Japta Naen
Hop Blong Laef Bakegen i Givim Paoa Long Yumi
1. ?Sipos i no gat hop blong laef bakegen, ol dedman bambae oli stap olwe olsem wanem?
?YU YU lusum wan fren no famle finis long ded? Sipos i no gat laef bakegen, bambae yu neva gat hop blong luk olgeta ya bakegen. Bambae oli stap ded olwe olsem we Baebol i tokbaot se: “Ol man we oli ded finis oli no moa save wan samting . . . from we . . . i no gat wok, mo tingting, mo save, mo waes long Hom blong ol Dedman [beregraon], mo hemia nao ples we bambae yumi go long hem.”—Prija 9:5, 10.
2. ?Promes blong laef bakegen long ded i givim wanem hop long yumi?
2 Jeova i gat sore, taswe hem i givim janis long plante milian man we oli ded finis blong oli kambak bakegen mo harem gud long laef we i no save finis. From samting ya, yu save harem gud tumas blong save se wan dei, long niufala wol blong God, bambae yu joen bakegen wetem ol fren mo famle blong yu we oli stap slip long ded.—Mak 5:35, 41, 42; Ol Wok 9:36-41.
3. (a) ?Olsem wanem laef bakegen long ded i givhan bigwan blong mekem stamba tingting blong Jeova i kamtru? (b) ?Wetaem hop blong laef bakegen i givim paoa long yumi moa?
3 From hop blong laef bakegen long ded, yumi no nid blong fraet bigwan long ded. I tru, Jeova i save letem Setan i traem ol man blong Hem kasem ded blong traem pruvum toktok blong hem se man bambae i “lego olgeta samting we hem i gat blong i sevem laef blong hem.” Be bambae Jeova i neva letem Setan i spolem yumi blong olwe. ( Job 2:4) Jisas i stap tru long God gogo kasem we hem i ded, mo from samting ya God i mekem hem i laef bakegen blong go long heven. Long rod ya, Jisas i save karem praes blong sakrefaes blong hem we i stret gud olgeta i go long Papa blong hem long heven. Sakrefaes ya i blong mekem i gud long yumi from we hem i save sevem laef blong yumi. From laef bakegen long ded, “smol kampani blong ol sipsip” we bambae oli rul wetem Kraes, oli gat hop blong joen wetem hem long Kingdom blong heven. (Luk 12:32, NW ) Ol narafala man we oli ded oli gat hop blong laef bakegen blong kasem laef we i no save finis long wan paradaes long wol. (Ol Sam 37:11, 29) Olgeta Kristin oli faenem se hop ya blong laef bakegen long ded i givim paoa we i “bigwan tumas” taem oli fesem traem we i mekem se maet oli lusum laef blong olgeta.—2 Korin 4:7.
Wan Stamba Tijing Blong Kristin Bilif
4. (a) ?Olsem wanem laef bakegen long ded hem i wan “stamba tijing”? (b) ?Wanem tingting blong bighaf blong ol man long saed blong laef bakegen long ded?
4 Olsem Hibrus 6:1, 2 i soem, laef bakegen long ded hem i wan “stamba tijing.” Hem i wan haf blong fandesen we bilif blong yumi i stanap long hem. Sipos yumi no bilif long laef bakegen, bambae yumi neva kam bigman long Kristin bilif. (1 Korin 15:16-19) Be, tijing blong Baebol long saed blong laef bakegen long ded i narakaen long tingting blong bighaf blong ol man long wol. Plante man we oli no save trutok, oli ting se laef we yumi gat naoia, hemia nomo laef we bambae yumi gat. Taswe, oli ronem ol pleplei mo oli traem harem gud long laef blong olgeta naoia. Mo tu, i gat sam man we oli folem bilif blong skul blong olgeta—ol Kristin skul no hiten skul—we oli ting se oli gat wan sol we i no save ded samtaem. Be bilif ya i no laenap wetem tijing blong Baebol long saed blong laef bakegen long ded. Sipos i tru se man i gat wan sol we i no save ded, i no nidim blong God i mekem ol dedman oli laef bakegen. Sipos man i traem joenem tufala tijing ya tugeta, bambae hem i konfius bigwan i bitim we hem i gat hop. ?Olsem wanem yumi save halpem ol man we hat blong olgeta i stret blong oli save trutok?
