Ol Yangfala—⁠Mekem Hat Blong Jeova i Glad

¹ Taem wan i yusum paoa mo yangtaem blong hem long stret rod, bambae hem i save haremgud tumas long laef. Waes King Solomon i raetem se: “Yangfala man, yu mas haremgud long yangtaem blong yu. Mo yu mas letem hat blong yu i mekem i gud long yu long ol yia we yu yu yangfala yet.” (Ekles. 11:⁠9) Ol yangfala, bambae yufala i mas talemaot long fes blong God ol samting we yufala i mekem.

² Rod we yu folem long laef blong yu, i save mekem papa mama blong yu i glad no i no glad long yu tu. Proveb 10:1 i talem se: “Wan pikinini we i waes i mekem papa blong hem i glad, be wan pikinini we i krangke i mekem mama blong hem i krae.” Be i impoten moa se, samting we yu mekem long laef blong yu i save mekem Man we i wokem yu, Jeova God, i glad no i no glad. From samting ya, Proveb 27:11 i stap leftemap tingting blong ol yangfala tu se: “Pikinini blong mi, yu mas waes mo yu mekem hat blong mi i glad, blong bambae mi save ansa long hem we i stap jikim mi.” ?Olsem wanem yufala ol yangfala i save mekem hat blong Jeova i glad tede? Samting ya i save kamtru long ol defren rod.

³ Long Wan Gudfala Eksampel: Yufala ol yangfala, yufala i stap kasem ol hadtaem ya we laef blong wol ya ‘i kam strong tumas’ olsem Tok blong God i talem. (2 Tim. 3:1) Maet yu kasem sam traem long ol fren blong yu long skul we oli no gat bilif no maet tija i jikim yu from ol bilif blong yu we oli stanap long Baebol. Eksampel, wan tija i talem se evolusen i tru mo se Baebol i olsem wan kastom store nomo. Be, wan yangfala pablisa long klas ya i stanap strong long saed blong Baebol. Frut i kamaot se, samfala oli stat stadi Baebol. Samfala we oli intres oli stat blong kam long ol miting. Bilif blong yufala ol yangfala brata mo sista i jajem rabis wol ya we i no obei long God mo i save pulum olgeta we oli gat gudfala hat long trutok.—⁠Skelem Hibrus 11:⁠7.

⁴ ?Yu save leftemap tingting blong ol fren blong yu long kongregesen blong olgeta tu oli no mekem samting we i nogud? Taem yu soem wan gudfala eksampel long skul, long haos, mo insaed long kongregesen, yu save mekem bilif blong ol narafala yangfala i kam strong moa. (Rom 1:12) Mekem hat blong Jeova i glad from gudfala eksampel we yu soem long ol narafala.

⁵ Klos Mo Hea: Wan yangfala sista oli jikim hem mo oli singaot hem se “yu no save go kolosap long hem.” Samting ya i no mekem hem i fraet we i foldaon long ol nogud fasin blong wol ya. Long defren fasin hem i eksplenem se hem i wan long ol Wetnes blong Jeova mo we hem i holemtaet ol fasin we wan Wetnes hem i mas gat. ?Yu yu stap stanap strong olsem? ?No yu yu letem ol tingting mo fasin blong wol blong Setan i winim yu? Hem i gud tumas blong luk we plante long yufala ol yangfala, yufala i stap holemtaet ol tijing blong Jeova mo sakemaot ol stael, fasin, ol aedol mo ol tijing blong wol. !Tru ya, olsem yumi lanem long distrik asembli blong yumi i no longtaem i pas, yumi mas luksave we olgeta samting ya blong wol ya oli joen wetem ol wok blong ol rabis speret!—⁠1 Tim. 4:⁠1.

