Yumi Save Faenem Ol Gudgudfala Samting We ‘Oli Haed Long Kraes’
“God i haedem ol gudgudfala samting blong waes mo save blong hem long Kraes.”—KOL. 2:3.
1, 2. (a) ?Wanem samting we wan man i bin faenem long 1922, mo ol samting ya oli stap wea naoia? (b) ?Tok blong God i talem long olgeta man se oli mas mekem wanem?
TAEM ol man oli faenem ol samting olsem gol no silva we man i bin berem samples no we i bin haed longtaem, plante taem samting ya i kam olsem bigfala stori long nius. Hemia nao samting we i hapen long 1922, taem wan man Briten we nem blong hem Howard Carter i faenem wan samting we plante man oli sapraes tumas long hem. Blong plante plante yia, man ya i bin hadwok tumas blong digim graon gogo hem i faenem gref blong wan king blong Ijip bifo. King ya, no Fero ya, nem blong hem Tutankhamen, mo insaed long gref blong hem oli faenem klosap 5,000 defdefren samting we ol man oli putum i stap wetem king ya taem oli berem hem.
2 Bighaf blong ol samting ya we Masta Carter i bin faenem, oli stap naoia long ol musium no sam man we oli gat bigfala mane oli pem. I tru se maet ol samting ya oli givim save long yumi long saed blong ol man we oli bin laef bifo, mo maet oli luk naes, be oli no rili save givhan long laef blong yumi evri dei. Tok blong God i talem se yumi mas traem faenem ol gudgudfala samting we oli rili save givhan long laef blong yumi. Tok ya blong God i goaot long olgeta man, mo blesing we man i save kasem taem hem i faenem ol gudgudfala samting ya, hem i moagud i winim eni gol mo silva mo sas samting we man i save faenem.—Ridim Ol Proveb 2:1-6.
3. ?From wanem ol gudgudfala samting ya we Jeova i talem long ol man blong hem blong oli faenem, oli nambawan tumas?
3 Ol gudgudfala samting ya we Jeova i talem long ol man blong hem se oli mas traem faenem, oli nambawan tumas. Wan long ol gudgudfala samting ya hemia fasin blong “fraet long Jeova,” we i min se yumi fraet blong mekem Jeova i harem nogud. Fasin ya i save givhan bigwan long yumi blong blokem trabol mo blong stap gud, nating se laef tede i fulap long trabol. (Sam 19:9, NW) Taem yu ‘savegud God mo fasin blong hem,’ hemia tu wan gudfala samting tumas from we i save openem rod blong yu fren wetem God ya we i Hae Olgeta—hemia wan bigfala ona ya we yumi man yumi save kasem. Mo ol gudgudfala samting ya we Jeova i givim olsem waes blong hem, save blong hem, mo fasin blong luksave samting, oli save halpem yumi blong yumi savegud olsem wanem blong winim ol problem mo wari blong yumi evri dei long laef. (Prov. 9:10, 11) ?Be olsem wanem yumi save faenem ol gudgudfala samting ya?
Faenem Ol Gudgudfala Samting Ya We God i Talem Se Yumi Mas Faenem
4. ?Wanem i save halpem yumi blong faenem ol gudgudfala samting ya we God i tokbaot?
4 Ol man blong digim graon blong faenem ol samting blong bifo mo ol man we oli wokbaot olbaot long wol blong traem faenem samting we man i no faenem yet, oli mas go farawe mo wok had blong faenem ol samting ya. Be yumi no nid blong go farawe blong faenem ol gudgudfala samting ya blong God. Tok blong God we i olsem wan map, i soemaot stret ples blong faenem ol gudgudfala samting we God i talem se yumi save kasem. Aposol Pol i tokbaot Jisas Kraes i se: “God i haedem ol gudgudfala samting blong waes mo save blong hem long Kraes.” (Kol. 2:3) Taem yumi ridim tok ya blong Pol, maet yumi tingting se: ‘?From wanem yumi mas traem faenem ol gudgudfala samting ya? ?Weswe ol samting ya oli ‘haed’ long Kraes? ?Mo olsem wanem blong faenem ol samting ya?’ Blong ansa long ol kwestin ya, yumi mas kasem save fastaem long saed blong ol tok ya we aposol Pol i raetem.
