Eksodas 20:12—“Yu Mas Ona Long Papa Mo Mama Blong Yu”

“Yu mas ona long papa mo mama blong yu, nao bambae yu save laef longtaem long kantri we God blong yu, Jehova, bambae i givim long yu.”—Eksodas 20:12, New World Translation.

“Yu mas ona long papa mo mama blong yu. Sipos yu folem fasin ya, bambae yu save stap longtaem long kantri ya we God mo MASTA blong yu bambae i givim long yu.”—Eksodas 20:12, King James Version.

Mining Blong Eksodas 20:12

Taem God i talem long ol man Isrel bifo se oli mas ona long papa mo mama blong olgeta, hem i joenem loa ya wetem wan promes we i pulum olgeta blong obei. Nating se ol Kristin oli no moa stap aninit long Loa we God i givim long ol man Isrel, be tingting blong hem i no jenis. Ol tingting blong God we Loa ya i stanap long olgeta, oli stret yet long ol Kristin.—Kolosi 3:20.

Nating se ol pikinini oli yangfala o oli olfala, be taem oli respektem papa mo mama blong olgeta mo obei long olgeta, oli stap ona long olgeta. (Levitikas 19:3; Ol Proveb 1:8) Nating se oli mared finis mo oli gat ol prapa pikinini blong olgeta, be oli gohed blong lavem mo givhan long papa mo mama blong olgeta. Oli meksua se papa mo mama blong olgeta i gat evri samting we tufala i nidim taem oli kam olfala, mo maet oli givhan long tufala long saed blong mane tu.—Matiu 15:4-6; 1 Timoti 5:4, 8.

I gud blong tingbaot se ol pikinini long Isrel bifo oli mas ona long mama tu, i no papa nomo. Hemia i min se oli luksave impoten wok we mama i gat insaed long famle. (Ol Proveb 6:20; 19:26) Ol pikinini tede oli mas mekem sem mak.

Be i gat sam taem we ol pikinini oli no mas ona long papa mo mama blong olgeta. Sipos wan papa mo mama long Isrel bifo o wan narafala man i wantem se pikinini i brekem loa blong God, pikinini i no mas obei. (Dutronome 13:6-8) Tede tu, ol Kristin oli ‘obei long God we i rula blong olgeta, i bitim we oli obei long ol man.’—Ol Wok 5:29.

Long Loa we God i givim long Isrel, hem i promes se ol pikinini we oli ona long papa mo mama blong olgeta, ‘bambae oli stap gud, mo oli save stap longtaem’ long kantri we bambae hem i givim long olgeta. (Dutronome 5:16) Bambae oli no kasem panis we pikinini i save kasem taem hem i kam bigwan, nao i brekem loa blong God, i no obei long papa mo mama blong hem, mo i stronghed tumas. (Dutronome 21:18-21) Ol tingting blong God we loa ya i stanap long olgeta, oli no jenis. (Efesas 6:1-3) Nating se yumi yangfala o yumi olfala, yumi mas talemaot ol fasin blong yumi long God. Olsem God i promes, ol pikinini we oli obei long hem mo papa mo mama blong olgeta, bambae oli stap longtaem, from we oli gat hop blong kasem laef we i no save finis.—1 Timoti 4:8; 6:18, 19.

Ol Vas Raonabaot Long Eksodas 20:12

Yumi lanem samting taem yumi tingbaot ol loa we oli stap bifo mo afta long Eksodas 20:12 long ol Tenkomanmen. (Eksodas 20:1-17) Ol loa bifo long vas ya oli soemaot ol samting we ol man Isrel oli mas mekem long God, olsem wosipim hem nomo. Ol loa afta long vas ya oli soemaot ol samting we oli mas mekem long ol man, olsem stap tru long hasban mo waef blong olgeta, mo oli no mas stil. Taswe loa ya se oli mas “ona long papa mo mama” blong olgeta, i olsem wan brij long medel, we i joenem ol loa ya.