Baebol i Talem Wanem
?Yu Yu Mas Fraet Long Amagedon?
?WANEM ya “Amagedon”? Blong talem long isi tok nomo, Amagedon i minim wan samting we bambae i hapen long wol, taem ol lida oli girap agensem God mo Kingdom blong hem we i stap long han blong Jisas Kraes. Buk blong Revelesen long Baebol i talemaot vison we aposol Jon i luk. Long vison ya, ol lida blong wol oli kam wanples blong girap agensem God. Nem blong ples ya, hemia Amagedon. Hem i no wan trufala ples, be tok ya i wan saen nomo.
Yumi save faenem tok ya “Amagedon” wan taem nomo long Baebol. Be plante man tede, oli yusum tok ya blong minim ol defren samting. Oli joenem tok ya wetem ol smosmol disasta olsem ol vaeras we oli spolem program blong ol kompiuta, mo wetem ol bigbigfala disasta tu, olsem ol niuklia bom we oli save kilimaot wan ful laen no kantri. Fulap man oli pem ol buk we oli tokbaot taem ya jes bifo long Amagedon, we oli kolem “en blong wol.” Wan man we i raetem plante buk olsem, i salem 60 milian kopi blong ol buk ya long ten yia we i pas.
Samfala oli fraet long Amagedon. Oli ting se ol teroris, ol faet bitwin long ol kantri, no ol disasta we man i no save blokem, bambae oli mekem wan bigfala trabol i kamaot we i jenisim wol ya fulwan, mekem se i no moa gat wan laef samting i save stap long wol. Sam narafala oli ting se long stret taem we God i jusum, bambae kros blong hem i pulum hem blong spolem wol ya mo evri samting long hem. !Tru ya, ol tingting ya oli save mekem man i fraet! ?Be wanem stret mining blong Amagedon, “bigfala Dei blong God ya we i gat olgeta paoa”?—Revelesen 16:14, 16.
?Amagedon Bambae i Spolem Wol?
Amagedon bambae i no spolem evri man. ?Olsem wanem yumi save samting ya? Baebol i talem se: “Jeova i save olsem wanem blong sevem ol man we oli fasgud long hem, oli aot long ol samting blong traem olgeta. Be ol man we oli no stret, hem i save olsem wanem blong holem olgeta oli stap gogo bambae hem i spolem olgeta long dei blong jajmen.” (2 Pita 2:9, NW ) Ale, yumi save sua se God ya we i gat olgeta paoa, bambae hem i yusum paoa ya long fasin we i stretgud. Ol man we oli stanap agensem rul blong God, olgeta nomo bambae oli kasem kros blong hem long Amagedon. God i no save mestem, hem i no save kilim gudfala man wantaem wetem ol rabis man.—Ol Sam 2:2, 9; Jenesis 18:23, 25.
Baebol i talem se God bambae i “spolem ol man ya we oli stap spolem wol.” (Revelesen 11:18) I klia se Jeova God i no gat tingting blong spolem graon we yumi wokbaot long hem. Be bambae hem i spolem ol rabis man we oli agensem rul blong hem, sem mak olsem long taem blong Noa, we Bigfala Wota i ron mo i draonem ol rabis man.—Jenesis 6:11-14; 7:1; Matiu 24:37-39.
“Bigfala Dei We Bambae Ol Man Oli Fraet Gud Long Hem”
I tru, plante profet tok blong Baebol long saed blong taem ya we God bambae i spolem ol rabis man, oli save mekem man i fraet. Olsem profet tok blong Joel, we i tokbaot “bigfala dei we bambae ol man oli fraet gud long hem.” (Joel 2:31) Ol tul blong faet we God i save yusum, i gat sno, ol ston blong aes, etkwek, ol sik, bigfala ren, faea mo salfa i folfoldaon, ol man oli lusum hed mo kilkilim olgeta bakegen, laetning, mo rabis sik we i mekem bodi blong man i kam rotin.a (Job 38:22, 23; Esikel 38:14-23; Habakuk 3:10, 11; Sekaraea 14:12, 13) Mo tu, Baebol i talem klia se bambae i gat wan taem we ol dedbodi oli stap olbaot long graon, stat long wan saed blong wol go kasem narasaed. Bambae oli stap olsem sitsit blong buluk nomo, no bambae ol pijin mo ol narafala anamol oli kakae olgeta. (Jeremaea 25:33, 34; Esikel 39:17-20) Long faet ya, ol enemi blong God bambae oli fraet bitim mak.—Revelesen 6:16, 17.
?Hemia i min se ol trufala man blong God we oli obei gud long hem, oli mas fraet long ol bigbigfala samting we bambae oli kamaot long Amagedon? Nogat. Ol man blong God long wol bambae oli no joen long faet ya. Mo tu, Jeova bambae i protektem olgeta. Nating se i olsem, taem ol trufala man blong God oli luk paoa blong hem long bigfala Dei ya blong hem, bambae oli gat bigfala respek mo ona long hem.—Ol Sam 37:34; Ol Proveb 3:25, 26.
Be wan samting we i impoten, hemia tok we God i pulum aposol Jon blong raetem blong mekem tingting blong yumi i strong. Hem i se: “Olgeta we oli harem ol tok ya we God i givim, we i stap long buk ya, oli save harem gud.” Hemia ol tok we i givim woning long saed blong Amagedon tu. (Revelesen 1:3; 22:7) ?Olsem wanem man i save haremgud taem hem i tingting dip long Amagedon?
God i Singaot Ol Man Blong Oli Tekem Aksin
Taem wan bigfala hariken i stap kam, oli givimaot woning long radio blong halpem ol man blong oli stap sef. Blong meksua se evri man oli harem woning ya, maet polis i ron i goraon long ol ples blong talemaot. Risen blong samting ya, i no blong mekem ol man oli fraet, be i blong pulum olgeta blong oli tekem aksin we i save sevem laef blong olgeta. Ol man we oli gat hed, oli glad long woning olsem, mo olgeta we oli tekem aksin, oli haremgud.
Sem mak long woning we God i stap givim long saed blong “bigfala win” blong Amagedon we i stap kam. (Ol Proveb 10:25) Long Baebol, Jeova i talem plante samting long saed blong faet ya. Hem i no traem blong mekem ol man oli fraet, be hem i wantem givim woning long olgeta mo pulum olgeta blong tanem tingting blong olgeta mo blong traehad blong mekem wok blong hem. (Sefanaea 2:2, 3; 2 Pita 3:9) Olgeta we oli tekem aksin olsem, bambae oli kasem blesing ya blong stap laef. Taswe, yumi no nid blong fraet long faet blong God we i klosap. Defren olgeta, yumi save lukluk i go long fiuja wetem strong tingting se ‘olgeta man we oli singaot Jeova long nem blong hem, hem bambae i sevem olgeta.’—Joel 2:32.
[Futnot]
a Yumi no mas fogetem se ol man blong raetem Baebol oli yusum plante tok olsem “saen” nomo. (Revelesen 1:1, NW ) Taswe, yumi no save talem stret se God bambae i yusum olgeta prapa samting we ol profet tok oli tokbaot, no sipos sam long olgeta oli saen nomo.
[Tok blong pija long pej 30]
Taem wan bigfala hariken i stap kam, oli talemaot woning long radio blong givhan long ol man blong oli stap sef
[Tok blong pija long pej 31]
Woning we God i givim long saed blong Amagedon i blong singaot ol man blong oli tekem aksin blong sevem laef blong olgeta