Ogenaesesen We i Mekem Wok Blong Jeova
Japta 12
Sapotem Wok Blong Kingdom Long Ples Blong Yumi Mo Long Fulwol
JISAS i talem wan profet tok long saed blong ol las dei, se ol man blong hem bambae oli talemaot gud nius ‘gogo oli finisim olgeta ples long wol.’ Ol Witnes blong Jeova oli mekem profet tok ya i kamtru. (Wok 1:8; Mat. 24:14) Oli givim taem mo paoa blong olgeta fri nomo blong serem trutok blong God long ol man. Oli trastem Jeova se bambae hem i lukaot long ol man we oli wok wetem Hem, taswe oli no wari tumas long saed blong ol samting blong laef, be oli gohed nomo blong putum Kingdom blong God long fas ples long laef blong olgeta. (Mat. 6:25-34; 1 Kor. 3:5-9) Frut we i kamaot i soemaot klia se Jeova i glad long olgeta mo i blesem olgeta.
LUKAOT LONG WOK BLONG KINGDOM LONG FULWOL
Be samfala oli wantem save se ol Witnes blong Jeova oli kasem mane olsem wanem blong mekem bigfala wok ya blong talemaot gud nius mo blong wokem ol buk mo Baebol we ol man oli no pem. Yumi save se i mas gat mane blong wokem fulap buk olsem mo blong sanemaot olgeta. Mo oli nidim mane tu blong wokem ol haos Betel mo blong lukaotgud long olgeta. Ol man we oli wok fultaem long ol ples ya oli yusum ol mesin blong printim ol buk mo ol magasin, oli lukaot long wok blong prij, mo oli mekem ol narafala wok blong givhan long wok blong talemaot gud nius. I mas gat mane tu blong trenem ol misinari mo sanem olgeta oli go long ol defren kantri. Samfala oli wok olsem ol spesel paenia long ol ples longwe long bus, no long ol smol kongregesen. Ol seket mo distrik elda we oli goraon blong visitim ol kongregesen, olgeta tu oli kasem smol mane we oli nidim blong gohed long wok blong olgeta. I klia se long taem blong yumi, i nidim mane blong sapotem wok blong prij long ples blong yumi mo long olgeta ples blong wol. ?Ale mane ya i kam wea?
Taem yumi givimaot buk long ol man, oli no pem. Be plante oli gat tangkiu from wok we ol Witnes blong Jeova oli mekem, mo oli glad blong givim smol presen mane blong halpem wok blong yumi long fulwol. Antap long hemia, ol Witnes blong Jeova oli sanem presen mane i go long branj ofis we i stap long ples blong olgeta. Oli save se i mas gat mane blong mekem wok ya, taswe oli glad nomo blong givim smol presen mane, olsem ol man blong God long taem bifo we oli glad blong givim plante samting blong sapotem wok blong bildim wan haos wosip long Jeova. (Eks. 35:20-29; 1 Kron. 29:9) Samfala oli givim bigfala presen mane taem oli raetem pepa blong talem se afta we oli ded, sam mane blong olgeta bambae i go blong sapotem wok blong ol Witnes blong Jeova. Be ol wanwan man, kongregesen mo seket oli sanem smol presen mane nomo. Taem yumi ademap ol presen mane ya, hemia i naf blong mekem wok blong prij i gohed.
Ol Witnes blong Jeova oli glad blong mekem wok blong talemaot gud nius. Mo oli glad tu blong yusum prapa mane blong olgeta mo sam narafala samting blong olgeta blong givhan long wok ya. Bifo, Jisas mo ol man blong hem oli holem wan basket blong mane blong olgeta, mo oli tekemaot mane long hem blong givhan long ol puaman, mo blong pem ol samting we oli nidim. (Jon 12:6; 13:28, 29) Baebol i talem se sam woman oli givim sam samting long Jisas mo ol disaepol blong hem, blong sapotem olgeta long wok blong prij. (Mak 15:40, 41; Luk 8:3) Long taem blong aposol Pol, samfala we oli wantem se gud nius i goaot moa oli givim sam samting long Pol blong sapotem hem long wok blong prij, mo Pol i talem tangkiu long olgeta from. (Fil. 4:14-16; 1 Tes. 2:9) Ol Witnes blong Jeova oli folem fasin ya yet. Oli wok strong mo oli givim presen mane long gladhat blong olgeta. Olsem nao, ‘wota blong laef we i olsem presen’ i save go long olgeta man blong wol we hat blong olgeta i stret.—Rev. 22:17.
