“Mekem Olgeta Samting Blong Givim Glori Long God”

YUMI givim laef blong yumi finis long God, taswe yumi mas soemaot ol gudfala fasin blong Jehova long ol toktok mo wok blong yumi. Aposol Pol i talem wan rul we i save lidim yumi, i se: “Sipos yufala i stap kakae o yufala i dring, o yufala i stap mekem narafala samting, yufala i mas mekem olgeta samting blong givim glori long God.” (1 Kor. 10:31) Hemia i min se yumi mas folem ol loa blong Jehova, we oli soemaot ol stret fasin blong hem. (Kol. 3:10) Yumi wan grup blong man we i klin mo i tabu, taswe yumi mas folem ol gudfala fasin blong God.—Efes. 5:1, 2.

² Aposol Pita i pulum tingting blong ol Kristin, i se: “Naoia yufala i stap obei olsem ol pikinini blong God, taswe yufala i mas stop blong mekem ol samting we yufala nomo i wantem, olsem we yufala i stap mekem bifo, taem yufala i no save God yet. Be yufala i mas tabu long evri fasin blong yufala, olsem Tabu God ya we i singaot yufala, from we Baebol i talem se: ‘Yufala i mas tabu from we mi mi tabu.’” (1 Pita 1:14-16) Olsem ol man Isrel bifo, olgeta long Kristin kongregesen tede oli mas tabu mo klin. Hemia i min se, oli no mas letem sin mo fasin blong wol ya i mekem olgeta oli kam doti. Oli mas stap klin mo defren long ol narafala man blong oli save mekem tabu wok.—Eks. 20:5.

³ Blong stap klin mo tabu, yumi mas folem ol loa mo ol tingting blong Jehova we Baebol i talemaot klia nomo. (2 Tim. 3:16) Taem yumi stadi Baebol, yumi kasem save long Jehova mo ol fasin blong hem, mo yumi laekem hem. Yumi kasem save se yumi mas obei long Kingdom blong God fastaem. Mo ol samting we Jehova i wantem oli impoten moa i bitim ol narafala samting long laef blong yumi. (Mat. 6:33; Rom 12:2) Taswe, yumi mas jenisim ol fasin blong yumi.—Efes. 4:22-24.

STAP KLIN LONG WOSIP MO FASIN

⁴ Samtaem i no isi blong obei long ol loa blong Jehova. Enemi blong yumi, Setan, i stap wok strong blong pulumaot yumi long trutok. Mo tu, rabis wol ya i save pulum yumi, mo sin we i stap long yumi i mekem i had blong obei. Taswe yumi mas faet agensem ol samting ya, blong yumi holem promes we yumi mekem taem yumi givim laef blong yumi i go long Jehova. Baebol i talem se yumi no mas sapraes taem samfala oli agensem yumi mo sam samting oli traem yumi. Bambae yumi kasem trabol olsem, taem yumi stap traehad blong folem stret fasin. (2 Tim. 3:12) Be yumi save harem gud, from we taem yumi kasem trabol, hemia i soemaot se yumi stap mekem ol samting we God i wantem.—1 Pita 3:14-16; 4:12, 14-16.

⁵ Nating se Jisas i stret gud olgeta, be ol trabol we hem i kasem i tijim hem blong i obei. Taem Setan i traem hem, hem i no foldaon, mo hem i neva wantem kam wan impoten man long wol ya. (Mat. 4:1-11; Jon 6:15) Hem i no gat tingting nating blong lego Jehova mo folem fasin blong wol. From we hem i holemstrong long God, ol man blong wol oli no laekem hem. Be hem i gohed nomo blong folem ol stret fasin blong Jehova. Smoltaem bifo we hem i ded, hem i givim woning long ol man blong hem se ol man blong wol bambae oli no laekem olgeta, bambae oli agensem olgeta. I stat long taem ya, ol man blong Jisas oli kasem plante trabol. Be oli save se Pikinini blong God i winim wol ya, mo samting ya i mekem tingting blong olgeta i strong.—Jon 15:19; 16:33; 17:16.

