Naf Gud Blong Mekem Wok Blong Tijim Tok Blong God

“God . . . i mekem mifala i naf blong kam minista.”​—2 KORIN 3:​5, 6.

1, 2. ?Wanem traehad we samfala i mekem long saed blong wok blong prij, be from wanem plante taem ol traehad ya oli no wok?

?BAMBAE yu harem olsem wanem sipos ol man oli askem yu blong mekem wan wok we yu no naf blong mekem? Oli givim evri tul no samting we bambae yu nidim blong mekem wok ya. Be yu no save nating wanem samting yu mas mekem blong wok. Antap long hemia, oli wantem se yu finisim wok ya kwiktaem nomo. Ol man oli stap dipen long yu blong mekem wok ya. !Ating bambae yu harem nogud tumas!

² Samting olsem i rili stap hapen tede. Tingbaot wan eksampol. Sam samtaem, ol skul blong Krisendom oli traem blong wokem plan mo mekem wok blong prij long haos wanwan. Be plante taem, ol plan ya oli foldaon, no oli wok smol blong sam wik no manis nomo, mo biaen oli lus. ?From wanem? From we Krisendom i no halpem ol man blong hem blong oli naf blong mekem wok ya. Ol lida blong skul tu, oli no naf blong mekem wok blong prij, nating se oli spenem plante yia long ol skul mo seminari. ?From wanem yumi talem olsem?

3. ?Long 2 Korin 3:​5, 6, wanem tok i kamaot tri taem, mo hem i minim wanem?

³ Tok blong God nomo i save talem sipos wan man i naf blong talemaot Kristin gud nius no nogat. Tabu spirit i pusum aposol Pol blong raetem se: “Mifala i no gat sam samting blong mekem mifala i naf blong talem se, ‘Wok ya i wok blong mifala.’ Olgeta samting ya blong mekem mifala i naf blong wok, oli kamaot long God nomo, from we hem nomo i mekem mifala i naf blong mekem ol wok.” (2 Korin 3:​5, 6) Makem tok ya we i kamaot tri taem se, “mekem mifala i naf.” ?Hem i minim wanem? Wan diksonari (Vine’s Expository Dictionary of Biblical Words) i talem se: “[Long lanwis Grik] taem oli yusum tok ya blong tokbaot ol samting, hem i blong minim se samting ya ‘i naf’ . . . ; be taem oli yusum [tok ya] long saed blong man, hem i minim ‘stret gud blong wok,’ ‘nafgud blong wok.’ ” Taswe, wan man we i ‘naf’ hem i “stret gud blong wok” mo hem i naf blong mekem eni wok we oli givim long hem. Yes, ol trufala man blong talemaot gud nius oli naf blong mekem wok blong God. Oli stret gud, no oli naf blong prij.

4. (a) ?Olsem wanem Pol i soemaot se wok blong prij i no stap long han blong wan smol grup blong man nomo we God i jusum se oli naf? (b) ?Wanem trifala samting we Jeova i yusum blong mekem we yumi naf blong prij?

⁴ ?Be olsem wanem ol man blong God oli save kam nafgud blong mekem wok ya? ?Hemia from we oli gat gudhan? ?Oli gat spesel save? ?Oli go long sam spesel skul blong kasem tijing? Aposol Pol i gat olgeta samting ya. (Ol Wok 22:3; Filipae 3:​4, 5) Nating se i olsem, hem i gat tingting daon mo i luksave se i no from ol spesel skul blong hae save, be from Jeova God nomo, hem i naf blong mekem wok blong prij. ?God i jusum wan spesel grup blong man nomo blong mekem wok ya? Pol i raet i go long kongregesen blong Korin i se “mifala i naf blong mekem ol wok.” Hemia i soemaot we Jeova i stap meksua se olgeta gudfala man blong hem oli stret mo naf gud blong mekem wok ya we hem i givim long olgeta. ?Olsem wanem Jeova i mekem we ol trufala Kristin tede oli naf? Bambae yumi tokbaot tri rod we hem i yusum: (1) Tok blong hem, (2) tabu spirit blong hem, mo (3) ogenaesesen blong hem long wol.

Tok Blong Jeova i Mekem Yumi Naf

5, 6. ?Wanem paoa we Baebol i gat long ol trufala Kristin?