⁶ Jusum Ol Pleplei Mo Spel: Ol papa mama oli mas tingbaot se oli mas halpem ol pikinini blong olgeta blong jusum ol gudfala pleplei mo spel long waes fasin. Wan brata i talem ol gudfala toktok long saed blong wan gudfala famle we hem i laekem tumas. From we oli gat tingting long saed blong speret, papa mama oli stap lidimgud ol pikinini nao samting ya i givhan long famle long taem blong spel tu. Brata ya i talem se: ‘Mi laekem fasin blong olgeta we oli stap mekem ol samting tugeta. I no se papa mama oli stap givhan long ol pikinini blong mekem rere wok blong prij nomo, be long taem blong spel, oli glad blong go wokbaot samples, visitim musium, no jes stap nomo long haos mo pleplei no mekem sam kaen wok. Fasin blong olgeta blong laeklaekem olgeta mo laekem ol narafala i mekem sua se oli save wokbaot long trutok long fyuja nomata wanem samting i kamaot.’

⁷ Yes, i gat taem we olgeta long famle oli no save joen wanples long spel mo ol pleplei. Yufala ol yangfala man i nidim blong save samting ya mo tingbaot se i impoten blong jusumgud ol samting we yufala i mekem long fri taem blong yufala. Setan i wantem pulum plante man, oli go krangke. Ol yangfala mo olgeta we oli no gat ekspiryens olgeta ya nao oli save foldaon kwiktaem long ol trik blong hem mo ol gyaman rod blong hem. (2 Kor. 11:3; Efes. 6:11) Taswe tede Setan i yusum plante defren rod blong pulum yu yu aot long stret rod mo blong ronem wan laef we yu lukaot ol samting we yu wan nomo yu wantem haremgud long olgeta mo we oli no stret.

⁸ Televisin i olsem wan bigfala samting we i pulum ol man, hem i leftemap fasin blong ronem ol sas samting blong wol mo ol rabis fasin long saed blong seks. Ol sinema mo video oltaem i soemaot ol faet mo rabis fasin long saed blong seks. Ol myusek we ol man oli laekem naoia oli stap kam moa nogud mo oli yusum ol doti tok. Ol samting we Setan i yusum blong pulum ol man maet oli luk olsem se oli oraet nomo, be oli trikim finis plante taosen yangfala Kristin blong oli foldaon long rong tingting mo rabis fasin. Blong blokem samting ya, yu mas strong blong mekem stret fasin. (2 Tim. 2:22) Sipos yu nidim blong jenisim sam tingting mo fasin blong yu long saed blong ol pleplei mo spel, ?olsem wanem yu save mekem samting ya? Ol Sam i givim ansa se: ‘Mi mi stap traehad long olgeta tingting blong mi, blong mekem wok blong yu. Plis yu halpem mi, blong mi no lego ol tok we yu yu putum.’—⁠Ol Sam 119:⁠10.

⁹ Plante man tede oli mekem ol spot mo fasin blong ol man blong plei spot no sinema, i olsem wan aedol. Fraet long Jeova i save halpem yu blong blokem fasin blong ona long ol man we oli no stret gud olgeta. Rabis fasin blong seks tu i olsem wan aedol long tingting blong plante tede. Yu save blokem ol fasin ya sipos yu no luk ol rabis buk mo lesin long ol nogud myusek. Long saed blong myusek, Wajtaoa Epril 15, 1993 i talem se: “Myusek hem i wan nambawan presen we i kamaot long God. Be long plante man oli westem tumas taem blong lesin long myusek. . . . Traem putum myusek long prapa ples blong hem mo tingbaot wok blong Jeova fastaem. Lukaotgud mo jusumgud myusek blong yu. Nao bambae yu save yusumgud nambawan presen ya we God i givim.”

