Papa Mo Mama—Yufala i Mas Tijim Pikinini Blong Yufala Taem Hem i Smol Yet

BAEBOL i talem se: “Ol pikinini ya blong yumi, hemia wan presen we Hae God i givim long yumi, wan gudfala samting we hem i givim blong leftemap yumi.” (Sam 127:3) Taswe yumi no sapraes we ol Kristin papa mo mama, oli glad tumas taem wan pikinini blong olgeta i jes bon.

Taem wan pikinini i bon, papa mama i glad, be tufala i gat wan bigfala wok tu blong mekem. Sipos tufala i wantem se pikinini ya i kam bigwan mo bodi blong hem i strong, tufala i mas mekem hem i kakae oltaem ol kakae we oli save givhan long bodi blong hem. Mo sipos tufala i wantem se hem i stanap strong mo i no lego trutok, tufala i mas givim ol kakae we oli save mekem bilif blong hem i strong, mo tufala i mas traehad blong tijim hem long ol loa blong God. (Prov. 1:8) ?Tufala i save tijim pikinini stat wetaem? ?Mo tufala i nidim wanem?

PAPA MO MAMA TUFALA I NIDIM ADVAES

Traem tingbaot man ya Manoa we i stap long taon ya Jora, long Isrel. Woman blong hem i no save karem pikinini, be Jehova i sanem wan enjel i kam talem long hem se bambae hem i bonem wan pikinini boe. (Jaj. 13:2, 3) Manoa mo woman blong hem tufala i glad tumas long janis ya. Be tufala i wari tu. Ale Manoa i prea, i se: “Hae God. Plis yu sanem man ya blong yu we yu sanem i kam fastaem, i kambak long mitufala bakegen. I gud hem i kam talemaot long mitufala ol samting ya we bambae mitufala i mas mekem long boe ya, taem hem i bon.” (Jaj. 13:8) Manoa mo woman blong hem, tufala i wari se bambae tufala i tijim pikinini ya olsem wanem. Be i klia se tufala i tijim gud boe blong tufala, Samson, long loa blong God, mo tufala i karem gudfala frut. Baebol i talem se: “Spirit blong Hae God i stap mekem hem i kam strong moa.” From samting ya, Samson i kam wan jaj blong ol man Isrel mo i stap mekem plante bigbigfala wok.—Jaj. 13:25; 14:5, 6; 15:14, 15.

?Wetaem i stret blong papa mama i stat tijim pikinini? Taem Timoti i “pikinini yet [“bebi yet,” NW],” mama blong hem Yunis mo bubu blong hem Loes, tufala i tijim hem long “ol tok blong Baebol.” (2 Tim. 1:5; 3:15) Yes, Timoti i stat blong kasem tijing blong Baebol taem hem i bebi nomo.

I waes blong ol Kristin papa mo mama oli askem long Jehova blong i lidim olgeta. Mo i waes blong oli mekem wan gudfala plan fastaem, olsem nao oli save tijim pikinini taem hem i “bebi yet.” Ol Proveb 21:5 i talem se: “Man we i mekem gudfala plan mo i stap wok strong long hem, hem i save kasem plante samting.” I klia se bifo we pikinini i bon, papa mo mama tufala i rere gud. Maet tufala i mekem wan lis blong ol samting we bambae bebi i nidim. I impoten tu blong tufala i mekem plan blong givhan long pikinini blong i fren gud wetem God. Tufala i mas putum mak se bambae tufala i stat tijim hem taem hem i bebi yet.

Wan Buk (Early Childhood Counts—A Programming Guide on Early Childhood Care for Development) i talem se: “Ol manis jes afta we bebi i bon oli impoten, from hemia ol manis we bren blong bebi i stat blong lanem samting. Long taem ya, ol string we oli mekem se man i save lanem samting (synapses), oli kam plante moa, olsem twanti taem antap long ol narafala taem.” Taswe ol papa mo mama oli waes sipos oli yusum gud smoltaem ya, blong putum ol gudfala tijing blong Baebol long tingting blong pikinini blong olgeta.

Wan mama we i fultaem paenia, i tokbaot yangfala gel blong hem se: “Mi stap karem hem i go long wok blong prij, taem hem i gat wan manis nomo. Nating se hem i no kasem save samting we i stap hapen, be mi bilif se taem mi karem hem i go long wok blong prij we hem i bebi nomo, samting ya i mekem i gud long hem. Taem klosap hem i gat tu yia, hem i no fraet blong seremaot traket long ol man long wok blong prij.”

