Japta Seven
?Yumi Lanem Wanem From We God i Letem Rabis Fasin i Stap?
1, 2. (a) ?Sipos Jeova i bin hareap blong kilim i ded ol stronghed man ya long Iden, olsem wanem long yumi? (b) ?From we Jeova i gat lav, hem i mekem wanem blong givhan long yumi?
OLFALA man ya Jekob blong bifo i talem se: “Laef blong mi i sotfala nomo, mo oltaem mi stap faenem i strong.” ( Jenesis 47:9) Job i talem sem mak, i se laef blong man “i sotfala nomo, mo i fulap long trabol.” ( Job 14:1) Olsem tufala ya, bighaf blong yumi i bin fesem sam hadtaem long laef, maet narafala i mekem i no stret long yumi, no wan bigfala trabol i kamaot long laef blong yumi. Be yumi no mas ting se God i mekem i no stret long yumi taem hem i letem yumi blong yumi bon long wol ya we i fulap long trabol. I tru se tingting mo bodi blong yumi i no stret gud olgeta olsem Adam mo Iv, mo yumi no laef long wan Paradaes olsem tufala ya i gat fastaem. ?Be olsem wanem sipos Jeova i bin spolem Adam mo Iv wantaem nomo, stret afta we tufala i mekem stronghed? I tru se sipos hem i bin mekem olsem bambae i no gat sik, krae, mo ded. Be bambae i no gat man i laef tu. Bambae i no gat wan long yumi i bon long wol ya. From we God i gat sore, hem i letem taem long Adam mo Iv blong tufala i karem pikinini, nating se ol pikinini ya bambae oli sinman. Ale biaen, Jeova i yusum Kraes blong mekem rod blong yumi kasembak samting ya we Adam i bin lusum—hemia laef we i no save finis long wan paradaes long wol.—Jon 10:10; Rom 5:12.
2 !Yumi glad tumas blong save se bambae yumi laef olwe long wan niufala wol we i Paradaes, we bambae yumi no moa save sik, krae, harem i soa, mo ded, mo i no moa gat rabis man! (Ol Proveb 2:21, 22; Revelesen 21:4, 5) I tru se yumi wantem tumas we Jeova i sevem yumi mo Jeova tu i wantem sevem yumi, be Baebol i soemaot se i gat wan narafala samting we i moa impoten i joen wetem bisnes ya.
From Nem Blong Hem We i Antap Olgeta
3. ?Wanem i joen wetem stamba tingting blong Jeova long saed blong wol ya mo ol man?
3 Stamba tingting blong God long saed blong wol ya mo ol man i joen wetem nem blong hem. Nem ya, Jeova, i minim “Hem i Mekem i Kamaot.” Nem ya i soemaot olgeta wok blong hem olsem Haefala Rula Blong Heven Mo Wol, Man We i Mekem Ol Stamba Tingting Blong Hem i Kamtru, mo God blong trutok. Olgeta laef samting long heven mo long wol oli mas tingbaot hae posisen blong Jeova, mo luksave se sipos oli wantem gat pis mo stap gud, oli nidim blong soem bigfala respek long nem blong hem wetem ol wok we oli joen long nem ya, mo oli mas obei long hem tu.
4. ?Wanem stamba tingting blong Jeova long saed blong wol ya?
4 Afta we Jeova i wokem Adam mo Iv, hem i givim wan wok blong tufala i mekem. Hem i soemaot klia se hem i no wantem nomo se tufala i bos long ful wol. I tru se, tufala i mas mekem paradaes i kavremap wol, be tu, tufala i mas fulumap wol ya wetem ol pikinini blong tufala. ( Jenesis 1:28) ?Be taem tufala ya i sin, olsem wanem nao? ?Stamba tingting blong Jeova bambae i no moa save kamtru? !Sipos plan ya i no kamtru long saed blong wol ya mo ol man, hemia i save sakem doti long nem blong Jeova we i gat olgeta paoa!
5. (a) ?Sipos Adam mo Iv tufala i kakae frut blong tri ya we i soem samting we i gud mo samting we i nogud, wetaem bambae tufala i ded? (b) ?Olsem wanem Jeova i mekem tok blong hem long Jenesis 2:17 i kamtru we long semtaem hem i holem stamba tingting blong hem long saed blong wol ya?