⁶ Sipos yumi wantem stap defren long ol man blong wol, yumi mas folem ol stret fasin blong Jehova olsem we Jisas i mekem. Yumi no joen long politik mo ol plan blong wol blong mekem laef blong ol man i kamgud moa. Mo yumi mas blokem ol rabis fasin blong wol ya. Yumi tinghevi long ol advaes blong Jemes 1:21 se: “Yufala i mas lego olgeta doti samting mo olgeta rabis fasin, mo yufala i mas stap daon blong letem God i planem tok blong hem insaed long yufala, we i save sevem laef blong yufala.” Oltaem yumi stadi mo yumi go long ol miting blong “letem God i planem tok blong hem” long tingting mo hat blong yumi, nao bambae yumi no moa wantem ol samting blong wol ya. Disaepol Jemes i talem se: “?Yufala i no save se man we i fren gud wetem wol ya, hem i kam badfren blong God? Taswe man we i wantem fren wetem wol, hem i stap mekem hem wan i kam enemi blong God.” (Jem. 4:4) From samting ya, Baebol i givim strong advaes se yumi mas folem ol stret fasin blong Jehova mo yumi mas stap longwe long ol fasin blong wol.

⁷ Baebol i givim woning se yumi no mas mekem rabis fasin mo ol fasin blong sem, i se: “Yufala i no mas tokbaot nating enikaen doti fasin blong seks, mo enikaen doti samting, mo toktok blong yufala i no mas soemaot se yufala i griri, from we i no stret blong ol tabu man oli mekem olsem.” (Efes. 5:3) Taswe yumi no mas letem tingting blong yumi i stap long ol fasin we oli doti, oli blong sem nomo, mo ol rabis fasin, mo yumi no mas tokbaot olgeta. Sipos yumi blokem ol samting ya, yumi soemaot se yumi holemtaet ol klin mo stret fasin blong Jehova.

KLIN LONG BODI

⁸ Ol Kristin oli mas stap klin long wosip mo long fasin blong olgeta. Antap long hemia, oli save se i impoten blong stap klin long bodi. God ya we i tabu mo i klin, i talem long ol man Isrel bifo se oltaem oli mas mekem we ples blong olgeta i klin. Yumi tu, yumi mas klin, nao bambae Jehova “i no luk wan samting we i doti” long yumi.—Dut. 23:14.

⁹ Baebol i joenem fasin blong stap klin long bodi wetem tabu fasin. Pol i raetem se: “Ol gudfala fren. . . . Yumi mas wasemaot ol samting we oli mekem bodi mo tingting blong yumi i kam doti, blong yumi kam tabu moa long fasin ya blong fraet long God.” (2 Kor. 7:1) Taswe, ol Kristin man mo woman oli mas swim oltaem blong mekem bodi blong olgeta i klin, mo oli mas wasem klos blong olgeta. Long sam kantri, maet samting ya i no isi. Be klosap oltaem yumi save gat sop mo wota we i naf blong wasem bodi mo klos blong yumi mo ol pikinini blong yumi.

¹⁰ Ol man long ples blong yumi oli save gud yumi from we yumi stap prij oltaem. Taem haos mo yad blong yumi i stret mo i klin, hemia i givim witnes long olgeta. Evriwan long famle oli save joen blong mekem ples i stap klin. Ol papa oli mas lukaotgud long haos mo yad, from we oli save se sipos ples i klin mo i naes, ol man raonabaot bambae oli gat gudfala tingting long yumi. Taem ol hed blong famle oli mekem wok ya mo oli lidim famle long wosip, oli stap lukaotgud long famle blong olgeta. (1 Tim. 3:4, 12) Ol mama oli mas givhan tu blong mekem ples i stap klin, antap moa, insaed long haos. (Taet. 2:4, 5) Papa mo mama i mas tijim ol pikinini tu blong oli stap klin long bodi mo blong oli klinim mo stretem rum blong olgeta. Olsem nao, evriwan long famle oli wok wanples blong folem ol klin fasin, we bambae yumi nidim blong laef long niufala wol, aninit long rul blong Kingdom blong God.

¹¹ Plante man blong Jehova tede oli yusum trak blong go long miting. Mo long sam ples, i had blong prij sipos i no gat trak. Ol Kristin oli mas lukaotgud long trak blong olgeta blong i klin oltaem mo i rongud. Haos mo trak blong yumi i mas soemaot se ol man blong Jehova oli klin mo oli tabu. Basket blong prij mo Baebol blong yumi tu i mas klin.

