Wajtaoa LAEBRI LONG INTENET
Wajtaoa
LAEBRI LONG INTENET
Bislama
  • BAEBOL
  • OL BUK
  • OL MITING
  • w20 Jun pp. 30-31
  • Tekem Aksen Taem Yu Harem Trampet

I no gat video yet long haf ya.

Sori, i gat problem taem i stap lodem video ya.

  • Tekem Aksen Taem Yu Harem Trampet
  • Wajtaoa i Talemaot Kingdom Blong Jehova (Stadi)—2020
  • Ol Sabtaetol
  • Sem Samting
  • OLI SINGAOT YUMI EVRIWAN I KAM WANPLES
  • OLI SINGAOT OL ELDA BLONG OLI KASEM TRENING
  • YUMI MAS MEKEM SAM JENIS
  • Trampet i Aot Long Ples Blong Faet i Kam Long Haos Blong Singsing
    Wekap!—1994
  • Ol Trabol We Jeova i Givim Long Krisendom
    Revelesen—Nambawan En
  • Ol Bigfala Poen Long Buk Blong Revelesen—Haf 1
    Wajtaoa i Talemaot Kingdom Blong Jehova—2009
Wajtaoa i Talemaot Kingdom Blong Jehova (Stadi)—2020
w20 Jun pp. 30-31
Tu pris blong Isrel i blu long ol longfala trampet.

Tekem Aksen Taem Yu Harem Trampet

YUMI bilif se long “ol las dei” ya, Jehova i stap lidim ol man blong hem mo givim ol samting we oli nidim blong stap klosap long hem. (2 Tim. 3:1) Be yumi wanwan i mas obei. Yumi olsem ol man Isrel long draeples. Taem oli harem saon blong trampet, oli mas tekem aksen.

Jehova i talem long Moses blong i wokem tu trampet long silva. Oli mas blu long tufala trampet ya “blong singaot olgeta man oli kam wanples,” mo blong givim saen se oli mas “aot blong go long narafala ples.” (Nam. 10:2) Ol pris oli mas blu long defdefren fasin blong soemaot samting we ol man oli mas mekem. (Nam. 10:3-8) Tede tu, i gat plante rod we ol man blong God oli kasem ol tok blong lidim olgeta. Bambae yumi tokbaot tri nomo, we oli mekem yumi tingbaot ol trampet long Isrel: Oli singaot yumi evriwan i kam wanples long ol bigfala miting, oli singaot ol elda oli kam wanples blong kasem trening, mo samtaem i gat ol jenis long oganaesesen blong Jehova.

OLI SINGAOT YUMI EVRIWAN I KAM WANPLES

Taem Jehova i wantem se “olgeta man” oli kam wanples long doa blong haos tapolen blong hem long saed i go long is, ol pris oli blu long tufala trampet. (Nam. 10:3) Olgeta laen, we oli seraot long fo kampani mo mekem kamp long fo saed blong haos tapolen blong God, oli save harem saon ya. Ating olgeta we oli stap klosap long get oli tekem sam minit nomo blong kam wanples. Ol narafala we oli stap longwe moa, oli nidim moa taem blong kam. Nating se i olsem wanem, Jehova i wantem se olgeta man oli kam wanples blong save samting we oli mas mekem.

Tede, yumi no joen wanples long haos tapolen blong God, be oli singaot yumi blong kam long ol asembli mo sam narafala spesel miting. Long ples ya, yumi kasem ol impoten save blong lidim yumi. Long olgeta ples long wol, ol man blong Jehova oli harem ol semfala save. Taswe, olgeta we oli obei mo oli joen wanples, oli glad. Samfala oli stap klosap, samfala oli stap longwe. Be evriwan we oli obei oli kasem blesing from.

?Olsem wanem long ol brata mo sista we oli stap olgeta nomo, long ol ples farawe? Plante long olgeta oli save wajem sem program long video o harem rikoding blong hem. Oli glad tumas, mo oli harem se oli no stap olgeta nomo. Long Benin, branj ofis i mekem se ol brata mo sista long taon ya Alit, long draeples blong Sahara, oli wajem tok blong brata we hedkwota i sanem. Twanti tu brata, sista, mo ol man we oli intres, oli joen wanples blong wajem. Nating se oli stap longwe, be oli harem se oli joen wetem ol 44,131 brata mo sista long bigfala asembli ya. Wan brata i raetem leta se: “Tangkiu we tangkiu tumas long video ya. Hemia i soemaot long mifala bakegen, olsem wanem yufala i lavem mifala.”