5. (a) ?Bifo we wan man i save gat tangkiu from laef bakegen, hem i mas save long wanem? (b) ?Wanem ol vas blong Baebol we bambae yu yusum blong soem se sol hem i wanem? ?mo blong soem olsem wanem long man taem hem i ded? (c) ?Yumi save mekem wanem sipos man we yumi toktok wetem hem, i yusum wan Baebol we i haedem trutok?
5 Bifo we wan man i save luksave se laef bakegen long ded hem i wan nambawan presen blong God, hem i mas kasem save fastaem long sol se hem i wanem, mo olsem wanem long man taem hem i ded. Plante taem, i naf blong yusum sam vas blong Baebol nomo blong mekem ol poen ya oli klia long tingting blong wan man we i hanggri long ol trutok blong Baebol. ( Jenesis 2:7; Ol Sam 146:3, 4; Esikel 18:4) Be sam niu translesen blong Baebol oli haedem trutok long saed blong sol. Taswe i impoten blong jekem lanwis we oli raetem Baebol long hem fastaem.
6. ?Olsem wanem yu yu save halpem wan man blong kasem save tru mining blong sol?
6 Baebol ya New World Translation i givhan bigwan blong save wanem toktok we ol faswan lanwis blong Baebol oli yusum. Oltaem Baebol ya i tanem Hibru tok ya neʹphesh, mo Grik tok ya psy·kheʹ i kam “sol.” Long Appendix blong Baebol ya i gat wan lis blong plante vas we yu save faenem ol tok ya long olgeta. Plante narafala Baebol oli no yusum sem tok oltaem blong tanem Hibru no Grik wod ya. Samtaem oli tanem tufala tok ya i kam “sol” be samtaem oli tanem i kam “laef samting,” “man,” mo “laef.” Samtaem sipos i gat tok ya “neʹphesh blong mi” oli tanem nomo se “mi,” no sipos i gat “neʹphesh blong yu” oli putum nomo se “yu.” Sipos wan Baebol studen i tekem ol defdefren Baebol mo i skelem olgeta wetem New World Translation, samting ya i save givhan long hem blong luksave se long Hibru mo Grik lanwis oli yusum tok ya “sol” blong tokbaot ol man wetem anamol tu. Be neva ol tok ya oli minim wan samting we ae i no save luk, olsem wan spirit we i aot long bodi taem man i ded mo i gohed blong laef samples.
7. ?Olsem wanem yu save yusum Baebol blong soem se ol man oli stap olsem wanem long Seol? Hades? mo Gehena?
7 Mo tu, New World Translation i yusum tok ya “Seol” oltaem blong tanem Hibru tok ya sheʼohlʹ, mo i yusum “Hades” blong talem Grik tok ya haiʹdes, mo bakegen i yusum “Gehena” blong tanem narafala Grik tok ya geʹen·na. Mining blong tok ya “Seol” i sem mak long mining blong tok ya “Hades.” (Ol Sam 16:10, NW; Ol Wok 2:27, NW ) Baebol i soem klia se Seol mo Hades tugeta i minim beregraon blong man nomo mo ples blong ol dedman, i no wan ples we i gat laef long hem. (Ol Sam 89:48, NW; Revelesen 20:13, NW ) Mo tu, Baebol i soemaot se ol man oli save aot long beregraon ya mo laef bakegen long ded. ( Job 14:13, NW; Ol Wok 2:31, NW ) Defren olgeta, Gehena i min se man i no gat hop blong laef bakegen long fiuja. I no gat wan vas blong Baebol we i talem se i gat ol laef sol oli stap long ples ya.—Matiu 10:28, NW.
8. ?Stret save long saed blong laef bakegen long ded i save mekem wanem long tingting mo fasin blong wan man?
