Japta Ten
Wan Kingdom We “Bambae i No Save Finis”
1. ?Ol samting we oli hapen long histri blong man longtaem finis i kam, oli soemaot wanem tok we i tru?
OL SAMTING we oli hapen long wol evri dei oli pruvum se ol man oli no faenem glad taem oli sakemaot rul blong Jeova mo oli traem rulum olgeta nomo. I no gat wan gavman we i save mekem i gud long evri man, mo mekem i sem mak long olgeta man. Nating se ol sayentis oli gat moa save i bitim bifo, oli no naf yet blong finisim sik mo ded. Rul blong man i no finisim ol wo, raf fasin, ol man blong brekem loa, kruked fasin, mo fasin pua. Long plante ples, gavman i mekem i strong yet long ol man. (Prija 8:9) Ol niufala wei we man i faenem blong wokem ol samting, mo fasin griri wetem fasin ya we man i sot long save, i mekem se ol man oli stap sakem doti long graon, wota, mo win. Ol haeman we oli no yusumgud mane blong ol kantri, oli mekem i had long plante man blong kasem evri samting we oli nidim blong laef. Ol taosen yia we man i rulum wol finis oli soemaot se tok ya i tru tumas: ‘I no gat man i save wanem samting bambae i kamtru long laef blong hem, mo i no gat man i save kam bos long laef blong hem.’—Jeremaea 10:23.
2. ?Wanem wan samting nomo we i save stretem ol problem blong man?
2 ?Wanem i save stretem problem ya? Hemia Kingdom Blong God, we Jisas i tijim ol man blong hem blong prea from, i se: “Letem kingdom blong yu i kam. Mekem ol samting we yu yu wantem oli kamaot long wol, olsem we oli kamaot finis long heven.” (Matiu 6:9, 10, NW ) Seken Pita 3:13 i tokbaot Kingdom Blong God long heven se i olsem “niufala skae.” Bambae hem i rul antap long “niufala wol,” we i minim ol man we oli gat stret fasin. Kingdom Blong God long heven i impoten tumas, taswe taem Jisas i prij hem i tokbaot Kingdom ya plante. (Matiu 4:17) Hem i soem se Kingdom ya i mas stap long wanem ples long laef blong yumi taem hem i se: “Yufala i mas gohed blong lukaot kingdom mo stret fasin blong hem fastaem.”—Matiu 6:33, NW.
3. ?From wanem man i mas hareap naoia blong save long Kingdom Blong God?
3 I no longtaem, bambae Kingdom ya i jenisim fasin blong rulum wol ya blong olwe, taswe ol man oli mas hareap naoia blong save long Kingdom Blong God. Daniel 2:44 i talemaot se: “Long taem blong ol king ya [ol gavman we oli stap rul naoia], God ya we i stap long heven bambae i stanemap wan king [Kingdom long heven] we rul blong hem bambae i no save finis samtaem. Bambae i no gat wan king i save winim hem [ol man bambae oli neva rulum wol ya bakegen]. Bambae hem i save flatemgud paoa blong ol narafala king [blong naoia], nao bambae hem i rul oltaem gogo i no save finis.” Yes, Kingdom Blong God bambae i endem ol las dei ya taem hem i spolem fulwan rabis wol ya blong naoia. Afta long hemia, bambae i no moa gat man we i save agensem Kingdom ya long heven we i rulum wol. !Yumi tangkiu tumas se gudfala taem ya i klosap nao!
4. ?Long saed blong Kingdom, wanem i bin hapen long heven long 1914, mo from wanem samting ya i impoten long yumi?
4 Long 1914, Jisas Kraes i kam King mo i kasem raet blong “rulum ol enemi blong [hem].” (Ol Sam 110:1, 2) Mo long semfala yia ya, ol ‘las dei’ blong rabis wol ya oli stat. (2 Timoti 3:1-5, 13) Long semtaem, ol samting we Daniel i bin luk long vison blong hem oli kamtru long heven. “Olfala ya we i stap fastaem bifo olgeta,” hemia Jeova God, i givim paoa long Pikinini blong Man, hemia Jisas Kraes. Hem i mekem Jisas i kam “king, i leftemap nem blong hem i hae we i hae, mo i givim bigfala paoa long hem, blong bambae olgeta man blong olgeta kantri mo olgeta kala mo olgeta lanwis oli wok blong hem.” Daniel i tokbaot vison ya we hem i luk, hem i raetem se: “Hem i king we paoa blong hem bambae i stap oltaem nomo, mo rul blong hem bambae i no save finis samtaem.” (Daniel 7:13, 14) From Kingdom ya nao, we i stap long han blong Jisas Kraes, God bambae i givim janis long ol man we oli laekem stret fasin, blong oli harem gud long olgeta gudgudfala samting we hem i bin promes blong givim long faswan papa mama blong yumi long Paradaes.