¹⁰ Yu mas wokem wan tingting we yu no laekem nating ol samting we oli nogud. (Ol Sam 97:10) Taem i gat traem blong mekem wan nogud samting, traem tingbaot olsem wanem Jeova i tingbaot samting ya mo tingbaot ol samting we i save kamaot from: olsem gat bel be oli no wantem pikinini, ol kaen sik we i kamaot from fasin blong slip olbaot, harem nogud long filing, no moa gat fasin blong respektem yu wan mo lusum ol gudfala wok we yu mekem insaed long kongregesen. Ronwe long fasin ya blong lukluk televisin, sinema, video, lesin long singsing no toktok we i leftemap nogud fasin. Sakemaot fasin joen wetem olgeta we Baebol i soem klia se oli “krangke.” (Prov. 13:19) Lukaotgud long ol samting we yu jusum, jusum blong joen wetem olgeta long kongregesen we oli laekem Jeova mo stret fasin blong hem.

¹¹ Yes, ol yangfala we oli rili wantem mekem hat blong Jeova i glad bambae oli folem gudfala advaes we i stap long Efesas 5:15, 16: “From samting ya, yufala i mas lukaotgud long ol fasin we yufala i stap mekem. Bambae yufala i no mekem fasin blong man we i no gat hed. Yufala i mas mekem fasin blong man we i waes. Yufala i mas yusum evri jans we yufala i kasem blong wokem i gud, from we long taem ya nao, ol fasin nogud oli gat paoa.” ?Wanem samting i save halpem yu blong stap “lukaotgud” olsem wanem yu stap gohed long ol lasdei ya?

¹² Lukaotgud Ol Nid Blong Speret: Long Matyu 5:3, Jisas i talem se: “Olgeta we oli stap lukaot God from we oli no gat paoa, oli save harem gud.” Yu tu yu save glad sipos yu tingbaot ol nid blong yu long saed blong speret. Wan long ol samting we yumi mas mekem blong fulumap nid ya, hemia blong joen fulwan long wok blong talemaot gud nyus, samting ya i stap bildimap bilif blong yumi long ol samting we yumi stap lanem.—⁠Rom 10:⁠17.

¹³ From ekspiryens blong yu, yu save se i no isi blong joen oltaem long wok blong prij. Plante taem samting ya i kamaot from fasin fraet. Taswe, yu nidim strong tingting. Taem yu stap joen oltaem long minista wok, bambae yu gat gudhan moa long wok blong prij, mo bambae yu no moa fraet blong prij.

¹⁴ Mekem ol plan blong prij wetem ol pablisa long kongregesen we oli gat ekspiryens finis, olsem ol fultaem paenia mo ol elda. Lesingud taem oli stap toktok long ol man, mo olsem wanem oli winim ol toktok we ol man oli talem blong blokem yumi. Yusumgud Reasoning buk mo ol advaes long Kingdom Wok Blong Yumi. Bambae i no longtaem, yu save kasem moa glad long minista wok ya from we yu stap givim yu fulwan long Jeova.—⁠Ol Wok 20:⁠35.

¹⁵ Samfala oli bin tekem jans blong prij long skul mo oli bin mekem disaepol long rod ya. (Mat. 28:19, 20) Wan yangfala Kristin i talem se: “Long ol fritaem long klas, mi mi gat plante jans blong prij, antap moa long taem blong spel. Taem mi bin livim ol buk we oli tokbaot Baebol long des blong mi we ol narafala oli save luk olgeta, plante studen we oli intres oli kam storeyan wetem mi.” Biaen, sam studen mo wan tija tu oli stat blong kam long ol Kristin miting. Yes, tija ya i gohedgud, ale hem i givim laef blong hem long Jeova mo i kam wan Wetnes. Jeova i glad tumas taem ol yangfala we oli wosip long hem, olsem yu, oli presem nem blong hem.

