?Hu i Rili Rulum Wol?

ATING yu neva toktok wetem lida blong wan grup blong brekem loa. ?Be olsem wanem, samting ya i min se i no gat man olsem? Ol bos blong ol man blong brekem loa oli save gud wanem blong mekem blong man i no save olgeta. Samfala oli stap long kalabus, nao oli talem long ol man nogud we oli no stap long kalabus, wanem blong oli mekem. Ol niuspepa oli tokbaot ol man we oli faet from ol drag, mo ol woman blong rod. Oli tokbaot olgeta we oli karem ol man oli go long narafala kantri long fasin we i haed, mo sam narafala samting bakegen. Ol fasin ya we oli no stret mo ol trabol ya we yumi stap luk, oli soemaot se ol bigman blong brekem loa oli stap. Ol trabol we oli mekem long ol narafala i mekem we yumi save se oli stap.

Tok blong God Baebol, i soemaot se Setan i wan spirit man we i laef i stap, mo hem i olsem wan bigman blong brekem loa we i gat paoa. Hem i yusum “ol giaman saen” mo “evrikaen trik we oli no stret,” blong pulum ol man blong oli mekem samting we hem i wantem. Yes, Baebol i talem se “hem i save tanem fasin blong hem, blong mekem ol man oli luk hem olsem we hem i wan enjel blong laet.” (2 Tesalonaeka 2:9, 10; 2 Korin 11:14) Sem mak olsem ol bigman blong brekem loa, yumi save se Setan i stap from ol trabol we hem i mekem long ol man. Be i had long plante man blong oli bilif se i gat wan nogud enjel we oli no save luk hem. Bambae yumi traem faenemaot moa wanem we Baebol i talem long saed blong Setan. Be fastaem bambae yumi tokbaot sam tingting mo sam rong tijing we i blokem plante man blong oli bilif se Setan i stap.

◼ “?Weswe God i save mekem Setan, sipos hem i lavem ol man?” Baebol i talem se God i gat gudfala fasin mo i stret gud olgeta. Sipos yumi ting se God i mekem wan enjel we fasin blong hem i nogud, we i spolem narafala mo i rabis olgeta, i olsem se yumi agensem fasin blong God. Blong talem stret, Baebol i no talem se God i mekem wan enjel we fasin blong hem i olsem. Be Baebol i tokbaot fasin blong God se: ‘Fasin blong hem i gud tumas, mo hem i stret olwe nomo. Hem i tru mo oltaem, tingting blong hem i stap strong long ol man blong hem. Oltaem hem i stap mekem ol samting we i stret, mo i stap mekem sem mak nomo long olgeta man.’—Dutronome 32:4; Ol Sam 5:4.

Samting we yumi mas tingbaot hemia sipos wan enjel we God i mekem i stret gud, ?hem i save mekem wan samting we i no stret? Ol man mo ol enjel oli no olsem wan masin. God i mekem olgeta blong oli tingting mo oli jusum samting we oli wantem mekem. Taswe, wan enjel no wan man we i stret gud olgeta, hem i save jusum blong mekem fasin we i gud no fasin we i nogud.

Sipos God i blokem ol enjel no ol man blong oli no mekem fasin we i nogud, bambae oli no moa fri blong jusum samting we oli wantem. Jisas i tokbaot Setan se hem i no yusum gud fasin ya blong jusum samting, i se: “Hem i no holemstrong long trutok.” (Jon 8:44, NW) Ol tok ya oli soemaot se fastaem olgeta, Setan i wan enjel we i stret gud mo hem i “holemstrong long trutok.”a Jehova God i mekem ol enjel mo ol man blong oli fri blong jusum samting we oli wantem mekem, from we hem i lavem olgeta mo hem i trastem olgeta.—Plis lukluk bokis ya “?Man No Enjel We i Stret Gud Olgeta, Hem i Save Mekem Sin?”

◼ “Setan i wok blong God” Samfala oli ting se tingting ya i stap long Baebol long buk blong Job. Baebol i talem se Setan i “stap go olbaot long evri ples long wol.” Wan buk long saed blong Baebol i talem se ol tok ya oli blong tokbaot wok blong ol man Pesia bifo, we oli stap wokbaot olbaot mo oli stap talemaot long king ol samting we oli faenemaot. (Job 1:7) Be sipos Setan i stap wok blong God blong faenemaot ol samting we oli stap hapen, bambae hem i no nid blong eksplenem long God se hem i “stap go olbaot long evri ples long wol.” Buk blong Job i no soemaot we Setan i stap wok wetem God. Defren olgeta buk ya i singaot nogud enjel ya se Setan, we i minim “Man blong agensem man.” Yes, hemia i soemaot se Setan i bigfala Enemi blong God. (Job 1:6) Sipos i olsem, ?tingting ya se Setan i stap wok blong God i kam wea?