5. ?Wanem ol samting we yumi intres blong save long saed blong Kingdom, mo from wanem yumi intres long ol samting ya?
5 ?Yu yu wantem se Kingdom ya i rulum yu? Sipos yes, ating yu intres blong save ol plan mo ol wok blong gavman ya we i stap long heven. Ating yu wantem save wanem we hem i stap mekem naoia, wanem we bambae hem i mekem long fiuja, mo wanem we hem i wantem yu blong mekem. Taem yu kasem moa save long Kingdom ya, fasin tangkiu we yu yu gat long wok blong hem bambae i kam bigwan moa. Sipos yu letem hem i rulum yu, bambae yu naf moa blong talemaot long ol man ol nambawan samting we Kingdom Blong God bambae i mekem long olgeta we oli obei long hem.—Ol Sam 48:12, 13.
Olgeta We Oli Rul Long Kingdom Blong God
6. (a) Talem sam tok blong Baebol we i soemaot se hae rul blong hu i stap kamaot tru long Kingdom Blong Mesaea. (b) ?Ol samting we yumi lanem long saed blong Kingdom oli mas mekem wanem long yumi?
6 Wan long ol faswan samting we yumi lanem hemia se, Kingdom Blong Mesaea i rod we Jeova i yusum blong soemaot hae rul blong hem. Jeova nao i putumap Pikinini blong hem ‘i kam king, i leftemap nem blong hem i hae we i hae, mo i givim bigfala paoa long hem.’ Afta we Pikinini blong God i kasem paoa blong rul olsem King, plante voes long heven oli singaot se: “Ol kingdom blong wol ya oli kam aninit long paoa blong Hae God blong yumi [ Jeova], wetem Mesaea blong hem. Mo hem [ Jeova] i King we bambae i stap rul oltaem gogo i no save finis.” (Revelesen 11:15) Taswe, evri samting we yumi lanem long saed blong Kingdom ya, mo olgeta samting we hem i mekem, oli save pulum yumi i kam klosap moa long Jeova hem wan. Ol samting ya i mas mekem we yumi wantem tumas blong stap aninit long hae rul blong Hem blong olwe.
7. ?From wanem yumi glad we Jeova i putumap Jisas Kraes Blong Rul Long Nem Blong Hem?
7 Mo tu, tingbaot se Jeova i putum Jisas Kraes long jea blong king Blong Rul Long Nem Blong Hem. Jeova i yusum Jisas olsem Nambawan Man Blong Wok Blong Hem, blong wokem wol mo ol man. Taswe Jisas i save gud ol samting we yumi nidim. Stat long taem we man i wokbaot long wol ya, Jisas i soemaot we hem i “hapi tumas blong luk ol man.” (Ol Proveb 8:30, 31; Kolosi 1:15-17) Hem i lavem ol man tumas mekem se hem i rere blong kamdaon long wol mo givim laef blong hem olsem wan ransom blong pemaot yumi. ( Jon 3:16) Long rod ya, hem i givim janis long yumi blong kam fri long sin mo ded mo kasem laef we i no save finis.—Matiu 20:28.
8. (a) ?Ol gavman blong wol oli no save stap longtaem, be from wanem gavman blong God bambae i stap olwe? (b) ?Olsem wanem “slef we i stret mo waes” i joen wetem gavman ya long heven?
8 Kingdom Blong God i no save jenis, hem i wan gavman we bambae i stap olwe. Yumi sua long samting ya from we Jeova i no save ded samtaem. (Habakuk 1:12) Jisas Kraes, we God i putum hem olsem king, i defren olgeta long ol king blong wol ya, from we hem tu i no save ded. (Rom 6:9; 1 Timoti 6:15, 16) I gat 144,000 narafala man we bambae oli joen wetem Kraes blong rul olsem ol king. Ol man ya we oli holemstrong long God, oli kamaot long “olgeta kala, mo long olgeta kantri, mo long olgeta laen, mo long olgeta lanwis.” Olgeta tu bambae oli no save ded samtaem. (Revelesen 5:9, 10; 14:1-4; 1 Korin 15:42-44, 53) Bighaf blong olgeta ya oli stap finis long heven, mo smol haf blong olgeta we oli stap yet long wol oli mekemap grup ya we tede oli kolem “slef we i stret mo waes.” Olgeta ya oli lukaot long ol wok blong Kingdom long wol ya.—Matiu 24:45-47, NW.
