Japta 101

Long Betani, Long Haos Blong Saemon

NAO Jisas i aot long Jeriko, i stap gobak bakegen long Betani. Blong kasem Betani, hem i mas wokbaot wan ful dei, samting olsem 19 kilomita long wan nogud rod. Long semtaem hem i mas klaem i go antap. Jeriko i stap 250 mita antap nomo, be Betani i stap samwe long 760 mita antap. Ating yu rimemba we Betani i ples blong Lasros mo ol sista blong hem. Smol velej ya i no longwe long Jerusalem, samwe long tri kilomita nomo. Hem i stap long is saed blong Hil blong ol Oliftri.

Nao plante man oli aot long evri ples, oli go finis long Jerusalem blong mekem Lafet blong Pasova. Olgeta oli go long Jerusalem bifo long lafet ya blong mekem spesel wosip, blong oli kam klin long fes blong God. Maet oli bin tajem wan dedbodi no mekem wan narafala samting we i save mekem se oli no klin long fes blong God. Taswe oli mas mekem sam spesel samting blong oli kam klin, nao oli save joen long Lafet blong Pasova. Nao olgeta ya we oli kamtru fastaem long haos prea blong God, oli stap asaskem long olgeta se: ‘?Bambae Jisas i kam long lafet ya, no i no save kam?’

Long Jerusalem, ol man oli gat ol defren tingting long saed blong Jisas, mo oli stap agyu from. Olgeta evriwan oli save se ol lida blong skul blong ol man Jyu oli wantem holem Jisas blong kilim hem i ded. Oli talem finis long ol man se sipos oli faenem Jisas, oli mas kam talem long olgeta. I no longtaem ol lida ya oli bin traem tri taem blong kilim Jisas i ded: Fastaem long Lafet blong ol Wansaed Haos, afta, long Lafet blong Dedikesen, mo bakegen, taem Jisas i mekem Lasros i laef bakegen long ded. Taswe ol man oli stap tingbaot se Jisas bambae i kamaot long open ples bakegen, no no gat. Oli stap asaskem long olgeta se: “?Yufala i stap tingbaot olsem wanem?”

Long kalenda blong ol man Jyu, oli mekem Lafet blong Pasova long Naesan 14. Jisas i kamtru long Betani sikis dei bifo long Pasova. Hemia samtaem long sapa long Fraede, i olsem stat blong Naesan 8. Sabat dei i stat taem san i godaon long Fraede i go kasem taem san i godaon long Sarede. Jisas i no save wokbaot i kam long Betani long Sabat dei, from we loa blong ol man Jyu i talem se i tabu blong wokbaot long Sabat dei. Nao ating Jisas i mekem olsem we hem i mekem bifo, hem i go long haos blong Lasros, ale hem i slip long ples ya long Fraede naet.

Long sapa long Sarede, wan man Betani i singaot Jisas wetem ol man blong hem blong oli kam kakae long haos blong hem. Nem blong man ya, Saemon. Fastaem, man ya i gat leprosi, be ating Jisas i bin mekem bodi blong hem i kamgud bakegen. Mata, we hem i wan woman blong wok, hem i stap karem kakae i kam long olgeta. Be Meri i stap lesin long Jisas, olsem we hem i mekem evritaem. Nao, hem i mekem wan samting we plante man oli no glad from.

Meri i tekem wan botel we wan haf lita senta i stap long hem. Oli wokem senta ya “long nad,” wan gudfala gras blong India we praes blong hem i antap tumas. !Yes, praes blong hem i olsem pei blong wan leba blong wan ful yia! Nao Meri i kafsaedem senta ya i go long hed mo long leg blong Jisas, mo i ravem leg blong Jisas long hea blong hem blong mekem i drae bakegen. Nao haos ya i fulap gud long gudfala smel blong senta ya.

Be i gat sam disaepol oli stap we oli kros. Nao oli stap taltalem long olgeta se: “?From wanem hem i spolem senta ya olsem?” Nao Judas Iskariot i girap, i talem se: “?From wanem hem i no salem senta ya blong kasem mane blong givim long ol puaman? !Hemia i naf blong kasem [300 denarias, NW] ya!” Hem i tok olsem, be i no from we hem i kea long ol puaman, i from we hem i man blong stil. Hem i stap holem basket blong mane blong olgeta disaepol, mo samtaem hem i save stil long hem.

Be Jisas i blokem tok blong olgeta, i talem se: “E, yufala i livim woman ya. ?Weswe yufala i stap spolem hem? Hem i mekem wan gudfala wok ya long mi. Ol puaman bambae oli stap oltaem wetem yufala. Mo sipos yufala i wantem, oltaem yufala i save mekem i gud long olgeta. Be mi, bambae mi no save stap oltaem wetem yufala. Woman ya i mekem wan samting we hem i naf blong mekem. Hem i kafsaedem senta ya i go long bodi blong mi blong mekem mi mi rere blong oli berem mi. Mo tru mi talem long yufala, long evri ples long wol we bambae oli talemaot gud nyus blong mi, be bambae oli mas store long samting ya we woman ya i mekem, blong tingbaot hem bakegen.”

Jisas i stap 24 haoa long Betani finis, ale toktok i goraon se hem i stap. Plante man oli harem nyus ya, nao oli kam long haos blong Saemon blong luk Jisas. Be oli no kam blong luk Jisas nomo. Oli wantem luk Lasros tu, we hem i stap wetem Jisas. Nao ol jif pris oli agri se oli mas kilim Lasros tu i ded wetem Jisas. ?From wanem? From we plante man Isrel, taem oli luk se Lasros i laef bakegen long ded, oli no moa biaen long olgeta, oli bilif long Jisas. !Tru, ol lida blong skul ya oli rabis nomo! Jon 11:55 kasem 12:11; Matyu 26:6-13; Mak 14:3-9; Ol Wok 1:12.

▪ ?Long haos prea long Jerusalem, ol man oli stap talem wanem? ?From wanem?

▪ ?Olsem wanem yumi save se Jisas i no kamtru long Betani long Sarede, be hem i kamtru long Fraede?

▪ ?Taem Jisas i kamtru long Betani, ating hem i stap wea long Sabat dei?

▪ ?Meri i mekem wanem we plante man oli no glad long hem from? ?Olsem wanem Jisas i blokem tok blong olgeta?

▪ ?Ol jif pris oli mekem wanem we i soemaot rabis fasin blong olgeta?