Toktok Blong Yu i Pulum Man Blong Tekem Aksen

OL KRISTIN elda oli mas naf blong “tijim ol man long ol stret tok.” (Taet. 1:9) I no isi oltaem blong mekem samting ya, from we oli save fesem plante defren kaen trabol. I impoten blong givim advaes we i laenap wetem Baebol. Taswe, ol elda oli mas folem ol tok ya se: “Yu mas gohed blong kam gud moa . . . blong talem ol tok we i pulum man blong tekem aksen.” (1 Tim. 4:13, NW) Poen ya we yumi stap tokbaot i stret fastaem long ol elda mo long olgeta we oli stap traehad blong kam naf blong mekem wok blong elda. Be samtaem ol papa mama tu oli mas toktok blong pulum ol pikinini blong olgeta blong oli tekem aksen, mo samtaem olgeta we oli mekem Baebol stadi long narafala oli mas toktok olsem tu. Long ol taem olsem, i gud yumi folem advaes ya.

?Wetaem Yu Mas Toktok Blong Pulum Man Blong Tekem Aksen? Yu faenem ansa blong kwestin ya taem yu lukluk long sam eksampol long Baebol. Aposol Pita i toktok blong pulum ol elda, blong oli mekem gud wok blong olgeta blong lukaot long ol sipsip blong God. (1 Pita 5:1, 2) Pol i talem long Taetas se, hem i mas toktok blong pulum ol yang man ‘blong oli blokem ol samting we olgeta nomo oli wantem.’ (Taet. 2:6) Pol i toktok blong pulum ol Kristin brata mo sista blong hem blong oli gat “wan tingting nomo,” mo blong oli no go klosap long olgeta we oli wantem mekem ol brata oli seraot. (1 Kor. 1:10; Rom 16:17; Fil. 4:2) Pol i talem ol gudfala tok long olgeta long kongregesen blong Tesalonaeka from ol gudfala samting we oli mekem. Be hem i pulum olgeta tu blong oli gohed moa yet blong folem ol tijing we oli kasem. (1 Tes. 4:1, 10) Pita i toktok blong pulum ol Kristin blong oli ‘no mekem ol rabis fasin we tingting blong olgeta i wantem.’ (1 Pita 2:11) Jud i raetem leta i go long ol Kristin brata mo sista, blong pulum olgeta blong oli ‘faet strong blong holem trutok ya we oli bilif long hem finis.’ Hem i talem olsem from we sam man we oli joen wetem olgeta oli no stap mekem fasin we God i glad long hem, be oli mekem ol rabis fasin. (Jud 3, 4) Olgeta Kristin oli kasem advaes se oli mas toktok long olgeta blong leftemap tingting blong olgeta, olsemia, sin i no save pulum wan long olgeta blong i kam stronghed. (Hib. 3:13) Pita i toktok long ol man Isrel we oli no bilif long Kraes yet, blong pulum olgeta blong oli tekem aksen ya: “Yufala i mas kamaot long ol rabis man ya, blong yufala i no kasem panis wetem olgeta.”—Wok 2:40.

?Wanem ol fasin we man i mas gat blong hem i save toktok blong pulum man blong tekem aksen? Tok blong hem i no mas strong tumas mo i no mas spolem narafala. ?Ale, hem i save mekem olsem wanem?

“Yumitu i Stap Laeklaekem Yumitufala.” Taem yu wantem pulum man blong tekem aksen, yu mas toktok long fasin we ‘yu laekem hem tumas.’ Sipos no, toktok blong yu bambae i strong tumas. (Flm. 9, NTB) Be sipos man i mas hareap blong tekem aksen, brata we i givim tok i mas toktok long fasin we i soemaot samting ya. Sipos hem i toktok kwaet nomo, tok blong hem bambae i no gat paoa. Hem i mas toktok long fasin we i soemaot se samting we hem i talem i impoten tumas. Mo hem i mas traem putum hem wan i stap long ples blong ol man we oli lesin long hem. Sipos hem i toktok long ol man ya long fasin we hem i laekem olgeta tumas, ating bambae oli wantem tekem aksen. Taem Pol i raetem leta long ol Kristin long Tesalonaeka, hem i talemaot tingting blong hem wetem ol fren blong hem se: “Yufala i savegud we mifala i mekem long yufala evriwan, stret olsem wan papa we i stap lukaot long ol pikinini blong hem.” (1 Tes. 2:11) Ol Kristin elda ya oli toktok long ol brata olsem ol fren. Long sem fasin, ol tok blong yu i mas soemaot se yu wari long ol man we oli lesin long yu.