5. ?From wanem Pol i raetem leta long saed blong ol gudgudfala samting we God i wantem givim?
5 Pol i raetem ol tok ya i go long ol Kristin brata sista long Kolosi. Hem i talem se hem i stap hadwok tumas blong givhan long olgeta blong bambae ‘tingting blong olgeta i stap strong, mo blong oli kam wan kampani nomo, from we oli stap lavlavem olgeta.’ (Ridim Kolosi 2:1, 2.) ?From wanem Pol i toktok olsem? Pol i luksave se sam long ol brata long Kolosi oli stap leftemap waes mo save blong ol man Gris, mo samfala oli stap pulum tingting blong ol Kristin blong oli ting se oli mas folem Loa blong Moses bakegen. Pol i givim strong woning long ol brata ya se: “Yufala i mas lukaot gud, blong bambae i no gat ol man oli kam fasem yufala long rabis tok ya we i folem waes blong man. Ol tok ya i blong giaman nomo, i stap kamaot long ol devel we oli stap olbaot long wol ya fastaem, i no kamaot long Kraes.”—Kol. 2:8.
6. ?From wanem i gud blong kasem save mining blong tok we Pol i raetem long ol Kristin long Kolosi?
6 Tede Setan mo rabis wol blong hem i yusum semfala samting blong pulum tingting blong yumi. Waes blong wol, olsem tingting ya se man i no nidim God mo i naf hem wan blong lukaot long laef blong hem, mo tingting ya tu se man i kamaot long mangke, waes ya nao i lidim tingting blong ol man, i mekem man i ting se hem wan nomo i save jusum samting we i gud mo samting we i nogud. Waes ya nao i pulum ol man blong traem kasem ol mak long laef we i no laenap wetem tingting blong God, mo i mekem we fasin blong laef blong ol man i jenis. Ol giaman skul oli stamba blong plante bigfala lafet we long plante kantri tede ol man oli mekem pablik holide from. Mo tu, ol samting we ol man oli wokem blong pleplei mo harem gud, olsem ol program long televisin, ol muvi, mo ol miusik, oli stap givim samting we man i wantem tumas long bodi nomo. Mo tingbaot Intenet. Hemia tu i wan samting we i save spolem tingting blong ol man, yangfala mo olfala. Tru ya, yumi stap long wan wol we ol samting ya oli plante tumas, taswe oli save gat paoa long ol filing mo tingting blong yumi isi nomo, nao oli save mekem we yumi no moa letem Jeova i lidim yumi, mo sloslo yumi no moa wok strong blong kasem laef ya we i prapa wan. (Ridim 1 Timoti 6:17-19.) Tru ya, yumi mas kasem save mining blong tok we Pol i raetem long ol Kristin long Kolosi sipos yumi wantem blokem ol trik blong Setan blong oli no winim yumi.
7. ?Wanem tufala samting we Pol i talem se i save halpem ol Kristin long Kolosi?
7 Tingbaot bakegen ol tok ya we Pol i raetem i go long ol Kristin long Kolosi. Afta we Pol i tokbaot samting we i mekem hem i wari long saed blong ol Kristin ya, hem i tokbaot tufala samting we i save halpem olgeta blong oli harem gud mo blong oli joengud long lav. Faswan samting, hem i talem se ‘tingting blong olgeta i mas stap kwaet, from we oli savegud mining blong tok ya blong God.’ Yes, ol Kristin ya oli mas meksua se save we oli kasem long saed blong Baebol hem i wan save we i stret. Olsem nao bambae bilif blong olgeta i stanap long wan fandesen we i strong. (Hib. 11:1) Afta long hemia, Pol i talem se oli mas “kasemgud mining blong tok ya we fastaem i blong haed.” Ol Kristin ya oli no mas stanap nomo long ol trutok we oli harem fastaem, be oli mas go moa, oli mas traem kasem moa save mo oli mas klia gud long ol dip save blong God. (Hib. 5:13, 14) Hemia gudfala advaes blong ol Kristin long Kolosi mo blong yumi tede tu. ?Be olsem wanem yumi save sua se tijing we yumi kasem i stret mo yumi gat stret save? Pol i talem olsem wanem blong mekem samting ya taem hem i tokbaot Jisas Kraes se: “God i haedem ol gudgudfala samting blong waes mo save blong hem long Kraes, mo long Kraes nomo, man i save faenem ol samting ya.”