Plante gudfala frut oli kamaot sipos papa mo mama tufala i tijim pikinini taem hem i bebi. Be ol papa mama oli save se i no isi blong tijim pikinini long Baebol.

YUTUFALA I MAS ‘YUSUM EVRI JANIS WE YUTUFALA I KASEM’

From we ol bebi oli no save stap kwaet, mo oli intres long samting blong smoltaem nomo, hemia i mekem se i no isi long ol papa mama blong tijim olgeta. Tingting blong olgeta i no save stap longtaem long wan samting. Hemia from we oli wantem tumas blong save ol samting we oli stap raonabaot long olgeta mo oli traem faenemaot ol samting ya. Taswe, ?papa mo mama i save mekem wanem blong givhan long pikinini blong tufala, blong i putum tingting blong hem long samting we tufala i stap traem blong tijim long hem?

Traem tingbaot samting we Moses i talem long Dutronome 6:6 mo 7. Hem i se: “Yufala i no mas fogetem ol tok ya we mi mi stap givim long yufala tede. Oltaem, yufala i mas tijim ol pikinini blong yufala long hem. Sipos yufala i stap long haos, no yufala i stap wokbaot, no yufala i go blong slip, no yufala i girap bakegen, be yufala i mas tokbaot ol samting ya.” Tok ya “tijim” i givim tingting ya blong talem samting bakegen mo bakegen. Wan smol pikinini i olsem wan smol tri we i nidim wota oltaem. Fasin ya blong talem samting bakegen mo bakegen, i givhan long yumi ol bigman blong tingbaot ol samting we oli impoten. !Be i save givhan long ol smol pikinini tu!

Papa mo mama i save tijim trutok blong God long pikinini, sipos tufala i spenem plante taem wetem hem. Laef long wol ya i bisi oltaem, taswe i no isi blong ol papa mama oli faenem taem blong spenem wetem pikinini blong olgeta. Nating se i olsem, aposol Pol i talem se oli mas “yusum evri janis we” oli kasem, blong mekem ol gudfala wok. (Efes. 5:15, 16) ?Olsem wanem blong folem tok ya blong Pol? Traem tingbaot wan Kristin elda we woman blong hem i wan fultaem paenia. Elda ya i mas lukaot long ol wok long kongregesen, i mas wok blong lukaot long famle, mo i mas tijim smol gel blong hem. Hem i talem se i no isi blong skelem gud taem blong hem. Ale, ?hem mo woman blong hem, tufala i mekem olsem wanem blong tijim gel blong tufala? Hem i talem se: “Evri moning bifo mi go long wok, mi mo woman blong mi, mitufala i ridim Buk Blong Ol Baebol Stori no smol buk ya Ridimgud Ol Tok Blong Baebol Evri Dei wetem hem. Long naet bifo we hem i slip, mitufala i rid wetem hem. Mo taem mitufala i go prij, mitufala i tekem hem tu. Mitufala i wantem spenem taem wetem hem long ol fas yia blong laef blong hem.”

OL PIKININI OLI “OLSEM OL ARA”

Yumi wantem we ol pikinini blong yumi oli gruap mo oli naf blong lukaot long olgeta wan. Be i tru se faswan risen blong tijim olgeta, hemia blong oli mas lavem Jehova long olgeta hat blong olgeta.—Mak 12:28-30.

Ol Sam 127:4 i talem se: “Ol pikinini we man i bonem taem i yang yet, . . . oli olsem ol ara long han blong soldia.” Ol pikinini oli olsem ol ara we wan soldia i holem mo i sutum i go stret long mak. Man we i sut long bonara, hem i no moa save singaot ara i kambak taem hem i lego ara i go. Ol papa mama oli gat ol “ara,” hemia ol pikinini blong olgeta we oli stap long han blong olgeta blong smoltaem nomo. Oli mas yusum smoltaem ya blong putum ol loa blong God long hat mo tingting blong ol pikinini blong olgeta.

Aposol Jon i stap tingbaot ol pikinini blong hem long saed blong spirit, taem hem i talem se: “Taem mi harem we oltaem ol pikinini blong mi oli stap folem ol tok we i tru, hemia i mekem mi mi harem gud moa, i winim we mi harem gud long ol narafala samting.” (3 Jon 4) Ol Kristin papa mama oli save talem semfala toktok sipos oli luk we ol pikinini blong olgeta “oli stap folem ol tok we i tru.”