Mitufala i Givhan Blong Mekem Trutok Blong Baebol i Kasem Plante Man

Be papa blong mi i gohed blong askem sipos mi wantem joen long Baebol stadi, ale wan dei mi agri. Mi sapraes blong faenemaot olsem wanem ol tok blong Baebol long saed blong sayens, i tru. Sloslo, mi stat blong bilif se Baebol i Tok blong God, mo se ol Witnes blong Jehova oli stap tijim ol man long trutok mo oli stap folem long laef blong olgeta. Long 1970, mi mi baptaes, hemia long sem dei olsem papa blong mi. Sam yia biaen, Mama mo tufala sista blong mi, olgeta tu oli baptaes.

I luk olsem se ol nara yangfala fren blong mi oli wantem nomo blong mekem lafet mo gat gudtaem. Taem mi gat 17 yia, mi tu mi gat sem tingting. Be mi luk se ol Witnes we oli stadi wetem mi oli glad oltaem long wok blong olgeta blong prij fultaem, mo hemia i mekem se mi wantem joenem olgeta. Ale, taem mi gat 21 yia, mi stat blong prij fultaem.

Mi kasem bigfala glad long wok blong paenia, mo mi harem se mi sud stat bifo finis. Mi laekem tumas blong prij long Göteborg. Long ples ya, mi serem trutok wetem ol boskru blong ol kago sip we oli kam long ol narafala kantri.

Long fifti yia we i pas, mi harem gud blong mekem wan spesel wok, blong gud nius i save goaot long ol man we oli toktok plante defdefren lanwis. Bambae mi tokbaot olsem wanem i stat.

Wok Long MEPS

Wok blong mi i blong jusum wanem kaen leta mo wod we bambae oli luk naes long ol pej, mo rerem olgeta bifo we oli printim buk (typographer). Mi mekem wok ya sam dei nomo evri wik, blong winim mane blong gohed blong paenia. Long taem ya, i gat ol niufala rod blong printim buk i jes kamaot. Oli no moa yusum metal mo led blong mekem ol leta mo pija, be oli yusum ol masin we oli lelebet olsem kamera. Ol masin ya oli tekem foto blong ol toktok mo pija, nao oli putum i go long ol plet we oli yusum long masin blong printim ol buk. Mi lanem blong yusum ol niufala masin ya we oli wok wetem kompiuta, blong rerem ol plet ya.

Long 1980, mi maredem Helene, we i wan fultaem paenia. Mitufala tugeta i laekem blong mitim ol man blong ol defren kantri, mo kasem save long ol narafala kalja. Mitufala i wantem tumas blong go long Skul Blong Gilead mo mekem wok blong misinari.

Be from we mi save gud wok blong printim ol buk, oli singaot mitufala i go wok long Betel long Swiden. Oganaesesen blong Jehova i wantem yusum ol niufala tul mo niufala rod blong givhan long wok blong printim ol buk. Taswe, long 1983, mitufala i go long Betel long Wallkill, New York, blong kasem trening long wan niufala tul we ol brata oli stap wok long hem, hemia MEPS (Multilanguage Electronic Phototypesetting System).a

Mitufala i faenemaot se MEPS i wan program long kompiuta we i yusum ol alfabet mo raeting blong defdefren lanwis, i joenem wetem ol pija, mo i putum evri samting long stret oda long ol pej. Wok blong mitufala i blong putum ol niufala alfabet mo raeting long MEPS, blong oli save printim ol buk mo magasin long plante moa lanwis. !Tede, ol Witnes blong Jehova oli printim ol buk blong talemaot gud nius, long bitim wan taosen lanwis!

Afta we sam taem i pas, oli askem long mi mo Helene blong go long Esia, blong givhan long wok blong ademap sam moa lanwis long MEPS. !Mitufala i harem se i wan bigfala ona blong givhan long wok blong mekem gud nius i goaot long plante moa lanwis!

Wan Fasin Blong Laef We i Defren Olgeta

Long 1986, mi mo Helene i jam long plen blong go long India. !Mitufala i mas lan long wan fasin blong laef we i defren olgeta! Taem mitufala i kasem Bombay we naoia oli kolem Mumbai, mitufala i sek long ol samting raonabaot long mitufala we i defren olgeta long ol samting long Swiden. Long faswan wik, mitufala i wantem nomo blong kambak long kantri blong mitufala.

Be afta long faswan wik ya, mitufala i tingbaot se: ‘Mitufala i bin wantem tumas blong mekem wok blong misinari. Hemia nao stret ples blong mekem wok ya. ?Olsem wanem mitufala i save ronwe? Mitufala i mas winim ol samting we oli had.’

Ale, mitufala i mekem desisen blong traehad blong kasem save fulwan long fasin blong laef long India. Taem mitufala i mekem olsem, mitufala i stat blong laekem India. Biaen. mitufala i lanem tu lanwis blong India, hemia Gujarati mo Punjabi.

