Kam Klosap Long God

‘Yufala i Mas Traehad Blong Folem Fasin Blong God’

Efesas 4:32–5:2

KAEN fasin. Sore. Fasin fogif. Lav. Sore tumas we tede, i no moa gat plante man we oli stap soemaot ol fasin ya.?Olsem wanem long yu? ?Yu yu harem se nating we yu traehad blong wokem ol gudfala fasin ya be neva bambae yu save wokem olgeta? Ating yu yu strong blong talem se, ol slak fasin mo ol samting nogud we i bin hapen long laef blong yu bifo, oli mekem se i had tumas blong wokem ol gudfala fasin ya. Nating se i olsem wanem, Baebol i tijim trutok ya—Man we i wokem yumi i save se yumi nafgud blong wokem ol gudfala fasin ya.

Tok blong God i talem stret long ol trufala Kristin se: “Yufala i pikinini blong God, mo hem i lavem yufala tumas, nao from samting ya, yufala i mas traehad blong folem fasin blong hem.” (Efesas 5:1) Ol toktok ya oli soemaot klia se God i rili trastem ol man we oli mekem wosip long hem. ?Olsem wanem tok ya i soemaot se God i trastem olgeta? Jeova God i wokem man blong i tekem ol fasin blong hem, i olsem Hem nomo. (Jen 1:26, 27) Tru long rod ya nao, ol man oli gat ol gudfala fasin we i olsem blong God.a Taswe, taem Baebol i pulum ol Kristin blong oli ‘traehad blong folem fasin blong God,’ i olsem we Jeova hem wan i stap talem long olgeta se: ‘Mi mi trastem yu. Mi save se, nating we yu no stretgud olgeta, be yu yu save kam olsem mi yet, go kasem mak we yu yu naf blong kasem.’

?Wanem sam fasin blong God we yumi save folem? Ol vas raonabaot long Efesas 5:1 oli givim ansa. Vas we i kam fastaem i tokbaot kaen fasin, sore, mo fogivim narafala. (Efesas 4:32; 5:1) Long vas we i kam biaen long vas ya we i givim advaes blong folem fasin blong God, Pol i talem long ol Kristin blong oli gat wan fasin blong laef we i soemaot se oli no tingbaot olgeta nomo, be oli lavem ol narafala man. (Efesas 5:2) I tru tumas, taem yumi traem blong soemaot kaen fasin, fasin sore, fogivim narafala, mo soemaot lav long narafala, yumi gat wan nambawan eksampol blong folem, hemia Jeova God.

?From wanem yumi mas wantem folem fasin blong God? Toktok blong Pol i gat paoa blong pulum yumi, i se: “Yufala i pikinini blong God, mo hem i lavem yufala tumas, nao . . . yufala i mas traehad blong folem fasin blong hem.” ?Olsem wanem? ?Toktok ya i mekem yu yu harem gud? Jeova i luk ol man we oli mekem wosip long hem olsem ol pikinini we hem i laekem olgeta tumas. Olsem wan smol boe we i traehad blong kam olsem papa blong hem, ol trufala Kristin tu oli traehad blong kam olsem Papa blong olgeta we i stap antap long heven.

Jeova i no fosem ol man blong oli folem fasin blong hem. Defren olgeta, hem i respektem yumi taem hem i wokem yumi wetem fasin ya we yumi fri blong jusum rod blong yumi. Taswe i stap long yu nomo sipos yu wantem traehad blong folem fasin blong God no nogat. (Dutronome 30:19, 20) Yu no mas fogetem se, yu yu naf blong soemaot ol gudfala fasin ya blong God. Be blong mekem olsem, fastaem yu mas save se God i olsem wanem, ale biaen yu save traehad blong folem fasin blong hem. Baebol i save halpem yu blong lanem moa long saed blong ol gudfala fasin ya blong God, we oli pulum plante milian man blong traehad blong folem fasin blong hem.

[Futnot]