Baebol i Talemaot Klia Hu i Rulum Wol
WAN taem Jisas i talem se God bambae i “brekem paoa blong Setan, we i stap rulum wol ya.” Long wan narafala taem, hem i talem se ‘Setan ya we i masta blong wol ya, hem i no gat paoa blong mekem wan samting long hem.’ Mo Jisas i talem se “masta blong wol ya Setan, God i jajem hem finis.” (Jon 12:31; 14:30; 16:11) ?From wanem Jisas i talem se Setan i stap rulum wol, be i no Jehova God we i mekem heven mo wol? ?Bambae God i “brekem paoa” blong Setan olsem wanem? ?God i “jajem hem finis” olsem wanem?
Man We i “Stap Rulum Wol Ya” i Soemaot Hem
Plante taem wan bigman blong brekem loa i tokflas from paoa blong hem. Setan i mekem sem mak taem hem i traem Jisas we i Pikinini blong God. Setan i soemaot long Jisas “olgeta kantri” long wol ya, mo i talem long hem se: “Bambae mi mi putum olgeta kantri ya, wetem olgeta gudgudfala samting blong olgeta, oli stap long han blong yu. Olgeta samting ya oli stap long han blong mi finis, mo mi mi save givim long hu man we mi wantem givim long hem. Oraet, sipos yu nildaon, yu mekem wosip long mi, bambae olgeta samting ya i blong yu.”—Luk 4:5-7.
Sipos Setan i pija nomo blong nogud fasin, olsem samfala oli talem, ?bambae yumi kasem save olsem wanem long traem ya? ?Afta we Jisas i baptaes, hem i gat wan nogud tingting? ?Hem i wantem wan samting we i no laenap wetem tingting blong God, nao samting ya i stap traem hem? Sipos i olsem, i min se tok blong Baebol i giaman se “hem i no gat sin.” (1 Jon 3:5) Jisas i no agensem tingting ya se Setan i gat paoa antap long ol man. Defren olgeta, ol tok blong Jisas i soemaot se tingting ya i tru. Hem i talem se Setan i “masta blong wol ya,” i “man blong kilim man” mo i “man blong giaman.”—Jon 14:30; 8:44.
Samwe long 60 yia afta long taem ya we Setan i traem Jisas, aposol Jon i talem long ol Kristin se Setan i gat paoa long ol man. Hem i talem se “olgeta man blong wol ya oli stap long paoa blong Setan.” Mo Jon i talem se Setan i “stap giaman long olgeta man long wol, i lidim olgeta oli go krangke.” (1 Jon 5:19; Revelesen 12:9) I klia se Baebol i tokbaot wan nogud enjel we yumi no save luk hem, we i stap “rulum wol ya.” ?Paoa we nogud enjel ya i gat long ol man i bigwan olsem wanem?
Man We i Rulum Wol i Givim Paoa Long Ol Narafala
Taem aposol Pol i tokbaot se ol Kristin oli mas faet blong holemtaet bilif blong olgeta, hem i talemaot klia ol enemi blong olgeta we oli nogud we oli nogud. Hem i talem se: “Olgeta ya we yumi stap faet agens long olgeta long laef blong yumi, oli no man. Yumi stap faet agens long ol devel we oli stap olbaot long wol ya. Hemia ol lida blong olgeta, mo olgeta we oli gat paoa, mo ol jif blong olgeta we oli stamba blong ol fasin blong tudak long wol ya.” (Efesas 6:12) Yes, yumi no stap faet agensem ol man nomo, be yumi stap faet agensem “ol devel.”
“Ol devel” ya oli no pija blong nogud fasin, be oli ol nogud enjel we oli gat paoa. Setan i yusum ol nogud enjel we oli “livim prapa ples blong olgeta” long heven, blong hem i save gat paoa long ol man.—Jud 6.
Buk blong Daniel long Baebol, i talemaot se “ol jif” ya oli gat paoa antap long wol longtaem finis. Long yia 537 B.K.T.,a ol man Jiu we oli kalabus long Babilon oli gobak long Jerusalem. Profet Daniel i wari long saed blong olgeta, mo blong tri wik hem i prea from olgeta. God i sanem wan enjel blong leftemap tingting blong hem. Enjel ya i eksplenem from wanem hem i no save kam kwik, hem i se: “Rabis enjel ya we i stap lukaot long ol man Pesia, hem i stap agens long mi kam kasem twanti wan dei.”—Daniel 10:2, 13.
?“Rabis enjel ya we i stap lukaot long ol man Pesia,” hem i hu? “Rabis enjel ya” hem i stap wok blong Setan. Hem i gat paoa antap long ol man Pesia. Biaen, enjel blong God i talem se hem i mas gobak blong faet long “rabis enjel ya we i stap lukaot long ol man Pesia,” mo i mas faet agens long “narafala rabis enjel ya we i stap lukaot long ol man Gris.”—Daniel 10:20.
?Yumi lanem wanem long ol tok blong enjel ya blong God? Yumi lanem se i gat “ol jif” blong wol ya we yumi no save luk olgeta, hemia ol nogud enjel. Ol nogud enjel ya oli gat paoa antap long ol defdefren ples long wol, mo oli stap aninit long paoa blong lida blong olgeta, Setan. ?Be wanem tingting blong olgeta? ?Oli wantem mekem wanem long wol ya?
Man We i Rulum Wol i Soemaot Prapa Fasin Blong Hem
Long las buk blong Baebol hemia long Revelesen, aposol Jon i singaot Jisas long narafala nem blong hem Mikael, jif blong ol enjel. Jon i tokbaot se Jisas i winim Setan mo ol nogud enjel blong hem, mo i sakemaot olgeta long heven. Samting ya i mekem bigfala trabol long wol. Baebol i talem se: “Sore tumas long yu, graon, . . . from we Setan i kamdaon finis long yufala. Mo hem i kros tumas, from we hem i save se i gat smol taem nomo blong hem i stap yet.”—Revelesen 12:9, 12.