8 Taem ol samting ya oli klia long tingting blong wan man, nao yu save halpem hem blong kasem mining blong laef bakegen long ded. Man ya i save stat blong gat tangkiu long Jeova from lav we hem i soem taem hem i givim hop ya long ol man. Hop ya i daonem soasore we ol man oli gat taem oli lusum wan fren no famle long ded, from we oli glad blong tingbaot se bambae oli save luk hem bakegen long niufala wol blong God. Save we yumi kasem long saed ya i impoten tu from we hem i halpem yumi blong kasem save bigfala samting we ded blong Kraes i mekem long ol man. Ol Kristin long faswan handred yia oli luksave se laef bakegen blong Jisas Kraes, hem i wan samting we i impoten long Kristin bilif from we taem Jisas i laef bakegen, hem i openem rod long ol narafala man blong oli save laef bakegen. Oli wok strong blong talemaot long ol man se Jisas i laef bakegen long ded mo olsem wanem bilif ya i givim hop long ol man. Tede tu, ol man we oli tangkiu bigwan from hop ya blong laef bakegen long ded oli wantem serem sas trutok ya wetem ol narafala.—Ol Wok 5:30-32; 10:42, 43.
‘Ki Blong Hades’
9. ?Fastaem Jisas i yusum “ol ki blong ded mo Hades” long hu?
9 Olgeta we bambae oli joen wetem Kraes blong rul long Kingdom blong hem long heven, oli mas ded fastaem. Be oli save gud tok ya we Jisas i bin talem blong mekem tingting blong olgeta i strong, se: “Fastaem mi mi ded, be yufala i luk, naoia mi mi laef, mo bambae mi laef gogo i no save finis. Mi mi holem ol ki blong ded mo Hades.” (Revelesen 1:18, NW ) ?Hem i minim wanem? Hem i stap tokbaot samting we i bin hapen long laef blong hem. Hem tu i bin ded. Be God i no lego hem i stap long Hades. Long namba tri dei, Jeova i mekem hem i laef bakegen wetem wan spirit bodi mo hem i no moa save ded bakegen. (Ol Wok 2:32, 33; 10:40) Antap long hemia, God i givim “ol ki blong ded mo Hades” long Jisas blong bambae hem i save tekemaot ol narafala man long beregraon mo mekem oli fri long sin blong Adam. From we Jisas i holem ol ki ya hem i save mekem ol gudfala man blong hem oli laef bakegen long ded. Kongregesen blong hem we tabu spirit i makemaot olgeta, oli ol faswan man we hem i mekem oli laef bakegen blong kasem laef we i no save finis samtaem long heven. Laef ya i olsem laef we Papa blong hem i givim long hem.—Rom 6:5; Filipae 3:20, 21.
10. ?Wetaem ol Kristin we tabu spirit i makemaot olgeta oli laef bakegen?
10 ?Wetaem ol Kristin we tabu spirit i makemaot olgeta bambae oli laef bakegen blong go long heven? Baebol i soemaot se hemia i stat finis. Aposol Pol i eksplenem se olgeta ya bambae oli laef bakegen long ‘taem ya we Kraes i stap finis,’ hemia i min se i stat long 1914. (1 Korin 15:23, NW ) Taem ol tabu Kristin ya oli finisim laef blong olgeta long wol, long taem ya we Kraes i stap finis olsem king, oli no nid blong stap slip long ded mo wet gogo kasem we Masta blong olgeta i kambak. Stret long taem ya we oli ded, oli girap bakegen wetem spirit bodi, bodi blong olgeta i jenis ‘wantaem nomo, olsem taem man i satem ae.’ !Olgeta ya oli kasem wan glad we i bigwan tumas from we frut blong ol gudfala wok we oli bin mekem bambae ‘oli tekem i go wetem olgeta’!—1 Korin 15:51, 52, NW; Revelesen 14:13.
11. ?Bighaf blong ol man we oli ded finis bambae oli laef bakegen long weples, mo samting ya bambae i stat wetaem?
11 Be laef bakegen long ded i no blong olgeta ya nomo we bambae oli go laef long heven blong rul long Kingdom. Yumi save samting ya from we Revelesen 20:6 (Nyutesteman wetem Ol Sam long Bislama) i talem se ‘olgeta ya oli laef bakegen fastaem,’ hemia i min se i mas gat wan narafala grup we i laef bakegen biaen. Olgeta we bambae oli laef bakegen biaen, oli gat nambawan hop ya blong laef olwe long wan paradaes long wol. ?Samting ya bambae i hapen wetaem? Buk blong Revelesen i soem se bambae hem i hapen afta we God i finisim “wol mo heven”—hemia ol rabis man wetem ol gavman blong olgeta. Taem ya i stap kam klosap. Nao biaen, long stret taem we God i makem, bambae hem i stat mekem ol dedman oli laef bakegen long wol ya.—Revelesen 20:11, 12.
