Haf 10
Nambawan Yufala Wol We God Bambae i Mekem
1, 2. ?Wanem bambae i hapen biaen we faet blong Amageden i klinim wol ya?
?WANEM bambae i hapen taem faet blong Amageden i klinim wol finis? Bambae i openem doa long wan nyufala taem mo long glad. Olgeta we bambae oli laef tru long Amageden, we oli pruvum se oli stap obei long rul blong God, bambae oli go insaed long nyufala wol. !Bambae i gat bigfala glad tumas long nyufala taem ya blong histri, we God bambae i mekem plante nambawan samting long famle blong man!
2 Aninit long Kingdom blong God, olgeta we oli stap laef bambae oli wok blong mekem wan paradaes. Bambae oli yusum ful paoa blong olgeta blong mekem ol samting we oli blong givhan long olgeta man we oli stap laef, i no blong givhan long olgeta nomo. Wol ya bambae i stat blong kam wan naes ples blong stap long hem, we i gat pis, we i stretgud long ol man.
Stret Fasin i Tekem Ples Blong Nogud Fasin
3. ?Wanem ol samting ya we oli mekem yumi harem nogud we bambae oli finis kwiktaem biaen long Amageden?
3 Olgeta samting ya oli save kamtru taem bambae wol blong Setan i finis. Ol rod blong mekem man i seraot olsem ol gyaman skul, fasin blong ol sosaeti no ol gavman bambae i no moa gat. Ol man mo ogenaesesen we oli stap leftemap ol tingting blong Setan bambae oli lus wetem wol blong Setan. Traem tingbaot: !Olgeta tingting mo fasin blong Setan we oli gat paoa long wol ya olsem posen, bambae oli finis! !Samting ya bambae i mekem yumi haremgud!
4. Talemaot ol jenis we bambae oli kamaot long fasin blong tijim man.
4 Gudfala tijing we i kam long God bambae i tekem ples blong ol fasin blong spolem we i stanap long rul blong man. “Olgeta pikinini blong yu, bambae Jeova i tijim olgeta, mo pis blong ol pikinini blong yu bambae i fulap.” (Aesea 54:13) From gudfala tijing ya we bambae i gohed long plante yia, “wol ya i fulap tru long save blong Jeova olsem we ol wora oli kavremap solwora.” (Aesea 11:9) Ol man bambae oli no moa lanem blong mekem nogud, be “olgeta man we oli stap long gudfala graon ya, bambae oli lanem stret fasin tru.” (Aesea 26:9) Long taem ya ol tingting mo ol fasin blong man bambae oli gud.—Ol Wok 17:31; Filipae 4:8.
5. ?Wanem bambae i hapen long fasin nogud mo evri man nogud?
5 Olsemia nao, bambae i no moa gat man i kilim man i ded, raf fasin, fasin blong fosem woman, fasin blong stil, mo enikaen fasin blong brekem loa. I no moa gat man i harem nogud from rabis fasin blong ol narafala. Proveb 10:30 i talem se: “Ol stret man ya, bambae i no gat samting i save spolem olgeta blong olwe; be ol man nogud, bambae oli no moa gohed blong stap long wol ya.”
Bodi i Stretgud Olgeta
6, 7. (a) ?Wanem ol strong samting blong naoia we rul blong Kingdom bambae i finisim? (b) ?Olsem wanem Jisas i soemaot samting ya taem hem i bin stap long wol ya?
6 Nyufala wol bambae i tekemaot ol nogud frut blong fasin stronghed we i kamaot fastaem. Wan eksampel, rul blong Kingdom bambae i finisim sik mo fasin blong kam olfala. Naoia, ating bodi blong yu i strong yet be taem yu kam olfala yu save harem nogud, ae blong yu i kam slak, tut blong yu i kam nogud, sora blong yu i no moa opengud, skin blong yu i gat ol mak long hem, insaed long bodi blong yu i kam nogud gogo ded i finisim yu.
