“Go Long Solwota Long Taem Blong Hariken”

?YUFALA i no ting se fasin olsem i krangke nomo, mo i rod blong kasem moa trabol? Be, i gat sam man we oli stap mekem samting we i klosap sem mak long laef blong olgeta. ?Olsem wanem? Long ol yia 16 handred, wan man Engglan we i raetem buk, nem blong hem Thomas Fuller, i talem se: “I nogud man i mekem samting taem hem i kros tumas. Fasin olsem i sem mak nomo olsem man we i go long solwota long taem blong hariken.”

Sipos wan man i gohed blong mekem samting we hem i wantem mekem long taem we hem i kros tumas, bigfala trabol i save kamaot from. Yumi luksave samting ya long wan stori we i stap long Baebol. Tufala pikinini boe blong olfala Jekob, Saemon mo Livae, tufala i kam kros bigwan from wan man i bin repem Dina, sista blong tufala. Tufala i wantem givimbak long man ya. ?Wanem i kamaot from? Tufala i mekem ol nogud fasin blong kilim man i ded mo stilim samting blong narafala. Yumi no sapraes se Jekob i agensem bigfala sin blong tufala taem hem i talem se: “Tufala. Yutufala i mekem wan bigfala trabol long mi ya. Naoia, ol laen blong Kenan . . . bambae oli no moa laekem mi, bambae oli agens long mi.”​—Jenesis 34:25-​30.

Baebol, Tok blong God, i givim waes advaes blong folem wan rod we i defren olgeta. Hem i talem se: “I nogud yu kros, i nogud yu faerap, i nogud yu wari. Ol rod ya i rod blong kasem trabol nomo.” (Ol Sam 37:8) Sipos yumi folem advaes ya, bambae i blokem yumi blong mekem sam bigfala sin.​—Prija 10:4; lukluk tu Ol Proveb 22:24, 25.