Givhan Long Olgeta We Oli Safa Long Ol Disasta

Long yia 2020, i gat plante disasta, mo sik ya COVID-19 i kasem fulwol. ?Ol Witnes blong Jehova oli mekem wanem blong givhan long olgeta we oli safa from?

Long 2020 sevis yia,a Kodineta Komiti blong Hed Kampani i agri blong spenem bitim 3 bilian vatu,b blong givhan long olgeta we oli safa long bitim 200 defren disasta, olsem sik ya COVID-19, saeklon long ol ples we i hot, wota i kavremap plante ples long Afrika, kakae i sot long Veneswela, mo draetaem long Simbabwe. Presen mane i givhan blong pem kakae, wota, ples blong slip, klos, mo meresin, mo sam narafala samting blong klinim, riperem, mo wokem gud bakegen ol haos. Tingbaot sam eksampol.

COVID-19. Long olgeta ples long wol, pandemik ya i spolem ol Kristin brata mo sista blong yumi long saed blong helt, filing, mo mane. Blong givhan long olgeta, i gat bitim 800 Disasta Rilif Komiti oli stanap long ol defren ples long wol. Ol komiti ya oli kasem save long nid blong ol brata mo sista, nao oli sanem ripot kwiktaem long Kodineta Komiti, blong i save rod we i beswan blong yusum mane blong halpem olgeta.

Long ful yia, ol Disasta Rilif Komiti i givhan long plante blong oli kasem kakae, wota, sop, mo meresin. Long sam ples, komiti ya i wok wetem ol elda blong givhan long ol brata mo sista blong oli kasem help blong gavman.

Ol man we oli no Witnes, oli makem gud wok we yumi mekem blong givgivhan long yumi. Wan eksampol: Field Simwinga, we i distrikejen blong Nakonde, Sambia, i talem long ol brata se: “Mifala i kaon long yufala from ol samting we yufala i karem long stret taem, blong givhan long ol famle we oli gat bigfala nid.”

Kakae i Sot Long Angola. From COVID-19 pandemik, i no gat naf kakae long Angola, mo praes blong evri samting i go antap. I had blong ol brata mo sista oli faenem kakae blong pem.

Branj ofis long Brasil i sanem ol wanwan katon blong kakae long ol brata long Angola. Blong yusum gud ol presen mane, ol brata oli mekem risej blong faenemaot weswan rod i beswan blong pem mo sanemaot ol kakae, nao oli faenemaot se i moagud blong pem plante kakae wantaem. Taswe, praes blong pem mo sanemaot wanwan katon blong kakae long sip, hem i samwe long 2,300 vatu. Insaed long katon, i gat 20 kilo kakae olsem raes, ol bin, mo oel. Kam kasem naoia, oli sanem 33,544 katon long sip, hemia samwe long 654,000 kilo. !Taem ol brata oli ademap hemia long ol kakae we oli gat finis, oli givim kakae long bitim 50,000 man!

?Ol brata oli harem olsem wanem long saed blong ol help ya we oli kasem? Aleksandre, we i stap long wan ples long bus long Angola, i talem se: “Hemia i soemaot long mi se Jehova i lavem mi mo mi no stap mi wan. !Oganaesesen blong Jehova i tinghae long mi!” Wan singel mama, Marisa, i talem se: “Jehova i harem ol krae blong mi. !Mi talem tangkiu long hem mo oganaesesen blong hem.”

Draetaem Long Simbabwe. Long 2020 sevis yia, i gat bigfala draetaem long Simbabwe, we i mekem se plante milian man oli hanggri. Plante taosen Witnes tu oli no gat naf kakae.

Faef Disasta Rilif Komiti i stanap blong givhan long ol brata long saed blong kakae. Plante handred pablisa oli givhan blong fulumap kakae long ol katon, putum long ol trak, mo samfala oli yusum prapa trak blong olgeta blong karem i go long ol brata.c !Long 2020 sevis yia, oli spenem klosap 75 milian vatu blong givim kakae long bitim 22,700 man!

Plante brata oli no moa gat kakae nating, mo taem oli luk se kakae i kam, oli presem Jehova. Samfala oli stat blong singim ol singsing blong Kingdom.

Long wan ples, tu wido we tufala i Witnes, i go joen long wan miting long komuniti blong tufala, blong tokbaot kakae we wan oganaesesen blong wol i stap seremaot. Be taem miting i gohed, oli joenem politik insaed, ale tufala sista i mekem desisen blong no kasem help blong olgeta. Taem tufala i goaot long miting ya, ol man oli jikim tufala, oli se: “!Yutufala i no kam askem kakae long mifala!” Be tu wik biaen, tufala i kasem kakae taem ol brata oli karem kakae i kam long ples blong tufala. !Hemia longtaem bifo we oganaesesen ya i stat blong givimaot kakae!

Ol help we ol brata long Simbabwe i kasem long taem blong disasta, i givim wan gudfala witnes. Traem tingbaot Priska we i stap long wan smol vilej. Nating se hem i kasem trabol from bigfala draetaem ya, be hem i spenem evri Wenesde mo evri Fraede long wok blong prij, mo hemia long taem blong rerem graon blong planem kakae tu. Plante man long vilej oli jikim hem, oli se: “Yu spenem olgeta taem blong yu blong prij, be famle blong yu bambae i hanggri.” Priska i ansa se: “Jehova i neva lego ol man blong hem.” Smoltaem biaen, oganaesesen blong yumi i seremaot kakae long hem. Sam neba blong Priska oli sapraes, oli talem se: “God i no lego yu, taswe mifala i wantem lanem moa long saed blong hem.” Naoia seven neba blong hem oli stap lesin long miting blong kongregesen we i kamaot long radio.

Taem yumi stap kam klosap moa long en, bambae i gat plante moa disasta. (Matiu 24:3, 7) Mifala i talem tangkiu tumas long yufala from presen mane we yufala i givim long gladhat blong yufala, folem ol defren rod long donate.jw.org. Bambae mifala i yusum gud blong givhan long olgeta we oli gat nid, long stret taem we oli nidim.