‘Bambae Ol Man Oli Stap Talemaot Gud Nius Blong Kingdom’
“Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae Lasdei i save kam.”—MATIU 24:14.
?Hemia i Minim Wanem? Man ya Luk, we i raetem buk blong Baebol we i tokbaot laef blong Jisas, i talem se Jisas “i stap wokbaot, i stap pas long ol taon mo long ol vilej. Hem i stap prij, mo i stap talemaot gud nius ya we God i stap kam King blong ol man blong hem.” (Luk 8:1) Jisas hem wan i talem se: “Mi mas talemaot gud nius ya long olgeta, se God i stap kam King blong olgeta man long wol, from we God i sanem mi blong mi mekem olsem.” (Luk 4:43) Hem i sanem ol man blong hem oli go talemaot gud nius long ol taon mo ol vilej, mo biaen i talem long olgeta se: “Bambae yufala i mas go talemaot mi . . . long olgeta ples, gogo yufala i finisim olgeta ples long wol.”—Ol Wok 1:8; Luk 10:1.
Samting We Ol Fas Kristin Oli Mekem: Ol disaepol blong Jisas oli no westem taem. Oli mekem samting we Jisas i talem. “Evri dei, long haos blong God, mo insaed long ol haos blong ol man, oli stap tijim ol man, mo oli stap talemaot gud nius ya blong Jisas, se hem i Mesaea.” (Ol Wok 5:42) I no wan spesel grup nomo we i mekem wok blong prij. Wan man blong histri we nem blong hem Neander, i tokbaot fas man we i raetem ol buk blong agensem ol Kristin, hemia Celsus. Neander i talem se: “Celsus i jikim ol Kristin, i talem se oli stap wok strong blong talemaot gud nius blong Kraes, be oli man nating nomo we oli no gat nem. Oli man blong wokem kaliko long hea blong sipsip, man blong wokem sus, man blong rerem skin blong anamol.” Jean Bernardi i raetem long buk blong hem The Early Centuries of the Church, se: “[Ol Kristin] oli mas go toktok long olgeta man long olgeta ples. Oli go long bigrod mo long taon, long ples we ol man oli stap long hem, mo long haos blong ol man. Oli mekem olsem, nating se man i glad long olgeta no nogat. . . . Oli mas kasem olgeta ples long wol.”
?Hu Tede i Stap Folem Fasin Blong Jisas? Wan pris blong Anglikan Jos, David Watson, i talem se: “Wan risen we plante man tede oli no strong blong mekem wosip long God, hemia from we jos i no mekemgud wok blong hem blong prij mo blong tijim ol man.” José Luis Pérez Guadalupe, i raetem buk ya Why Are the Catholics Leaving? Hem i tokbaot wok blong Evanjelis Jos, ol Adventis, mo sam narafala jos bakegen. Hem i luk se oli “no go long ol haos wanwan.” Be hem i tokbaot ol Witnes blong Jehova se: “Olgeta oli meksua se oli go long olgeta haos wanwan.”
Ol tok blong Jonathan Turley we i stap long Cato Supreme Court Review, 2001-2002, i pulum tingting blong yumi mo i tru tumas. Hem i se: “Taem ol man oli harem nem ya ol Witnes blong Jehova, fas samting we oli tingbaot hemia ol man we oli kam prij long olgeta long haos, long ol taem we i no stret long olgeta. Ol Witnes blong Jehova oli tingbaot se wok ya blong talemaot gud nius long ol man long haos blong olgeta, i pulum narafala blong bilif. Be i no hemia nomo. Wok ya i mekem bilif blong olgeta i strong.”
[Bokis blong pija long pej 7]
?Yu Yu Luksave Hu i Gat Fasin Blong Tru Kristin Man?
Ol tok blong Baebol we yumi luk finis long magasin ya, oli soemaot fasin blong ol tru Kristin. ?Hu tede we yu luk se oli folem fasin blong tru Kristin man? Nating se i gat plante taosen grup mo jos we oli talem se oli Kristin, i gud yu tingbaot ol tok we Jisas i talem long ol man blong hem, i se: “I no olgeta man evriwan we oli stap singaot mi se ‘Masta, Masta’ we bambae oli save go insaed long niufala wol ya we God i king long hem. Man we i stap mekem ol samting we Papa blong mi long heven i wantem, hem nomo bambae i save go insaed.” (Matiu 7:21) Sipos yu yu save hu olgeta we oli stap mekem samting we God i wantem, we oli gat fasin blong tru Kristin man, mo yu yu joen wetem olgeta, bambae yu save kasem ol blesing blong olwe, aninit long Kingdom blong God. Plis yu askem long ol Witnes blong Jehova we oli givim magasin ya long yu, blong oli givhan long yu blong save moa long saed blong Kingdom blong God, mo ol blesing we bambae ol man oli kasem from Kingdom ya.—Luk 4:43.