“Mi Mekem Bes Blong Mi”

Irma blong Jemani i gat klosap 90 yia blong hem. Hem i kasem tu bigfala aksiden mo dokta i katem hem plante taem, taswe hem i no moa save prij long ol haos wanwan. Naoia hem i stap raetem ol leta, blong talemaot bilif blong hem long ol famle mo ol narafala we hem i save olgeta. Ol leta we Irma i raetem oli leftemap tingting blong ol man, taswe plante long olgeta oli ringim hem blong askem wetaem bambae hem i raet bakegen. Plante man oli raet blong talem tangkiu mo blong askem sipos hem i save raet long olgeta bakegen. Irma i talem se: “Samting ya i mekem mi mi glad tumas, mo i mekem se mi save gohed blong prij.”

Irma i stap raetem leta long ol olfala tu. Hem i talem se: “Wan olfala woman i ringim mi blong talem se leta we hem i kasem taem hasban blong hem i ded, i mekem hem i harem gud bakegen. Hem i putum leta ya insaed long Baebol blong hem, mo plante taem hem i ridim bakegen long naet. Wan narafala woman we hasban blong hem tu i jes ded, i talem se leta blong mi i givhan long hem moa i bitim seves we pris i mekem long jos. Hem i askem plante kwestin, mo i wantem kam luk mi.”

Wan woman we Irma i save hem be i no wan Witnes, i muv i go long wan narafala ples, mo i askem long Irma blong raet long hem. Irma i talem se: “Woman ya i putum gud ol leta we mi mi raetem long hem. Afta we hem i ded, gel blong hem i ringim mi, mo i talem se hem i ridim ol leta ya. Hem i askem sipos mi save raet long hem tu blong tokbaot Baebol.”

Irma i laekem tumas wok we hem i mekem blong prij. Hem i se: “Mi plis long Jehova blong i givim paoa long mi blong gohed long wok blong hem. Mi no moa save prij long ol haos wanwan, be mi mekem bes blong mi.”