?Yu Yu Rere Blong Mekem Sam Jenis?
1. Naoia we olgeta samting long wol oli stap jenis, ?yumi mas mekem wanem?
1 Baebol i tokbaot wol ya olsem wan ples blong mekem muvi. Taem wan haf blong stori i finis, ol man ya oli aot, nao ol narafala man oli tekem ples blong olgeta blong mekem nekis haf. Naoia we ol samting long wol ya oli stap jenis, yumi tu yumi mas rere blong mekem sam jenis. Hemia i min se yumi mas yusum ol defren rod blong prij, yumi mas jenisim program blong yumi, mo yumi mas jenisim ol fastok blong yumi tu. ?Olsem wanem? ?Yu yu rere blong mekem sam jenis?
2. ?From wanem yumi mas mekem ol jenis folem ogenaesesen?
2 Ol Defren Rod Blong Prij: Longtaem finis i kam, ogenaesesen blong Jehova i stap mekem sam jenis. Bifo, taem Jisas i sanemaot ol disaepol blong hem blong oli go prij, hem i talem long olgeta se oli no mas tekem kakae no mane wetem olgeta. (Mat. 10:9, 10) Be biaen, taem hem i sanemaot olgeta bakegen, hem i talem long olgeta se oli mas karem paos no basket blong olgeta. Hem i talem olsem from we hem i save finis se ol man bambae oli mekem i nogud long olgeta. Mo tu, hem i save se wok ya we hem givim long olgeta i mas kasem olgeta ples long wol. (Luk 22:36) Long ol handred yia we i pas, ogenaesesen blong Jehova i yusum plante defren rod blong prij. Oli yusum wan kad we oli givim long man blong i ridim, oli toktok long laodspika we oli fasem long trak blong olgeta, mo oli toktok long radio. Hemia i folem nomo ol samting we ol man long taem ya oli stap yusum. Tede, yumi prij long ol haos wanwan, be taem yumi no faenem man long haos, yumi prij long ol pablik ples, mo yumi tekem evri janis blong prij long ol man. Be tu yumi kasem advaes se i gud samtaem blong prij long ol haos wanwan long sapa, from we long dei ol man oli go long wok. Ogenaesesen blong Jehova long heven i olsem wan kat we i stap muv i go fored. ?Olsem wanem? ?Yu yu stap folem kat blong Jehova?—Esik. 1:20, 21.
3. ?Wanem samting yumi save mekem blong givhan long ol man we yumi prij long olgeta?
3 Ol Fastok: ?Ol man long ples blong yu oli stap wari from wanem samting? ?Oli wari from famle blong olgeta, from mane, no from we i gat tumas kruked fasin? I gud sipos yumi savegud ol trabol we ol man long ples blong yumi oli stap fesem, olsem nao yumi save rerem sam fastok we oli stret gud long ol trabol we man i kasem. (1 Kor. 9:20-23) Taem man blong haos i talemaot samting we hem i wari long hem, ?bambae yumi mekem wanem? ?Bambae yumi gohed nomo long fastok ya we yumi jusum finis blong tokbaot? !Nogat! I moa gud we yumi jenisim fastok blong yumi mo yumi mekem storian blong yumi i laenap wetem samting we man ya i wari long hem.
4. ?From wanem yumi mas kwik blong mekem sam jenis?
4 I no longtaem, wol blong yumi we i olsem ples blong plei muvi, bambae i kasem en blong hem, mo i no longtaem bigfala trabol bambae i stat. “Naoia, yumi no gat plante taem i stap.” (1 Kor. 7:29) !Taswe, i impoten tumas we naoia yumi mas traehad blong mekem sam jenis bifo we i let tumas!