⁵ Fastaem: ?Olsem wanem Tok blong God i givhan long yumi blong mekem wok blong prij? Pol i raetem se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin. Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.” (2 Timoti 3:​16, 17) Taswe, Baebol i save mekem yumi ‘waes long olgeta samting, mo yumi savegud’ olsem wanem blong mekem “gudfala wok” ya blong tijim Tok blong God long ol man. ?Be, olsem wanem long ol narafala man long ol jos blong Krisendom? Olgeta tu oli gat Baebol. ?Weswe buk ya i save givhan long sam man blong oli naf blong wok olsem minista be i no givhan long ol narafala? Ansa i stap long wei we yumi wanwan i yusum mo tingbaot Baebol.

⁶ Sore tumas, plante man we oli go long jos oli no agri wetem mesej blong Baebol olsem “we hem i tok blong God stret.” (1 Tesalonaeka 2:​13) Krisendom i gat wan histri we i nogud tumas long saed ya. Ol lida blong skul oli spenem plante yia blong stadi long ol tijing blong skul. ?Be biaen, oli naf blong kam ol tija blong Tok blong God? Oli no rili naf blong mekem wok ya. !Sam long ol studen we oli go long ol skul ya, fastaem oli gat bilif long Baebol, be taem oli finis, tingting blong olgeta i hafhaf long saed blong Baebol! Ale biaen, oli no moa prijimaot Tok blong God​—from we olgeta wan oli no moa bilif long tok ya​—be oli stat folem defren rod. Oli tekem saed blong ol raorao blong politik, oli wok long komuniti blong mekem laef blong ol man i kam moagud, no oli leftemap ol waes blong man nomo long ol toktok blong olgeta. (2 Timoti 4:3) Defren olgeta, ol trufala Kristin oli folem fasin blong Jisas Kraes.

7, 8. ?Olsem wanem tingting we Jisas i gat long Tok blong God i defren long tingting blong ol lida blong skul long taem blong hem?

⁷ Jisas i no letem ol lida blong skul long taem blong hem oli jenisim tingting blong hem. Nating se Jisas i tijim wan smol grup blong man, olsem ol aposol blong hem, no wan bigfala hip man, hem i yusum Baebol oltaem. (Matiu 13:10-​17; 15:​1-​11) Fasin ya i mekem we hem i defren olgeta long ol lida blong skul long taem ya. Ol lida ya oli strong long ol man olbaot, se oli no gat raet blong faenemaot ol tingting blong God we oli haed. Tru ya, hem i kastom blong wan tija long taem ya blong talem se sam haf blong Baebol oli dip tumas blong tokbaot wetem ol man olbaot. Be hem i gat raet blong tokbaot ol haf ya wetem studen ya nomo we hem i laekem moa​—be long taem we tija ya i mekem olsem, hem i mas toktok wetem wan smol voes nomo mo i mas kavremap hed blong hem. !Ol lida blong skul oli fraet blong yusum sam haf blong Baebol, mo oli fraet tu blong talem nem blong God!

⁸ Jisas Kraes i no olsem. Hem i bilif se i no wan spesel grup nomo we oli mas tingbaot “evri tok we God i talem,” be evri man oli mas mekem samting ya. Jisas i no intres blong givim save long wan spesel grup nomo. Hem i talem long ol disaepol blong hem se: “Ol samting ya we mi mi talem long yufala long tudak, yufala i mas talemaot bakegen long delaet. Mo ol samting ya we mi stap tok smosmol blong talem long sora blong yufala, yufala i mas singaot bigwan blong talemaot long fes blong ol man.” (Matiu 4:4; 10:27) Jisas i wantem tumas blong serem save blong God wetem olgeta man.

9. ?Ol Kristin oli yusum Baebol olsem wanem?

⁹ Tok blong God hem i mas stap olsem stamba blong ol tijing we yumi givim. Eksampol, taem yumi mekem wan tok long Haos Kingdom blong ol Witnes blong Jeova, samtaem i no naf blong ridim wanwan vas nomo we yumi jusum long Baebol. Maet yumi nidim blong eksplenem, yusum pijatok, mo soem olsem wanem vas ya i save wok long laef blong yumi. Wok blong yumi hemia blong karemaot mesej we i stap long ol pej blong Baebol mo putum long hat blong ol man we oli lesin. (Nehemaea 8:8, 12) Yumi mas yusum Baebol taem yumi givim advaes no stretem narafala. Nating se ol man blong Jeova oli toktok long ol defren lanwis mo oli gruap long ol defren kaen laef, olgeta evriwan oli respektem Nambawan Buk ya, Baebol.

10. ?Mesej blong Baebol i save mekem wanem long yumi?