¹⁶ Wan narafala rod blong fulumap nid blong yu long saed blong speret, hemia taem yu stadi yu wan. Blong mekem hat blong Jeova i glad, yumi mas kasem save long hem, ol stampa tingting blong hem long saed blong fyuja, mo ol samting we hem i wantem blong yumi mekem. ?Yu yu makemaot wan stret taem blong mekem prapa stadi blong yu wan? ?Yu yu stap stadi oltaem, olsem we yu tekem taem blong kakae oltaem? (Jon 17:⁠3) ?Yu yu gat wan program blong ridim Baebol yu wan antap long program blong Baebol riding long Tiokratik Skul we yu stap traehad blong folem? ?Yu yu stap reregud long ol miting? ?Yu yu stap ridim Wajtaoa mo Wekap! magasin oltaem? Samting we i impoten, ?yu yu tekem taem blong ridim olgeta wanwan haf ya long saed blong “Ol Yangfala Oli Askem . . . ”, mo jekem olgeta vas? Mo yu no mas fogetem buk ya we Sosaeti i prentem speseli blong lukaot long nid blong yufala long saed blong speret, hemia Questions Young People Ask—⁠Answers That Work. Ol yangfala Kristin mo ol papa mama blong olgeta long evri ples long wol oli bin raet i kam blong talem olsem wanem buk ya i bin halpem olgeta blong kam kolosap moa long Jeova.

¹⁷ Taem yu ridim Baebol mo ol tiokratik buk blong stadi Baebol, oli tokbaot Jeova long yu, ol tingting blong hem mo ol stampa tingting blong hem long saed blong fyuja. Tingbaot olsem wanem ol save ya oli save givhan long yu. Tingbaot olsem wanem samting we yu stap ridim i joen wetem ol samting we yu ridim finis. Blong mekem olsem i nidim fasin blong tingting dip. Fasin blong tingting dip i letem ol save i kasem hat blong yu mo pusum yu.—⁠Ol Sam 77:⁠12.

¹⁸ Mifala i glad tumas blong luk ol yangfala we oli luksave nid blong olgeta long saed blong speret, ale oli stap kam long ol miting blong kongregesen. Yufala ol yangfala Kristin, yufala i save leftemap tingting blong ol narafala taem yufala i givim ol gudfala ansa long ol miting. Putum wan mak blong kasem, se bambae yu mas givim wan ansa long evri miting. Traem frengud wetem ol defren man long kongregesen we oli gat ol defren yia, taem yu joengud wetem olgeta bifo mo afta long ol miting. (Hib. 10:24, 25) Wan yangfala brata i talem se papa mama blong hem oli leftemap tingting blong hem blong traem storeyan long wan brata no sista we i olfala moa long evri miting. Naoia hem i glad tumas long ekspiryens we hem i kasem taem hem i joen wetem ol olfala long kongregesen.

¹⁹ Traem Kasem Ol Mak Long Saed Blong Speret: Sore tumas, laef blong plante yangfala i no gat mining mo oli no save wanem rod blong folem. Be, ?yu yu haremgud taem yu putum wan tiokratik mak blong kasem, nao yu gohed gogo yu kasem? Ol mak ya we yu stap kasem wetem help blong save ya we God i tijim yumi long hem, bambae oli mekem yumi haremgud naoia mo bambae oli lidim yumi blong kasem laef blong olwe.—⁠Ekles. 12:1, 13.

²⁰ Taem yufala i wantem putum wan mak blong kasem, prea long saed ya. Toktok wetem papa mama blong yufala mo ol elda. Skelemgud yu wan mo ol samting we yu save mekem, mo putum ol mak we yu yu naf blong kasem stret long ol samting we yu wan yu save mekem, i no blong skelem yu wan wetem narafala. Evriwan i no sem mak—⁠long bodi, tingting, filing, mo long saed blong speret. From samting ya, yu no mas ting se yu save mekem evri samting we wan narafala i save mekem.

