Talem Long Olgeta Se Yu Lavem Olgeta

Ong-li i wan Witnes blong Jehova long Bulgaria. Hem i mekem Baebol stadi wetem wan yangfala woman we nem blong hem Zlatka, we hasban blong hem i no stadi Baebol. Ong-li i talem se: “Taem mitufala i stap tokbaot haf ya long saed blong famle, mi eksplenem se i impoten we yumi talem long hasban o waef mo ol pikinini blong yumi se yumi lavem olgeta. !Zlatka i harem nogud mo i talem se hem i neva talem long hasban mo smol gel blong hem se hem i lavem tufala!”

Zlatka i talem se: “Mi mi rere blong mekem eni samting from tufala, be mi jes no save talem tok ya. Mama blong mi i neva talem se hem i lavem mi, mo abu woman blong mi tu i neva talem long mama blong mi se i lavem hem.” Ong-li i yusum Baebol blong soemaot long Zlatka se Jehova i talemaot klia se hem i lavem Jisas. (Matiu 3:17) Ong-li i leftemap tingting blong Zlatka blong i prea long Jehova long saed ya, mo blong i traehad blong talem long hasban mo gel blong hem se hem i lavem tufala.

Ong-li i talem se: “Tu dei i pas, Zlatka i glad we i glad blong talem long mi se hem i bin prea long Jehova blong i givhan long hem. Taem hasban blong hem i kambak long haos, Zlatka i talemaot ol samting we hem i lanem long Baebol, se i impoten blong waef i respektem mo i lavem hasban blong hem. !Biaen, hem i stop smol, nao i talem long hasban blong hem se hem i rili lavem hem! !Taem gel blong hem i kambak long haos, Zlatka i putum han blong hem raon long hem mo i talem long hem se hem i lavem hem! Zlatka i talem long mi se: ‘Naoia mi harem gud moa. Long olgeta yia we oli pas, mi mi no naf blong talemaot ol filing blong mi, be Jehova i givhan long mi, mo naoia mi save talemaot long famle blong mi, se mi lavem olgeta.’

Wan wik i pas, mi mitim hasban blong Zlatka mo hem i talem long mi se: ‘Plante man oli talem se Zlatka i no mas stadi Baebol wetem yu, be mi mi luk se taem hem i stadi Baebol, hemia i givhan bigwan long famle blong mifala. Naoia mifala i harem gud moa mo mared blong mitufala i hapi.’”