5 Jeova i bin givim woning long Adam mo Iv se sipos tufala i no obei long hem mo tufala i kakae frut blong tri ya we i blong mekem man i save samting we i gud mo samting we i nogud, bambae tufala i ded “long sem dei nomo” we tufala i kakae. ( Jenesis 2:17) Olsem we Jeova i talem, long sem dei ya we tufala i sin, Jeova i tok long tufala mo i talemaot panis blong ded we bambae tufala i kasem. Long lukluk blong God, i olsem we Adam mo Iv tufala i ded long sem dei ya nomo. Be blong mekem stamba tingting blong hem long saed blong wol ya i kamtru, Jeova i letem tufala i karem pikinini bifo we tufala i ded long bodi. Tru ya, God i tingbaot 1,000 yia olsem wan dei nomo, taswe taem Adam i ded we hem i gat 930 yia, i olsem we hem i no laef wan “dei” yet long lukluk blong God. (2 Pita 3:8; Jenesis 5:3-5) Olsemia nao, Jeova i tok tru nomo long saed blong taem we bambae tufala i kasem panis, mo stamba tingting blong hem long saed blong wol ya i no lus taem tufala ya i ded. Be blong smoltaem, God i letem olgeta sin man, wetem ol rabis man tu, oli laef.
6, 7. (a) ?Folem tok blong Eksodas 9:15, 16, from wanem Jeova i letem rabis fasin i gohed blong sam taem? (b) ?Long taem blong Fero, olsem wanem Jeova i soemaot paoa blong Hem mo olsem wanem Hem i mekem ol man oli save long nem blong hem? (c) ?Wanem bambae i kamaot taem rabis wol blong naoia i lus?
6 Samting we Jeova i talem long rula blong Ijip long taem blong Moses i soemaot moa from wanem God i letem rabis fasin i stap. Taem Fero i blokem ol man Isrel blong oli no aot long Ijip, Jeova i no kilim hem i ded wantaem. Jeova i mekem Ten Trabol oli kamaot long kantri blong Ijip, mo ol trabol ya oli soemaot nambawan paoa blong hem. Taem Jeova i talemaot namba seven trabol we bambae i kam, hem i talem long Fero se hem i save kilim Fero mo ol man blong hem oli ded wantaem nomo. Be Jeova i talem se: “Mi wantem soemaot long yu we mi mi gat paoa, nao mi letem yu yu stap laef kam kasem naoia, blong mekem nius blong paoa blong mi bambae i kavremap olgeta ples long wol.”—Eksodas 9:15, 16.
7 Yes, taem Jeova i mekem nesen blong Isrel i gofri, ol man blong plante ples oli tokbaot Jeova. ( Josua 2:1, 9-11) Tede, klosap 3,500 yia biaen, yumi stap tokbaot yet ol wok ya we hem i bin mekem bifo. Ol man oli harem nem blong Jeova, mo tu, oli harem trutok long saed blong Hem we i holem nem ya. Nius ya i mekem i klia se Jeova i wan God we i holem ol promes blong hem mo i tekem aksin blong givhan long ol man blong hem. ( Josua 23:14) Nius ya i soemaot se from we hem i gat olgeta paoa, i no gat wan samting we i save blokem stamba tingting blong hem. (Aesea 14:24, 27) Taswe, yumi save sua se bambae hem i tekem aksin i no longtaem blong givhan long ol gudfala man blong hem. Bambae hem i spolem rabis wol ya blong Setan fulwan. Taem Jeova bambae i soemaot bigfala paoa blong hem mo i leftemap nem blong hem, neva ol man bambae oli save fogetem samting ya. Mo ol blesing we oli kamaot from, bambae oli neva gat en blong olgeta.—Esikel 38:23; Revelesen 19:1, 2.
‘!Waes Blong God i Bitim Mak!’
8. ?Wanem sam poen we Pol i wantem yumi blong tingbaot?
