Japta 33

Tok Blong Aesea i Kamtru

JISAS i harem we ol Farisi mo ol lida blong pati blong Herod oli stap mekem plan blong kilim hem i ded. Ale hem wetem ol disaepol blong hem oli godaon long bigfala lugun blong Galili. Mo plante man tumas oli biaen long hem. Oli aot long olgeta ples long Palestaen, mo long sam ples afsaed tu, nao oli kam blong luk Jisas. Long ples ya hem i mekem plante sikman oli gud bakegen. From samting ya, olgeta sikman oli stap puspusum olgeta blong kam kasem hem.

From we i gat plante tumas man long ples ya, Jisas i talem long ol man blong hem blong oli blokem wan bot blong hem. Sipos hem i klaem long bot ya, olgeta man ya oli no moa save pusum hem tumas. Mo hem i save sidaon long bot blong tijim olgeta. Mo tu, hem i save pulum bot ya, i go long narafala ples bakegen blong givhan long sam moa man.

Matyu i raetem long buk blong hem se ol wok blong Jisas oli mekem profet tok ya we “Aesea i bin talemaot bifo” i kamtru. Nao Matyu i raetemdaon profet tok ya we i kamaot long Jisas, i se:

“Hemia man blong wok blong mi we mi mi bin jusumaot hem. Mi mi laekem hem tumas, tingting blong mi i glad tumas long hem. Bambae mi mi givim Speret blong mi long hem, nao bambae hem i talemaot ol stret fasin blong mi long fes blong ol hiten man. Bambae hem i no save rao, i no save singaot bigfala tumas, mo i no save mekem bigfala toktok long open ples. Waelken we i bendaon finis, man ya i no save brekem. Mo laet we kolosap i ded, be hem i no save kilim. Hem bambae i wok olsem gogo i mekem stret fasin i win, i stanap strong. Nao bambae ol hiten man oli putum tingting blong olgeta i stap long hem.”

I klia we Jisas nomo i man blong wok blong God we God i laekem hem tumas. Ol kastom blong ol gyaman skul oli stap spolem stret fasin, be Jisas i soemaot klia mining blong trufala stret fasin blong God. !Traem tingbaot! !Ol Farisi oli no save givhan long wan sikman long Sabat dei, from we oli stap twistim Loa blong God! Be Jisas i soemaot stret fasin blong God long ol man, i klia nomo. Hem i tekemaot bigfala baden we ol gyaman kastom oli stap putum long ol man. From samting ya, ol lida blong ol skul oli wantem kilim hem i ded.

?Wanem mining blong profet tok blong Aesea taem hem i talem se: ‘Bambae hem i no save rao, i no save singaot bigfala tumas, mo i no save mekem bigfala toktok long open ples’? Taem Jisas i mekem ol sikman oli gud bakegen, hem i ‘stap tok long olgeta, i stap blokem olgeta blong oli no talemaot nem blong hem.’ Hem i no wantem mekem plante toktok we i leftemap hem nomo, mo hem i no wantem we ol man oli go mekem ripot we i no stret long saed blong ol wok blong hem.

Mo tu, Jisas i karem gudfala mesej blong hem i go long ol man we oli olsem waelken we i bendaon finis, we man i purumbut long hem finis. Ol man ya oli olsem wan laet we kolosap i ded. Jisas i no save brekem waelken ya, mo hem i no save kilim laet we kolosap i ded. Be hem i soemaot lav mo kaengud fasin, hem i keagud long ol man, mo hem i leftemap tingting blong ol man we oli gat tingting daon. !Tru tumas, man ya we ol man oli save trastem hem, hemia Jisas nomo! Matyu 12:15-21; Mak 3:7-12; Aesea 42:1-4.

▪ ?Olsem wanem Jisas i soemaot trufala stret fasin? ?Olsem wanem hem i no save rao, i no save singaot bigfala, i no mekem bigfala toktok long open ples?

▪ ?Hu olgeta man we oli olsem waelken we i bendaon finis mo laet we kolosap i ded? ?Jisas i stap soemaot wanem fasin long ol man ya?