded mo man i bon bakegen long wan narafala bodi, i stat long Babilon bifo. Biaen, ol waes man blong India oli statem bilif long Karma. Folem buk ya Britannica Encyclopedia of World Religions, Karma i “loa ya se i gat frut blong evri aksen, we i min se samting we man i mekem long laef blong hem naoia bambae i gat paoa long nekis laef blong hem.”—Pej 913.