Tingting i Mas Klia Gud Taem En i Kam Klosap
1 Plante taem, Tok blong God i talem se dei blong Jeova bambae i kam “olsem wan man blong stil,” hemia se kwik, wantaem, long kwaet fasin. (1 Tes. 5:2; Mat. 24:43; 2 Pita 3:10; Rev. 3:3; 16:15) Jisas i talem se: “From samting ya, oltaem yufala i mas rere, from we mi, mi Pikinini blong Man, bambae mi kamtru long taem we yufala i no tingbaot.” (Mat. 24:44) ?Olsem wanem yumi save rere long saed blong spirit taem en i stap kam klosap? Bigfala samting we yumi mas mekem, i stap long advaes ya we i kamaot long God se: “Yufala i mas wekap we tingting blong yufala i klia gud.”—1 Pita 4:7.
2 Man we tingting blong hem i klia gud i stap tingbaot ol samting olsem Jeova i stap tingbaot olgeta. (Efes. 5:17) Tingting olsem i givhan long yumi blong luksave se yumi stap long medel blong ol man blong wol ya “olsem ol strenja nomo, mo olsem ol man we oli no gat hom blong olgeta.” (1 Pita 2:11) Tingting ya i halpem yumi tu blong luksave wanem samting i rili impoten long laef, mo blong putum ol samting we oli impoten long fasples, mo blong mekem ol waes disisen.—Fil. 1:10.
3 Kasem Ol Mak Long Saed Blong Spirit: Samting we i save givhan long yumi blong gat tingting we i klia gud, hemia se yumi mas putum sam mak long saed blong spirit mo traehad blong kasem olgeta. ?Yu yu stap traehad blong kasem sam mak long saed blong spirit naoia? ?Yu yu stap traehad blong ridim Baebol evri dei, go long ol Kristin miting, ridim evri Wajtaoa mo Wekap!, no maet blong joen moa long wok blong prij? Sipos yu putum ol mak we oli no strong tumas, mo yu gat strong tingting blong kasem olgeta, mo yu askem long Jeova blong i blesem traehad blong yu, maet bambae yu sapraes long frut we i kamaot.
4 Wan elda i askem long wan yangfala man mo woman we tufala i mared, long saed blong ol mak we tufala i wantem kasem. Kwestin ya i mekem tufala i luksave se sipos tufala i stretem laef blong tufala blong mekem se i no moa fasfas, mo sipos tufala i finisim ol kaon we tufala i gat, ale tufala i save paenia. Taswe, tufala i mekemap tingting blong tufala blong kasem mak ya blong paenia. Tufala i pem ol kaon blong tufala, mo tufala i faenem rod blong sakemaot sam wok we tufala i no nid blong mekem, mo we i stap westem taem mo paoa blong tufala. Wan yia biaen stret, tufala i kasem mak we tufala i bin putum. ?Wanem i kamaot biaen? Hasban i talem se: “Sipos mitufala i no bin putum mak mo traehad blong kasem, bambae laef blong mitufala i no olsem naoia. Mitufala i hapi moa. Laef blong mitufala i kwaet mo i gud moa. Mitufala i haremgud from we mitufala i gat wan gudfala risen blong laef.”
5 Taem yumi stap wet blong dei blong Jeova i kamtru, yumi mas wekap gud mo rere oltaem long saed blong spirit. Yumi mekem olsem taem tingting blong yumi i klia gud, mo taem yumi putum tingting i stap oltaem long ol samting we God i wantem yumi blong mekem.—Taet. 2:11-13.