“Yufala i Mas Luklukgud Long Laef Blong Yufala”
“From we olgeta samting ya bambae oli lus olsem, yufala i mas luklukgud long laef blong yufala. . . . Yufala i mas tabu, yufala i man blong God, mo yufala i mas mekem ol fasin we hem i wantem.”—2 PITA 3:11.
1. ?From wanem ol tok we Pita i talem long seken leta blong hem, i stret long ol Kristin long taem blong hem?
BIFO we aposol Pita i raetem seken leta blong hem, plante man oli agensem Kristin kongregesen. Be samting ya i no mekem tingting blong ol Kristin i kam slak. Defren olgeta, kongregesen i kam bigwan moa. From samting ya, Setan i traem olgeta long wan narafala rod we i winim plante man bifo finis. Pita i tokbaot se Setan i yusum sam man we tijing blong olgeta i no stret, blong spolem ol man blong God. Ol man ya, “oli wantem stilim woman,” mo oli “wantem tumas ol samting blong narafala man.” (2 Pita 2:1-3, 14; Jud 4) Taswe, Pita i raetem seken leta blong hem blong talem ol tok we i kamaot stret long hat blong hem, blong pulum ol Kristin blong oli holemstrong long God.
2. ?Seken Pita japta 3 i tokbaot wanem? ?Mo wanem ol kwestin we yumi mas tingbaot?
2 Pita i talem se: “Mi mi savegud se bambae i no longtaem, mi mi aot long bodi blong mi. . . . Nao from samting ya, taem mi stap yet long bodi ya, i stret nomo blong mi talemaot ol tok ya oltaem, blong wekemap yufala. Mo mi mas traehad blong givhan long yufala, blong bambae taem mi mi aot long wol ya, be oltaem yufala i save tingbaot ol trutok ya bakegen.” (2 Pita 1:13-15) Yes, Pita i save se i no longtaem bambae hem i ded. Be hem i wantem talem ol tok we bambae ol Kristin oli save tingbaot bakegen mo bakegen long ol yia we oli kam biaen. Mo hemia nao samting we i hapen. Ol tok we hem i talem oli stap long Baebol, blong yumi evriwan tede yumi save ridim. Yumi intres speseli long japta 3 blong seken leta blong Pita, from we i tokbaot “ol las dei” blong fasin blong laef we i stap naoia. Mo i tokbaot heven mo wol we bambae i lus. (2 Pita 3:3, 7, 10, NW) ?Pita i talem wanem advaes we i stret long yumi? ?Taem yumi folem advaes blong Pita, olsem wanem samting ya i save mekem se Jeova i glad long yumi?
3, 4. (a) ?Afta we Pita i tokbaot wol blong Setan se bambae i lus, hem i talem se yumi mas mekem wanem? ?Mo Pita i givim woning long saed blong wanem? (b) ?Wanem trifala samting we bambae yumi tokbaot?
3 Afta we Pita i tokbaot wol blong Setan se bambae i lus, hem i talem se: “Yufala i mas luklukgud long laef blong yufala. . . . Yufala i mas tabu, yufala i man blong God, mo yufala i mas mekem ol fasin we hem i wantem.” (2 Pita 3:11, 12) Ol tok ya blong Pita oli klia. Olgeta nomo we oli mekem samting we Jeova i wantem mo we oli mekem ol fasin we hem i glad long olgeta, bambae oli sef long dei ya we hem i “flatemdaon ol enemi” blong hem. (Aes. 61:2) Taswe, aposol Pita i talem tu se: “Ol fren. Yufala i kasem finis ol tok blong wekemap yufala, taem trabol ya i no kamtru yet. From samting ya, yufala i mas lukaot gud. Sipos no, ol man ya we oli no holem stret fasin [ol man we oli tijim ol giaman tok], bambae oli pulum yufala long ol krangke tok blong olgeta, nao bambae yufala i aot long sef ples ya we yufala i stap long hem, yufala i foldaon.”—2 Pita 3:17.