Ol buk we ol man Jiu oli raetem long ol yia 1 K.T.b kasem 99 K.T., oli tokbaot Setan se i stap mekem plan wetem God mo i stap mekem samting we God i wantem. Plante handred yia biaen, Martin Luther, wan man we i mekem sam jenis long tijing blong Protestan Jos i talem sam samting long saed blong Setan. Wan man blong histri, J. B. Russell i talem se Luther i ting se ‘God i yusum Setan olsem wan tul, olsem se i wan huknaef no wan narafala tul blong wokem garen blong hem.’ Russell i talem se long tingting blong Luther, ‘tul ya i glad blong spolem ol rabis gras,’ be tul ya i stap yet long han blong God, i stap mekem samting we God i wantem. Biaen, John Calvin, wan Franis man we i stadi long ol jos, i agri long tijing ya blong Luther. Be tijing ya i mekem plante man long jos oli harem nogud from we oli harem se i no stret. ?Olsem wanem God i save lavem ol man, be i letem nogud fasin i gohed mo i wantem se nogud samting i hapen? (Jemes 1:13) Tijing ya, wetem ol nogud samting we i hapen long ol yia 1900, i mekem se plante man oli no moa bilif long God mo long Setan.

◼ “Setan i no rili stap, hem i pija nomo blong nogud fasin” Sipos yumi ting se Setan i pija nomo blong nogud fasin, bambae yumi no kasem save long sam haf blong Baebol. Yu traem tingbaot wanem we Job 2:3-6 i tokbaot. Sipos Setan i no rili stap, ?God i stap toktok wetem hu? ?Hem i stap toktok long nogud tingting we i stap long Job? ?No hem i stap toktok long hem wan bakegen? ?Yu ting se God i talem ol gudfala tok long saed blong Job, mo biaen God i traem hem, i mekem ol nogud samting i hapen long hem? Sipos yumi ting se God i mekem olsem, yumi stap talem se fasin blong God i nogud. Tingting olsem i no laenap wetem ol tok blong Baebol we i talem se i “no gat wan samting nating long [God] we i no stret.” (Ol Sam 92:15) I no God we i spolem Job. God i no mekem wan nogud samting nating long Job. I klia se Setan i no pija nomo blong rabis fasin mo hem i no wan nogud tingting we i stap long God. Hem i wan enjel we i girap agensem God, i kam Enemi blong God.

?Hu i Rili Rulum Wol?

Tede, plante man oli ting se bilif long Setan i wan tijing blong bifo. Be i no gat wan narafala rod we i eksplenem gud, from wanem i gat plante nogud fasin long wol. Yes, taem ol man oli traem sakemaot tijing ya se Setan i stap, plante man oli no moa bilif long God, mo oli sakemaot ol rul long saed blong fasin we i gud mo fasin we i nogud.

Wan man blong raetem ol naesfala toktok long ol yia 1800, Charles-Pierre Baudelaire, i talem se “bigfala trik blong Setan, hemia blong pulum yumi blong ting se hem i no stap.” Setan i save gud wanem blong mekem blong man i no luksave hem. Mo long rod ya, hem i mekem se plante man oli no moa bilif long God. Sipos Setan i no rili stap, i min se God i stamba blong ol nogud fasin. Hemia nao tingting we Setan i wantem se ol man oli gat.

Olsem wan bigman blong brekem loa, Setan i traem mekem wanem we hem i wantem long fasin we man i no luksave hem. ?Setan i stap mekem wanem? Baebol i ansa se: ‘Setan we i rabis god blong wol ya hem i satem tingting blong ol man finis, nao oli stap long tudak, oli no save bilif. Hem i stap blokem olgeta, blong oli no luk laet ya we i stap saenaot i go long olgeta. Laet ya i kamaot long gud nius blong Jisas Kraes, we hem i stret pija blong God.’—2 Korin 4:4.

I gat wan moa kwestin we i impoten blong save ansa blong hem. ?Bambae God i mekem wanem long nogud enjel ya we i stamba blong ol nogud fasin mo ol trabol? Bambae yumi tokbaot samting ya long nekis haf.

[Ol futnot]

[Tok blong makem poen long pej 5]

?Setan i stap wok blong God no hem i stap agensem God?

[Bokis/Image blong pija long pej 6]

?Man No Enjel We i Stret Gud Olgeta, Hem i Save Mekem Sin?

Fastaem olgeta, God i mekem ol man mo ol enjel oli stret gud, blong oli save laef olsem we hem i wantem. Be nating se God i mekem Adam i stret gud olgeta, Adam i mas folem ol loa we God i putum long saed blong bodi blong hem. Sipos hem i kakae graon, korel, no wud, bambae hem i harem nogud tumas. Sipos hem i no folem loa blong gravitic nao hem i go antap long wan bigfala hil mo i jam i godaon, bambae hem i ded no i kasem bigfala kil.

Long sem fasin, sipos man no enjel we i stret gud olgeta i no folem ol loa we God i putum long saed blong fasin we i gud mo fasin we i nogud, bambae hem i kasem trabol. Taswe, sipos wan man no wan enjel i no jusum gud samting we hem i mekem, i isi blong hem i mekem samting we i no stret mo hem i mekem sin.—Jenesis 1:29; Matiu 4:4.

[Futnot]