?Setan i soemaot se hem i kros tumas olsem wanem? Ol man blong brekem loa oli rere blong mekem eni samting we oli mas mekem blong kasem samting we oli wantem. Long sem fasin, Setan mo ol nogud enjel blong hem oli gat strong tingting se bambae oli spolem wol ya mo ol man we oli stap long hem. Oli mekem olsem from we oli save se God bambae i spolem olgeta. Setan i save se hem i gat smol taem nomo i stap. Taswe, hem i yusum ol stamba samting long wol ya we oli stap long paoa blong hem blong spolem laef blong ol man. Wan long ol stamba samting ya hemia ol bigfala bisnes. Setan i yusum ol bigfala bisnes blong pulum tingting blong ol man blong wantem plante samting, nao ol man oli stap yusum tumas ol gudfala samting we oli stap long graon mo long solwota. Long olgeta ples long wol, oli stap spolem graon, solwota, win, ol tri, mo plante narafala samting.—Revelesen 11:18; 18:11-17.
Stat bifo olgeta, fasin blong ol jos mo ol politik paoa i soemaot se Setan i yusum olgeta tu blong bos long ol man. Buk blong Revelesen i talem se ol politik paoa oli olsem ol wael anamol we Setan i givim ‘paoa long olgeta blong wokem plante samting.’ Mo buk blong Revelesen i soemaot se fasin ya we ol politik paoa mo ol jos oli wok wanples, i wan samting blong sem. I olsem we ol politik paoa blong wol oli mekem krangke wetem ol jos. (Revelesen 13:2; 17:1, 2) Yu traem tingbaot samting ya. Long ol handred yia we oli pas, ol haeman oli mekem i nogud long ol narafala man, plante man oli mas wok slef blong narafala, i gat ol bigfala faet, mo i gat ol faet we man i no laekem narafala from laen blong hem. !Plante milian man oli ded from ol samting ya! ?Yu ting se ol rabis samting ya we oli hapen, oli kamaot from prapa fasin blong ol man nomo? ?No yumi kasem ol trabol ya from we ol nogud enjel oli gat paoa long ol man?
Baebol i talemaot klia hu i stap lidim ol haeman mo ol gavman blong wol. Ol man oli stap soemaot tingting mo fasin blong nogud enjel ya we i rulum wol. Mo oli folem tingting blong hem blong mekem eni samting we oli mas mekem blong kasem wanem we oli wantem. Maet ol man oli no save se oli stap mekem olsem. ?Bambae ol man oli stap harem nogud aninit long han blong Setan kasem wetaem?
Ol Samting We Oli Hapen Bifo We Setan i Lus
Ol samting we Kraes i mekem taem hem i stap long wol, oli soemaot se bambae hem i kilim Setan mo ol nogud enjel oli ded. Taem ol disaepol blong Jisas oli stap talem se oli ronemaot ol devel we oli stap long ol man, Jisas i talem long olgeta se: “Mi mi luk Setan i aot long heven, i foldaon olsem we laetning i sut i kamdaon.” (Luk 10:18) Ol tok ya blong Jisas oli soemaot se hem i glad long samting we bambae hem i mekem, taem hem i gobak long heven olsem Mikael, jif blong ol enjel. Bambae hem i winim nogud enjel ya we i stap rulum wol. (Revelesen 12:7-9) Taem yumi stadi gud long ol profet tok long Baebol, yumi kasem save se Jisas i winim Setan long heven, long yia 1914 no smoltaem afta long yia ya.b
Stat long yia 1914, Setan i save se i no longtaem bambae hem i lus. Nating se ‘wol ya i stap long paoa blong Setan,’ plante milian man tede oli no foldaon long ol trik we Setan i yusum blong bos long olgeta. Baebol i givhan long olgeta blong oli luksave hem mo ol plan blong hem. (2 Korin 2:11) Oli putum tingting blong olgeta i stap long ol tok we Pol i talem long ol Kristin se: “God i stamba blong pis blong yumi, mo bambae i no longtaem, hem i flatemgud Setan, we bambae yufala i save purumbut long hem.”c—Rom 16:20.
!I no longtaem bambae Setan i no moa gat paoa long ol man! Bambae ol stret man oli stap aninit long rul blong Kraes we i lavem olgeta. Mo bambae oli wok blong mekem wol ya i kam paradaes. Raf fasin, fasin we man i no laekem narafala man, mo fasin we man i wantem plante samting, bambae oli lus blong olwe. Baebol i talem se: “Ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta.” (Aesea 65:17) !Yes, olgeta we oli no letem Setan i bos long olgeta, bambae oli harem gud tumas!
[Ol futnot]
a B.K.T. i minim Bifo Kristin Taem.
b Blong faenemaot moa save long saed blong yia ya, yu save luk buk ya ?Wanem Samting We Baebol i Rili Tijim? long pej 215 kasem pej 218. Ol Witnes blong Jehova oli wokem buk ya.
c Ol tok ya blong Pol oli klosap sem mak long fas profet tok long Baebol we i stap long Jenesis 3:15. Profet tok ya i tokbaot taem we bambae Setan i lus olgeta. Taem Pol i stap tokbaot samting ya, hem i yusum wan Grik tok we i min se man i ‘smasem no brekem wan samting long ol smosmol pis.’—Vine’s Complete Expository Dictionary of Old and New Testament Words.
[Tok blong makem poen long pej 9]
Bambae ol stret man oli stap aninit long rul blong Kraes we i lavem olgeta. Mo bambae oli wok blong mekem wol ya i kam paradaes