¹² Klos mo hea blong yumi i mas stret, olsem we God i wantem. Sipos yumi go luk wan haeman, bambae yumi no putum klos mo mekem hea blong yumi i olbaot. Taem yumi toktok long nem blong Jehova, long wok blong prij o long stej long Haos Kingdom, bambae yumi lukaot moa se klos mo hea blong yumi i stret. Olsem nao, ol man we oli luk yumi bambae oli gat gudfala tingting long wosip blong Jehova. I nogud yumi putum klos we i no stret o klos we i spolem tingting blong narafala. (Maeka 6:8; 1 Kor. 10:31-33; 1 Tim. 2:9, 10) Taswe, taem yumi stap mekemrere blong go prij mo blong go long miting, wan dei asembli, mo bigfala asembli, yumi mas tingbaot ol tok blong Baebol se bodi blong yumi i mas klin mo klos mo hea blong yumi i mas stret. Yumi wantem leftemap nem blong Jehova oltaem mo givim ona long hem.

¹³ Yumi mas folem sem fasin taem yumi go visitim branj ofis blong ol Witnes blong Jehova. Yumi mas tingbaot se nem ya Betel i minim “Haos blong God.” Taswe taem yumi visitim Betel, klos mo ol fasin blong yumi oli mas sem mak olsem we yumi stap go long miting long Haos Kingdom.

¹⁴ Taem yumi mekem samting blong spel mo pleplei, yumi mas lukaot gud se klos mo hea blong yumi i stret. Maet yumi save tingbaot se, ‘?Bambae mi mi glad blong tekem janis blong prij, o bambae mi sem from we klos mo hea blong mi i no stret?’

SPEL MO PLEPLEI

¹⁵ Samtaem, yumi mas spel mo pleplei blong mekem bodi i strong mo blong jenisim tingting. Wan taem, Jisas i tekem ol disaepol blong hem oli go long wan ples we i no gat man, blong oli “save spel smol.” (Mak 6:31) Taem yumi spel smol o pleplei o mekem wan narafala samting we yumi laekem, yumi harem gud long tingting mo bodi. Yumi kasem paoa bakegen blong gohed long wok blong yumi.

¹⁶ I gat plante samting we yumi save mekem blong spel mo pleplei, be ol Kristin oli mas waes blong jusum samting we God i glad long hem. Samtaem i gud blong spel mo pleplei, be hemia i no mas kam bigfala samting long laef blong yumi. Baebol i givim woning se, “long ol las dei” ol man bambae “oli laekem ol samting we oli save harem gud long hem, bitim we oli lavem God.” (2 Tim. 3:1, 4) Bighaf blong ol samting we ol man tede oli mekem blong spel mo pleplei oli no stret, mo olgeta we oli wantem folem ol stret fasin blong Jehova oli no save mekem ol samting ya.

¹⁷ Ol fas Kristin oli no joen long ol rabis pleplei we ol narafala man oli harem gud long olgeta. Long ol bigfala stadium long Rom, sam man oli faet, kilim man i ded, mo mekem rabis fasin blong man wetem woman. Ol narafala man oli harem gud blong pasem taem blong wajem ol samting ya, olsem pleplei nomo. Be ol Kristin oli no joen nating long olgeta. Tede tu, ol pleplei blong wol oli fulap long ol nogud fasin, mo ol man we oli gat rabis tingting oli laekem ol pleplei ya. Taswe yumi “mas lukaot gud” olsem wanem yumi wokbaot, mo yumi no mas joen long ol nogud pleplei blong wol ya. (Efes. 5:15, 16; Sam 11:5) Nating se wan pleplei i gud nomo, be sipos yumi joen wanples wetem ol man blong wol blong wajem pleplei ya, samting ya i save spolem yumi.—1 Pita 4:1-4.

¹⁸ I gat plante gudfala samting we ol Kristin oli save harem gud long olgeta blong spel mo pleplei. Ol tok blong Baebol mo ol gudfala advaes long ol buk blong yumi, oli givhan bigwan.

