!I Gat Rod Blong Faenem Trufala Glad!
PLANTE man long olgeta ples blong wol oli ting se rod blong faenem glad, hemia blong gat wan flas trak, plante mane long bang, wan gudfala wok, wan bigfala haos, ol niufala samting we oli wok wetem lektrik, mo naes bodi. ?I tru se glad i dipen long ol sas samting mo naes bodi?
Wan spesel ripot long buk ya Time i talem se: “Ol man oli spenem fulap taem blong lukaot save long saed blong fasin glad, tingting ya we man i lukluk gudfala saed blong ol samting, ol gudfala filing, mo ol gudfala fasin we oli givhan long bodi mo tingting.” Ol save we oli faenem i mekem plante man oli sapraes. Stadi blong olgeta i soemaot se ol man we oli ting se mane, haenem, mo naes bodi i save mekem olgeta oli glad, oli stap giaman long olgeta nomo. Oli stap mekem se laef blong olgeta i stanap long fandesen we i nogud, oli save lusum stret tingting mo tingting blong olgeta i save foldaon tu.
Long Yunaeted Stet, plante man oli rij moa i bitim olgeta taem bifo. Be ripot long Time i talem se: “Mane ya i no mekem se yumi glad moa.” Sem mak long ol narafala kantri tu. Jaena i stap kam antap bigwan long saed blong mane mo wok, be namba blong ol man we oli no hapi i stap kam antap bitim mak. Niuspepa ya Access Asia we i stap kamaot wan taem long tri manis i talem se, “bighaf blong [ol man Jaena] we oli ded taem oli gat 15 yia kasem 34 yia,” olgeta nomo oli kilim olgeta i ded bakegen. I luk olsem we wan risen blong samting ya, hemia se ol yangfala oli stap traehad tumas blong folem tingting blong wol we i stap pusum olgeta blong kam rij mo wingud long wok blong olgeta.
I klia se mane mo olting oli no daonem wari mo fasin blong harem nogud. Defren olgeta, mane i save mekem se ol nogud filing ya oli kam antap moa. Long wan yunivesiti, oli mekem wan stadi mo oli faenemaot se “fasin blong laef blong yumi i bigfala samting we i mekem yumi harem nogud mo tingting i foldaon.” Man ya Van Wishard we i stadi long fasin blong laef we plante moa man oli stap folem, i talem se “plante kampani oli yusum helt insurens blong olgeta from ol problem we ol wokman blong olgeta oli kasem long tingting mo filing blong olgeta, i bitim we oli yusum from ol narafala sik.”
Wol ya we i stap jenis kwiktaem nomo, i stap mekem ol pikinini tu oli harem nogud. Masta Wishard i talem se, naoia oli raetem sam buk blong ol pikinini we oli gat eit yia nomo, blong givim advaes long olgeta “olsem wanem blong luksave ol saen se oli stap wari tumas, mo wanem samting oli save mekem blong winim trabol ya.” Wan pepa we i givim save long saed blong tingting we i foldaon, i talem se long plante kantri blong Yurop mo Amerika, evri yia, 23 pesen blong ol pikinini oli kasem trabol ya we tingting blong olgeta i foldaon. Pepa ya i talem se “ol smosmol pikinini we oli no skul yet, oli dring moa meresin blong tingting we i foldaon i bitim ol bigman.”
Fraet tu i stap kam antap, mo samting ya i no kamaot from we man i sot long mane nomo. Sam gavman mo sam jos oli stap pulum ol man blong faet mo blong girap agensem narafala. Plante man oli fraet long ol trabol we i save kamaot long fiuja. ?Olsem wanem? ?I gat samting we i save givhan long yumi?
Samwe long tu taosen yia bifo, Jisas Kraes i tijim ol man long wan fasin blong laef we i defren long hemia tede, i save mekem man i haremgud, mo i daonem wari mo trabol. Tijing blong hem i stanap long wan trutok we i isi be i dip. Hem i se: “Olgeta we oli luksave se oli nidim ol samting long saed blong spirit, oli save glad.” (Matiu 5:3, NW ) Yes, Jisas i pulum ol man blong tingbaot samting we oli nidim moa—hemia trutok long saed blong God mo plan we Hem i gat blong ol man.
Ol pej we oli kam biaen, bambae oli eksplenem olsem wanem trutok ya i save halpem yumi blong luksave wanem samting i rili impoten, nao yumi save kasem moa glad long laef blong yumi mo yusum laef blong yumi long fasin we i waes. Mo tu, trutok ya i givim hop long yumi.
[Tok blong makem poen long pej 3]
?Glad i stanap long ol sas samting?