Yu mas toktok long fasin we i waes. Sipos tok blong yu i mekem man i harem nogud, bambae hem i kros, nao i no wantem tekem aksen. Be yu no mas fraet tu blong talemaot “olgeta samting we God i wantem.” (Wok 20:27) Olgeta we oli glad blong kasem advaes bambae oli no kros, mo sipos yu toktok gud blong pulum olgeta blong mekem samting we i stret, bambae oli no tingting nogud long yu.—Sam 141:5.

Sipos yu wantem pulum man blong tekem aksen, plante taem i gud yu talem ol gudfala tok long hem fastaem from samting we hem i mekem. Yu save tingbaot ol gudfala samting we ol brata oli stap mekem, hemia ol samting we Jehova i glad tumas long olgeta. Maet yu tingbaot we oli gat bigfala bilif we i pulum olgeta blong wok, lav we i pulum olgeta blong traehad, mo fasin blong stanap strong taem oli kasem trabol. (1 Tes. 1:2-8; 2 Tes. 1:3-5) Sipos yu talem sam gudfala tok long olgeta fastaem, bambae oli harem se yu tinghae long olgeta mo yu kasem save long tingting blong olgeta. Nao bambae oli glad blong folem ol tok blong yu.

Yu “Mekem Tingting Blong Yu i Longfala.” Taem yu toktok blong pulum man blong tekem aksen, “yu mas mekem tingting blong yu i longfala.” (2 Tim. 4:2) ?Yu mekem samting ya olsem wanem? Yu stanap strong, nating se narafala i stap mekem i no stret no i agensem yu. Yu holem gudfala tingting se bambae narafala ya i folem advaes we yu yu givim. Sipos yu gat ol fasin ya taem yu toktok blong pulum man blong tekem aksen, bambae man ya i no save ting se yu yu gat nogud tingting long hem. Sipos yu gat strong tingting se ol brata mo sista oli wantem mekem bes blong olgeta long wok blong Jehova, bambae oli luksave tingting blong yu, mo samting ya bambae i givhan long olgeta blong oli wantem mekem i stret.—Hib. 6:9.

Yu “Tijim Ol Man Long Ol Stret Tok.” Sipos wan elda i wantem pulum man blong tekem aksen, hem i mas ‘tijim hem long ol stret tok.’ ?Hem i mekem samting ya olsem wanem? Hem i “holemstrong tok ya we yumi save putum tingting blong yumi i stap long hem, mo we yumi stap tijim ol man long hem.” (Taet. 1:9) Hem i no mas talemaot prapa tingting blong hem, be hem i yusum Tok blong God blong pulum man. Hem i lukluk i go long Baebol blong luksave wanem we hem i mas talem. Hem i tokbaot ol gudfala frut we i kamaot taem man i folem wanem we Baebol i talem long samting we hem i stap storian long hem. Hem i tingbaot ol nogud frut we i kamaot naoia mo biaen, taem man i no folem Tok blong God. Mo hem i tokbaot olgeta, blong pulum man blong i luksave se hem i mas tekem aksen.

Yu eksplenem klia long ol man, wanem samting we oli mas mekem mo oli mekem samting ya olsem wanem. Yu soemaot klia se ol tok blong yu i stanap long Baebol. Sipos Baebol i letem ol man wanwan oli mekem prapa desisen blong olgeta long samting ya, yu eksplenem se i gat mak blong samting we man i fri blong mekem, mo yu talem wanem mak ya. Nao lastok blong yu i mas mekem tingting blong ol man i strong blong oli tekem aksen.

Yu “No Fraet Nating” Blong Toktok. Taem yu wantem pulum ol narafala blong oli tekem aksen, yu ‘no mas fraet nating blong tokbaot bilif blong yumi.’ (1 Tim. 3:13, NW) ?Wanem i save mekem se yu no fraet blong toktok? Yu wan yu ‘mekem ol gudfala wok ya’ we yu stap pulum ol Kristin brata blong mekem. (Taet. 2:6, 7; 1 Pita 5:3) Olsemia, ol brata bambae oli luksave se yu no stap talem wan samting long olgeta we yu yu no stap mekem. Bambae oli luk se oli save folem fasin blong bilif blong yu, olsem we yu yu stap traehad blong folem fasin blong Kraes.—1 Kor. 11:1; Fil. 3:17.

Yes, sipos yu yusum Tok blong God, mo yu toktok long man long fasin we yu laekem hem tumas, yu save pulum hem blong tekem aksen. Olgeta we oli gat wok blong stretem mo leftemap tingting blong ol narafala, oli mas lanem blong mekem gud wok ya.—Rom 12:8.