EKSPLENESEN BLONG OL VAS
Jeremaea 11:11—“Bambae Mi Mekem Se Ol Nogud Samting i Hapen Long Olgeta”
“Taswe hemia samting we Jehova i talem, i se: ‘Naoia bambae mi mekem wan trabol i kasem olgeta, mo bambae oli no naf blong ronwe long hem. Taem oli singaot long mi from help, bambae mi no lesin long olgeta.’”—Jeremaea 11:11, Baebol Long Niu Wol Translesen.
“Taswe MASTA i talem se, Yu luk, bambae mi mekem se ol nogud samting i hapen long olgeta, bambae oli no save ronwe; mo nating se oli krae i kam long mi, bambae mi no lesin long olgeta.”—Jeremaea 11:11, King James Version.
Mining blong Jeremaea 11:11
God i stap toktok long ol man Jiu we oli laef long taem blong profet Jeremaea. Ol man ya oli sakemaot ol stret loa blong Jehovaa mo ol gudfala tok we ol profet oli talem blong stretem olgeta. Taswe, Jehova i no save protektem olgeta long ol nogud frut we bambae oli kasem from ol rabis fasin blong olgeta.—Ol Proveb 1:24-32.
“Taswe hemia samting we Jehova i talem.” Tok ya “taswe” i joenem tingting we i stap long vas bifo wetem nekiswan. Long Jeremaea 11:1-10, Jehova i talem long ol man blong hem se oli brekem kontrak o promes we ol olfala bubu blong olgeta oli bin mekem wetem hem. (Eksodas 24:7) Ol Jiu ya oli lego wosip blong Krieta blong olgeta mo oli wosipim ol aedol. From samting ya, oli mekem ol kaen rabis fasin, !mo tu, oli bonem ol pikinini blong olgeta long faea, olsem ol sakrefaes!—Jeremaea 7:31.
“Bambae mi mekem wan trabol i kasem olgeta.” Taem Baebol i talem se God i mekem wan samting, plante taem i min se God i letem samting ya i hapen. ?Olsem wanem hemia i tru long taem blong Jeremaea? Taem ol man blong Jehova oli sakemaot ol loa blong hem mo wosipim ol giaman god, oli pulum plante trabol i kam long olgeta bakegen. Mo tu, God i no moa protektem olgeta. From samting ya, wan enemi we i gat paoa, hemia king blong Babilon, i winim Jerusalem mo i tekem ol man oli go kalabus. Ol giaman god we ol man ya oli trastem, oli no save sevem olgeta.—Jeremaea 11:12; 25:8, 9.
Taem God i letem ol trabol i kasem olgeta, i no hem we i stap mekem i no stret o i nogud long olgeta. Jemes 1:13 i talem se: “Ol samting nogud oli no save traem God, mo tu God i no save yusum ol samting nogud blong traem ol man.” I tru, King James Version i talem se God i “mekem se ol nogud samting i hapen long [ol man Jiu].” Long lanwis blong bifo, tokb we yumi tanem i kam “ol nogud samting” long Jeremaea 11:11, i save minim “bigfala trabol” o “disasta,” mo hemia i soemaot klia ol nogud samting we i mekem ol man Jiu oli safa.
“Taem oli singaot long mi from help, bambae mi no lesin long olgeta.” Jehova i no stap lesin long prea blong olgeta we ‘han blong yufala i fulap long blad,’ o olgeta we oli trastem ol giaman god blong sevem olgeta. (Aesea 1:15; 42:17) Be hem i lesin long prea blong olgeta we oli tanem tingting blong olgeta from ol rabis rod we oli stap folem, oli mekem tingting blong olgeta i stap daon, mo oli kambak long hem.—Aesea 1:16-19; 55:6, 7.
Ol vas raonabaot long Jeremaea 11:11
Long yia 647 B.K.T., Jehova i givim wok long Jeremaea blong talemaot ol profet tok. Ale Jeremaea i gohed 40 yia blong givim woning long ol man Juda long saed blong jajmen we God bambae i mekem. Be oli no lesin. Long taem ya, Jeremaea i raetem ol tok we yumi ridim long Jeremaea 11:11. Long 607 B.K.T., jajmen we hem i talemaot i kamtru, taem ol ami blong Babilon oli spolem gud Jerusalem.—Jeremaea 6:6-8; 39:1, 2, 8, 9.
Be buk blong Jeremaea i givim hop long olgeta tu. Jehova i talem se: “Taem 70 yia blong yufala long Babilon i finis, . . . bambae mi mekem promes blong mi i kamtru, taem mi tekem yufala i kambak long ples ya [kantri blong ol man Jiu].” (Jeremaea 29:10) Jehova i ‘mekem promes blong hem i kamtru’ long 537 B.K.T., afta we ol ami blong Media mo Pesia oli winim Babilon. Jehova i letem ol man blong hem we oli stap olbaot long ol ples we Babilon i bin rul long olgeta, oli kambak long kantri blong olgeta mo stanemap tru wosip bakegen.—2 Kronikel 36:22, 23; Jeremaea 29:14.
Wajem sot video ya blong luk samting we buk blong Jeremaea i tokbaot.
a Long Bislama, yumi yusum Jehova blong talem fo Hibru alfabet we oli minim prapa nem blong God. Blong faenemaot from wanem plante Baebol oli yusum “Masta” long ples blong prapa nem blong God, ridim atikol ya “?Hu Ya Jehova?”
b Ol buk stat long Jenesis kasem Malakae, we plante man oli singaotem se Oltesteman, oli raetem fastaem long Hibru mo Arameik.