4 Pita tu i “kasem finis ol tok” se long ol las dei, bambae ol Kristin oli mas lukaot gud blong holemstrong long Jeova. Biaen, aposol Jon i talem klia from wanem i olsem. Hem i luk wan vison blong Setan we oli sakemaot hem long heven i kamdaon long wol. Mo Setan i “kros tumas” long olgeta we “oli stap obei long ol tok blong God, mo we oli stap holem ol tok we Jisas i talemaot se i tru.” (Rev. 12:9, 12, 17) Ol tru Kristin we tabu spirit i makemaot olgeta, mo ol fren blong olgeta we oli olsem “ol narafala sipsip,” bambae oli winim Setan. (Jon 10:16) ?Be olsem wanem long yumi wanwan? ?Bambae yumi holemstrong long Jeova? I gat tri samting we yumi save mekem blong givhan long yumi blong holemstrong long Jeova. (1) Yumi save wokem ol fasin we God i glad long olgeta. (2) Yumi mas mekem ol fasin we oli stret, mo laef blong yumi i mas klin gud, we i no gat wan samting i mekem yumi doti long fes blong God. (3) Yumi mas gat stret tingting long saed blong ol samting we oli traem yumi. I gud yumi tokbaot trifala samting ya.
Wokem Ol Fasin We God i Glad Long Olgeta
5, 6. ?Wanem ol fasin we yumi wantem kam gud moa long olgeta? ?Mo from wanem yumi mas “traehad” blong wokem ol fasin ya?
5 Long stat blong seken leta blong Pita, hem i raetem se: “Yufala i mas traehad blong mekem fasin blong yufala i kam gud moa. Yufala i gat fasin blong bilif finis, ale yufala i mas soemaot bilif ya long ol fasin we i stret. Mo taem yufala i stap mekem ol fasin we i stret, ale yufala i mas soemaot we yufala i gat save. Mo taem yufala i kasem save ya finis, ale yufala i mas soemaot we yufala i save blokem ol samting we yufala nomo i wantem. Mo taem yufala i save mekem olsem, ale yufala i mas soemaot we yufala i gat paoa blong holem wok longtaem. Mo taem yufala i gat paoa blong holem wok longtaem, ale yufala i mas soemaot samting ya long fasin ya we yufala i stap mekem ol samting we God i wantem. Mo taem yufala i stap mekem ol samting we God i wantem, ale yufala i mas soemaot we yufala i lavem ol brata blong yufala. Mo taem yufala i stap lavem ol brata blong yufala, ale yufala i mas soemaot we yufala i lavem olgeta man. I stret blong yufala i kasem ol fasin ya, mo sipos yufala i gohed blong holemstrong olgeta long laef blong yufala, bambae yufala i no save stap nating nomo. Bambae yufala i save savegud, Jisas Kraes, Masta blong yumi, nao bambae laef blong yufala i save karem frut.”—2 Pita 1:5-8.
6 I tru, yumi mas “traehad” bigwan blong mekem ol samting we oli givhan long yumi blong wokem ol fasin we God i glad long olgeta. Yumi mas traehad blong go long olgeta Kristin miting, ridim Baebol evri dei, mo folem wan gudfala program blong mekem stadi yumi wan. Yumi mas wok had blong folem wan gudfala program blong mekem Famle Wosip evri wik, mo blong ful famle i harem gud long hem, mo blong ol save i stret long olgeta. Taem yumi gat wan gudfala program we yumi folem oltaem, i moa isi blong mekem ol gudfala fasin ya, speseli taem yumi luk se oli givhan long yumi.
7, 8. (a) ?Samfala oli talem wanem long saed blong naet blong Famle Wosip? (b) ?Olsem wanem famle wosip blong yu i stap givhan long yu?
7 Wan sista i tokbaot naet ya blong mekem famle wosip se: “Naet ya i givim janis long mifala blong lanem moa long saed blong plante defren samting.” Wan narafala sista i talem se: “Blong talem stret, mi no wantem se buk stadi i finis. Miting ya, mi laekem moa i bitim ol narafala miting. Be naoia we mifala i stap mekem naet blong Famle Wosip, mi luk se Jeova i save wanem we mifala i nidim mo i save stret taem we mifala i nidim samting ya.” Hed blong wan famle i talem se: “Famle wosip i givhan long mitufala bigwan. Naet ya i olsem wan spesel miting we i stret long ol nid blong mitufala. !I nambawan! Mitufala tugeta i harem se mitufala i stap kam gud moa long ol fasin we oli olsem frut blong tabu spirit, mo naoia mitufala i glad moa long wok blong prij i bitim ol narafala taem bifo.” Hed blong wan narafala famle i talem se: “Ol pikinini oli stap lukaot moa save olgeta nomo. Samting ya i stap givhan long olgeta blong lanem plante moa samting, mo oli glad from. Niufala program ya i mekem se mifala i trastem moa Jeova, se hem i save ol wari blong mifala mo hem i stap ansa long ol prea blong mifala.” ?Olsem wanem? ?Yu yu gat tingting olsem long nambawan presen ya we Jeova i givim?