8 Taem aposol Pol i raetem leta i go long ol man Rom, hem i askem kwestin ya: “?Yumi save talem se God i mekem i no stret?” Nao hem i ansa wantaem nomo se: “!Nogat! Hem i mekem i stret nomo.” Nao hem i makem klia se God i gat sore, mo i tokbaot taem ya we Jeova i letem Fero i stap laef mo from wanem hem i no kilim Fero ya i ded. Mo tu, Pol i soem se yumi, yumi olsem graon nomo long han blong wan man blong wokem graonpot. Nao hem i talem se: “[God] i wantem soemaot, we hem i kros tumas long ol man we oli mekem sin [“ol graonpot blong kros,” NW ], we i stret nomo blong oli lus, mo i wantem mekem olgeta oli save we hem i gat paoa. Be from we hem i gat longfala tingting, hem i no kwik blong panisim olgeta. Mo hem i wantem soemaot gudfala laef ya blong hem we i blong heven, we laef ya i gudfala tumas. Nao hem i givim laef ya long yumi ya, we hem i gat sore long yumi [“ol graonpot blong sore,” NW ], mo we hem i mekem yumi rere finis blong kasem laef ya. Yumi ya, hem i singaot yumi finis, we bifo, sam long yumi oli laen blong Isrel, mo sam oli no laen blong Isrel.”—Rom 9:14-24.
9. (a) ?Hu ya ol “graonpot blong kros, we i stret nomo blong oli lus”? (b) ?From wanem Jeova i stap soem longfala tingting taem ol man oli agensem hem, mo olsem wanem ol man we oli lavem hem oli save kasem wan gudfala blesing yet?
9 Stat long taem we fasin rebel i kamaot long Iden, olgeta man we oli agensem Jeova mo ol loa blong hem, oli stap olsem “ol graonpot blong kros, we i stret nomo blong oli lus.” Long olgeta yia biaen long taem ya, Jeova i soemaot longfala tingting. Ol rabis man oli tok jikim ol wok blong Jeova, oli kilim ol man blong hem, mo oli kilim Pikinini blong hem tu i ded. Jeova i blokem kros blong hem bigwan, mo i letem inaf taem i pas blong olgeta laef samting oli luksave fulwan olsem wanem we fasin blong rebel agensem God mo fasin blong man blong rulum hem wan, i karem trabol nomo. Mo tu, ded blong Jisas i givim janis long olgeta man we oli obei blong oli kasem laef, mo i “brekemdaon ol wok we Setan i mekem.”—1 Jon 3:8; Hibrus 2:14, 15.
10. ?Long ol 1,900 yia we oli pas, from wanem Jeova i soem longfala tingting long ol rabis man?
10 Naoia i mekem 1,900 yia finis we Jisas i laef bakegen long ded, mo Jeova i gohed yet blong soem longfala tingting long ol “graonpot blong kros.” Hem i no hareap blong spolem olgeta. ?From wanem hem i no hareap? Wan risen, se hem i stap rerem olgeta we bambae oli rul wetem Jisas Kraes long Kingdom blong hem long heven. Hemia ol 144,000 man, mo olgeta ya oli ol “graonpot blong sore” we aposol Pol i tokbaot. Fastaem, ol man Jiu oli gat janis blong mekemap grup ya we bambae oli go long heven. Be biaen, God i singaot ol man blong ol narafala nesen blong oli joenem grup ya. Jeova i no fosem ol man ya blong oli mekem wok blong hem. Nogat. Be long olgeta man we oli soem tangkiu from ol samting we hem i givim wetem lav, i gat sam we hem i givim blesing ya long olgeta blong oli rul wetem Pikinini blong hem long Kingdom blong heven. Tede, wok blong rerem grup ya klosap i finis fulwan.—Luk 22:29; Revelesen 14:1-4.
11. (a) ?Weswan grup i stap kasem blesing naoia from we Jeova i soem longfala tingting? (b) ?Ol man we oli ded bambae oli kasem wanem blesing?
11 ?Be olsem wanem long ol narafala man we oli laef long wol? From we Jeova i gat longfala tingting, hem i stap hivimap wan ‘bigfala hip man’ we oli kamaot long olgeta nesen. Namba blong bigfala hip ya i kasem plante milian finis. Jeova i promes se grup ya we i blong stap long wol bambae i stap sef taem rabis fasin blong wol ya i lus, mo bambae i save laef olwe long paradaes long wol. (Revelesen 7:9, 10; Ol Sam 37:29; Jon 10:16) Long stret taem we God i jusum, plante dedman bambae oli laef bakegen, mo bambae oli kasem janis blong laef long wol ya aninit long Kingdom we i stap long heven. Long Ol Wok 24:15, Tok Blong God i talem se: “God bambae i mekem olgeta man we oli ded oli laef bakegen, ol man we oli stret, wetem ol man we oli no stret.”—Jon 5:28, 29.