7 Yes, kolosap nao ol nogud frut we yumi kasem from faswan papa mama blong yumi bambae oli finis. ?Yufala i tingbaot wanem we Jisas i soemaot long saed blong gudfala bodi taem hem i stap long wol yet? Baebol i talem store ya: “Mo plante man tumas oli kam long hem. Oli tekem olgeta we leg blong olgeta i nogud, mo olgeta we oli blaen, mo olgeta we samting i spolem bodi blong olgeta, mo olgeta we oli no save toktok, mo plante narafala sikman tu, oli kam long hem. Oli tekem olgeta oli kam kolosap long Jisas, nao hem i mekem olgeta oli gud bakegen. Nao ol man we fastaem oli no save toktok, oli save toktok, mo ol man we samting i spolem bodi blong olgeta, bodi blong olgeta i gud bakegen. Ol man we leg blong olgeta i nogud oli save wokbaot gud, mo ol blaenman oli save lukluk. Mo taem ol man oli luk ol samting ya, oli sapraes tumas.”—Matyu 15:30, 31.
8, 9. Talemaot glad we bambae hem i kamaot long nyufala wol taem bambae ol man oli haremgud olgeta long bodi blong olgeta.
8 !Bambae yumi gat bigfala glad long nyufala wol taem ol trabol blong yumi oli finis! Bambae yumi no moa harem nogud long ol sik we i save mekem nogud long laef blong yumi. “Mo bambae i no gat wan man ples we i save talem se: ‘Mi mi sik.’ ” “Long taem ya, ae blong ol blaenman bambae i open, mo sora blong ol man we oli no save harem bambae i no moa fas. Long taem ya, man we i wokbaot nogud bambae i save klaemap olsem wan man dia, mo tang blong man we i no save toktok bambae i singaot from glad blong hem.”—Aesea 33:24; 35:5, 6.
9 ?Yu ting se i gud, taem bambae yu wekap long moning mo yu harem we bodi blong yu i strong? ?Yu ting se i gud blong luk ol man we oli olfala oli kam strong bakegen olsem long yangtaem blong olgeta mo oli kam stretgud olgeta olsem Adam mo Iv fastaem? Baebol i promes long samting ya se: “!Skin blong hem bambae i kamgud bakegen bitim taem we hem i yang, bambae hem i kasem paoa bakegen olsem taem we hem i yangfala!” (Job 33:25) !Bambae yumi glad tumas blong sakem ol glas blong ae, ol samting blong putum long sora blong harem samting, ol stik blong wokbaot, ol wiljea mo ol meresin! !Bambae yumi no moa nidim ol haospetal, ol dokta mo ol man blong fiksimap tut!
10. ?Bambae olsem wanem long ded?
10 Ol man we oli haremgud tumas long bodi blong olgeta bambae oli no moa wantem ded. Yes, olgeta bambae oli no save ded, mo bambae ol man oli no moa harem nogud olsem we oli no stret olgeta from sin mo ded we yumi kasem long faswan papa mama blong yumi bambae i no moa gat paoa long yumi. “Kraes i mas stap king fastaem, gogo God i winim olgeta enemi blong Kraes, i putum olgeta oli stap daon, aninit long leg blong Kraes. Mo laswan blong ol enemi ya we God bambae i winim olgeta, hemia samting ya ded.” “Presen we God i stap givim i go nomo long ol man, hemia laef ya we i no save finis.”—1 Korin 15:25, 26; Rom 6:23; lukluk tu Aesea 25:8.
11. ?Olsem wanem Revelesen i soemaot ol gudfala samting blong nyufala wol?
11 Long saed blong ol gudfala samting we God ya we i kea long yumi bambae i mekem long famle blong man long Paradaes, las buk blong Baebol i talem se: “Hem [God] bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”—Revelesen 21:3, 4.
Ol Dedman Oli Laef Bakegen
12. ?Olsem wanem Jisas i soemaot paoa ya we God i givim long hem blong mekem olgeta man i laef bakegen long ded?
