Halpem Ol Brata Mo Sista Long Fulwol Long Taem Blong Pandemik

Long Maj 2020, Wol Helt Oganaesesen i talemaot se sik ya COVID-19 i kam wan pandemik. Long taem ya, plante long yumi i no tingbaot nating se bitim wan yia biaen, sik ya bambae i gohed yet blong spolem fulwol. Sik ya i mekem trabol long saed blong bodi, filing, mo mane, long plante milian man, we sam long olgeta oli Witnes blong Jehova. ?Olsem wanem ol Witnes oli oganaesem mo sanemaot help we ol brata mo sista oli nidim?

Help Blong Olgeta We Oli Nidim

Komiti Blong Ol Kodineta long Hed Kampani blong ol Witnes blong Jehova, i stanemap bitim 950 Disasta Rilif Komiti (DRK) long fulwol, blong givim help long taem blong COVID-19. Samtaem ol komiti ya oli givhan long ol brata mo sista long eria blong olgeta, mo samtaem ol Witnes oli kasem help we gavman i givim. Ol DRK oli oganaesem ol bigbigfala wok blong givhan long plante kantri.

Traem tingbaot kantri blong Paragwe. Ripot long wan niuspepa i talem se from we pandemik i mekem se ol man oli no gat mane, “plante man Paragwe oli stap hanggri long haos blong olgeta.” Be long taem ya, DRK long Paragwe i stat blong givimaot ol bokis finis we oli gat naf saplae blong tu wik, blong wan famle we i gat fo man long hem. Hemia ol kakae, ol samting blong klinim haos, mo ol samting blong wanwan man olsem sop mo toelet pepa. Ol samting we i stap long wan bokis, praes blong hem i samwe long 3,200 vatu.

?Olsem wanem olgeta we oli givimaot ol samting ya oli protektem olgeta blong oli no kasem COVID-19? Oli werem mask mo oli no go klosap tumas long ol man. Mo tu, oli jekem se ol kampani we oli pem kakae long olgeta, oli kukum long ples we i klin, mo oli folem gud ol rul blong protektem olgeta. Oli meksua se olgeta we oli rerem ol bokis oli kavremap gud bodi blong olgeta, oli klinim ol trak blong olgeta wetem sop we i kilim jem, mo oli storem ol bokis ya long ol ples we oli klinim finis wetem sop blong kilim jem. Mo tu, olgeta we oli givimaot ol bokis, oli lukaot gud blong no go klosap tumas long ol brata we oli kasem ol bokis ya.

Yusum Presen Mane Long Waes Fasin

Long Jenuware 2021, Komiti Blong Ol Kodineta i agri blong spenem bitim 2.7 bilian vatu blong halpem ol brata mo sista long taem blong COVID-19. Ol branj ofis mo ol DRK oli yusum gud ol presen mane ya, mo oli traehad blong faenem praes we i beswan, taem oli pem ol saplae. Wan eksampol, hemia long Jili, we ol brata long DRK oli wantem pem 750 kilo blong bin. !Be praes blong ol bin ya i dabol long wan manis! Tu aoa biaen we oli agri blong pem ol bin ya long praes we i hae moa, man we i salem i talem se wan man we i bin pem sam bin long praes we i daon, i kam givimbak olgeta. Taswe, hem i no moa askem praes we i hae moa long ol brata, be hem i agri blong salem ol bin ya long praes we i daon olsem wan manis bifo.

Be taem ol brata oli go blong karem ol bin ya, man we i salem i traem blong kanselem. Hem i talem se oli olsem ol narafala grup, we oli no givim ol bin long ol man we oli rili nidim, be oli givimaot olbaot nomo. Wan brata i mekem wan kwik prea long tingting blong hem, nao hem i talem long man ya se oli mekem sevei finis long ol kongregesen blong faenemaot hu i rili nidim help. Ol brata oli eksplenem tu se from we oli rerem ol bokis blong ol man blong ol defdefren kalja, oli putum ol samting insaed long ol bokis we i stret long ol wanwan famle. Oli talem tu se oli yusum presen mane nomo, mo ol wok we ol Witnes oli mekem oli no kasem pei from. Man ya i sapraes bigwan, nao i agri blong daonem praes, mo antap long hemia, hem i givim 400 kilo blong bin i fri nomo, long nekis oda we ol brata oli mekem.

“Pruf Blong Trufala Lav”

Long Laeberia, Lusu, wan olfala wido, i stap long sem haos wetem faef famle blong hem. Wan moning, taem oli stap dring ti mo ridim vas blong dei, smol bubu blong Lusu we i gat seven yia nomo, i luk se i no moa gat kakae long haos. Hem i askem se: “?Bambae yumi kakae wanem?” Lusu i talem long hem se hem i prea finis blong askem long Jehova blong i givhan long olgeta, mo hem i gat strong tingting se Jehova bambae i halpem olgeta. Long sem aftenun, ol elda long kongregesen oli ring long Lusu blong talem long hem blong kam karem sam kakae. Lusu i talem se: “Smol bubu blong mi i talem se naoia hem i save se Jehova i harem mo i ansarem prea, from we hem i ansarem prea blong mi.”

Long Demokratik Ripablik blong Kongo, wan woman we i stap long nekis yad long wan famle we oli Witnes, i luk se ol brata mo sista oli stap karem kakae i kam long famle ya, nao hem i talem se: “Afta long pandemik ya, bambae mifala i joenem ol Witnes blong Jehova, from we mifala i luk se oli kea long ol brata mo sista blong olgeta long hadtaem ya.” Hasban blong hem i askem se: “?Bambae yu joenem ol Witnes blong Jehova from wan bag raes nomo?” Hem i ansa se: “Nogat. Be bag raes ya i pruf blong trufala lav.”

From we yufala i gat gladhat blong givim presen mane, ol Witnes blong Jehova oli save givhan kwiktaem long ol brata mo sista we oli nidim help long pandemik ya. Tangkiu tumas long ol presen mane we yufala i givim, folem ol rod we websaet ya donate.jw.org i tokbaot.