OLI SINGAOT OL ELDA BLONG OLI KASEM TRENING

Taem ol pris long Isrel oli blu long wan trampet nomo, “ol lida blong olgeta laen” oli kam wanples long haos tapolen blong God. (Nam. 10:4) Nao Moses i givim save mo i trenem olgeta, blong oli naf blong mekem wok long ol wanwan laen blong olgeta. Sipos yu yu wan long ol lida ya, ating bambae yu mekem bes blong yu blong stap long ol miting ya mo kasem gudfala trening.

Tede, ol elda oli no “lida” mo bos long ol sipsip we God i putum long han blong olgeta. (1 Pita 5:1-3) Be oli traehad blong lukaot gud long ol sipsip blong God. Taswe, oli glad blong joen wanples blong kasem moa trening, olsem long Skul Blong Ol Elda. Long taem olsem, ol elda oli lanem olsem wanem blong kamgud moa long wok blong lukaot long kongregesen. Hemia i mekem se evriwan long kongregesen oli kam klosap moa long Jehova. Maet yu neva go long wan skul olsem, be ating yu stap kasem blesing taem oli yusum samting we oli lanem blong halpem kongregesen.

YUMI MAS MEKEM SAM JENIS

Sam samtaem ol pris long Isrel oli stap blu sotsotwan nomo long trampet. Hemia i givim saen long ol man Isrel se oli mas muv i go long narafala ples. (Nam. 10:5, 6) Taem oli muvaot, oli folem wan gudfala plan, mo evriwan oli mas wok had. Samtaem maet sam long olgeta oli no glad blong muvaot. ?From wanem?

Maet oli harem se oli stap muv tumas mo i hapen kwik tumas. “Samtaem klaod ya i stap wan naet nomo.” Sipos no, maet “tu dei, no wan manis, no wan yia no i bitim wan yia.” (Nam. 9:21, 22) ?Hamas taem ol man Isrel oli muv i go long narafala ples? Namba japta 33 i tokbaot 40 ples we ol man Isrel oli bin stap long olgeta.

Samtaem, maet oli save putum ol haos tapolen blong olgeta long sado. Taem oli wokbaot long “bigfala draeples ya we i nogud we i nogud,” ating oli glad sipos oli faenem wan sado. (Dut. 1:19) Maet oli ting se sipos oli muv i go long narafala ples, bambae oli no faenem wan gudfala sado olsem.

Taem ol laen oli stat blong muvaot, maet i had blong samfala oli gat longfala tingting blong letem narafala i go fastaem. Evriwan oli harem saon blong trampet, be oli no save muvaot evriwan wantaem. Taem oli blu sotsotwan long trampet, trifala laen long saed i go long is oli muvaot, hemia laen blong Juda, Isakara, mo Sebulun. (Nam. 2:3-7; 10:5, 6) Afta, ol pris oli blu sotsotwan bakegen long trampet, nao tri laen long saed i go long saot oli muvaot. Oli gohed olsem gogo olgeta laen oli muvaot.

Maet yu harem se i had taem i gat sam jenis long oganaesesen. Maet yu ting se i gat tumas jenis, o yu no glad from yu laekem moa plan we i stap fastaem. Nating se i olsem wanem, yu harem se ol jenis ya oli traem longfala tingting blong yu, mo i tekem taem blong yu lan long olgeta. Be sipos yu obei, ating bambae yu luksave se jenis ya i wan blesing blong Jehova.

Long taem blong Moses, Jehova i lidim plante milian man, woman, mo pikinini oli gotru long draeples. Sipos hem i no lukaot long olgeta mo lidim gud olgeta, bambae oli lus long ples ya we i had. Tede, Jehova i stap lidim yumi i gotru long ol las dei ya we oli had. Hem i givhan long yumi blong yumi stap klosap long hem mo blong mekem bilif blong yumi i strong. Taswe, i gud yumi evriwan i gat strong tingting blong mekem sem mak olsem ol man Isrel, taem yumi harem saon blong trampet.

    Ol buk long Bislama (1987-2026)
    Logaot
    Login
    • Bislama
    • Serem
    • Setemap Olsem Yu Wantem
    • Copyright © 2025 Watch Tower Bible and Tract Society of Pennsylvania
    • Ol Rul
    • Privacy Policy
    • Privacy Settings
    • JW.ORG
    • Login
    Serem