Japta 15

Faswan Merikel Blong Jisas

JISAS i singaot Andru mo Pita mo Jon mo Filip mo Nataniel mo ating Jemes blong kam ol faswan disaepol blong hem. Nao wan no tu dei i pas finis. Olgeta oli stap wokbaot blong gobak long ples blong olgeta long Galili. Oli stap go long velej blong Nataniel, nem blong hem Kena. Kena i stap antap long ol hil kolosap long Nasaret, ples we Jisas i gruap long hem. Oli stap go from wan lafet blong mared long Kena.

Mama blong Jisas, Meri, hem tu i kam long lafet ya. Hem i wan fren blong famle blong tufala we bambae tufala i mared. Taswe i luk olsem we Meri i stap givhan long olgeta blong mekem kakae mo blong givimaot kakae long ol man long lafet ya. Taswe hem i kwik blong luk we oli sot long wan samting, nao hem i go talem long Jisas se: “Olgeta oli no moa gat waen nao.”

I olsem we Meri i askem long Jisas blong mekem wan samting blong givim moa waen long olgeta. Fastaem Jisas i no wantem. Hem i talem se: “?Woman, olsem wanem yu yu putum samting ya long mi?” God i makemaot hem se bambae hem i King. Taswe ol famle mo fren blong hem oli no bos long ol wok blong hem. Ale Meri i waes, hem i livim bisnes ya long han blong boe blong hem. Hem i talem nomo long ol man blong wok se: “Yufala i mas mekem olsem we hem i talem.”

Nao i gat sikis bigfala dram blong wora oli stap long ples ya. Olgeta oli wokem long ston, mo wan i naf blong samting olsem 40 lita wora i go insaed. Nao Jisas i talem long ol man blong wok i se: “Yufala i fulumap ol dram ya long wora.” Ale, olgeta oli fulumap olgeta, nao hem i talem long olgeta se: “Ale, yufala i tekem sam wora ya, yufala i karem i go long man ya we i bos long lafet.”

Olgeta oli mekem olsem, nao taem man ya i dring wora ya, hem i sapraes tumas we hem i wan nambawan waen. Hem i no save se waen ya i kam from wan merikel blong Jisas. Nao hem i singaot long man we i mared, i talem long hem se: “Oltaem ol man oli save givimaot ol bes waen fastaem, mo biaen, taem we ol man oli dring plante waen lelebet, oli save givimaot ol narawan we i no beswan. Be yu yu stap holem beswan, kam kasem naoia.”

Hemia faswan merikel we Jisas i mekem, nao taem ol nyufala disaepol blong hem oli luk bigfala paoa we hem i gat, bilif blong olgeta i kam strong moa. Biaen long mared ya, Jisas wetem mama blong hem mo ol brata blong hem oli wokbaot oli godaon long taon ya Kapaneam, kolosap long bigfala lugun blong Galili. Jon 2:1-12.

▪ ?Mared long Kena i kamaot long wanem taem long minista wok blong Jisas?

▪ Fastaem Jisas i no wantem mekem samting we mama blong hem i talem. ?From wanem?

▪ ?Jisas i mekem wanem merikel? ?Taem ol narafala oli luk samting ya, oli tingting olsem wanem?