12. ?Hu sam long ol gudfala man blong bilif we bambae oli laef bakegen long wol ya, mo from wanem yumi glad tumas long samting ya?
12 ?Hu olgeta we bambae oli girap bakegen blong laef long wol ya? Bambae i gat ol gudfala man blong wok blong Jeova we oli laef longtaem bifo. Ol man mo woman ya oli bilif strong long laef bakegen long ded taswe oli “no wantem lego bilif blong olgeta, blong oli save go fri.” Hemia i min se oli no wantem lego God, nating sipos oli save se bambae oli kasem kil, no bambae oli ded. !Bambae yumi glad tumas blong toktok stret wetem wanwan long olgeta ya mo harem stori blong olgeta we maet haf blong hem nomo i stap long Baebol! Long olgeta ya we bambae oli laef bakegen long ded, i gat Ebel, we hem i faswan witnes blong Jeova. I gat Inok mo Noa, we tufala i no fraet nating blong talemaot ol woning blong Jeova bifo we Bigfala Wota i ron. Ebraham mo Sera tu, we tufala i givim kakae long ol enjel. I gat Moses, we i kasem Loa blong God long Bigfala Hil ya Sinae. Mo i gat ol profet olsem Jeremaea, we i stap taem Jerusalem i lus long 607 B.K.T.,a mo Jon Baptaes, we i harem God hem wan i talemaot se Jisas i pikinini blong Hem. Antap long olgeta ya, i gat plante narafala man mo woman blong bilif we oli ded long taem blong ol las dei blong rabis wol ya, olgeta tu bambae oli laef bakegen.—Hibrus 11:4-38; Matiu 11:11.
13, 14. (a) ?Wanem bambae i hapen long Hades mo ol dedman we oli stap long hem? (b) ?Hu bambae i laef bakegen tu, mo from wanem?
13 Afta long taem ya, sam narafala man, we oli no man blong God, bambae oli laef bakegen long ded, mekem se bambae beregraon i emti. Yumi save se beregraon bambae i emti, taem yumi tingbaot wanem we Jisas bambae i mekem wetem ‘ki blong Hades,’ blong mekem i gud long ol man. Hemia i kam klia long wan vison we aposol Jon i luk. Hem i luk we wan enjel i sakem Hades i go long “bigfala hol blong faea.” (Revelesen 20:14) ?Hemia i minim wanem? Hem i min se Hades, beregraon blong ol man, bambae i lus blong olwe. Yes, bambae i no moa gat beregraon from we ol dedman blong hem bambae oli laef bakegen. Olgeta ya we oli wosipim Jeova, wetem samfala ya tu we oli man nogud, bambae Jisas i sore long olgeta, i mekem olgeta oli laef bakegen. Tok Blong God i mekem yumi sua long samting ya se: “God bambae i mekem olgeta man we oli ded oli laef bakegen, ol man we oli stret, wetem ol man we oli no stret.”—Ol Wok 24:15.
14 Ol man nogud ya bambae oli no laef bakegen blong kasem jajmen blong go ded bakegen. Nogat. Taem olgeta ya oli laef bakegen bambae oli stap long wan wol we stret fasin nomo i stap long hem aninit long Kingdom Blong God. From samting ya bambae oli kasem help blong oli mekem laef blong olgeta i laenap wetem ol stret fasin blong Jeova. Vison blong Jon i soem se ‘ buk blong laef ’ bambae i open. Ol man nogud ya we oli jenisim fasin blong olgeta, bambae oli gat janis se nem blong olgeta tu i go long buk ya. God bambae i ‘jajem olgeta dedman ya wanwan folem ol wok blong olgeta’ we oli mekem afta we oli laef bakegen. (Revelesen 20:12, 13, NW ) Taswe, taem yumi tingbaot laswan jajmen ya, yumi save talem se olgeta ya oli gat janis blong stap olsem man we oli “girap bakegen blong kasem laef ” no oli save “girap bakegen blong bigfala kot bambae i jajem [panisim] olgeta.”—Jon 5:28, 29, NW.
15. (a) ?Hu bambae i no save laef bakegen? (b) ?Stret save we yumi gat long saed blong laef bakegen i mas mekem wanem long yumi?
