!Taem We “Olgeta Samting Oli Kam Niuwan Bakegen” i Klosap Nao!

Smoltaem bifo we Jisas i go antap long heven, sam long ol trufala disaepol blong hem oli askem long hem se: “Masta. ?I stret taem nao blong yu mekem we ol laen blong Isrel oli gat king blong olgeta bakegen, no i no taem blong hem yet?” Ansa blong Jisas i soem se plante yia i mas pas bifo we Kingdom i kam. Long taem ya, ol man blong Jisas bambae oli gat plante wok blong mekem. Bambae oli mas talemaot Jisas long “Jerusalem, mo long olgeta ples long Judia mo Sameria, gogo [oli] finisim olgeta ples long wol.”—Ol Wok 1:6-8.

OL MAN blong Jisas oli no save mekem bigfala wok ya long sam dei, sam wik, no sam manis nomo, nogat. Be kwiktaem nomo, ol disaepol oli stat blong prij. Oltaem oli stap tingbaot taem ya we bambae God i mekem ol samting oli kam niuwan bakegen. Wan taem, aposol Pita i stap toktok long wan bigfala hip blong man long Jerusalem, mo i tokbaot samting ya, i se: “Yufala i mas tanem tingting blong yufala from ol sin blong yufala, mo yufala i mas luk long God blong hem bambae i tekemaot ol sin blong yufala. Sipos yufala i mekem olsem, Hae God bambae i save givim niufala paoa long laef blong yufala. Mo hem bambae i save sanem Jisas i kambak, we hem i Mesaea blong yufala, we God i jusumaot hem finis. Be Jisas i mas stap long heven fastaem, gogo kasem taem we bambae olgeta samting oli kam niuwan bakegen, olsem we God i talemaot finis long ol tok blong ol tabu profet blong hem bifo.”—Ol Wok 3:19-21.

Taem ya we “olgeta samting oli kam niuwan bakegen,” bambae i stat long taem we bambae Jeova i “givim niufala paoa” long olgeta man. Taem ya bambae i kamtru long tu fasin. Fastaem, ol samting oli kam niuwan bakegen long saed blong spirit, mo samting ya i stap kamtru naoia. Sekenwan se, biaen bambae wol ya i kam wan paradaes.

Taem We Ol Samting Oli Stat Kam Niuwan Bakegen

Taem aposol Pita i stap toktok long bigfala hip blong man ya long Jerusalem, hem i soemaot klia se ‘fastaem, Jisas i mas stap long heven nomo.’ Hem i mekem olsem kam kasem 1914. Long taem ya, hem i kasem paoa olsem King mo i stat blong rul olsem King we God i jusumaot. Pita i talem se, long taem ya, bambae Jeova “i save sanem” Pikinini blong hem i kam. Hemia i min se bambae Hem i letem Jisas blong i mekem wok blong hem olsem nambawan man blong mekem ol stamba tingting blong God oli kamtru. Baebol i yusum tokhaed blong talemaot samting ya, i se: “Nao woman ya [ogenaesesen blong God long heven] i bonem wan pikinini we i boe [Kingdom blong God we Jisas i rulum]. Pikinini ya bambae i King long olgeta man long wol, mo saen blong paoa blong hem, i wokingstik we oli wokem long aean. Be taem pikinini ya i bon, wantaem nomo oli tekem hem, oli karem hem i go long God we i stap sidaon long bigfala jea blong hem.”—Revelesen 12:5.

Be olgeta nesen long wol ya oli no wantem stap aninit long rul blong Kraes. Oli stap agensem olgeta ya we oli stap aninit long rul blong hem long wol ya, hemia ol Witnes blong Jeova. Olsem ol aposol bifo, ol Witnes oli no fraet blong karem wok ya blong givim witnes long “ol tok we Jisas i talemaot se i tru.” (Revelesen 12:17) Long plante kantri, ol man oli stap agensem ol trufala Kristin ya from wok we oli stap mekem. Long 1918, ol brata we oli lukaot long hedkwota blong Watch Tower Society long Brooklyn, New York, oli pas long kot. Ol man oli mekem giaman toktok long saed blong olgeta, oli jajem olgeta long fasin we i no stret se oli mas kalabus blong plante yia. Nao blong smoltaem, i luk olsem se wok ya blong givim witnes long “olgeta ples long wol” bambae i stop.—Revelesen 11:7-10.