¹⁰ Taem yumi yusum Baebol long rod ya, mesej blong hem i gat paoa. (Hibrus 4:​12) Hem i pulum ol man blong jenisim laef blong olgeta, mo blong ronwe long ol nogud fasin olsem fasin blong slip tugeta bifo mared, fasin blong stilim man no woman blong narafala, fasin blong wosip long aedol, fasin drong, mo stil. Baebol i halpem plante man blong oli sakemaot olfala fasin mo putum niufala fasin. (Efesas 4:​20-​24) Yes, sipos yumi tinghae moa long Baebol i bitim tingting no kastom blong ol man, mo sipos yumi fasgud long Baebol oltaem, bambae hem i save mekem we yumi stret mo naf gud blong kam ol tija blong Tok blong God.

Tabu Spirit Blong Jeova i Mekem Yumi Naf

11. ?From wanem i stret blong talem se tabu spirit blong Jeova hem i “Spirit blong Givhan”?

¹¹ Seken samting we yumi mas tokbaot hemia wok we tabu spirit, no paoa blong Jeova i mekem long yumi blong yumi naf blong wok. Neva fogetem se tabu spirit blong Jeova i wan paoa we i strong moa i winim eni paoa we i stap. Jeova i givim raet long gudfala Pikinini blong hem, blong i yusum paoa ya blong givhan long ol trufala Kristin. I stret nomo we Jisas i tokbaot tabu spirit ya se “Spirit blong Givhan.” (Jon 16:7) Hem i talem long ol man blong hem se oli mas askem tabu spirit ya long Jeova from we oli save sua se bambae hem i save givim long olgeta.​—Luk 11:10-13; Jemes 1:17.

12, 13. (a) ?From wanem i impoten blong prea from tabu spirit taem yumi joen long wok blong prij? (b) ?Olsem wanem ol Farisi oli soem se tabu spirit i no wok long laef blong olgeta?

¹² Evri dei yumi mas prea blong kasem tabu spirit, antap moa taem yumi joen long wok blong prij. ?Paoa ya i save mekem wanem long yumi? Paoa ya i save wokem tingting mo hat blong yumi, mo givhan long yumi blong yumi jenis, yumi kam bigman long tingting, mo blong putum ol niufala fasin long ples blong olfala fasin. (Kolosi 3:9, 10) Paoa ya i save halpem yumi blong wokem ol gudfala fasin olsem Kraes. Plante long yumi i save talem baehat wanem we i stap long Galesia 5:22, 23. Ol vas ya oli givim lis blong ol frut blong tabu spirit blong God. Faswan hemia lav. Fasin ya i impoten tumas long wok blong prij we yumi mekem. ?From wanem?

¹³ Lav i gat paoa mo i save pusum yumi blong mekem samting. Taem ol Kristin oli lavem Jeova mo ol man raonabaot long olgeta, lav ya i pusum olgeta blong talemaot gud nius. (Mak 12:​28-​31) Sipos yumi no gat lav ya, bambae yumi no naf blong wok olsem ol tija blong Tok blong God. Makem gud wanem samting nao i mekem se Jisas i defren olgeta long ol Farisi. Matiu 9:36 i tokbaot Jisas se: “Taem hem i luk ol man we oli plante tumas, hem i sore tumas long olgeta, from we olgeta oli trabol tumas, oli no moa gat paoa, oli olsem ol sipsip we i no gat man blong lukaot long olgeta.” ?Ol Farisi oli tingting wanem long saed blong ol man olbaot? Oli se: “Ol man olbaot ya oli no save Loa blong Moses nating, taswe God i kros long olgeta.” (Jon 7:​49) Ol Farisi ya oli no gat lav long ol man, oli no laekem olgeta nating. I klia se, tabu spirit blong Jeova i no stap wok long ol Farisi ya.

14. ?Lav we Jisas i soem taem hem i prij i mas mekem wanem long yumi?

¹⁴ Jisas i harem save filing blong ol man. Hem i luksave se oli stap harem nogud. Hem i save se oli olsem ol sipsip we i no gat man blong lukaot long olgeta. Jon 2:​25 i talem se Jisas i “savegud wanem i stap long tingting blong man.” Taem God i wokem olgeta samting fastaem, Jisas i givhan long hem olsem man blong mekem ol plan. Taswe, Jisas i gat gud save long saed blong ol man. (Ol Proveb 8:30, 31) Save ya i mekem we hem i lavem ol man moa. !I gud we semfala lav ya i pusum yumi blong mekem wok blong prij! Sipos yumi harem se yumi nidim blong wok moa long saed ya, yumi mas prea long Jeova blong askem tabu spirit long hem, mo biaen yumi save mekem ol wok we oli laenap wetem prea ya. Bambae Jeova i ansa long yumi. Bambae hem i sanem paoa ya we i no gat samting i naf blong blokem, blong halpem yumi blong wokem moa ol fasin olsem Kraes we hem i naf fulwan blong talemaot gud nius.

