Baebol i Talem Wanem

?God i Save Fogivim Ol Bigbigfala Sin?

SORE i wan bigfala fasin blong God. (Ol Sam 86:15) ?Sore blong hem i bigwan olsem wanem? Man blong raetem Ol Sam i raetem se: “Hae God. . . . ?Sipos yu yu stap raetemdaon ol sin blong mifala, hu bambae i save stanap long fes blong yu, we yu yu no save jajem hem? Be yu yu stap fogivim mifala, yu stap tekemaot ol sin blong mifala, nao mifala i stap bodaon long yu, mifala i stap ona long yu.” (Ol Sam 130:3, 4) Mo wan narafala vas i talem se: “Ol sin ya blong yumi, hem i stap tekemaot olgeta i go longwe we longwe long yumi, olsem we saed long is i stap longwe long saed long wes. Fasin blong Hae God, oltaem hem i stap mekem i gud tumas long olgeta we oli stap ona long hem, olsem we ol papa oli stap mekem long ol pikinini blong olgeta. Hem i savegud we hem i mekem yumi long graon. Oltaem hem i stap tingbaot we yumi kamaot long asis nomo.”—Ol Sam 103:12-14.

I klia se fasin sore blong Jeova hem i fulwan, mo hem i no save holemtaet fasin ya blong hem. Taem hem i sore long yumi, hem i tingbaot we yumi sinman mo yumi no naf blong mekem plante samting—yumi kamaot long “asis” nomo. Tingbaot sam eksampol we Baebol i tokbaot long saed blong bigfala sore blong God.

Tri taem aposol Pita i talem se hem i no save Jisas. (Mak 14:66-72) Taem aposol Pol i no kam wan Kristin yet, hem i stap mekem i strong tumas long ol man blong Jisas. Mo taem kot i jajem ol man blong Jisas se oli mas ded, Pol tu i agri blong kilim olgeta i ded. Hem i glad nomo we olgeta oli kilim wan long ol man blong Jisas i ded. (Ol Wok 8:1, 3; 9:1, 2, 11; 26:10, 11; Galesia 1:13) Bifo we sam memba blong kongregesen long Korin oli kam Kristin, oli stap dring we oli lusum hed, oli stap mekem ol bisnes blong stilim mane, mo oli stap stil. (1 Korin 6:9-11) Be biaen, olgeta evriwan ya oli haremgud long blesing blong God. ?From wanem God i fogivim sin blong olgeta?

Tri Rod We Yumi Save Kasem Sore Blong God

Pol i talem se: “[God] i gat sore long mi, from we mi no bilif yet long hem, nao mi no save ol samting ya we mi mi stap mekem.” (1 Timoti 1:13) Pol i talem stret, wanem tingting mo filing blong hem. Hemia nao faswan rod we yumi mas folem blong God i save fogivim sin blong yumi—kasem ol stret save blong Jeova mo ol loa blong hem long Baebol. (2 Timoti 3:16, 17) Yumi mas save se, blong mekem Bigfala Man ya we i wokem yumi i glad, yumi mas save gud hem. Jisas i mekem prea i go long Papa blong hem, i talem se: “Mo laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.”—Jon 17:3.

Taem ol man we hat blong olgeta i stret oli kasem ol stret save blong God, oli rili sore from ol sin we oli mekem bifo, nao oli soemaot se oli tanem tingting blong olgeta from sin blong olgeta. Hemia nao namba tu rod we yumi mas folem blong God i save fogivim sin blong yumi. Baebol i talem long Ol Wok 3:19 i se: “Yufala i mas tanem tingting blong yufala from ol sin blong yufala, mo yufala i mas luk long God [“tanraon,” NW] blong hem bambae i tekemaot ol sin blong yufala.”

Vas ya antap i talemaot namba tri rod tu, hemia tanraon. Blong tanraon i minim se, yumi lego olgeta fasin blong laef mo tingting blong yumi blong bifo, mo yumi gat ol tingting mo fasin blong laef we God i wantem yumi blong folem. (Ol Wok 26:20) Hemia i min se, man i jenisim fasin blong laef blong hem. Nao niufala fasin we hem i mekem i soemaot se, taem hem i talem long God se hem i sore from ol sin blong hem, hem i rili tok tru.