Mitufala i Go Long Mianma

Long 1988, mitufala i go long kantri ya Mianma, we raonabaot long hem, i gat Jaena, India, mo Taelan. Politik i strong long Mianma mo ami i rul long bighaf blong kantri ya. Long MEPS i no gat yet ol alfabet blong Mianma, mo i no gat wan narafala program long kompiuta we oli save yusum blong wokem ol alfabet ya. Taswe faswan wok blong mitufala i blong givhan blong raetem ol alfabet, mo karem olgeta oli gobak long Wallkill blong putum long MEPS.

Lon epot, Helene i karem ol alfabet ya long basket blong hem. From ol trabol long saed blong politik, ol gad oli save arestem mitufala sipos oli faenem ol samting we mitufala i raetem long lanwis blong Mianma. Taem oli jekem Helene, hem i leftemap tufala han blong hem i go antap, mo i holem basket long han blong hem. !Be i no gat wan long olgeta i jekem basket!

Ol transleta long Mianma oli no kasem ol alfabet blong olgeta nomo be oli kasem ol kompiuta, ol printa, mo trening long MEPS tu. Bighaf blong ol transleta oli neva luk wan kompiuta, be oli wantem tumas blong lanem ol niufala samting. I no longtaem, oli no moa dipen long ol olfala masin we oli yusum led, mo we ol man nomo oli mekem rere ol toktok mo pija blong printim. Kwiktaem nomo, ol buk blong yumi oli kam gud moa.

Mitufala i Go Long Nepal

Long 1991, mi mo Helene i go givhan long kantri blong Nepal, we i stap long ol bigfala hil blong Himalaya, long saed i go long saot. Long taem ya, i gat wan kongregesen nomo long kantri ya, mo i gat sam buk nomo long lanwis Nepali.

I no longtaem, oli transletem plante moa buk blong givimaot long kantri ya. Tede, i gat samwe long 3,000 Witnes long bitim 40 kongregesen long Nepal, mo long yia 2022, bitim 7,500 man oli kam long miting blong tingbaot ded blong Jisas.

Wan Buk Long Lanwis Lahu

Samwe long 1995, ol misinari long taon ya Chiang Mai, Taelan, oli stat blong prij long ol laen we oli toktok lanwis Lahu. Oli stap antap long ol hil klosap long boda blong Jaena, Laos, Mianma, Taelan, mo Vietnam. I no gat wan buk long lanwis blong olgeta.

Wan yangfala man we i stap stadi wetem ol misinari i tanem buk ya “Look! I Am Making All Things New” we i stap long lanwis blong Taelan, i go long lanwis Lahu. Biaen, hem wetem sam narafala long vilej oli mekem kleksin mo sanem mane mo buk ya i go long branj ofis. Long leta we oli raetem, oli talem se oli wantem we ol man we oli toktok lanwis Lahu, oli harem trutok we olgeta ya oli bin kasem save long hem taem oli ridim buk ya.

Sam yia i pas, nao mi mo Helene i gat bigfala blesing blong trenem olgeta we oli tanem ol buk oli go long lanwis Lahu, blong oli save yusum MEPS. Wan brata we i jes baptaes i stap wok long ofis blong translesen long Chiang Mai. !Mitufala i sapraes taem mitufala i faenemaot se hemia yangfala ya we i bin tanem buk ya “Look!” i go long Lahu!

Long 1995, mi mo Helene i kambak long India. Mitufala i wok wetem ol transleta long branj ofis blong oli gat ol tul long MEPS blong mekem wok blong olgeta. Tede, i gat ol buk long plante lanwis blong India, we oli naf blong halpem ol man blong stadi Baebol mo gohed go kasem baptaes.

Wan Nambawan Laef

Stat long 1999, mi mo Helene i wok long branj ofis long Briten blong givhan long tim long wol hedkwota we oli mekem program blong MEPS. !Mitufala i glad tumas blong stap long London mo prij long ol man we oli toktok lanwis Gujarati mo lanwis Punjabi! Taem i gat wan niufala lanwis i kamaot long jw.org, mitufala i lukaot janis blong prij long ol man long teritori blong mifala we oli toktok lanwis ya.

Mi glad tumas se taem mi yangfala, mi fren gud wetem Jehova i bitim we mi folem olgeta we oli lafet mo gat gudtaem nomo. Taem mi mo Helene i tingting bak, mitufala i no harem nogud long desisen blong mitufala blong mekem wok blong God fultaem. Mitufala i go long bitim 30 kantri, mo luk wetem prapa ae blong mitufala olsem wanem gud nius i stap kasem ol man long evri nesen, laen, mo lanwis.—Revelesen 14:6.