15. ?Olsem wanem ol tok blong Aesea 61:1-3 oli stret long Jisas mo oli soemaot wanem long saed blong ol tija blong Loa mo ol Farisi?

¹⁵ ?Olsem wanem Jisas i kam we i naf blong mekem ol wok ya we hem i mekem? Hem i se, ‘paoa blong spirit blong Jeova i kam fulap long mi.’ (Luk 4:​17-​21) Yes, Jeova hem wan i makemaot Jisas long tabu spirit blong hem. Jisas i no nidim wan stefeket. ?Tabu spirit i bin putumap ol lida blong skul long taem blong Jisas tu? Nogat. Mo oli no naf tu blong mekem ol tok blong Aesea 61:​1-3 oli kamtru long olgeta. Jisas i ridimaot ol vas ya mo soemaot we hem i mekem ol tok ya oli kamtru. I gud we yu wan yu ridim ol vas ya mo luksave se ol tija blong loa mo ol Farisi oli gat tu fes nomo mo oli no naf blong mekem wok blong God. Oli no gat wan gud nius blong talemaot long ol pua man. ?Yu ting se olgeta ya oli save prij se ol slef bambae oli gofri mo ol blaenman oli save lukluk? !Nogat, from we olgeta nomo oli blaen long saed blong spirit mo oli slef long ol kastom blong man! Yumi mas defren long ol man ya. Yumi mas naf blong tijim ol man.

16. ?Ol man blong Jeova tede oli save harem we oli suagud long wanem samting long saed blong minista wok blong olgeta?

¹⁶ I tru se yumi no go long ol skul blong Krisendom blong kasem hae save. Yumi no kasem wan stefeket blong pruvum se yumi naf blong mekem wok blong tija. ?Hemia i min se yumi sot long save blong tij? !Nogat! Jeova hem wan i putumap yumi olsem ol Witnes blong hem. (Aesea 43:10-12) Sipos yumi prea long hem blong kasem tabu spirit mo sipos yumi mekem wok we i laenap wetem prea blong yumi, bambae yumi save naf fulwan blong mekem wok blong prij. Be yumi no stretgud olgeta mo samtaem yumi mestem blong folem eksampol we Bigfala Tija blong yumi, Jisas, i soem. Nating se i olsem, yumi tangkiu tumas long Jeova from we hem i givim tabu spirit blong hem mo ol samting we yumi nidim blong mekem yumi naf blong tijim Tok blong hem.

Ogenaesesen Blong Jeova i Mekem Yumi Naf

17-19. ?Olsem wanem ol faef miting we ogenaesesen blong Jeova i mekem evri wik i halpem yumi blong kam naf long minista wok?

¹⁷ Naoia bambae yumi tokbaot namba tri rod we Jeova i yusum blong mekem yumi naf blong stap olsem ol tija blong Tok blong hem. Rod ya hemia kongregesen, no ogenaesesen blong Jeova long wol we i stap trenem yumi blong kam ol minista. ?Hem i mekem samting ya olsem wanem? !Tingbaot nambawan program blong ol tijing we yumi stap kasem naoia! Long wan wik nomo yumi stap joen long faef Kristin miting. (Hibrus 10:24, 25) Long Buk Stadi yumi joen tugeta long ol smosmol grup blong mekem wan dip stadi long wan long ol buk we ogenaesesen blong Jeova i givim. Taem yumi lesin mo givim ansa, yumi lanem samting mo yumi leftemap tingting blong ol narafala. Mo tu, brata we i lidim buk stadi ya hem i stap givim tijing mo i lukaot long ol nid blong yumi wanwan. Long Pablik Tok mo Wajtaoa Stadi yumi kasem moa kakae bakegen.