8 Yu no mas letem ol smosmol samting oli blokem yu blong mekem famle wosip. Wan man mo woman blong hem, tufala i talem se: “Long fofala wik we i pas, evri Tasde, long taem blong stadi blong mitufala, i gat wan samting we klosap i blokem mitufala. Be mitufala i no letem samting ya i blokem mitufala, mitufala i mekem stadi yet.” I tru se samtaem yu mas jenisim program blong yu. Be nating se i olsem, !yu mas gat strong tingting blong mekem Famle Wosip blong yu, we yu no mestem wan wik!
9. ?Olsem wanem Jeova i givim paoa long Jeremaea? ?Mo olsem wanem eksampol blong hem i save givhan long yumi?
9 Profet Jeremaea i soemaot gudfala eksampol long yumi. Ol tok we Jeova i talem long hem i olsem kakae we hem i nidim blong mekem hem i strong, mo hem i glad tumas long samting ya. Ol tok ya i givim paoa long hem blong holemstrong long wok blong prij, nating se ol man oli no lesin. Hem i talem se: “Ol tok blong yu i stap bon olsem faea insaed long tingting blong mi.” (Jer. 20:8, 9) Ol tok blong Jeova oli givhan long Jeremaea tu long ol hadtaem we hem i kasem, klosap long taem we Jerusalem i lus. Tede, yumi gat fulwan Baebol. Taem yumi stadi gud long ol tok blong God mo mekem tingting blong yumi i laenap wetem tingting blong God, bambae i givhan long yumi blong gat fasin olsem Jeremaea. Bambae yumi save holemstrong long wok blong prij mo yumi glad long wok ya. Mo tu bambae yumi stanap strong nating se ol samting oli traem yumi, bambae yumi gat ol fasin we oli stret, mo bambae yumi klin long fes blong Jeova.—Jem. 5:10.
‘Laef Blong Yu i Mas Klin Gud, We i No Gat Wan Samting i Rong Long Hem’
10, 11. ?From wanem yumi mas traehad blong mekem ‘laef blong yumi i klin gud, we i no gat wan samting i rong long hem’? ?Mo olsem wanem blong mekem olsem?
10 Yumi ol Kristin yumi save se yumi stap long ol las dei. Taswe, yumi no sapraes we ol man blong wol oli tingting bitim mak long ol samting we Jeova i no laekem nating, olsem griri fasin, ol doti fasin blong man wetem woman, mo ol raf fasin. Olsem Revelesen 2:13, 14 i tokbaot, Setan i gat tingting ya se: ‘Sipos mi no save mekem ol man blong God oli fraet, maet mi save spolem ol gudfala fasin blong olgeta.’ Taswe yumi mas tinghevi long toktok we Pita i talem wetem lav se: “Yufala i mas traehad blong mekem we long fes blong God, laef blong yufala i klin gud, mo we i no gat wan samting i rong long laef blong yufala. Nao long fasin ya, yufala i gat pis wetem God.”—2 Pita 3:14.
11 Long vas ya, Pita i talem sem toktok ya bakegen se “yufala i mas traehad.” Jeova nao i pulum Pita blong raetemdaon ol tok ya. Tru ya, Jeova i save se yumi mas traehad blong blokem ol doti tingting mo fasin blong wol blong Setan, blong ‘laef blong yumi i stap klin gud, we i no gat wan samting i rong long hem.’ Blong traehad olsem, yumi mas lukaot long tingting mo hat blong yumi, blong yumi no wantem ol samting nogud. (Ridim Ol Proveb 4:23; Jemes 1:14, 15.) Traehad i minim tu se, taem ol man oli sapraes long Kristin laef blong yumi mo “oli tok nogud” long yumi from, bambae yumi stanap strong.—1 Pita 4:4.
12. ?Wanem promes i stap long Luk 11:13?
12 From we yumi sinman, yumi hadwok blong mekem samting we i stret. (Rom 7:21-25) I gat wan rod nomo we i save givhan long yumi blong win, hemia blong lukluk i go long Jeova. Hem i glad blong givim tabu spirit long olgeta we oli askem long hem wetem fulhat blong olgeta. (Luk 11:13) Ale spirit ya i givhan long yumi blong wokem ol fasin we God i glad long olgeta, mo i halpem yumi blong stanap strong taem sam samting oli pulum yumi mo taem sam narafala samting oli traem yumi. Taem dei blong Jeova i kam klosap moa, bambae ol samting we oli traem yumi oli kam plante moa.
