Tang Blong Smol Pijin Ya Hummingbird

Bifo, ol saentis oli ting se taem hummingbird i dring nekta o wota blong flaoa, hem i pulum wota tru long sam smosmol paep long tang blong hem. Be naoia oli kasem save se hem i yusum wan rod we i moa gud, we oli kolem “fluid trap.”

Tingbaot: Taem hummingbird i pusum tang blong hem blong kasem nekta, tang i split long tu haf olsem wan fok. Long en blong tufala haf ya i gat samting olsem wan smol dren we i save open mo sat. Taem tang i tajem nekta, dren i open, nao pijin i stretem tang blong hem, mo i mekem sem aksen olsem dog taem i dring wota, be i no olsem taem yumi dring wetem wan stro. Taem hem i pulum tang i kambak long maot blong hem, smol dren ya we i fulap long nekta, i sat.

Trifala man blong mekem risej, Alejandro Rico-Guevara, Tai-Hsi Fan, mo Margaret Rubega, i faenemaot se “i no tekem wan seken nating” blong hummingbird i mekem ol samting ya. Mo tu, trifala i talem se: “Taem hem i pusum tang i go long nekta mo i pulum i kambak, . . . en blong tang i stap jenis blong pulum wota i kam long smol dren ya mo satem dren ya.”

Mo tu, smol pijin ya i no nid blong yusum plante paoa blong mekem wok ya. Taem tang blong hem i tajem nekta mo i kamaot, ol wok ya i hapen olsem we i otomatik nomo.

From we tang blong hummingbird i wan gudfala fluid trap, ol saentis oli ting se ol dokta, ol man blong mekem robot, mo sam narafala, oli save yusum ol save ya long wok blong olgeta. Mo tu, maet i givhan long ol man we oli wokem ol tul blong draemap wota o oel we i kafsaed mo i kavremap ples.

?Wanem tingting blong yu? ?Tang blong hummingbird i kamaot olsem nomo, o i gat wan Man we i wokem?