¹⁸ Tiokratik Skul hem i givim advaes long yumi blong yumi save olsem wanem blong tij. Taem yumi rerem ol tok, yumi lanem olsem wanem blong yusum Tok blong God blong tijim narafala long plante samting. (1 Pita 3:​15) ?Samtaem yu rerem wan tok we tijing blong hem yu save finis, be biaen yu faenem se yu lanem wan niufala samting bakegen long saed ya? Hemia samting we i hapen long plante long yumi. Beswan rod blong mekem we save blong yumi i kam klia moa, hemia taem yu tijim save ya long narafala. Nating se samtaem i no yumi we i mekem tok, be yumi save lanem yet blong kam ol gudfala tija. Olgeta studen wanwan oli gat sam gudfala fasin we yumi save lukluk mo yumi save tingbaot olsem wanem blong mekem sem mak.

¹⁹ Miting blong Kingdom Wok, hemia tu i blong mekem we yumi naf blong tijim Tok blong God. Evri wik yumi glad blong harem ol gudfala tok, ol storian, mo luk ol pleplei we oli laenap long wok blong prij. ?Wanem fastok we bambae yu yusum? ?Olsem wanem blong winim wan traem long wok blong prij? ?Wanem sam rod blong prij we maet yumi save traem samtaem? ?Wanem i save halpem yumi blong karem moa frut long wok blong tij taem yumi mekem ol visit mo Baebol stadi? (1 Korin 9:​19-​22) Yumi kasem ansa blong ol kwestin ya long Miting blong Kingdom Wok. Plante long ol haf blong miting ya oli kamaot long Kingdom Wok Blong Yumi, we i wan narafala tul blong givhan long yumi long minista wok.

20. ?Olsem wanem ol miting mo asembli oli rili save givhan long yumi?

²⁰ Taem yumi rerem ol miting mo joen long olgeta, mo taem yumi folem ol samting we yumi lanem long wok blong tijim man, yumi stap trenemgud yumi. Be i gat moa samting yet. I gat sam narafala miting blong yumi, we oli bigwan moa. Hemia ol asembli we oli stret blong rerem yumi long wok blong tijim Tok blong God. !Yumi wantem tumas blong lesin gud mo folem ol advaes we yumi kasem long ol taem ya!​—Luk 8:18.

21. ?Wanem pruf i soem se trening blong yumi i karem frut, mo hu i kasem ona from samting ya?

²¹ ?Wanem i soemaot se trening we Jeova i givim i wokgud? Tingbaot ol pruf ya. Evri yia i gat plante taosen man we oli lanem ol stamba tijing blong Baebol mo oli mekem laef blong olgeta i laenap wetem wanem we God i wantem. Namba blong yumi i stap kam antap, be i no gat wan long yumi we i kasem ona from. Yumi mas gat sem tingting ya we Jisas i gat. Hem i se: “I no gat man i save kam long mi, sipos Papa blong mi we i sanem mi mi kam, hem i no pulum hem i kam.” Olsem ol aposol bifo, bighaf blong yumi i no gat nem mo maet yumi no skul gud. (Jon 6:​44; Ol Wok 4:​13) Wok blong yumi i save karem frut sipos yumi dipen long Jeova. Yes, hem nomo i save pulum ol man we oli gat gudfala hat i kam long trutok. Pol i talem i stret nomo se: “Mi mi planem kakae long garen, nao Apolos i klinim garen ya, be God nomo i stap mekem kakae ya i gru gud.”—1 Korin 3:6.

22. ?From wanem i nogud blong ting se yumi no naf blong mekem Kristin minista wok?

²² Yes, Jeova God i joen fulwan long wok blong yumi blong tijim Tok blong hem. Maet samtaem yumi harem se yumi no naf blong tij. Be tingbaot se, Jeova nao i stap pulum ol man oli kam long hem mo Pikinini blong hem. Jeova nomo i save mekem we yumi naf blong tij wetem help blong Tok blong hem, tabu spirit, mo ogenaesesen blong hem long wol. !I gud yumi folem trening we Jeova i stap givim naoia blong mekem we yumi naf blong wok olsem ol Tija blong Tok blong God!

?Bambae Yu Yu Ansa Olsem Wanem?

• ?Olsem wanem Baebol i mekem yumi naf blong prij?

• ?Wanem wok we tabu spirit i mekem blong bambae yumi naf blong wok olsem ol minista?

• ?Olsem wanem ogenaesesen blong Jeova long wol i halpem yu blong yu naf blong talemaot gud nius?

• ?From wanem yumi no mas fraet blong joen long wok blong prij?

[Tok blong pija long pej 25]

Jisas i wan tija blong Tok blong God we i soem lav long ol man