?I Gat “Seven Sin We Man i Save Ded From”?

Ansa we Baebol i givim

Baebol i no talem stret wan lis blong “seven sin we man i save ded from.” Be Baebol i tijim se sipos man i stap gohed nomo blong mekem ol bigfala sin, bambae God i no save sevem hem. Baebol i tokbaot ol bigfala sin, olsem doti fasin blong seks, wosip blong ol aedol, wok blong ol rabis spirit, faerap long kros, mo fasin drong, se oli “ol wok we oli kamaot long tingting blong man.” Biaen, i talem se: “Olgeta we oli stap mekem ol samting ya, bambae oli no save kasem Kingdom blong God.”—Galesia 5:19-21.a

?Baebol i mekem lis blong ‘seven rabis samting we Masta i no laekem nating’?

Yes, i tru. Folem King James Version, Ol Proveb 6:16 i talem se: “Hemia sikis samting we Masta i no laekem nating: yes, seven rabis samting we hem i no laekem nating.” Be lis blong ol sin long Ol Proveb 6:17-19 i no soemaot olgeta sin we God i no laekem. Hem i soemaot nomo ol defdefren kaen sin we man i save mekem long tingting, toktok, mo aksen blong hem.b

?Wanem mining blong “sin we man i save ded from”?

Long sam Baebol oli yusum tok ya long 1 Jon 5:16. The New American Bible i talem se: “I gat ol sin we man i save ded from.” Narafala rod blong talem tok ya se “sin we i blong ded.” ?Olsem wanem “sin we i blong ded” i defren long sin we “i no blong ded”?—1 Jon 5:16.

Baebol i talemaot klia se evri sin i lidim man i go long ded. Ransom sakrefaes blong Jisas Kraes nomo i save mekem yumi kamfri long sin mo ded. (Rom 5:12; 6:23) Be ransom blong Kraes i no kavremap “sin we i blong ded.” Man we i mekem kaen sin ya i wantem gohed nomo, mo bambae hem i neva jenisim tingting mo fasin blong hem. Baebol i talem tu se man we i mekem kaen sin olsem, “God bambae i no fogivim hem.”—Matiu 12:31; Luk 12:10.