15 Be, i no olgeta man evriwan we oli laef bifo mo oli ded finis, we bambae oli laef bakegen. I gat sam man oli mekem sin we God i no save fogivim. Ol man ya oli no go long Hades, be oli go long Gehena, we i min se oli ded blong olwe. Long olgeta ya, i gat ol man we bambae oli ded long “bigfala trabol,” we i klosap nao. (Matiu 12:31, 32; 23:33, NW; 24:21, 22; 25:41, 46; 2 Tesalonaeka 1:6-9) Taswe, i tru se bambae Jeova i soem bigfala sore taem hem i tekemaot ol dedman long Hades. Be, hemia i no min se yumi no nid blong wari long wanem we yumi stap mekem long laef blong yumi naoia. Yumi no save gat hop blong laef bakegen sipos yumi minim nomo blong go agensem hae rul blong Jeova. Save ya i mas mekem we yumi wantem moa blong soem bigfala tangkiu long kaengud fasin blong God, mo mekem laef blong yumi i laenap wetem wanem we hem i wantem yumi blong mekem.
Hop Blong Laef Bakegen i Mekem Yumi Strong
16. ?Olsem wanem hop blong laef bakegen i save givim paoa?
16 Sipos yumi rili bilif long laef bakegen, yumi kasem bigfala paoa from. Sipos yumi olfala finis, yumi save se bambae yumi no save seftem ded i go longwe moa—nomata wanem meresin we yumi tekem. (Prija 8:8) Be sipos yumi bin stap tru long Jeova mo mekem wok blong hem wetem ogenaesesen blong hem, yumi save sua long fiuja blong yumi. From we i gat hop se ol dedman bambae oli girap, yumi save se bambae yumi harem gud bakegen long laef, long stret taem we God i wantem. !Tingbaot laef ya! Bambae hem i nambawan tumas, hem i “laef ya we i prapa wan” we aposol Pol i tokbaot.—1 Timoti 6:19; Hibrus 6:10-12.
17. ?Wanem i save halpem yumi blong holemstrong long Jeova?
17 Taem yumi save se bambae ol dedman oli laef bakegen mo taem yumi save Hemia we bambae i mekem samting ya, yumi naf blong holemstrong long bilif. Save ya i mekem yumi strong blong stap tru long God nating sipos ol man nogud oli spolem yumi gogo klosap yumi ded. Longtaem finis i kam, Setan i yusum fraet long ded olsem wan tul blong holem ol man oli stap aninit long paoa blong hem. Be Jisas i no fraet long ded. Hem i holemstrong long Jeova go kasem ded blong hem. From ransom sakrefaes, Jisas i mekem rod blong ol man oli no moa fraet long ded.—Hibrus 2:14, 15.
18. ?Wanem i bin halpem ol man blong Jeova blong gat gudnem olsem ol man we oli holemstrong long God?
18 Ol man blong Jeova we oli bilif long sakrefaes blong Kraes mo long laef bakegen, oli bin wokem wan gudnem olsem ol man we oli holemstrong long God. Taem oli fesem hadtaem, oli pruvum se “oli no tingbaot laef blong olgeta” moa i winim we oli lavem Jeova. (Revelesen 12:11) Oli waesgud, oli no lego ol Kristin rul blong traem sevem sotfala laef ya blong naoia. (Luk 9:24, 25) Oli save se sipos oli lusum laef blong olgeta naoia from we oli holemstrong long hae rul blong Jeova, be bambae Jeova i blesem olgeta biaen taem hem i mekem oli laef bakegen. ?Yu yu gat bilif olsem? Yu save gat bilif olsem sipos yu rili lavem Jeova mo yu gat bigfala tangkiu from hop blong laef bakegen.
[Futnot]
a B.K.T. i minim Bifo Kristin Taem.
Tingtingbak
• ?From wanem man i nidim save long saed blong sol mo ded bifo we hem i save bilif long laef bakegen?
• ?Hu olgeta we bambae oli laef bakegen long ded, mo save ya i mas mekem wanem long yumi?
• ?Olsem wanem hop blong laef bakegen long ded i mekem yumi strong?
[Tok blong pija long pej 85]
Jeova i promes se man we i stret wetem man we i no stret bambae oli laef bakegen long ded