Ol Gudgudfala Samting We God i “Haedem” Long Kraes
8. ?Wanem mining blong tok ya se God i “haedem” ol gudgudfala samting long Kraes?
8 Taem Pol i talem se God i “haedem” ol gudgudfala samting blong waes mo save blong hem long Kraes, i no min se man i no save kasem ol samting ya, olsem we oli lokem i stap long wan ples we i haed. Nogat. Tok ya i minim nomo se blong kasem ol gudgudfala samting ya, yumi mas wok had, mo tingting blong yumi i mas stap long Jisas Kraes. Hemia i laenap wetem wanem we Jisas i talem long saed blong hem wan i se: “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sipos mi mi no tekem hem i kam.” (Jon 14:6) Yes, blong faenem save blong God, yumi mas lukluk i go long Jisas blong hem i halpem mo lidim yumi.
9. ?Wanem wok we God i putum long han blong Jisas?
9 Jisas hem i “rod” be hem i ‘trutok mo stamba blong laef’ tu. Hemia i min se wok blong hem i no jes blong karem man i go long Papa. Hem i gat nara wok tu we i bigwan moa. Yes, Jisas i gat impoten wok ya blong halpem man blong kasem save long trutok blong Baebol mo blong kasem laef we i no save finis. Tru ya, i gat sam gudgudfala samting olsem ol sas ston we oli haed i stap long Jisas. Ol man ya nomo we oli stadi gud long Baebol bambae oli save faenem ol sas ston ya. Bambae yumi tokbaot sam long ol sas ston ya we oli save halpem yumi blong gat wan gudfala fiuja mo blong yumi frengud wetem God.
10. ?Yumi lanem wanem long saed blong Jisas long ol tok blong Kolosi 1:19 mo 2:9?
10 “From we long hem nomo, fasin blong God i stap fulwan.” (Kol. 1:19; 2:9, NW) Jisas i stap longtaem wetem Papa blong hem, taswe hem nomo i savegud ol fasin blong God mo ol samting we God i wantem mekem. Taem Jisas i mekem wok blong God long wol ya, hem i tijim ol man long olgeta samting we Papa blong hem i bin tijim long hem. Long olgeta samting we hem i mekem, hem i soemaot ol fasin we Papa blong hem i bin soem long hem. Taswe Jisas i save talem se: “Man we i luk mi, hem i luk Papa blong mi.” (Jon 14:9) Olgeta waes mo save blong God oli haed, no oli stap, long Kraes. Taswe sipos yumi wantem save Jeova, yumi mas traem gat plante save long saed blong Jisas, i no gat wan narafala rod we i gud moa blong kasem save ya.
11. ?Olsem wanem ol profet tok blong Baebol oli joen long Jisas?
11 “Trutok ya we Jisas i wetnes long hem, hemia i stampa blong ol tok blong ol profet.” (Rev. 19:10, Nyutesteman wetem Ol Sam long Bislama) Vas ya i soem se Jisas nao i man ya we i mekem plante profet tok blong Baebol oli kamtru. Yes, taem man i kasem save long wok we Jisas i mekem long Kingdom blong Mesaea, bambae hem i kasem save mining blong ol profet tok blong Baebol, i stat long faswan profet tok we Jeova i talem long Jenesis 3:15 i go kasem ol nambawan vison blong buk blong Revelesen. Taswe sipos wan man i no bilif se Jisas hem i Mesaea, bambae man ya i no kasem save long plante long ol profet tok we oli stap long Hibru haf blong Baebol. Mo tu, sipos wan man i no bilif long ol tok blong Hibru haf blong Baebol we i talemaot plante profet tok long saed blong Mesaea, be bambae hem i no bilif tu long Jisas, bambae hem i ting se Jisas i wan man nomo olsem yumi. Save long saed blong Jisas i givhan long ol man blong God blong oli kasem save tu long mining blong ol profet tok ya long Baebol we oli no kamtru yet.—2 Kor. 1:20.
12, 13. (a) ?Olsem wanem Jisas i “laet blong ol man blong wol”? (b) ?From we ol man blong Kraes oli fri long tudak blong ol giaman skul, wanem wok we oli mas mekem?
