Wan Kwestin

Folem sam ripot, long sam hospital, afta we wan pikinini i bon, oli karem basket blong pikinini mo rop blong nambuten blong hem, mo oli karemaot sam samting long blad insaed long olgeta, blong yusum biaen. ?Ol Kristin oli mas wari long samting ya?

Long bighaf blong ol hospital, oli no folem fasin ya, taswe ol Kristin oli no nid blong wari tumas. Sipos i gat gudfala risen blong ting se oli stap folem fasin ya long hospital we wan Kristin sista bambae i karem pikinini blong hem, ale, i stret blong talem klia long dokta se yu wantem we oli sakemaot basket blong pikinini mo rop blong nambuten blong hem, mo no yusum long wan narafala rod.

Ol man blong stadi long ol meresin, oli bin wokem plante defren meresin long ol laef samting, olsem ol anamol mo man. Eksampel, oli karemaot samkaen homona long pispis blong ol hos we oli gat bel. Oli wokem wan stik meresin blong blokem sik ya tetanus, from blad blong hos. Mo, longtaem finis, ol man oli bin yusum wan samting we oli kolem gama globulin we i kamaot long blad blong basket blong pikinini (afta we pikinini i bon), blong winim sam sik. Samfala hospital oli kipim ol basket ya blong pikinini mo oli putum long aesbokis. Nao biaen, ol man blong stadi long bisnes ya, oli tekemaot gama globulin long blad blong ol basket ya, from we hem i rij long ol samting blong faetem sik.

I no longtaem i pas, ol man blong stadi oli talem se i gat gudfala risal taem oli yusum blad blong basket blong pikinini afta we i bon, olsem meresin blong sik ya lukimia. Mo oli ting se maet blad ya i gud tu blong winim sam problem we oli mekem se bodi i no moa gat paoa blong faetem sik, mo tu, blong tekem ples blong fasin ya we dokta i jenisim ol sel insaed long bun. Taswe, i gat plante toktok i kamaot long saed blong fasin ya we ol papa mama oli letem dokta i karemaot blad blong basket blong pikinini afta we hem i bon, putum long aesbokis, mo kipim i stap, blong oli save yusum bakegen long fyuja sipos pikinini ya i kam sik samtaem.

Fasin ya we oli mekem bisnes from blad blong basket blong pikinini, i no laenap wetem tingting blong ol trufala Kristin. Olgeta ya oli letem loa blong God we i stretgud i lidim olgeta. Man ya we i wokem yumi, hem i luk blad olsem wan tabu samting, we i saen blong laef we Hem i givim. God i talem long ol man blong yusum blad long wan fasin nomo, hemia long olta blong mekem sakrifaes. (Levitikas 17:10-​12; skelem wetem Rom 3:​25; 5:8; Efesas 1:7.) Long ol narafala taem we man i karemaot blad blong wan laef samting, hem i mas kafsaedem long graon, i no mas yusum.​—Levitikas 17:13; Dutronome 12:15, 16.

Taem ol Kristin oli kilim wan anamol blong kakae, olsem wan faol no pig, oli letem blad blong anamol ya i ronaot, mo oli no yusum. I no minim se evritaem oli folem fasin we oli kafsaedem blad ya long graon. Impoten samting, hemia se oli mas sakem blad ya, oli no mas yusum bakegen.

Ol Kristin we oli sik mo oli mas go long hospital, oli bilif se dokta bambae i sakem ol samting we hem karemaot long bodi blong olgeta, olsem ol doti blong bodi, ol haf blong bodi we sik i mekem i kam nogud, mo blad. I tru se, maet wan dokta i wantem mekem sam tes fastaem long ol samting ya, olsem jekem pispis blong luk sipos man i gat sik, stadi long sam haf we oli katemaot we maet i gat kansa long hem, no jekemap blad. Be afta, oli sakem ol samting ya, folem loa blong kantri we yumi stap long hem. Wan sik man we i stap long hospital, ating i no rili nidim blong mekem wan spesel toktok long saed blong bisnes ya, from we i stret mo i waes we ol dokta oli sakem kwiktaem ol haf we oli tekemaot long bodi. Sipos wan sikman i gat gudfala risen blong ting se dokta bambae i no folem fasin olsemia, ale, hem i mas talem long dokta ya se, from bilif blong hem, hem i wantem se dokta i sakem ol samting ya.

Be, olsem yumi talem finis, hemia i no wan bigfala wari blong ol sikman, from we long plante ples, ol hospital oli no tingbaot, mo oli no folem, fasin ya blong karemaot mo yusum bakegen ol samting insaed long basket blong pikinini afta we hem i bon, no sam narafala samting blong bodi.

Haf ya “Yumi Mas No Laekem Nating Ol Fasin We Oli Nogud,” long “Wajtaoa” blong Janewari 1, 1997, i luk olsem se i stap tokbaot pedofilia. ?Wanem mining blong pedofilia?

Webster’s Ninth New Collegiate Dictionary i talem se, “pedofilia” i minim “krangke fasin long saed blong seks we man i mekem wetem ol pikinini.” Dutronome 23:17, 18 i agensem ol fasin we oli joen wetem pedofilia. Long ples ya, God i tok agens long olgeta we oli mekem rabis fasin long saed blong seks insaed long haos prea (futnot i talem se, “‘katamaet,’ hemia wan boe we oli holem hem i stap blong mekem krangke fasin blong seks wetem hem”). Mo tu, ol vas ya oli blokem eniman blong karem praes blong “wan dog” (futnot i talem se, “ating wan pederas; man we i slip wetem man, antap moa wetem ol yangfala boe”), i kam long “haos blong Jeova.” Ol tok ya we i kamaot long Baebol mo sam narafala buk, oli soemaot se Wajtaoa ya i stap tokbaot fasin ya we bigman i mekem nogud long saed blong seks wetem pikinini, olsem fasin blong tajem ol tabu haf blong bodi blong pikinini.

[Futnot]