12 Jisas i mekem ol sikman mo olgeta we leg blong olgeta i nogud oli kamgud bakegen, be hem i go moa tu. Hem i mekem ol man oli aot long beregraon tu. Hem i soemaot nambawan paoa ya we God i givim long hem, taem hem i mekem ol dedman oli laef bakegen. ?Yu tingbaot store ya we Jisas i go long haos blong wan man we pikinini gel blong hem i ded? Jisas i talem long smol gel ya we i ded se: “!Smol gel, yu girap!” ?Wanem i hapen nao? “Nao wantaem nomo, gel ya i stanap, i wokbaot.” Taem olgeta i luk samting ya, olgeta man “oli sapraes tumas.” !Glad blong olgeta i bitim mak!—Mak 5:41, 42; lukluk tu Luk 7:11-16; Jon 11:1-45.
13. ?Ol wanem kaen man bambae oli laef bakegen?
13 Long nyufala wol, “bambae ol dedman oli girap bakegen, ol stret man, wetem olgeta we oli no stret.” (Ol Wok 24:15, NW) Long taem ya, Jisas bambae i yusum paoa ya we God i givim long hem blong mekem ol man oli laef bakegen, olsem we hem i talem i se: “Stampa blong laef bakegen long ded, mi ya. Stampa blong laef, mi ya. Man we i bilif long mi, nating we bambae i ded, hem bambae i mas laef.” (Jon 11:25) Hem i talem ol tok ya tu: “Ol dedman we oli stap long beregraon [long tingting blong God], bambae oli harem voes blong mi [Jisas], nao bambae oli aot long beregraon.”—Jon 5:28, 29.
14. ?From we bambae ded i no moa stap, wanem samting tu bambae i finis?
14 !Bambae i gat wan bigfala glad tumas i kavremap wol taem ol grup wanwan, oli laef bakegen blong luk ol fren mo famle blong olgeta we oli laekem olgeta tumas! Ol man we oli stap laef long taem ya bambae oli no moa harem nogud long ol ded mesej. Bambae i defren olgeta, ating bambae i gat ol mesej blong talemaot nem blong ol man we oli jes girap oli laef bakegen blong mekem olgeta we oli laekem olgeta ya oli glad tumas. Olsemia nao, bambae i no moa gat taem blong berem man, ol wud blong bonem dedbodi, bambae i no moa gat ol spesel haos blong bonem bodi blong ol dedman mo i no moa gat beregraon!
Wan Wol We i Gat Trufala Pis
15. ?Olsem wanem profet tok blong Maeka bambae i kamtru fulwan?
15 Olgeta laef samting bambae oli gat trufala pis. Ol faet mo ol man we oli leftemap fasin blong faet, ol faktri blong mekem tul blong faet bambae oli samting blong bifo. ?From wanem i olsem? From we fasin blong tingbaot kantri, velej mo kala blong man, we oli stampa rod blong mekem man i seraot, bambae oli lus. Long taem ya bambae tok ya i kamtru fulwan se: “Bambae olgeta oli no leftemap naef blong faet, wan nesen agens long narafala nesen, mo bambae oli no moa lanem fasin blong faet.”—Maeka 4:3.
16. ?Olsem wanem God bambae i mekem we i no moa gat faet?
16 Ating promes ya i wan sapraes taem yumi tingbaot histri blong man, wetem ol faet mo ol blad we oli ron. Be samting ya i kamaot from we ol man oli stap aninit long paoa blong man mo blong ol devel. Long nyufala wol, aninit long rul blong kingdom, hemia samting we bambae i hapen: “Yufala i kam, yufala i luk ol samting ya we Hae God i mekem. . . . Hem i stap mekem ol faet oli finis long olgeta ples long wol. Hem i stap brekem ol bonara, i stap spolem ol spia, mo i stap bonem ol sil long faea.”—Ol Sam 46:8, 9.
17, 18. ?Long nyufala wol, bambae olsem wanem long ol man mo ol anamol?
17 Olgeta man bambae oli stap long pis tu wetem ol anamol, olsem long garen blong Iden. (Jenesis 1:28; 2:19) God i promes se: “Tru ya, long taem ya, bambae mi mekem wan kontrak wetem olgeta, hemia ol wael anamol blong bus, mo ol pijin we oli stap flae long skae, mo ol anamol we oli stap wokbaot long graon ya, mo . . . bambae mi mi mekem olgeta oli slip kwaet.”—Hosea 2:18.