LUKAOT LONG OL NID BLONG KONGREGESEN
Ol samting we wanwan kongregesen i mas pem, hemia tu i kamaot long ol presen mane. Kongregesen i no mekem kleksen, mo i no talem hamas mane wanwan man i mas givim, mo i no askem mane. Be i gat ol bokis blong presen mane long ol haos miting, mo wanwan man oli save givim ‘olsem we oli jusumaot.’—2 Kor. 9:7.
Oli yusum bighaf blong ol presen mane blong pem ol kaon blong Haos Kingdom, mo blong pem ol samting we oli nidim blong mekem haos ya i stap gud mo klin. Maet ol elda oli tekem desisen se bambae oli sanem sam presen mane i go long branj ofis blong ol Witnes blong Jeova we i lukaot long ples blong olgeta, blong oli yusum blong givhan long wok blong Kingdom long olgeta ples blong wol. Nao ol elda oli askem long kongregesen sipos evriwan oli agri long desisen ya. Plante kongregesen oli sanem mane evri manis blong givhan long wok blong Kingdom. Samtaem maet kongregesen i nidim mane from wan spesel samting. Sipos yumi evriwan i tingting gud long ol samting we kongregesen i nidim, bambae i no gat nid blong ol elda oli talemaot oltaem se kongregesen i sot long presen mane.
OL PRESEN MANE BLONG KONGREGESEN
Afta long evri miting, tu elda no tu man blong givhan we ol elda oli jusumaot, bambae tufala i openem ol bokis blong presen mane, tekemaot mane, mo raetemdaon hamas mane we tufala i tekemaot. (2 Kor. 8:20) Ol elda bambae oli talem wan rod blong lukaot long mane ya, go kasem taem we oli sanem i go long branj ofis no oli yusum blong pem ol kaon blong kongregesen. Maet bambae oli putum long bang long wan akaon blong kongregesen. Evri manis, brata we i lukaot long ol kaon i rerem wan ripot blong ol kaon blong ridimaot long kongregesen. Evri tri manis, presiden elda i mekem plan blong wan brata i jekem ol kaon. Kingdom Wok Blong Yumi i mekem ol elda oli tingbaot samting ya.
MANE BLONG MEKEM OL SEKET ASEMBLI MO OL SPESEL DEI ASEMBLI
Presen mane we ol Witnes long seket oli givim, hemia nao mane we i pem ol samting blong seket asembli. Long asembli i gat ol bokis blong presen mane, olsem long ol miting blong kongregesen. Ol brata oli save putum smol presen mane long ol bokis ya blong givhan long seket. Seket elda bambae i jusumaot wan brata blong lukaot long mane blong seket mo blong pem ol kaon we seket elda i agri se seket i mas pem.
Wanwan asembli i mas pem ol kaon blong asembli ya, mo biaen, sipos i gat sam mane i stap, oli mas putum long bang, long wan akaon blong seket. Long en blong wan asembli, sipos presen mane i no naf blong pem ol kaon blong asembli, oli save tekemaot sam mane long kaon blong seket long bang. Olsem nao, i no nid blong raetem leta long ol kongregesen long seket, se mane i sot blong pem ol kaon blong asembli. Be sipos i no gat naf mane long bang blong pem ol kaon taem asembli i finis, no blong pem samting we oli nidim blong statem nekis asembli, ale seket elda i save talem long ol kongregesen se oli gat janis blong givhan long saed ya. Nao ol elda long ol wanwan kongregesen oli save toktok tugeta blong talem hamas mane kongregesen blong olgeta i save givim long seket. Biaen, oli talemaot long kongregesen mo askem sipos evriwan oli agri long desisen ya.