12 “Mi nao, mi olsem laet blong ol man long wol.” (Ridim Jon 8:12; 9:5.) Longtaem bifo we Jisas i bon long wol ya, profet Aesea i talemaot se: “Fastaem, mifala i stap wokbaot long tudak, be naoia, mifala i luk wan bigfala laet. Bifo, mifala i stap long tudak we i blong ded nomo, be naoia, laet i saenaot, i kasem mifala.” (Aes. 9:2) Aposol Matiu i talem se Jisas i mekem profet tok ya blong Aesea i kamtru taem hem i statem wok blong prij mo i stap talemaot se: “Yufala i mas tanem tingting blong yufala from ol sin blong yufala, from we taem blong God i kam King blong olgeta man long wol, i kam klosap finis.” (Mat. 4:16, 17) Yes, taem Jisas i statem wok blong prij, hem i halpem ol man blong oli luk laet long saed blong spirit mo oli no moa slef blong ol giaman tijing, oli fri. Jisas i talem se: “Mi mi olsem laet. Mi kam long wol ya blong man we i bilif long mi bambae i no moa save stap long tudak, i save stap long laet ya.”—Jon 1:3-5; 12:46.
13 Plante yia afta we Jisas i talem tok ya, aposol Pol i talem long ol Kristin brata sista blong hem se: “Bifo, yufala i stap long tudak nomo, be naoia we yufala i joen long Masta blong yumi, yufala i stap long delaet. Nao from samting ya, oltaem yufala i mas holem fasin blong man blong delaet long laef blong yufala.” (Efes. 5:8) From we ol Kristin oli no moa kalabus long tudak blong ol giaman skul, ale i wok blong olgeta nao blong oli mas holem fasin blong man blong delaet. Hemia i laenap wetem wanem we Jisas i talem long ol man blong hem taem hem i mekem bigfala toktok blong hem antap long Hil. Hem i se: “Nao long sem fasin, laef blong yufala i olsem laet, mo yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao, bambae olgeta oli save leftemap nem blong Papa blong yufala, we i stap long heven.” (Mat. 5:16) ?Yu yu rili gat tangkiu from ol gudgudfala samting long saed blong spirit we yu faenem long Jisas? Sipos yu rili gat tangkiu, ale bambae yu soemaot long ol man se ol samting ya we yu faenem, oli gud tumas. Bambae yu mekem olsem taem yu tokbaot ol gudgudfala samting ya long olgeta mo taem yu gat ol gudfala Kristin fasin.
14, 15. (a) ?Baebol i soemaot se taem ol man oli wosipim Jeova bifo, oli yusum sipsip mo narafala anamol blong mekem wanem? (b) ?From wanem Jisas we i olsem “smol sipsip blong God,” hem i gud moa i bitim gol mo silva?
14 Jisas hem i “smol sipsip blong God.” (Jon 1:29, 36) Long Baebol, yumi ridim plante taem we ol man oli yusum sipsip olsem rod blong kasem fogif long ol sin blong olgeta mo blong oli kam klosap long God. Olsem nao, afta we Ebraham i soemaot long God se hem i rere nomo blong givim Aesak, boe blong hem, olsem wan sakrefaes, ale God i talem long Ebraham se bambae hem i no kilim Aesak be bambae i kilim wan man sipsip olsem sakrefaes, mo God i givim sipsip ya tu long hem. (Jen. 22:12, 13) Taem ol man Isrel oli no moa slef long Ijip, oli gofri, oli mas kilim wan sipsip mo putum blad blong hem long pos blong doa blong haos blong olgeta, hemia i olsem “lafet blong Pasova” blong ona long Jeova. (Eks. 12:1-13) Mo aninit long Loa blong Moses, ol man oli mas mekem ol sakrefaes blong plante defren anamol, we long ol anamol ya i gat ol sipsip mo ol nani tu.—Eks. 29:38-42; Lev. 5:6, 7.