Yumi Kam Strong Moa Taem Yumi Winim Ol Samting We Oli Traem Yumi
13. ?Taem ol samting oli kam traem yumi, wanem bambae i givhan long yumi blong stanap strong?
13 Go kasem en blong olfala wol ya, bambae i gat ol defren samting oli kam blong traem yumi. Be yumi no mas letem tingting blong yumi i foldaon. Yumi save tingbaot se ol samting we oli traem yumi oli givim janis long yumi blong soemaot we yumi lavem God, mo oli save mekem bilif blong yumi long God mo long tok blong hem, i kam strong moa. Disaepol Jemes i talem se: “Ol brata mo sista. Taem plante samting oli stap kam blong traem yufala, bambae yufala i save luk olgeta olsem samting blong harem gud, from we yufala i save se taem bilif blong yufala i strong, nao yufala i winim ol samting ya blong traem yufala, bambae yufala i save kam strong moa blong stanap longtaem.” (Jem. 1:2-4) Mo tu, yumi mas tingbaot se Jeova “i save sevem ol man we oli bilif long hem, i save tekemaot olgeta long ol samting we i stap traem olgeta.”—2 Pita 2:9.
14. ?Olsem wanem stori blong Josef i leftemap tingting blong yu?
14 Tingbaot Josef, pikinini blong Jekob. Ol stret brata blong hem bakegen oli salem hem blong i kam wan slef. (Jen. 37:23-28; 42:21) ?Olsem wanem? ?Bilif blong Josef i kam slak from rabis samting ya we oli mekem long hem? ?Hem i kam kros long God from we God i letem nogud samting ya i hapen long hem? Tok blong God i talem klia nomo se !nogat! Be i no samting ya nomo we i traem Josef. Biaen wan woman i giaman se Josef i traem fosem hem blong slip wetem hem, ale Josef i go kalabus from. Be long taem ya tu, Josef i no lego Jeova. (Jen. 39:9-21) Taem ol samting ya oli traem hem, hem i kam strong moa, mo from samting ya God i blesem hem bigwan.
15. ?Yumi lanem wanem long stori blong Nomi?
15 I tru se taem ol samting oli kam blong traem yumi, yumi save harem nogud mo tingting blong yumi i save foldaon. Maet Josef tu i harem olsem. I gat sam narafala man blong God we oli harem olsem. Tingbaot Nomi. Man blong hem wetem tufala pikinini boe blong hem oli ded. Nao Nomi i talem se: “Yufala i no moa singaot mi se ‘Nomi’ . . . I moa gud yufala i singaot mi se ‘Mara’ we i min se ‘Harem nogud.’ Hae God i gat olgeta paoa, mo hem i mekem mi mi harem nogud tumas.” (Rut 1:20, 21) I stret nomo we Nomi i harem nogud, mo yumi kasem save long filing blong hem. Be olsem Josef, Nomi tu i no kam slak long bilif blong hem. Hem i gohed blong obei long God oltaem. From samting ya, Jeova i blesem Nomi bigwan. (Rut 4:13-17, 22) Traem tingbaot tu se, taem God bambae i mekem wol ya i kam wan paradaes, bambae hem i stretem olgeta trabol we i kamaot from Setan mo rabis wol blong hem. “Ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta.”—Aes. 65:17.
16. ?Yumi mas gat wanem tingting long saed blong prea, mo from wanem?
16 Nomata wanem samting i traem yumi, yumi save se God i lavem yumi, mo samting ya i save givhan long yumi blong stanap strong. (Ridim Rom 8:35-39.) Bambae Setan i gohed blong traem mekem tingting blong yumi i foldaon. Be sipos ‘tingting blong yumi i klia gud’ mo yumi ‘wekap mo prea’ oltaem, bambae Setan i no save winim yumi. (1 Pita 4:7) Jisas i talem se: “Oltaem, yufala i mas rere, mo yufala i mas prea. Sipos yufala i mekem olsem, bambae yufala i gat paoa blong ronwe long olgeta trabol ya, mo bambae yufala i save stanap long fes blong mi, mi Pikinini blong Man we yufala i no sem.” (Luk 21:36) Long Grik lanwis, oli yusum wan tok blong talem “prea” we i min se man i plis long God wetem fulhat blong hem. Taswe taem Jisas i talem se yumi mas plis long God wetem fulhat blong yumi, hem i wantem makem long yumi se naoia i taem blong meksua se yumi gat gudnem long fored blong hem mo Papa blong hem. Long dei blong Jeova, olgeta ya nomo we God i glad long olgeta, bambae oli laef.