18 ?Pis ya bambae i bigwan olsem wanem? “Wael dog bambae i stap smoltaem wetem smol sipsip, mo bambae lepad i slip kolosap long pikinini blong nani, mo pikinini blong buluk mo yangfala laeon mo anamol we i fatfat gud, bambae oli stap tugeta. Mo wan smol boe nomo bambae i lidim olgeta.” Bambae i no moa gat anamol we oli mekem trabol long man mo long ol narafala anamol tu. Mo tu, “bambae laeon i kakae drae gras, olsem buluk.”—Aesea 11:6-9; 65:25.
Wol Ya i Kam Paradaes
19. ?Bambae wol ya i jenis i kam olsem wanem?
19 Ful wol bambae i kam paradaes blong bambae ol man oli stap long hem. From samting ya, Jisas i bin promes long wan man we i bilif long hem se: “Bambae yu yu stap wetem mi long paradaes.” Baebol i talem se: “Bambae ples nating mo drae ples oli harem gud, mo level ples we i drae bambae i glad olsem we gras ya safran i putum flaoa blong hem. . . . From we long drae ples bambae ol wora oli kamaot, mo ol krik tu oli kamaot long ol level ples we oli drae bifo.”—Luk 23:43; Aesea 35:1, 6.
20. ?From wanem hanggri i no moa save mekem man i harem nogud?
20 Aninit long Kingdom blong God, bambae yumi no moa luk ol milyan man we oli harem nogud from oli no gat kakae. “Yu mekem we bambae i gat plante kakae long ples ya, we ol hil oli fulapgud long ol kakae.” “Tri blong ol garen bambae i givim frut blong hem mo graon bambae i mekem ol samting oli gru, mo tru ya olgeta bambae oli stap long sef ples long graon ya.”—Ol Sam 72:16; Esikel 34:27.
21. ?Bambae olsem wanem long olgeta man we oli no gat haos, ol haos we i olbaot mo ol ples we fasin blong brekem loa i kam antap?
21 Bambae i no moa gat fasin pua, ol man we oli no gat haos, ol haos we oli olbaot no ol ples we fasin blong brekem loa i spolem. “Mo tru, ol man bambae oli wokem ol haos, mo bambae oli save stap long hem. Mo bambae oli planem rop ya we oli mekem waen long frut blong hem mo bambae oli kakae frut blong hem. Bambae oli no wokem haos blong narafala man i stap long hem. Mo bambae oli no planem garen blong narafala man i kakae frut blong hem.” “Bambae oli sidaon, wanwan, aninit long rop blong frut we oli wokem waen long hem mo aninit long figtri blong olgeta. Bambae i no gat wan samting we i mekem olgeta oli seksek.”—Aesea 65:21, 22; Maeka 4:4.
22. ?Olsem wanem Baebol i soemaot ol blesing we bambae rul blong God i mekem?
22 Olgeta samting ya, mo ol narafala tu, bambae oli stap long Paradaes, yes bambae i gat plante blesing long ol man. Ol Sam 145:16 hem i talem se: “Yu [God] stap givim plante kakae long olgeta we oli hanggri, yu stap mekem olgeta evriwan oli harem gud.” Yumi no sapraes taem profet tok blong Baebol i talem se: “Ol man we tingting blong olgeta i stap daon, bambae oli tekem graon ya i blong olgeta. Bambae oli harem gud, . . . Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:11, 29.
Ol Samting Blong Bifo Oli Lus
23. ?Olsem wanem Kingdom blong God bambae i finisim ol trabol we ol man oli bin kasem?
23 Rul blong Kingdom blong God bambae i finisim ol trabol we famle blong man i kasem long ol sikis taosen yia we i pas finis. Ol glad long taem ya bambae i mekem ol man oli haremgud tumas, ol trabol we oli bin kasem bifo bambae i olsem nating nomo. Fasin blong tingtingbak long ol trabol blong bifo bambae oli no moa kambak blong spolem laef blong man. Long taem ya ol tingting mo ol gudfala wok we man bambae i haremgud long hem evri dei bambae i blokem man blong hem i no moa tingbaot ol trabol blong bifo.
