Yumi Lukaot Gud Long Ol Haos Kingdom Blong Yumi

Wan yangfala sista long Kolombia we nem blong hem Nicole i talem se: “!Mi laekem tumas Haos Kingdom blong mi! Hem i wan ples we mi save go long hem blong joen wetem ol Kristin brata mo sista.” ?Yu tu yu gat sem tingting olsem Nicole?

Ol Witnes blong Jehova raon long wol oli joen wanples long samwe 63,000 Haos Kingdom. Ol Haos Kingdom oli ol gudfala ples blong wosipim God. Be i no hemia nomo, wan yangfala paenia long Kolombia we nem blong hem David i talem se: “Haos Kingdom blong mifala i pulum ol man blong wantem save ol tijing blong mifala. Plante man oli sapraes taem oli luk se haos wosip blong mifala i luk naes oltaem.” Be samting ya i no hapen olsem nomo. Yumi stap wok had blong klinim mo lukaot gud long ol Haos Kingdom blong yumi. ?Yumi mekem wok ya olsem wanem?

?Yumi Folem Wanem Plan?

Wanwan kongregesen we i yusum wan Haos Kingdom i gat wok ya blong lukaot gud long hem. Blong mekem olsem, ol brata mo sista oli klinim Haos Kingdom oltaem. Mo tu, oli mekem ol wok blong mentenens mo ol smosmol wok blong fiksimap ol samting.

Lokol Disaen/Konstraksen Dipatmen (LDC) i jusum sam brata blong oli trenem ol pablisa long wanwan kongregesen blong oli lukaot gud long Haos Kingdom blong olgeta. Ol brata ya wanwan oli lukaot long sikis kasem ten Haos Kingdom. Oli visitim ol Haos Kingdom ya mo trenem ol pablisa long wanwan kongregesen blong oli save olsem wanem blong mekem mentenens long ol Haos Kingdom blong olgeta. Evri tri yia, oli jekem wanwan Haos Kingdom blong luk sipos i gat sam samting blong fiksimap o sam samting we i save mekem se man i kasem kil.

Ol brata mo sista oli glad tumas long trening we oli kasem long ol brata ya. Wan sista long India we nem blong hem Indhumathi i talem se: “Trening we mifala i kasem i nambawan. Mifala i glad blong lanem olsem wanem blong lukaot gud long Haos Kingdom blong mifala.” Wan brata long Kenia we nem blong hem Evans i talem se: “Mifala i lanem olsem wanem blong fiksimap ol smosmol samting bifo we i kam wan bigfala problem. Long rod ya, mifala i no nid blong spenem tumas mane.”

?Yumi Kasem Mane Wea?

Mane we yumi spenem blong lukaot gud long wan Haos Kingdom i save kasem 10,000 vatu o plante handred taosen vatu long wan yia. Hemia i dipen long hamas kongregesen we i yusum Haos Kingdom ya, ples we Haos Kingdom ya i stap long hem, mo se Haos Kingdom ya i olfala olsem wanem.a ?Yumi kasem mane wea blong lukaot gud long ol Haos Kingdom blong yumi?

Yumi yusum presen mane blong lukaot gud long ol Haos Kingdom blong yumi. Wan brata long Kasakstan we nem blong hem Alexander i eksplenem se: “Mifala i yusum sam presen mane blong pem ol samting olsem intenet, wota, mo laet. Mifala i yusum sam presen mane tu blong pem ol narafala samting we mifala i nidim, olsem ol pepa tawel, ol hanglaf, ol samting blong klinap, mo pent.” Sipos i gat haf presen mane i stap, oli sanem i go blong givhan long wok blong yumi long fulwol. Hemia blong sapotem ol bigfala projek blong mentenens raon long wol.

Ol Bigfala Projek Blong Mentenens

Sipos i nidim blong mekem wan wok blong mentenens we praes blong hem i bitim mane we wan kongregesen i stap spenem long tu o tri manis, ol elda long kongregesen ya oli mas toktok wetem brata we i stap mekem trening blong mentenens. Sipos LDC i agri blong oli mekem projek ya, bambae oli yusum presen mane we i blong sapotem wok long fulwol blong mekem wok ya. Long sevis yia blong 2023, oli mekem 8,793 bigfala projek olsem, mo oli spenem samwe 9,216 milian vatu. Hemia tu long ol projek ya:

Long Angola, wan Haos Kingdom we i stap blong 15 yia finis i gat plante problem. Ol rop blong lektrik oli no moa wok gud, i gat ol krak long ol wol, mo ol neba oli talem se taem i ren wota long Haos Kingdom i stap ron i go long haos blong olgeta. LDC i oganaesem wok blong fiksimap ol problem ya. Oli spenem samwe long 1.1 milian vatu long projek ya. Ol neba oli glad tumas mo oli sapraes long fasin blong yumi blong mekem wok ya.

Long Polan, ruf blong wan Haos Kingdom i stap lik, mo kapet long floa i kam nogud. LDC i agri blong mekem projek ya blong fiksimap ruf mo jenisim kapet. Oli spenem samwe long 1.2 milian vatu long projek ya. Hemia i mekem se blong plante yia bambae oli no nidim blong mekem wan bigfala wok bakegen blong riperem Haos Kingdom ya.

Wok Blong Mentenens i Leftemap Nem Blong Jehova

Wok blong mentenens i givhan blong sevem mane, be i no hemia nomo. Wok ya i givhan tu blong leftemap nem blong Jehova. Wan brata long Tonga we nem blong hem Shaun i talem se: “Wok blong mentenens long ol Haos Kingdom i mekem se yumi save wosipim Jehova long wan ples we i klin, i luk naes, mo ol samting long hem oli wok gud. Hemia i leftemap nem blong Jehova mo i givim wan gudfala witnes long ol man long komuniti. Taswe yumi glad blong singaot ol man blong kam long Haos Kingdom.”

?Yu Save Mekem Wanem Blong Givhan?

Yumi evriwan i save givhan blong klinim mo mekem mentenens long Haos Kingdom blong yumi. Marino, wan brata long Ostrelia we i stap trenem ol narafala blong mekem mentenens, i talem se: “Wok ya blong lukaot gud long ol Haos Kingdom blong yumi i wan nambawan wok we yumi evriwan i save joen long hem. Taem yumi joen long wok ya, yumi stap givhan blong sevem presen mane, nao oganaesesen i save yusum mane ya long ol ples we i gat moa nid.”

Wan brata long India we nem blong hem Joel, i laekem wok ya blong mekem mentenens long Haos Kingdom blong hem. Hem i talem se: “Taem mi wok wetem ol brata mo sista, hemia i mekem mi tingbaot taem ya we bambae yumi evriwan i wok tugeta long niufala wol.” Nicole we yumi tokbaot hem finis, i talem se: “I no longtaem i pas, mi givhan blong mop taem ol brata oli stap fiksimap wan paep blong wota we i lik long batrum. Nating se mi no fiksim paep ya, be wok we mi mekem i givhan blong mekem se i no gat wan i kasem kil.”

Sipos yu yu glad blong givhan blong mekem mentenens long Haos Kingdom blong yu, plis toktok wetem ol elda long kongregesen blong yu. Mo tu, presen mane we yu givim i save givhan long wok blong mentenens long Haos Kingdom blong yu, mo long ol narafala Haos Kingdom raon long wol. Yu save putum presen mane long ol bokis blong presen mane we oli stap long Haos Kingdom blong yu, o yu save go long donate.jw.org. Tangkiu tumas long ol presen mane we yufala i stap givim long gladhat blong yufala.