Yangfala—Wokem Wan Fandesen Blong Laef Blong Yu We i Save Stap Strong Oltaem
1. ?From wanem ol yangfala Kristin oli mas wokem wan bilif we i strong?
1 ?Long tingting blong yu wanem i moa impoten? ?Wanem samting nao we oltaem yu stap tingbaot? ?Ol samting we yu yu tingbaot moa, hemia ol samting blong naoia nomo, no ol samting blong fiuja, olsem ol promes blong God? (Mat. 6:24, 31-33; Luk 8:14) Yumi nidim bilif sipos yumi wantem se ol promes blong God oli pulum yumi blong wok. Yumi luk samting ya long eksampol blong Ebraham mo Moses. (Hib. 11:8-10, 24-26) ?Olsem wanem yumi save gat bilif ya mo wokem wan ‘fandesen blong laef blong yumi we i save stap strong oltaem’?—1 Tim. 6:19.
2. ?Yumi lanem wanem long eksampol blong King Josaea?
2 Lukaot Jeova: Sipos yu yu gat wan program blong mekem ol wok long saed blong spirit wetem famle blong yu, hemia i nambawan. Be yu no mas ting se program ya nomo bambae i mekem we yu yu gat strong bilif. Blong ‘savegud Jeova’ yu wan yu mas traem faenem hem. (Prov. 2:3-5; 1 Kron. 28:9) Hemia nao samting we yangfala King Josaea i mekem. Hem i gruap long wan taem we ol man oli no tinghae long wosip blong Jeova. Nating se i olsem, taem hem i gat 15 yia blong hem, “hem i stat blong mekem wosip long Hae God olsem we olfala bubu ya blong hem bifo, King Deved i stap mekem.”—2 Kron. 34:3.
3. ?Olsem wanem ol yangfala Kristin tede oli save lukaot Jeova?
3 ?Yu yu save mekem wanem blong lukaot Jeova? Yu mas jekemap ol samting ya we yu yu bilif long hem mo ‘yu nomo yu mas luksave’ se hemia nao trutok. (Rom 12:2, NW ) Eksampol: ?Yu yu save eksplenem wanem we Baebol i talem long saed blong blad? ?Yu yu save pruvum se Kingdom blong God i stat rul long heven long 1914? Sipos yu wantem wokem wan fandesen blong laef blong yu we i stap strong oltaem, i impoten blong kasem “stret save long trutok.”—1 Tim. 2:3, 4, NW.
4. ?Olsem wanem ol pablisa we oli no baptaes yet oli soem se oli stap gohed long saed blong spirit?
4 Taem Josaea i traehad blong faenem God, i gat gudfala frut i kamaot. Bifo we hem i kasem 20 yia blong hem, hem i wok wetem strong tingting blong karemaot giaman wosip long kantri blong hem. (2 Kron. 34:3-7) Olsem nao, ol fasin mo wok blong yu bambae oli soemaot sipos yu stap gohed long saed blong spirit. (1 Tim. 4:15) Sipos yu yu wan pablisa we i no baptaes yet, traem kamgud moa long fasin blong yu blong prij. I no naf blong seremaot buk nomo. Traem yusum Baebol, mekem man i tingting gud long hem, mo mekem visit long ol man we oli soem intres. (Rom 12:7) Samting ya bambae i halpem yu blong kam bigman long saed blong spirit.
5. ?Ol Kristin we oli baptaes finis oli gat wanem janis blong mekem moa wok?
5 Givim Bes Blong Yu Long Jeova: Taem yu givim laef blong yu long Jeova mo tekem baptaes, yu kam wan minista blong God. (2 Kor. 3:5, 6) Samting ya i openem rod blong yu save mekem wok blong Jeova fultaem. Maet yu wok long Betel, kam wan misinari, no givhan blong bildim ol haos blong Sosaeti raon long wol. Sam narafala rod blong mekem moa long wok blong Jeova, se yu save lanem wan narafala lanwis no yu save muv i go long ples we i nidim moa man blong prij.
6. ?Olsem wanem yumi evriwan i save wokem wan fandesen blong laef blong yumi we i save stap strong oltaem?
6 I tru se i no yumi evriwan we i save joen long ol gudfala wok ya, be yumi wanwan i save givim bes blong yumi long Jeova. (Mat. 22:37) Nomata se laef blong yu i olsem wanem, i gud yu mekem se wok blong Jeova nao i bigfala samting long laef blong yu. (Sam 16:5) Taem yu mekem olsem, bambae yu stap wokem wan fandesen blong laef blong yu we i save stap strong oltaem.