¹⁹ Samtaem maet wan Kristin famle i singaot narafala famle i kam long haos blong olgeta. Sipos no, maet i gat wan lafet blong mared o wan narafala lafet. (Jon 2:2) Man we i singaot ol narafala oli kam, hem nao i mas meksua se i no gat ol nogud fasin long lafet ya. I klia se, taem i gat plante man oli joen wanples, oli mas lukaotgud. Tingting blong harem gud we i stap long taem olsem, i lidim sam Kristin blong oli brekem ol rul blong stret fasin. Oli kakae mo dring bitim mak, mo samfala oli mekem rabis fasin. Taswe, ol Kristin we oli luksave samting ya oli waes, ale oli singaot sam man nomo, mo tu, oli no letem lafet i go kasem let naet. Sipos i gat strong dring, bambae i smol nomo. (Fil. 4:5) Sipos ol Kristin oli traehad blong mekem ol gudfala lafet we oli leftemap tingting, kakae mo dring i no impoten tumas.

²⁰ I gud tumas blong singaot ol narafala oli kam long haos blong yumi blong kakae, spel, mo storian. (1 Pita 4:9) I gud yumi singaot samfala we oli gat trabol long laef blong olgeta mo oli nidim kampani blong ol narafala. (Luk 14:12-14) Sipos wan Kristin i singaot yumi i kam long haos blong hem, fasin blong yumi i mas laenap wetem ol tok long Mak 12:31. I gud yumi soemaot se yumi glad tumas long kaen fasin blong narafala.

²¹ Ol Kristin oli glad tumas long ol nambawan presen we God i stap givim long olgeta. Oli ‘stap kakae, dring, mo oli glad long ol samting we oli stap hadwok long hem.’ (Pri. 3:12, 13) Sipos evri samting we yumi mekem long lafet i “givim glori long God,” olgeta we oli joen long lafet ya bambae oli tingtingbak long gudfala taem ya. Bambae oli glad from we lafet ya i leftemap tingting blong olgeta blong oli gohed long wok blong God.

OL PIKININI LONG SKUL

²² Ol pikinini blong ol Witnes blong Jehova oli kasem edukesen we oli nidim. Oli skul blong lanem blong rid gud mo raet. Mo plante narafala samting we oli lanem long skul oli save givhan long olgeta blong kasem sam mak long wok blong Jehova. Be long ol yia we oli stap skul, oli mas ‘tingbaot Bigman, God Ya We i Wokem olgeta.’ Hemia i min se oli mas putum wosip blong olgeta fastaem long ol narafala samting.—Pri. 12:1.

²³ Sipos yu yu wan yangfala Kristin we yu stap skul yet, yu no mas spenem tumas taem wetem ol yangfala blong wol. (2 Tim. 3:1, 2) I gat plante samting we yu save mekem blong blokem ol fasin blong wol. Jehova i givim ol samting we yumi nidim blong protektem yumi. (Sam 23:4; 91:1, 2) Taswe yu mas yusum ol samting we Jehova i givim blong protektem yu.—Sam 23:5.

²⁴ Blong stap longwe long ol fasin blong wol, plante yangfala Witnes oli no joen long ol samting we ol narafala yangfala oli mekem afta long ol aoa blong skul. Maet ol yangfala long klas mo ol tija oli no kasem save long desisen ya. Be i moa impoten blong mekem God i glad. Taswe, yu mas lesin long tingting blong yu we yu trenem folem Baebol. Yu no mas joen long fasin blong wol blong traem winim narafala, mo blong leftemap wan kantri se i gud moa i bitim ol narafala kantri. (Gal. 5:19, 26) Sipos yufala ol yangfala i lesin long advaes blong Baebol we papa mo mama blong yufala i givim, mo yufala i joen wetem ol gudfala brata mo sista long kongregesen, bambae yufala i naf blong folem ol stret fasin blong Jehova oltaem.

WOK MO OL FREN

²⁵ Baebol i talem se hed blong famle i mas wok blong kasem ol samting we famle i nidim. (1 Tim. 5:8) Be hem i save se wok blong Kingdom i mas stap fastaem long wok blong winim mane, from we hem i man blong God. (Mat. 6:33; Rom 11:13) Sipos famle i onagud long God mo oli glad long smol kakae mo klos we oli gat, bambae oli no wari tumas, mo oli no foldaon long trap ya blong ronem mane.—1 Tim. 6:6-10.