God i Save Fogivim Sin Go Kasem Wan Mak

I gat sam man we God i no save fogivim sin blong olgeta. Pol i raetem se: “Yumi ya we yumi kasem save long trutok finis, sipos yumi girap, yumi stap gohed blong mekem sin, bambae i no moa gat wan sakrefaes i stap we i save tekemaot ol sin ya blong yumi.” (Hibrus 10:26, 27) Tok ya “gohed blong mekem sin” i soemaot se, man ya we i mekem sin, hem i no wantem nating blong tanem tingting blong hem, mo hem i gohed nomo blong mekem ol rabis fasin. Hat blong man olsem i rili rabis.

Hat blong Judas Iskariot i kam nogud olsem. Jisas i talem se: “Bambae i moa gud long man ya, sipos hem i no bon.” (Matiu 26:24, 25) Jisas i tok strong long ol lida blong skul long taem blong hem, i se: “Yufala i gat sem fasin nomo we papa blong yufala Setan, hem i gat. . . . Taem we hem i stap giaman, hem i stap mekem fasin blong hem nomo, from we hem i man blong giaman, we i stamba blong ol giaman toktok.” (Jon 8:44) Tingting blong ol man ya i rabis olgeta, olsem Setan nomo. Oli no tanem tingting blong olgeta from ol nogud fasin we oli bin mekem, be oli gohed moa long ol rabis fasin blong olgeta we oli no kea nating.a I tru, sam trufala Kristin tu oli save mekem bigfala sin samtaem, from we oli no stretgud olgeta no from we oli kam slak blong folem ol stret fasin. Be mastik blong olgeta i no soemaot se oli gat wan rabis hat.—Galesia 6:1.

Jisas i Gat Sore Long Man Gogo Hem i Ded

Jeova i luk sin we ol man oli mekem, mo tu hem i luk tingting mo filing blong olgeta. (Aesea 1:16-19) Tingbaot tufala rabis man ya we oli stap long pos klosap long Jisas. Tufala ya i bin mekem ol fasin we oli rabis olgeta, taswe wan long tufala ya i se: “Yumitufala, i stret nomo blong yumitufala i kasem panis ya from ol samting nogud ya we yumi yumitufala i mekem. Be man ya [Jisas] i no mekem wan samting nating we i rong.” Tok blong man ya i soemaot we hem i kasem save sam samting long saed blong Jisas. Save ya we hem i gat, i halpem hem blong jenisim tingting blong hem. Nekis tok we hem i talem long Jisas i soemaot samting ya, i se: “Jisas, taem we bambae yu kasem kingdom blong yu, plis yu tingbaot mi bakegen.” ?Jisas i talem wanem long man ya we i askem samting ya wetem fulhat blong hem? Jisas i talem long hem se: “Tru mi mi talem long yu tede, se bambae yu yu stap wetem mi long paradaes.”—Luk 23:41-43, NW.

Tingbaot ol laswan tok ya blong Jisas taem hem i stap yet long wol. Hem i sore long wan rabis man we hem wan i bin talem se i stret blong i kasem ded. !Samting ya i mas leftemap tingting blong yumi! Yumi save sua se long fiuja, nomata wanem bigfala sin we yumi mekem bifo, be sipos yumi soemaot we yumi rili tanem tingting blong yumi, bambae Jisas mo Jeova tugeta i save fogivim yumi mo tekemaot sin blong yumi.—Rom 4:7.

[Futnot]

?YU YU BIN TINGBAOT?

◼ ?Bambae yu yu eksplenem fasin sore blong God olsem wanem?—Ol Sam 103:12-14; 130:3, 4.

◼ ?Wanem ol rod we wan man i mas folem blong God i save glad long hem?—Jon 17:3; Ol Wok 3:19.

◼ ?Jisas i talem wanem promes long rabis man ya we i stap long pos klosap long hem?—Luk 23:43, NW.

[Tok blong pija long pej 10]

Jisas i soemaot se God i save fogivim ol bigbigfala sin