12. (a) ?Yumi lanem wanem long saed blong Jeova from we hem i letem rabis fasin i stap kasem naoia? (b) ?Wanem filing blong yu long saed blong fasin ya we Jeova i folem?
12 ?Yumi save talem se sam long ol plan ya oli no stret? Nogat, from we taem God i holembak jajmen blong ol rabis man ya we oli ol “graonpot blong kros,” hem i stap soem sore long ol narafala man, stret folem stamba tingting blong hem. Hemia i soem se God i gat bigfala sore mo lav. Mo tu, yumi lanem fulap samting long saed blong Jeova from we yumi gat naf taem blong luk olsem wanem stamba tingting blong hem i stap kamtru. Yumi sapraes blong luk ol defdefren fasin we hem i soemaot—stret fasin, sore, longfala tingting, mo waes we i gat plante naranarafala rod blong hem. Waes fasin we Jeova i yusum blong stretem bigfala kwestin ya—long saed blong raet we hem i gat blong rul—bambae i stap olwe olsem wan pruf se fasin blong hem blong rul i nambawan. Yumi save talem sem samting ya we aposol Pol i talem se: “!Olgeta! !Fasin blong God blong givhan long ol man, i gud tumas! !Waes blong hem, mo save blong hem i bigfala tumas, i bitim mak! Yumi no save talemaot olsem wanem hem i jusumaot ol rod blong hem. Yumi no naf blong save ol plan blong hem, se bambae oli kamtru olsem wanem.”—Rom 11:33.
Janis Blong Soem Se Yumi Fasgud Long God
13. ?Taem yumi fesem hadtaem long laef blong yumi, yumi gat janis blong soem wanem, mo wanem bambae i halpem yumi blong tekem disisen we i waes long taem olsem?
13 Plante long ol man blong God oli stap kasem traem we i mekem se oli safa. Olgeta ya oli gohed blong safa from we God i no spolem ol rabis man yet mo i no mekem ol man oli kam fri long sin. ?Samting ya i mekem yumi kros? ?No yumi luk trabol we i kasem yumi olsem wan janis blong pruvum se Devel Setan i man blong giaman? Yumi save gat paoa blong mekem olsem sipos yumi tingbaot tok ya se: “Pikinini blong mi, yu yu mas kam waes. Sipos yu kam waes, bambae mi glad we mi glad, mo sipos man i faerap long mi, be bambae mi gat ansa blong givim long hem.” (Ol Proveb 27:11) Setan hem i man ya we i faerap long Jeova, mo hem i stap talem se sipos ol man oli lusum evri samting no sipos oli harem nogud long bodi, bambae oli blemem God mo maet oli tok nogud long hem tu. ( Job 1:9-11; 2:4, 5) Sipos yumi stap tru long Jeova long taem blong trabol, yumi mekem Hem i glad bigwan, mo yumi soem se tok ya blong Setan i no kamtru long saed blong yumi.
14. ?Sipos yumi dipen long Jeova taem yumi pastru long ol traem, wanem blesing we yumi save kasem?
14 Sipos yumi dipen long Jeova taem yumi fesem wan traem, bambae yumi save wokem ol gudfala fasin. Eksampol, ol samting we oli mekem Jisas i harem nogud bigwan, oli tijim hem “blong obei long God” long fasin we hem i neva save long hem bifo. Yumi tu, yumi save lanem plante samting taem yumi kasem ol traem. Yumi save wokem longfala tingting, fasin blong stanap strong longtaem, mo yumi save gat bigfala tangkiu moa long Jeova from stret fasin blong hem.—Hibrus 5:8, 9; 12:11; Jemes 1:2-4.
15. ?Olsem wanem yumi save givhan long ol narafala, taem yumi stanap strong wetem longfala tingting?
15 Ol narafala man bambae oli wajem samting we yumi mekem. Ol traem we yumi fesem from we yumi lavem stret fasin, bambae oli mekem we sam long ol man ya oli luksave hu ol trufala Kristin tede. Nao sipos oli joen wetem yumi long wosip, oli gat janis tu blong kasem blesing blong laef we i no save finis. (Matiu 25:34-36, 40, 46) Jeova mo Pikinini blong hem oli wantem we olgeta man oli kasem janis ya.