²⁶ Olgeta Kristin we oli givim laef blong olgeta i go long God, oli mas tingbaot ol rul blong Baebol taem oli wok blong winim mane. Yumi mas folem stret fasin taem yumi wok blong kasem ol samting blong laef we yumi nidim, i min se yumi no save mekem wok we i agensem loa blong God mo loa blong gavman. (Rom 13:1, 2; 1 Kor. 6:9, 10) Yumi mas tingbaot oltaem se sipos yumi joen wetem ol man we oli gat nogud fasin, oli save spolem yumi. Yumi we yumi olsem ol soldia blong Kraes, yumi no joen long enikaen bisnes we i agensem ol stret fasin blong God. Yumi no joen long politik mo faet, mo yumi no mekem ol samting we i save spolem fasin fren blong yumi wetem God. (Aes. 2:4; 2 Tim. 2:4) Mo tu, yumi no mekem enikaen samting we i joen wetem enemi blong God, “Bigfala Babilon.”—Rev. 18:2, 4; 2 Kor. 6:14-17.

²⁷ Yumi joen wanples long ol Kristin miting mo asembli blong mekem wosip long Jehova. Mo yumi kam long tebol blong Jehova blong kasem moa save we i olsem kakae. Yumi no yusum janis ya blong mekem bisnes wetem ol brata mo sista, o blong tokbaot samting we yumi nomo i laekem. Olsem nao, yumi stap folem ol stret fasin blong Jehova. Mo tu, long ol miting ya, yumi stap “leftemap tingting blong [yumi].” (Rom 1:11, 12; Hib. 10:24, 25) Taem yumi joen wanples olsem, i gud yumi storian nomo long ol save blong God mo wosip blong yumi.

OL KRISTIN OLI JOEN GUD

²⁸ Ol man blong Jehova we oli folem ol stret fasin blong hem, oli ‘holemtaet fasin ya we oli wan nomo long spirit, we pis i mekem se oli joen gud.’ (Efes. 4:1-3) Olgeta wanwan oli no mekem samting we olgeta nomo oli wantem, be oli mekem i gud long narafala. (1 Tes. 5:15) Ating yu luk fasin ya long kongregesen blong yu. Nomata se yumi kamaot long wanem kantri, mo wanem kala blong skin blong yumi, nomata sipos famle blong yumi i gat haenem o nogat, yumi gat mane o nogat, be yumi evriwan i folem ol stret fasin blong Jehova. Plante man blong wol tu oli luksave samting ya.—1 Pita 2:12.

²⁹ Aposol Pol i tokbaot sam narafala samting we oli mekem yumi joen gud, i se: “I gat wan hop nomo we God i singaot yufala from, mo long sem fasin i gat wan bodi nomo, wan spirit, wan Masta, wan bilif, wan baptaes, mo i gat wan God mo wan Papa blong olgeta man, mo hem i gat paoa antap long olgeta man, mo hem i yusum olgeta man blong mekem samting, mo paoa blong hem i wok long laef blong olgeta man.” (Efes. 4:4-6) Tok ya i soemaot klia se yumi mas gat wan tingting nomo long ol stamba tijing blong Baebol, mo long ol narafala tijing we oli had moa. Olsem nao, yumi soemaot se yumi luksave hae rul blong Jehova. Tru ya, Jehova i givim klin lanwis blong trutok long ol man blong hem, taswe oli save mekem wok blong hem we solda blong wan i joen long solda blong narawan.—Sef. 3:9.

³⁰ Olgeta we oli wosipim Jehova oli harem gud tumas blong stap insaed long Kristin kongregesen we i joen gud mo i gat pis. Jehova i mekem promes blong hem i kamtru, se: “Bambae mi mekem se oli joen gud, olsem ol sipsip long fenis.” (Maeka 2:12) Yumi mas laef folem ol stret fasin blong Jehova, olsem nao bambae yumi holemtaet pis mo yumi joen gud.

³¹ !Olgeta we Jehova i tekem olgeta oli kam insaed long klin kongregesen blong hem, oli glad! Yumi glad blong lego samting we yumi nomo i wantem, blong yumi holem nem blong Jehova. Taem yumi gohed blong fren gud wetem Jehova, bambae yumi traehad blong folem ol stret fasin blong hem mo blong soemaot long ol narafala se ol fasin ya oli gud tumas.—2 Kor. 3:18.