15 Be i no gat wan long ol sakrefaes ya we i save karemaot man long sin mo ded, yes olgeta sakrefaes ya oli no naf blong mekem olsem. (Hib. 10:1-4) Jisas nomo hem i “smol sipsip blong God, we hem bambae i tekemaot sin blong olgeta man long wol.” Trutok ya nomo i soemaot klia se Jisas hem i gud moa i winim olgeta gol mo silva we man i bin faenem samtaem. Taswe i gud we yumi stadi moa blong kasem save long ransom mo yumi bilif long nambawan presen ya we God i givim. Ale bambae yumi save kasem wan nambawan blesing. Sipos yumi blong “smol kampani blong ol sipsip,” bambae yumi go long heven blong rul wetem Kraes, mo sipos yumi blong ol “narafala sipsip,” bambae yumi gat laef we i no save finis long wol ya we i kam wan paradaes.—Luk 12:32, NW; Jon 6:40, 47; 10:16.
16, 17. ?From wanem i impoten blong kasem save se Jisas i “stamba blong bilif blong yumi, i stat long stat blong hem gogo i kasem en blong hem”?
16 Jisas hem i “stamba blong bilif blong yumi, i stat long stat blong hem gogo i kasem en blong hem.” (Ridim Hibrus 12:1, 2.) Long Hibrus japta 11, Pol i givim save ya se bilif hem i wanem. Hem i raetem nem blong plante man blong bilif we oli gudfala eksampol blong folem, olsem Noa, Ebraham, Sera, mo Rehab. Afta we Pol i tokbaot olgeta ya, hem i talem long ol Kristin brata sista se oli mas “luk long Jisas we hem nomo i stamba blong bilif blong yumi, i stat long stat blong hem gogo i kasem en blong hem.” ?From wanem?
17 Ol man mo woman ya we Hibrus japta 11 i tokbaot, oli bilif strong long ol promes blong God, be oli no gat ful save long saed ya se olsem wanem God bambae i yusum Mesaea mo Kingdom blong mekem ol promes blong hem oli kamtru. Taswe yumi save talem se bilif blong olgeta i no fulwan. Tru ya, olgeta ya we Jeova i yusum olgeta blong oli raetem plante profet tok long saed blong Mesaea, olgeta tu oli no kasem save fulwan se ol tok ya we oli raetem i impoten olsem wanem. (1 Pita 1:10-12) Jisas nomo i save mekem bilif blong yumi i fulwan. Taswe i impoten tumas blong kasem klia save long saed blong wok blong Jisas mo blong agri tu se hem i “stamba blong bilif blong yumi, i stat long stat blong hem gogo i kasem en blong hem.”
Gohed Blong Lukaotem
18, 19. (a) ?Wanem sam narafala sas ston we oli haed i stap long Kraes? (b) ?From wanem yumi mas gohed blong lukluk i go long Jisas blong faenem ol gudgudfala samting ya?
18 Long stadi ya yumi tokbaot sam nomo long ol impoten wok we Jisas i mekem insaed long stamba tingting blong God we hem i wantem sevem olgeta man. I gat plante narafala samting we oli gud tumas olsem ol sas ston, we oli haed long Kraes. Taem yumi faenem ol gudgudfala samting ya, bambae yumi harem gud, mo save ya bambae i givhangud long yumi. Tingbaot narafala nem ya we aposol Pita i putum long Jisas se hem i “Man we God i yusum blong givim laef” mo hem i “laet blong moningsta.” (Wok 3:15, NW; 5:31; 2 Pita 1:19) Mo nara tok ya we Baebol i talem long saed blong Jisas se hem i “Amen.” (Rev. 3:14) ?Yu yu save from wanem Baebol i tokbaot Jisas olsem? Ale i gud blong mekem olsem we Jisas i talem, se, “yufala i mas gohed blong lukaot, nao bambae yufala i save faenem.”—Mat. 7:7.
19 I no gat wan narafala man we i olsem Jisas. Hem nomo we laef blong hem i impoten tumas mo i joen bigwan long laef blong yumi long fiuja. Man we i wantem tumas long fulhat blong hem blong faenem ol gudgudfala samting ya we oli haed long Jisas, bambae hem i save faenem nomo. Bambae yu glad tumas mo yu kasem blesing taem yu faenem ol gudgudfala samting ya we ‘God i haedem long Kraes.’
?Yu Yu Tingbaot?
• ?Wanem ol gudgudfala samting we God i talem long ol Kristin blong oli traem faenem?
• ?From wanem advaes we Pol i givim long ol Kristin long Kolosi i stret long yumi tede tu?
• ?Wanem sam samting we oli olsem sas ston we oli ‘haed’ long Kraes, mo yu save eksplenem wok blong Kraes long saed ya?