Ol elda oli mekem miting long asembli, nao oli tekem desisen olsem wanem blong yusum mane we seket i gat. Oli mas tokbaot ol kaon blong asembli, ol samting we seket i nidim, mo ol kaon blong seket mo distrik elda taem tufala i goraon blong visitim ol kongregesen. Oli save tokbaot sipos bambae oli sanem sam presen mane i go long branj ofis blong givhan long wok blong Kingdom long olgeta ples blong wol, no blong givhan blong bildim ol Haos Kingdom raon long wol, no blong bildim wan Haos Asembli long ples blong olgeta nomo, no blong givhan long wan narafala impoten wok.
Sipos ol elda oli mekem desisen blong yusum sam mane from wan narafala samting we i no long saed blong ol kaon blong asembli, oli mas raetemdaon long wan pepa, olsem wan desisen we ol elda oli agri long hem. Oli mas raetem hamas mane stret we oli wantem yusum, mo evritaem we oli wantem yusum sam mane blong seket, oli mas askem long ol brata sista long seket sipos oli agri long desisen ya. I no stret blong folem wan desisen we oli bin mekem longtaem finis no wan desisen we i no talem hamas mane stret we oli nidim. Sipos oli wantem, oli save putum mane blong seket i stap wetem branj ofis go kasem taem we seket i nidim.
Seket elda bambae i mekem plan blong wan brata i jekem ol kaon blong seket afta long evri seket asembli mo spesel dei asembli.
GIVHAN LONG OL PUAMAN
Wan risen from wanem Jisas mo ol disaepol blong hem oli holem wan basket blong mane, hemia blong halpem ol puaman. (Mak 14:3-5; Jon 13:29) Kristin wok ya i stap yet, olsem Jisas i talem se: “Ol puaman bambae oli stap oltaem wetem yufala.” (Mak 14:7) ?Olsem wanem ol Witnes blong Jeova tede oli mekem wok ya?
Samtaem, wan gudfala brata no sista long kongregesen i sot long sam samting, maet from we hem i olfala, no i sik, no i kasem wan narafala trabol. Maet samfala long kongregesen we oli save long nid blong brata no sista ya, oli harem se oli wantem givhan long hem, folem tok we aposol Jon i talem, se: “?Sipos yu gat plante samting, mo yu luk wan Kristin brata no sista blong yu we i sot long sam samting, be yu no givhan long hem, olsem wanem yu save talem se yu yu lavem God? Ol pikinini blong mi. I nogud yumi lavem man long toktok blong yumi nomo. Yumi mas mekem samting blong givhan long hem, blong soemaot we yumi lavem hem tru.” (1 Jon 3:17, 18; 2 Tes. 3:6-12) Wok ya blong lukaot long ol gudfala brata we oli sot long sam samting, hemia i haf blong trufala wosip.—Jem. 1:27; 2:14-17.
Long faswan leta we aposol Pol i raetem long Timoti, hem i eksplenem olsem wanem blong givhan long ol gudfala brata sista we oli sot long sam samting. Yu save ridim advaes blong Pol long 1 Timoti 5:3-21. Hem i wok blong ol wanwan Kristin blong kasem ol samting we famle blong olgeta i nidim. Long saed blong ol olfala mo olgeta we oli sik, ol pikinini blong olgeta, ol smol bubu blong olgeta, no sam narafala famle oli mas givhan long olgeta. Long sam ples, gavman no sam grup we oli wok blong givhan long ol man we oli gat nid, oli save givim mane no kakae long olgeta. Ale, long kaen fasin, ol famle oli save givhan long hemia we i gat nid, blong i fulumap ol pepa blong kasem help ya. Sam samtaem, maet kongregesen nao i mas givhan long brata no sista we i gat nid mo we i bin wok strong long trutok longtaem finis. Sipos hem i no gat wan famle blong givhan long hem mo gavman i no givim mane long hem, ale ol elda oli save tokbaot sam rod blong halpem hem. Ol Kristin oli glad nomo blong serem ol samting we oli gat wetem ol brata mo sista we oli sot long sam samting.