9, 10. (a) ?Kingdom bambae i karemaot wanem samting we i seraotem mo spolem ol man tede? (b) ?Sipos yumi no wantem kam ol enemi blong Kingdom Blong God, yumi no mas joen long wanem samting?
9 I no longtaem nao, long taem we Jeova i jusum finis, bambae hem i sanem ol ami blong hem long heven blong oli mekem jajmen blong hem i kamtru long wol ya, mo blong oli klinim wol ya. Bambae oli kilimaot blong olwe ol man we oli no wantem luksave hae rul blong hem mo we oli lukluk rabis long olgeta samting we hem i givim wetem lav tru long Jisas Kraes. (2 Tesalonaeka 1:6-9) Hemia dei blong Jeova we ol man oli wet long hem longtaem finis. Hemia dei we bambae hem i pruvum se hem i gat raet blong stap olsem Haefala Rula Blong Heven Mo Wol. “!Yufala i luk! Dei blong Jeova i stap kam. Dei ya i nogud from we i fulap long panis mo kros blong God. . . . Bambae hem i spolem ol man nogud long ples ya.” (Aesea 13:9, NW ) “Dei ya, bambae i dei blong kros blong Hae God, mo i dei blong man i trabol, i harem nogud. Long dei ya, Hae God bambae i spolem olgeta samting. Long taem ya, bambae long dei nomo, be ples bambae i kam tudak olgeta, mo klaod we i blak we i blak bambae i kavremap olgeta ples.”—Sefanaea 1:15.
10 Olgeta giaman skul mo olgeta gavman blong man wetem ol ami blong olgeta, we oli bin stap long paoa blong Setan, bambae oli go lus foreva. Bambae God i spolem ol man we oli soemaot se oli man blong wol ya from we oli ronem ol samting we olgeta nomo oli wantem, oli giaman, mo oli gat wan fasin blong laef we i no klin. Setan mo ol rabis enjel blong hem bambae oli no moa save spolem ol man blong wol ya, bambae oli go kalabus blong wan taosen yia. Kingdom Blong God bambae i bos fulwan long wol ya. !Hemia wan nambawan blesing blong olgeta we oli lavem stret fasin!—Revelesen 18:21, 24; 19:11-16, 19-21; 20:1, 2.
?Olsem Wanem Kingdom i Mekem Plan Blong Hem i Kamtru?
11. (a) ?Olsem wanem Kingdom Blong Mesaea bambae i mekem stamba tingting blong Jeova long saed blong wol ya i kamtru? (b) ?Taem Kingdom ya i rul, ol man we oli laef aninit long hem bambae oli harem olsem wanem?
11 Kingdom Blong Mesaea bambae i mekem stamba tingting we God i gat fastaem long saed blong wol ya, i kamtru fulwan. ( Jenesis 1:28; 2:8, 9, 15) Kam kasem naoia, ol man oli no folem tingting ya blong God. Be, long “niufala wol ya we bambae i kamtru” evri samting bambae i stap long han blong Pikinini blong man, hemia Jisas Kraes. Olgeta man we oli no ded long taem we Jeova i jajem olfala wol ya, bambae oli wok tugeta aninit long Kraes olsem King blong olgeta. Bambae oli glad blong mekem evri samting we hem i talem, nao wol bambae i kam wan paradaes. (Hibrus 2:5-9) Olgeta man evriwan bambae oli harem gud long wok we oli mekem wetem prapa han blong olgeta, mo bambae oli kasem bigfala blesing taem graon i givim fulap kakae.—Ol Sam 72:1, 7, 8, 16-19; Aesea 65:21, 22.
12. ?Olsem wanem ol man we oli stap aninit long Kingdom ya bambae oli kam stretgud olgeta long tingting mo bodi?