²¹ ?Wanem sam mak we yu save traehad blong kasem? Sipos yu no wan pablisa yet, no yu no tekem baptaes yet, i gud blong traem kasem ol mak ya. Sipos yu yu wan pablisa finis, yu save putum wan mak blong kasem wan stret namba blong haoa long minista wok evri wik. Traehad blong kam wan gudfala tija taem yu mekem ol visit bakegen, mo putum wan mak blong traem lidim wan Baebol stadi. Sipos yu wan yangfala we yu stap skul yet be yu baptaes finis, ?from wanem yu no traem kasem mak ya blong mekem haftaem paenia long hot taem? I gat plante wok blong mekem “long ol wok ya blong Masta blong yumi.”—⁠1 Kor. 15:⁠58.

²² Oli Nidim Help Blong Ol Papa Mama: Ol yangfala long kongregesen oli no mas harem se oli stap olgeta nomo long ol samting we oli stap mekem blong kasem laef. Tru long ogenaesesen blong Hem, Jeova i stap givim advaes blong givhan long ol yangfala ya blong mekem ol disisen evri dei mo blong winim ol samting we oli stap blokem olgeta long laef. I tru, ol papa mama we oli givim laef blong olgeta finis long Jeova, oli gat bigfala responsabiliti blong halpem ol pikinini blong olgeta blong mekem ol gudfala disisen. Long 1 Korin 11:3, Baebol i talem se hasban nao i hed blong famle. From samting ya, long wan Kristin famle, we waef i wok wanples wetem papa, papa i mekem bigfala wok blong tijim ol pikinini long ol loa blong God. (Efes. 6:⁠4) Oli mekem olsemia taem oli stap trenemgud ol pikinini blong olgeta stat long taem we oli smol nomo. Long faswan yia blong laef blong pikinini, saes blong bren blong hem i kam tri taem moa bigwan bitim taem we hem i bon, taswe ol papa mama oli no mas ting se pikinini blong olgeta i no naf blong lanem sam samting yet. (2 Tim. 3:15) Taem ol pikinini oli stap kam bigwan, ol papa mama oli mas gohed blong tijim olgeta sloslou blong oli laekem tumas Jeova mo blong oli frengud wetem Hem.

²³ Long “Tijing Blong God” Distrik Asembli, i gat wan tok we nem blong hem “Wok Had Blong Sevem Famle Blong Yu.” Plante advaes oli kamaot blong halpem ol papa mama blong luksave ol rod we oli save yusum blong givhan gud long ol pikinini blong olgeta. Faswan samting, hemia gudfala eksampel we papa mama i soem. Samting ya bambae i mekem moa blong halpem ol pikinini blong yufala long saed blong speret bitim we yufala i spenem plante taem blong toktok wetem olgeta long ol samting we oli mas mekem mo ol samting we oli no mas mekem. Blong soem gudfala eksampel, papa mama i mas soemaot ol frut blong tabu speret long haos, yutufala i mas soem long yutufala mo long ol pikinini blong yutufala. (Gal. 5:22, 23) Plante oli luksave finis long ekspiryens blong olgeta se tabu speret blong God i wan bigfala paoa blong givhan. Hem i save halpem yu blong trenem tingting mo hat blong pikinini blong yu.

²⁴ Mo tu, long asembli oli tokbaot nid blong ol papa mama blong givim wan gudfala eksampel long saed blong prapa stadi blong olgeta wanwan, fasin blong go long ol miting, mo go oltaem long wok blong prij. Sipos yu yu glad blong tokbaot trutok long haos, wokhad long wok blong prij, gat strong tingting blong stadi yu wan, bambae ol samting ya oli pulum ol pikinini blong yu blong rili intres long ol samting long saed blong speret.

²⁵ Taem yu mekem wan famle stadi oltaem we i gat mining, mo yu mekemrere gud, olgeta long famle oli save haremgud long hem, hem i wan taem blong famle i haremgud tugeta. Tekem taem blong kasem hat blong ol pikinini blong yu. (Prov. 23:15) Plante famle oli yusum taem ya blong mekemrere Wajtaoa stadi evri wik, be maet samtaem i gud blong tokbaot wan samting we i stret long nid blong famle. Askem ol kwestin blong faenemaot tingting blong olgeta mo lesingud long ol tok blong evri memba blong famle, samting ya bambae i mekem se yu save ol tingting blong olgeta long famle mo i mekem tingting blong yu i haremgud. I no isi long hed blong famle blong mekem wan stadi we i givhan long evri memba blong famle wanwan. !Be hem i haremgud tumas taem olgeta oli gohed gud long saed blong speret! Sipos hem i mekem se ful famle i joen long stadi, bambae olgeta evriwan oli hapi.