Stap Bisi Long Wok Blong Jeova
17. ?Sipos wok blong prij i no isi long ples blong yu, olsem wanem eksampol blong ol profet bifo i save givhan long yu?
17 Taem yumi joen long ol Kristin wok, samting ya i givim paoa long yumi. Tingbaot ol tok ya blong Pita se: “Yufala i mas luklukgud long laef blong yufala. . . . Yufala i mas tabu, yufala i man blong God, mo yufala i mas mekem ol fasin we hem i wantem.” (2 Pita 3:11) Taswe yumi kasem save se i impoten blong mekem ol Kristin wok, speseli wok ya blong talemaot gud nius. (Mat. 24:14) I tru se long sam ples, wok blong prij i no isi. Maet ol man oli no wantem lesin, no oli agensem yumi, no maet oli stap tingting tumas long ol wari blong laef mo oli bisi tumas long olgeta. Long taem bifo, ol man blong Jeova oli fesem sem samting. Be nating, oli gohed blong mekem wok blong Jeova. “Oltaem” oli stap go talemaot tok blong God long ol man, bakegen mo bakegen. (Ridim 2 Kronikel 36:15, 16; Jer. 7:24-26.) ?Wanem i givhan long olgeta blong holemstrong long wok ya? Oli no gat tingting blong wol, be oli gat tingting blong Jeova long saed blong wok blong olgeta. Mo tu, oli ting se i wan bigfala ona blong karem nem blong God.—Jer. 15:16, NW.
18. ?Olsem wanem wok blong talemaot Kingdom bambae i leftemap nem blong God?
18 Yumi tu yumi gat bigfala ona ya blong talemaot nem blong Jeova mo stamba tingting blong hem. Tingbaot samting ya: Taem bigfala dei blong Jeova i kamtru, ol enemi blong God bambae oli no save talem se oli no save long Jeova. Hemia from we yumi prij long olgeta finis. Tru ya, olsem King blong Ijip bifo, bambae oli save se Jeova nao i stap faet agens long olgeta. (Eks. 8:1, 20; 14:25) Mo long taem ya, bambae Jeova i leftemap ol man we oli stap tru long hem. Bambae hem i mekem olgeta man oli save gud se hem nao i sanem ol man ya.—Ridim Esikel 2:5; 33:33.
19. ?Olsem wanem blong yusum gud taem we i stap yet?
19 Klosap long en blong seken leta blong Pita, hem i talem long ol Kristin brata blong hem se: “Masta blong yumi i gat longfala tingting blong wet long yufala. Mo yufala i mas luk fasin ya blong hem olsem janis blong yufala blong God i sevem yufala.” (2 Pita 3:15) Yes, Jeova i gat longfala tingting blong wet long yumi, taswe yumi mas gohed blong yusum gud taem we i stap yet. ?Olsem wanem yumi save mekem samting ya? Yumi mas wokem ol fasin we hem i glad long olgeta, mo ‘laef blong yumi i mas klin gud we i no gat wan samting i rong long hem.’ Mo tu, yumi mas holem tingting we i stret long saed blong ol samting we oli traem yumi, mo yumi mas stap bisi long wok blong Kingdom. Sipos yumi mekem ol samting ya, bambae yumi save kasem ol blesing we oli blong olwe, hemia ol blesing we bambae oli kamtru taem i gat “niufala skae mo niufala wol.”—2 Pita 3:13.
?Yu Yu Tingbaot?
• ?Olsem wanem blong wokem ol fasin we God i glad long olgeta?
• ?Olsem wanem blong gat wan ‘laef we i klin gud, we i no gat wan samting i rong long hem’?
• ?Yumi save lanem wanem long Josef mo Nomi?
• ?From wanem i wan bigfala ona blong joen long wok blong prij?
[Tok blong pija long pej 17]
?Yufala ol man we i mared, wanem bambae i givhan long yufala mo famle blong yufala blong wokem ol fasin we God i glad long olgeta?
[Tok blong pija long pej 18]
?Yumi lanem wanem long fasin blong Josef, taem sam samting i traem hem?