24, 25. (a) ?Aesea i talem wanem we bambae i hapen? (b) ?From wanem yumi sua se fasin blong tingbaot ol samting blong bifo bambae i finis?
24 God, we i kea long yumi, i talem se: “Mi mi wokem nyufala heven [wan nyufala gavman blong ol man long heven] mo nyufala wol [wan sosaeti blong man we i stret]. Mo bambae yufala i no moa tingtingbak long ol olfala samting, mo bambae oli no moa girap long hat blong yufala. Be yufala i mas harem gud, yufala i mas glad blong olwe from ol samting we mi mi stap wokem.” “Olgeta ples blong wol oli stat blong spel, i no moa gat noes long wol. Olgeta man oli singaot from we oli glad.”—Aesea 14:7; 65:17, 18.
25 Olsemia nao, tru long Kingdom blong hem, God bambae i mekem fasin nogud ya we i stap longtaem bifo i kamgud fulwan. God bambae i soemaot blong olwe se hem i kea long yumi, bambae i givim plante blesing blong kavremap ol trabol we yumi kasem bifo. Ol trabol we yumi kasem bifo bambae oli finis kwiktaem olsem wan samting we yumi tingbaot smoltaem, yes bambae yumi no moa tingbaot.
26. ?From wanem God bambae i finisim ol trabol blong yumi blong bifo?
26 God bambae i mekem olsemia nao blong finisim ol trabol we yumi kasem long wol long taem blong yumi. Hem i save se i no rong blong yumi we yumi no stretgud olgeta taem yumi bon, from we yumi kamaot long laen blong faswan papa mama blong yumi we tufala i no stret olgeta. I no rong blong yumi we yumi bon long wan wol we Setan i bos long hem from we sipos Adam mo Iv tufala i stap tru long God, bambae yumi bon long wan paradaes. From we hem i sore bigwan long yumi, God bambae i stretem ol trabol we yumi bin kasem bifo.
27. ?Wanem ol gudfala profet tok ya we bambae oli kamtru long nyufala wol?
27 Long nyufala wol ya, olgeta man bambae oli kasem fasin fri ya we Rom 8:21, 22 i talem: “Olgeta samting ya we God i mekem oli stap panis, from we oli stap rotin nomo. Be long dei ya we God bambae i mekem ol pikinini blong hem oli fri olgeta long sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem. Yumi save finis, we i kam kasem naoia, olgeta samting ya we God i mekem i stap krae, from we olgeta i stap harem nogud.” Olgeta man bambae oli luk we prea ya bambae i kamtru fulwan: “Yu mekem kingdom blong yu i kam. Yu mekem ol samting we yu yu wantem oli kamaot long wol, olsem we oli kamaot finis long heven.” (Matyu 6:10, NW) Ol gudfala samting we bambae oli kamaot long wol ya bambae oli pija blong ol samting we oli stap long heven.
[Tok blong pija long pej 23]
Long nyufala wol, ol man we oli olfala bambae oli gat paoa bakegen olsem taem oli yangfala
[Tok blong pija long pej 24]
Sik mo ol samting we i mekem man i harem nogud bambae i no moa stap long nyufala wol
[Tok blong pija long pej 25]
Long nyufala wol, ol dedman bambae oli laef bakegen
[Tok blong pija long pej 26]
“Bambae oli no moa lanem fasin blong faet”
[Tok blong pija long pej 27]
Olgeta man mo ol anamol bambae oli stap long pis long Paradaes
[Tok blong pija long pej 27]
‘God i openem han blong hem, nao hem i mekem we olgeta samting we oli laef oli harem gud, from we oli kasem ol samting we oli wantem tumas’
[Tok blong pija long pej 28]
Kingdom blong God bambae i mekem ol trabol we yumi bin kasem bifo oli olsem nating nomo