OL YANGFALA OLI ASKEM
?From Wanem Mi Mas Talemaot Evri Samting Long Papa Mo Mama?
?From wanem Papa mo Mama i wantem save evri samting long laef blong mi?
Papa mo mama blong yu i talem se tufala i wari long yu. Be yu yu harem se tufala i stap pusum nus blong tufala long bisnes blong yu. Maet samting olsem i hapen:
Wan yangfala we nem blong hem Erin, i talem se: “Papa i stap tekemaot mobaelfon blong mi, i askem paswod, mo i lukluk ol mesej. Sipos mi no wantem givim mobaelfon, hem i ting se mi stap haedem wan samting.”
Denise, we naoia i gat bitim 20 yia, i tingbaot taem we mama blong hem i stap lukluk bil blong telefon, i se: “Mama i lukluk evri namba mo i askem long mi se namba ya i blong hu mo mi tokbaot wanem long hem.”
Yangfala Kayla i stap raetemdaon sam samting we i no talemaot long ol narafala, long wan buk blong hem. Be hem i talem se mama blong hem i ridim buk ya, i se: “Mi raetemdaon plante filing blong mi long buk ya, mo sam samting long saed blong Mama tu. Afta we Mama i ridim, mi no moa raetem wan samting long buk ya.”
Stamba poen: Wok blong papa mo mama blong yu i blong lukaot gud long yu, mo sipos tufala i strong lelebet long yu, yu no save blokem tufala. Maet yu ting se samtaem tufala i go bitim mak. Be yu save mekem sam samting, blong yu no harem nogud taem tufala i wantem save ol samting we i stap hapen long laef blong yu.
?Yu save mekem wanem?
Talemaot tingting blong yu. Baebol i talem se yumi mas “mekem i stret nomo long olgeta samting.” (Hibru 13:18) Traehad blong mekem olsem long papa mo mama blong yu. Sipos yu no giaman long tufala mo yu talemaot tingting blong yu, ating bambae tufala i no wantem save evri samting long laef blong yu.
Blong tingbaot: Long ol taem we i pas, ?yu yu soemaot long papa mo mama blong yu se tufala i save trastem yu? ?Yu stap lukaot gud blong kamhom long stret taem we Papa mo Mama i talem, o yu kam let oltaem? ?Yu stap haedem ol samting long saed blong ol fren blong yu, o ol samting we yu mekem?
Mi tokbaot ol samting we mi stap mekem long laef blong mi. Mi ansarem evri kwestin we tufala i askem long mi, ale tufala i trastem mi, mo tufala i no stap traem blong faenemaot evri samting long laef blong mi.—Delia.
Gat longfala tingting. Baebol i talem se: “Yufala i mas gohed blong faenemaot se yufala i wanem kaen man.” (2 Korin 13:5) I tekem taem blong soemaot long Papa mo Mama se tufala i save trastem yu, be long en, gudfala frut i save kamaot.
Blong tingbaot: Bifo, papa mo mama blong yu tu i yangfala. ?Yu no ting se hemia nao risen from wanem tufala i wantem save ol samting we i stap hapen long laef blong yu?
“Mi ting se ol papa mo mama oli tingbaot ol mastik we oli mekem bifo, mo oli no wantem se ol yangfala blong olgeta oli mekem ol semfala mastik.”—Daniel.
Traem kasem save filing blong tufala. I gud yu traem kasem save tingting blong papa mo mama blong yu. Baebol i talem se wan gudfala mama “i lukluk gud ol wok we famle blong hem i stap mekem,” mo wan gudfala papa i “tijim o lidim [ol pikinini] folem tingting blong Jehova.” (Ol Proveb 31:27; Efesas 6:4, futnot) I no gat wan isi rod blong mekem ol samting ya, tufala i mas save wanem i stap hapen long laef blong yu.
Blong tingbaot: Sipos yu wan papa o mama we yu save gud tingting blong ol yangfala, ?bambae yu letem boe o gel blong yu i haedem evri samting, we yu no askem wan kwestin nating long hem?
Be naoia we mi mi bigwan finis, mi luksave from wanem tufala i mekem olsem. Tufala i stap soemaot se tufala i lavem yu.”—James.