EKSPLENESEN BLONG OL VAS
Jeremaea 29:11—“Mi Save Ol Plan We Mi Mekem Finis Blong Yufala”
“Hemia nao tok blong Jehova,a ‘Mi mi savegud wanem samting we mi stap tingbaot blong givim long yufala. Mi tingbaot blong givim pis long yufala, i no trabol, from we mi mi wantem we yufala i gat wan fiuja mo wan hop.’”—Jeremaea 29:11, New World Translation.
“MASTA i talem se: ‘Mi save ol plan we mi mekem finis blong yufala. Mi wantem we bambae yufala i gat plante samting, trabol bambae i no kasem yufala, mo yufala i gat hop mo stap gud long fiuja.’”—Jeremaea 29:11, New International Version.
Mining Blong Jeremaea 29:11
Jehova God i promes long ol man we oli wosipim hem se bambae hem i givim pis long olgeta long fiuja. Nating se oli raetemdaon ol tok ya longtaem finis, be God i gat sem tingting yet tede. Hem i “God ya we i stap givim hop.” (Rom 15:13) Blong talem stret, hem i mekem se ol man oli raetemdaon ol promes ya long Baebol, blong “yumi save gat hop” blong wan gudfala fiuja.—Rom 15:4.
Ol Vas Raonabaot Long Jeremaea 29:11
Ol tok ya i stap long wan leta we i go long ol man Isrel, we ol ami blong Babilon oli tekemaot olgeta long Jerusalem blong oli go wok slef long Babilon.b (Jeremaea 29:1) God i talem long olgeta se bambae oli stap longtaem long Babilon, mo se oli mas wokem ol haos, planem ol garen, mo gat plante pikinini. (Jeremaea 29:4-9) God i talem tu se: “Bambae yufala i stap long Babilonia gogo kasem seventi yia, mo biaen, bambae mi kam tekemaot yufala, mi tekem yufala i kambak long stret ples blong yufala bakegen [Jerusalem], olsem we mi promes finis long yufala.” (Jeremaea 29:10) Hemia i olsem wan promes se God bambae i no fogetem olgeta, mo se hop blong olgeta blong gobak long ples blong olgeta bambae i kamtru.—Jeremaea 31:16, 17.
God i holem promes ya. Olsem hem i talemaot finis, King Sirus blong Pesia i winim Babilon. (Aesea 45:1, 2; Jeremaea 51:30-32) Nao Sirus i letem ol man Jiu oli gobak long ples blong olgeta. Oli bin wok slef blong 70 yia long Babilon, be biaen oli gobak long Jerusalem.—2 Kronikel 36:20-23; Esra 3:1.
Promes ya blong Jeremaea 29:11 we i kamtru, i leftemap tingting blong olgeta tede we oli putum tingting i stap strong long ol promes blong God long fiuja. Wan long ol promes ya, se Kingdom blong God we Jisas Kraes i king blong hem, bambae i putum pis long fulwol.—Ol Sam 37:10, 11, 29; Aesea 55:11; Matiu 6:10.
Rong Tingting Long Saed Blong Jeremaea 29:11
Rong Tingting: God i gat wan “plan” blong yumi wanwan.
Trutok: God i stap letem ol man wanwan oli jusum rod we oli wantem folem. Ol tok blong hem long Jeremaea 29:11 oli go long grup blong ol man Isrel we oli stap long Babilon, mo hem i wantem se grup ya i stap long pis long fiuja. (Jeremaea 29:4) Be God i letem ol man wanwan oli jusum se oli wantem kasem ol blesing ya we hem i promes o nogat. (Dutronome 30:19, 20; Jeremaea 29:32) Olgeta we oli wantem kam klosap long God, oli prea long hem wetem fulhat blong olgeta.—Jeremaea 29:12, 13.
Rong Tingting: God bambae i givim plante samting long ol man we oli wosipim hem.
Trutok: Ol tok ya “gat plante samting” we i stap long sam Baebol long Jeremaea 29:11, i kamaot long wan Hibru tok we i minim “pis, gud helt, mo harem gud.” Long ol vas raonabaot, God i no promes blong givim mane mo olting long ol man Isrel, be hem i promes blong givim pis mo wan gudfala laef. Bambae oli gohed blong stap olsem wan nesen, mo wan dei bambae oli gobak long Jerusalem.—Jeremaea 29:4-10.
Ridim Jeremaea japta 29 wetem ol not mo refrens blong eksplenem japta ya.
a Jehova i prapa nem blong God.—Ol Sam 83:18, NW.
b Long saed blong Jeremaea 29:11, buk ya The Expositor’s Bible Commentary i talem se: “Hemia wan long ol nambawan promes long Baebol, we i soemaot olsem wanem Yawe [Jehova] i sore mo i kaen long olgeta we oli stap wok slef long Babilon. Hemia i leftemap tingting mo givim hop long olgeta.”—Buk 7, pej 360.