Be, long 1919, ol brata ya we oli lukaot long hedkwota, oli kamaot long kalabus mo biaen, oli stretem olgeta giaman toktok we ol man oli bin mekem agens long olgeta. Ale, kwiktaem nomo oli gohed bakegen long wok ya blong mekem ol samting oli kam niuwan long saed blong spirit. Stat long taem ya, kam kasem naoia, ol man blong Jeova oli stap haremgud long ol nambawan samting long saed blong spirit, i bitim ol narafala man.

Oli stap mekem wan bigfala wok, oli stap tijim ol man blong olgeta nesen blong folem olgeta samting we Kraes i bin talem long ol man blong hem blong mekem. (Matiu 28:20) !Yumi glad tumas blong luk se sam man we bifo, fasin blong olgeta i olsem anamol, oli jenisim fasin blong olgeta, oli kam gudfala man! Oli sakemaot olfala fasin blong laef, olsem fasin blong “kros,” fasin blong “tok agens,” mo fasin blong “yusum ol doti tok,” nao oli putum niufala fasin blong laef we “God nomo i stamba blong hem. Mo oltaem, hem i mekem laef ya i kam niuwan bakegen, blong mekem yufala i savegud hem, mo blong mekem yufala i kam moa olsem hem.” Tede tu, tok blong profet Aesea i stap kamtru long saed blong spirit: “Wael dog [man we bifo, fasin blong hem i olsem wael dog] mo pikinini blong sipsip [man we i gat tingtingdaon] bambae tufala i save stap wanples nomo, we tufala i fren gud. Bigfala puskat ya leped we i stap kakae nani, bambae i save go ledaon wetem pikinini blong nani, we tufala i save slip gud long wan yad nomo. Ol pikinini blong buluk mo ol pikinini blong laeon bambae oli stap kakae wanples nomo.”—Kolosi 3:8-10; Aesea 11:6, 9.

!Bambae Moa Samting i Kam Niuwan!

Antap long ol samting we oli kam niuwan tede, we i mekem se yumi stap long wan paradaes long saed blong spirit, yumi stap kam moa klosap long taem ya we bambae wol blong yumi i kam paradaes. Wan smol haf blong wol ya i bin stap olsem wan paradaes taem Jeova i putum tufala faswan bubu blong yumi, Adam mo Iv, long garen blong Iden. (Jenesis 1:29-31) Hemia nao risen from wanem yumi stap tokbaot Paradaes se bambae i stanap bakegen. Be bifo we wol ya i kam Paradaes, ol giaman skul we oli no givim ona long God, bambae oli mas finis. God bambae i yusum ol politik paoa blong wol ya blong spolem olgeta giaman skul ya. (Revelesen 17:15-18) Biaen, bambae God i spolem ol politik paoa mo ol bigfala bisnes wetem ol man we oli sapotem olgeta. Nao biaen long samting ya, bambae God i putum ol laswan enemi blong hem—Devel Setan mo ol rabis enjel blong hem—long kalabus blong wan taosen yia—wan longfala taem blong mekem ol samting oli kam niuwan bakegen. Long taem ya, “draeples bambae i harem gud, i glad. Ples we ol samting i no save gru long hem, ol flaoa bambae oli stap gru long hem.” (Aesea 35:1) Bambae i gat pis long olgeta ples long wol. (Aesea 14:7) Plante milian dedman, olgeta tu bambae oli laef bakegen long wol ya. Bambae olgeta evriwan oli luk ol blesing we oli kamaot from ransom sakrefaes. (Revelesen 20:12-15; 22:1, 2) Long taem ya, bambae i no moa gat blaenman, man we sora blong hem i fas, mo man we i no save wokbaot. “Bambae i no moa gat man olbaot long kantri ya we i save talem se hem i sik.” (Aesea 33:24) Smoltaem afta long en blong Wan Taosen Yia Rul blong Kraes, bambae Devel Setan i kam fri blong sot taem mo bambae hem i luk olsem wanem stamba tingting blong God i kamtru long wol long taem ya. Biaen, bambae God i kilim hem i ded blong olwe.—Revelesen 20:1-3.

Long en blong wan taosen yia, we i taem blong mekem ol samting oli kam niuwan bakegen long wol ya, “yumi olgeta samting we yumi gat laef, yumi evriwan” bambae i presem Jeova. Mo bambae yumi mekem olsemia oltaem, gogo i no save finis. (Ol Sam 150:6) ?Bambae yu stap long taem ya? Yes, yu save stap long taem ya.