²⁶ Yu nidim blong givim spesel trening long ol pikinini blong yu naoia wetem lav, blong sevem laef blong olgeta. (Prov. 22:⁠6) Taem yumi tingbaot samting ya, i isi blong kasem save se ating wok ya blong tijim olgeta i moa impoten bitim ol narafala tijing we yu givim long laef blong yu. Yu neva mas ting se yu wan nomo yu stap mekem spesel mo impoten wok ya. Lanem blong dipen bigwan long Jeova blong lidim yu blong lukaotgud long ol responsabiliti blong yu long famle. I no hemia nomo. Sam narafala tu oli save givhan.

²⁷ Wanem We Ol Narafala Oli Save Mekem Blong Givhan: Ol elda oli save askem ol yangfala tu blong klinim Haos Kingdom wetem ol papa mama blong olgeta. Leftemap tingting blong ol pikinini long ol miting blong kongregesen. Ol elda mo ol man blong givhan we oli mekem ol tok long Miting blong Kingdom Wok oli mas lukaot ol pikinini we oli stap putum han antap blong ansa long ol haf long miting we oli save ansa long hem. Lukaot ol jans blong yusum ol yangfala we oli soem gudfala eksampel, blong mekem ol pleplei wetem ol papa mama blong olgeta. Yu save askem kwestin long samfala mo oli save givim ol sot ansa.

²⁸ Yu no mas ting nating long fasin traehad blong olgeta. Ol yangfala oli soemaot finis se oli rili stap givhan long kongregesen. From gudfala fasin blong olgeta, plante oli “stap leftemap tok blong God ya we i sevem yumi.” (Taet. 2:6-10) No fogetem blong talem sam gudfala toktok long ol yangfala we oli mekem wan smol samting nomo long miting. Samting ya bambae i pulum olgeta blong mekemrere gud mo wantem joen bakegen long fyuja. Fasin ya blong soem intres long ol yangfala i impoten tumas; i no gat tok blong talem se i impoten olsem wanem. ?Hamas taem yu olsem wan elda no wan man blong givhan yu bin toktok wetem sam yangfala long kongregesen blong leftemap tingting blong olgeta from wan tok no wan pleplei we oli mekem long miting?

²⁹ ?Ol paenia, yufala i save mekem wanem blong givhan? I gud yufala i lukluk program blong yufala bakegen blong luk olsem wanem yu save pulum ol skul pikinini blong joen wetem yufala long ol aftenun mo wiken. ?Yu yu gat positif tingting taem yu tokbaot disisen blong yu blong paenia? ?Yu yu stap soemaot long fes mo fasin blong yu se yu haremgud long minista wok blong yu? ?Yu yu kwik blong pulum ol narafala blong joen long wok ya, antap moa ol yangfala? ?Taem yu stap prij long evri haos wanwan, toktok blong yu i leftemap tingting blong olgeta mo yu stap tokbaot gud saed blong ol samting? Sipos yes, ale yu tu olsem wan paenia yu stap joen long impoten wok ya blong trenem ol yangfala.

³⁰ Olgeta long kongregesen oli mas tingting oltaem long impoten wok ya blong trenem ol yangfala. ?Yu yu save putum wan stret taem blong wok wetem olgeta long wok blong prij? ?Yu yu stap mekem rere fastok wetem olgeta blong rere long wok blong prij long ol haos wanwan? ?Yu yu kwik blong tekem jans blong pulum olgeta blong joen long ol wok long saed blong speret long fyuja, taem yu stap wok wetem olgeta long minista wok? Olgeta pablisa wanwan oli mas tingbaot se wan smol tok nomo i save givim wan positif tingting long yangfala long saed blong ol samting blong speret we hem i wantem mekem long laef blong hem, mo i save givhan long hem blong olwe.