12 Taem God i wokem Adam mo Iv, tufala i stretgud olgeta. Mo long taem ya, stamba tingting blong God hemia se bambae tufala i fulumap wol ya wetem ol pikinini we tingting mo bodi blong olgeta i stretgud olgeta. Stamba tingting ya nao bambae i kamtru fulwan aninit long rul blong Kingdom. Hemia i min se bambae i no moa gat sin. Kraes bambae i wok olsem King mo Hae Pris tu, blong i save karemaot sin blong yumi. Bambae hem i soemaot longfala tingting taem hem i halpem olgeta man we oli obei long hem blong kasem blesing from sakrefaes blong laef blong hem we i save karemaot sin blong olgeta.
13. ?Wanem blesing long saed blong bodi we bambae ol man oli kasem taem Kingdom i rul?
13 Aninit long rul blong Kingdom, ol man we oli laef long wol bambae oli luk we bodi blong olgeta i kam strong gud. “Long taem ya, ol blaen man bambae oli save lukluk, mo olgeta we sora blong olgeta i fas, sora blong olgeta bambae i open bakegen. Olgeta we leg blong olgeta i nogud, bambae leg blong olgeta i kam gud bakegen, nao oli jamjam olbaot, oli danis, mo olgeta we oli no save toktok, bambae oli toktok, nao bambae oli glad, oli stap singsingaot from.” (Aesea 35:5, 6) Skin blong ol man we oli olfala no we sik i spolem olgeta, bambae i kam niuwan bakegen olsem skin blong wan pikinini. Ol man we bodi blong olgeta i slak bambae oli gat strong bodi bakegen. “Bodi blong man olsem i save kam gud bakegen, i save kam strong olsem we i yangfala nomo.” ( Job 33:25) Bambae i no moa gat man i save talem se, “Mi mi sik.” ?From wanem? From we ol man ya we oli stap fraetgud long God bambae oli no moa stap aninit long baden blong sin mo ol nogud frut blong hem. (Aesea 33:24, NW; Luk 13:11-13) Yes, God “bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:4.
14. ?Blong kam stret gud olgeta i minim wanem?
14 Be fasin blong kam stretgud olgeta i no minim nomo se bambae ol man oli gat gudfala bodi mo tingting. Man we i stretgud olgeta bambae i soemaot tu ol fasin blong Jeova long laef blong hem, from we God i wokem yumi blong yumi ‘tekem fasin blong hem, yumi olsem hem.’ ( Jenesis 1:26) Blong kasem mak ya, bambae yumi nidim we God i tijim yumi plante. “Stret fasin nomo bambae i stap” long niufala wol. Taswe, olsem we Aesea i bin talemaot, “bambae ol man oli lanem mining blong stret fasin.” (2 Pita 3:13; Aesea 26:9) Stret fasin bambae i karem pis i kam—pis bitwin ol man blong evri kala, pis bitwin ol fren, insaed long famle, mo antap moa, pis wetem God hem wan. (Ol Sam 85:10-13; Aesea 32:17) Ol man we oli lanem stret fasin, sloslo bambae oli kasem tijing long ol samting we God i wantem olgeta blong mekem long laef blong olgeta. Taem oli lavem Jeova moa wetem hat blong olgeta, bambae oli folem ol rul mo fasin blong hem long evri haf blong laef blong olgeta. Bambae oli save talem sem toktok ya we Jisas i bin talem se: ‘Oltaem, mi stap mekem ol samting we Papa i wantem.’ ( Jon 8:29) !Bambae yumi harem gud tumas long laef, taem samting ya i kamtru long olgeta man long wol!
Sam Samting We Oli Kamtru Finis
15. Yusum ol kwestin long paragraf ya blong soem sam wok we Kingdom i mekem finis mo wanem we yumi mas mekem naoia.
15 Ol nambawan wok blong Kingdom Blong God mo ol man blong hem, oli kam klia finis. Ol kwestin mo vas we oli kam biaen bambae oli mekem yu yu tingbaot sam long ol wok ya, mo bambae oli soem tu, wanem samting we ol man aninit long Kingdom ya oli save mekem mo oli mas mekem naoia.
?Kingdom i tekem aksin agensem hu fastaem, mo wanem i kamaot from? (Revelesen 12:7-10, 12)
?Stat long taem we Kraes i kam king, wok i stap gohed blong hivimap ol laswan memba blong wanem grup? (Revelesen 14:1-3)
?Olsem we Matiu 25:31-33 i tokbaot, wanem wok we Jisas i talem se bambae hem i mekem afta we bigfala trabol i stat?