Long sam ples, plante brata oli gat nid from wan trabol we i kasem olgeta. Maet samfala oli ronem mo kilim olgeta, maet i gat faet, etkwek, bigfala ren, kakae i sot, no maet wan narafala trabol i kasem olgeta from we laef long wol ya i kam strong tumas. (Mat. 24:7-9) Long taem olsem, maet olgeta kongregesen long eria blong olgeta i no gat samting blong serem. Ale Hed Kampani bambae i lukaot long plan ya se ol brata long ol narafala ples bambae oli givim samting we ol kongregesen ya oli nidim. Ol Kristin blong Esia Maena oli bin mekem olsem. Taem kakae i sot long Judia, ol Kristin long Esia Maena oli givim kakae long ol brata blong olgeta long Judia. (1 Kor. 16:1-4; 2 Kor. 9:1-5) Sipos yumi folem fasin blong olgeta, bambae yumi pruvum se yumi lavem ol brata blong yumi, ale yumi soemaot se yumi ol trufala disaepol blong Jisas Kraes.—Jon 13:35.
GIVIMAOT OL BUK MO MAGASIN
Ol Baebol mo buk we yumi givimaot oli mekem bigfala wok blong talemaot gud nius blong Kingdom. Klosap oltaem wan man blong givhan nao i lukaot long ol buk blong kongregesen, mo wan narafala man blong givhan we ol elda oli jusum, hem i lukaot long ol magasin. Ol pablisa oli save karem ol buk mo magasin blong serem long ol man we oli intres.
Ol brata we oli lukaot long ol buk mo magasin oli tinghevi long wok ya. Oli raetemdaon ol buk mo magasin we kongregesen i kasem mo ol buk mo magasin we oli givimaot. Sipos oli jekemap oltaem hamas buk i stap mo hamas buk ol pablisa oli stap tekem, oli save putum oda we i stret long nid blong kongregesen. Ol buk ya oli nambawan rod blong talemaot gud nius, taswe ol pablisa oli mas yusum olgeta long wok blong prij. Evri manis Kingdom Wok Blong Yumi i talem wanem buk we bambae yumi givimaot, mo samting ya i halpem yumi blong prij long fasin we i gat oda, mo blong givim gudfala witnes long olgeta teritori blong yumi.
Yumi ol Kristin we yumi givim laef blong yumi i go long Jeova, yumi save se taem blong yumi, bodi mo tingting blong yumi, gudhan we yumi gat blong mekem samting, olting blong yumi, mo laef blong yumi tu, oli ol presen we God i givim. Mo hem i wantem we yumi yusum olgeta blong mekem wok blong hem. (Luk 17:10; 1 Kor. 4:7) Taem yumi yusumgud ol samting ya, yumi soemaot se yumi rili lavem Jeova mo yumi tinghae long wosip blong hem. Yumi wantem yusum ol sas samting blong yumi blong leftemap nem blong Jeova. Yumi save se hem i glad tumas long eni presen we i soemaot se yumi stap mekem wok blong hem wetem ful laef blong yumi. (Prov. 3:9; Mak 14:3-9; Luk 21:1-4; Kol. 3:23, 24) Sipos yumi gat stret tingting long saed blong ol sas samting mo yumi gat gladhat blong givim presen, bambae tok ya blong Jisas i kamtru long yumi se: “Yufala i kasem we yufala i no pem, mo yufala i mas yusum we oli no pem yufala from.” Sipos yumi givim presen, bambae yumi glad moa i bitim we yumi kasem presen.—Mat. 10:8b; Wok 20:35.