³¹ Ol Yangfala Oli Save Givhan Long Olgeta Bakegen: Ol yangfala, mifala i leftemap tingting blong yufala evriwan blong harem ol tijing blong Jeova mo sakem ol samting we wol i wantem givim long yufala. Skelemgud ol fasin blong yu mo ol dip filing blong yu blong testem yu wan oltaem. ?Wanem tingting blong yu long saed blong Jeova mo ol samting we hem i wantem yu yu mekem long laef blong yu evri dei? ?Yu yu stap traehad blong blokem ol tingting blong Setan oli no gat paoa long yu? (1 Tim. 6:12) Ol man, antap moa ol yangfala, oli wantem se ol narafala yangfala oli laekem olgeta, taswe ?yu faenem se i isi nomo blong oli pulum yu blong folem olgeta blong mekem samting we i nogud? (Eks. 23:⁠2) Aposol Pol i save se i gat plante rod blong pulum yumi blong joen long ol fasin blong wol.—⁠Rom 7:21-23.

³² I nidim strong tingting blong blokem paoa blong wol, blong folem wan rod we i defren long ol yangfala fren blong wol, mo blong obei long ol tijing blong God. Ol olfala blong bifo oli bin mekem olsem mo oli kasem gudfala frut. Tingbaot strong tingting blong Noa. Hem i jajem ful wol from bilif blong hem mo from we hem i stap seraot long ol man nogud long taem blong hem. (Hib. 11:⁠7) Faet strong, mo bambae fasin traehad blong yu i mas karem frut. Yu no mas folem fasin blong ol slak yangfala, we oli no gat strong tingting nating, oli fraet mo folem ol man blong Setan. Long defren fasin, lukaot olgeta we Jeova i glad long olgeta blong joen wetem olgeta. (Fil. 3:17) Joen wetem olgeta we bambae oli stap kolosap long yu gogo yufala i go insaed long nyufala wol we God i promes long hem. (Fil. 1:27) No fogetem se i gat wan rod nomo blong kasem laef we i no save finis.—⁠Mat. 7:13, 14.

³³ !Sipos yumi glad blong luk ol yangfala we oli presem God blong yumi mo givim ona long Hem, tingbaot olsem wanem Hem i glad long olgeta! I klia se Jeova i haremgud tumas blong luk ol yangfala we oli joen fulwan blong talemaot ol bigfala tingting blong hem long saed blong fyuja. Oli olsem “wan presen” we Hem i givim, mo Hem i wantem se oli kasem ol nambawan samting. (Ol Sam 127:3-5; 128:3-6) Jisas Kraes i soemaot sem intres olsem Papa blong hem, hem i glad tumas blong joen wetem ol smol pikinini, hem i tekem taem blong leftemap tingting blong olgeta blong gohed long wosip blong olgeta long Jeova. Hem i soem se hem i laekem olgeta. (Mak 9:36, 37; 10:13-16) ?Yumi gat sem tingting long ol yangfala blong yumi olsem Jeova mo Jisas Kraes tufala i gat? ?Ol yangfala long ol kongregesen blong yumi oli luksave olsem wanem Jeova mo ol enjel oli tingbaot fasin blong olgeta blong holemstrong bilif blong olgeta mo soem gudfala eksampel? Yumi mas toktokgud long olgeta mo leftemap tingting blong olgeta blong mekem Jeova i glad from fasin traehad blong olgeta blong kasem ol mak long saed blong speret. Ol yangfala, traehad blong kasem ol mak we oli save givim blesing long yufala naoia mo long fyuja.