?Wanem bigfala wok we i stap gohed tede? ?Hu olgeta we oli joen long wok ya? (Ol Sam 110:3; Matiu 24:14; Revelesen 14:6, 7)
?From wanem ol man blong politik mo ol lida blong skul oli no naf blong stopem wok blong prij? (Sekaraea 4:6; Ol Wok 5:38, 39)
?Wanem sam jenis we i kamaot long laef blong olgeta we oli stap aninit long rul blong Kingdom? (Aesea 2:4; 1 Korin 6:9-11)
Kingdom Blong Wan Taosen Yia
16. (a) ?Kraes bambae i rul blong hamas yia? (b) ?Wanem nambawan samting we bambae i hapen long taem ya mo biaen long taem ya?
16 Afta we Setan mo ol rabis enjel blong hem oli go kalabus long bigfala hol, Jisas Kraes mo ol 144,000 man bambae oli rul olsem ol king mo pris blong wan taosen yia. (Revelesen 20:6) Long taem ya, olgeta man bambae oli kam stret gud olgeta, sin mo ded we yumi kasem long Adam bambae i lus blong olwe. Long en blong Taosen Yia Rul ya, afta we Jisas i finisimgud wok blong hem olsem Mesaea King mo Pris, bambae hem i “givimbak olgeta paoa blong hem” long God, Papa blong hem, “nao God bambae i holem paoa bakegen, blong i rul long olgeta samting.” (1 Korin 15:24-28) Long taem ya, Setan bambae i gofri bakegen blong smoltaem, blong traem ol man we sakrefaes blong Kraes i pemaot olgeta finis. Bambae hem i traem pulum olgeta blong oli no moa sapotem hae rul blong Jeova. Afta we laswan traem ya i finis, bambae Jeova i spolem Setan mo ol stronghed man we oli tekem saed blong hem. (Revelesen 20:7-10) Long taem ya tu, olgeta we oli sapotem hae rul blong Jeova—hemia se oli agri we hem i gat raet blong rul—bambae oli soemaot fulwan se i no gat wan samting i save spolem fasin blong olgeta blong stap tru long God. Nao bambae oli gat wan fasin fren wetem Jeova we i stret gud. Bambae hem i tekembak olgeta olsem ol pikinini blong hem, we hem i glad blong givim laef we i no save finis long olgeta.—Rom 8:21.
17. (a) ?Wanem bambae i hapen long Kingdom long en blong taosen yia? (b) ?Olsem wanem Kingdom “bambae i no save finis samtaem”?
17 Taswe, wok blong Jisas mo ol 144,000 man long saed blong wol ya bambae i jenis. ?Wanem wok we bambae oli mekem long fiuja? Baebol i no talem. Be sipos yumi strong blong sapotem hae rul blong Jeova, bambae yumi laef i stap afta long Taosen Yia Rul Blong Kraes blong faenemaot wanem tingting we Jeova i gat long saed blong olgeta ya mo ol narafala samting tu long heven mo wol. Nating se wok blong olgeta ya i jenis, taosen yia rul blong Kraes “bambae i stap oltaem nomo,” mo Kingdom blong hem bambae “i no save finis samtaem.” (Daniel 7:14) ?Olsem wanem samting ya i save kamtru? Wan samting se, paoa blong rul bambae i no go long han blong ol narafala man we oli save jenisim stamba tingting blong God, from we Jeova nomo bambae i rul. Mo tu, Kingdom ya “bambae i no save finis samtaem” from we ol samting we bambae hem i mekem i kamtru, bambae oli stap olwe. (Daniel 2:44) Antap long hemia, Mesaea King we i Pris tu, mo ol narafala man we oli king mo pris wetem hem, bambae oli kasem ona olwe from we oli mekem tabu wok blong Jeova.
Tingtingbak
• ?From wanem Kingdom Blong God nomo i save stretem ol problem blong man? ?Wetaem King Blong Kingdom Blong God i stat rul?
• ?Wanem samting we yu yu laekem long saed blong Kingdom Blong God mo wok we Kingdom ya bambae i mekem?
• ?Wanem sam wok we Kingdom i mekem finis, mo olsem wanem yumi save tekpat long ol wok ya?
[Tok blong pija long pej 93]
Aninit long Kingdom Blong God, olgeta man bambae oli lanem stret fasin