?Wanem Samting We i Mekem ‘Yu Yu Harem Gud Mo Yu Glad’?
1. ?Long en blong evri manis, wanem samting we i mekem yumi glad?
1 Taem en blong manis i kam mo yumi evriwan i givim ripot, ?wanem samting we i mekem “yu yu harem gud, yu glad”? (Sam 128:2) Maet yu yu spesel paenia mo yu givim ripot blong 130 aoa, no maet yu save kasem 15 minit nomo long wok blong prij, be yumi evriwan i mas glad se yumi mekem wok blong Jehova long olgeta hat blong yumi.—Sam 100:2.
2. ?From wanem yumi mas traehad long wok blong Jehova?
2 Jehova i Hae Masta blong heven mo wol, taswe hem i gat raet blong kasem olgeta samting we i beswan. (Mal. 1:6) From we yumi lavem hem, yumi givim laef blong yumi long hem blong mekem ol samting we hem i wantem. Yumi yusum taem blong yumi, gudhan we yumi gat, mo paoa blong yumi blong mekem wok blong hem. Sipos long en blong dei no long en blong manis, yumi harem se ol samting ya we yumi givim oli beswan, yumi save glad from i olsem se yumi givim “ol fas kakae” blong garen i go long Jehova. (Prov. 3:9) Be sipos yumi harem long tingting blong yumi se samting we yumi givim i no beswan, ale i gud yumi tingbaot wanem we yumi save mekem blong kam gud moa.—Rom 2:15.
3. ?From wanem i nogud blong skelem wok blong yumi wetem wok blong narafala?
3 I Nogud Yu Skelem Yu Wetem “Narafala Man”: I nogud yumi skelem wok blong yumi wetem wok blong narafala, mo i nogud yumi skelem wok we yumi mekem naoia wetem wok we yumi mekem bifo, taem yumi strong yet. Sam samting long laef blong yumi i save jenis. Ol samting we yumi wanwan i naf blong mekem oli defdefren. Taswe sipos yumi stap skelem wok blong yumi wetem wok blong narafala, maet bambae yumi wok blong winim narafala nomo, no maet bambae yumi ting nating long wok blong yumi. (Gal. 5:26; 6:4) Jisas i no skelem wan man wetem narafala man. Hem i talem ol gudfala tok long ol man wanwan from wok we oli naf blong mekem.—Mak 14:6-9.
4. ?Wanem bigfala lesen we yumi lanem long parabol blong Jisas?
4 Long wan parabol, Jisas i tokbaot tri man we oli holem mane blong masta blong olgeta. Hem i talem se masta i “makem save blong olgeta” mo i givim mane we i stret long wok we oli naf blong mekem. (Mat. 25:15) Taem masta i kambak mo i jekemap mane ya we i bin givim long olgeta, hem i luk hu i traehad blong mekem bes blong hem. Man we i traehad blong mekem gudfala wok, masta i talem gudfala tok long hem mo i singaot hem i kam joen long lafet blong hem. (Mat. 25:21, 23) Yumi save mekem bes blong yumi olsem ol man ya. !Taem yumi stap bisi long wok blong talemaot Kingdom, bambae Jehova i glad long yumi, mo yumi tu bambae yumi harem gud, yumi glad!