16. ?Olsem wanem fasin we yumi mekem long taem blong trabol, i laenap wetem fasin blong joengud?
16 !Taem yumi kasem hadtaem, i gud tumas sipos yumi tekem janis ya blong soem se yumi fasgud long Jeova mo yumi sapotem hem blong mekem wanem we hem i wantem i kamtru! Fasin ya i pruvum se yumi rili stap joengud moa wetem God mo Kraes. Jisas i prea long Jeova long saed blong ol trufala Kristin, hem i se: “Mi mi no prea from olgeta ya nomo [ol disaepol blong hem long taem ya], mi prea tu from ol man ya we bambae oli save bilif long mi from tok blong olgeta. Mi mi prea, blong olgeta evriwan oli save stap wan nomo. Papa. Laef blong yu i joen gud long laef blong mi, mo laef blong mi i joen gud long laef blong yu. Mo long sem fasin, mi mi prea blong laef blong olgeta ya i save joen gud long laef blong yumitufala, blong oli stap wan nomo.”—Jon 17:20, 21.
17. ?Yumi save sua long wanem samting sipos yumi stap tru long Jeova?
17 Sipos yumi stap tru long Jeova, bambae hem i no holembak ol blesing long yumi. Tok blong hem i talem se: “Yufala i mas stanap strong. Yufala i no mas slak. Oltaem yufala i mas wok strong long ol wok ya blong Masta blong yumi, from we yufala i save finis, se taem yufala i wok blong Masta ya blong yumi, be wok ya bambae i mas gat frut blong hem.” (1 Korin 15:58) Hem i talem tu se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem.” (Hibrus 6:10) Jemes 5:11 i talem se: “From we olgeta oli stap stanap strong longtaem, yumi talem se God i mekem olgeta oli harem gud. Mo yufala i harem finis tok blong fasin blong Job, we hem i mekem tingting blong hem i longfala. Mo yufala i save finis ol samting we Hae God i mekem long hem biaen. Hae God i kaen tumas, mo hem i gat sore long man.” ?Wanem i hapen long Job? “God i mekem hem i kam rijman bakegen, we i givim jenis long hem long olgeta samting we hem i gat fastaem, be i dabolem evriwan.” ( Job 42:10-16) Yes, Jeova i “stap mekem i gud long olgeta we oli stap traem faenem hem.” (Hibrus 11:6) !Tru ya, bambae hem i rili mekem i gud long yumi taem yumi kasem laef we i no save finis long paradaes long wol!
18. ?Wanem bambae i hapen long ol nogud memori we maet yumi gat?
18 Kingdom Blong God bambae i karemaot ol trabol we oli bin spolem ol man blong plante taosen yia finis. Glad we yumi kasem long taem ya bambae i bigwan tumas, bambae i mekem fasin safa we yumi stap kasem tede i luk olsem nating nomo. Bambae tingting blong yumi i no moa trabol from ol hadtaem we yumi gat bifo. Long niufala wol ya, ol gudfala tingting mo wok we ol man oli gat evri dei bambae oli mekem ol nogud memori blong bifo oli lus sloslou, gogo oli finis olgeta. Jeova i talemaot se: “Bambae mi mi mekem niufala heven mo niufala wol bakegen. Ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta. Bambae yufala i glad tumas long ol niufala samting ya we bambae mi mi mekem, mo bambae yufala i harem gud, gogo i no save finis.” Yes, long niufala wol blong Jeova, ol stret man bambae oli save talem se: “Olgeta man long wol oli glad, from we ples blong olgeta i stap kwaet, i gat pis. Nao olgeta man evriwan oli stap sing, from we oli stap harem gud tumas.”—Aesea 14:7; 65:17, 18.
Tingtingbak
• ?Taem Jeova i letem rabis fasin i stap, olsem wanem hem i soem bigfala ona long nem blong hem?
• ?Taem God i soem longfala tingting long ol “graonpot blong kros,” olsem wanem hem i soem sore long yumi evriwan?
• ?Yumi mas traehad blong luksave wanem janis we yumi gat taem yumi kasem hadtaem long laef blong yumi?
[Tok blong pija long pej 67]
Jeova ‘i mekem Job i kam rijman bakegen, be i dabolem evri samting we hem i gat fastaem’