Refrens Blong Kristin Wok Mo Laef Miting Wokbuk
© 2025 Watch Tower Bible and Tract Society of Pennsylvania
2-8 MAJ
OL SAS SAMTING LONG BAEBOL AESEA 41-42
“Yu No Mas Fraet”
ip-2 20 ¶10
Wan Profet Tok We i Save Leftemap Tingting Blong Yu Tu
10 Jehova i luk samting we bambae i hapen samwe 200 yia long fiuja. Man ya Saeras i lidim wan strongfala ami we oli muv spid mo oli atakem evri enemi blong olgeta. Ol man we oli laef long ol aelan, hemia ol man we oli laef long ol ples longwe, olgeta tu oli stap seksek taem hem i stap kam. From we oli fraet tumas, oli joen wanples blong faet agensem man ya we Jehova i singaotem hem blong i aot long is mo i kam jajem ol man. Oli stap traem blong lefleftemap tingting blong olgeta, taem oli se: “Yufala i mas strong.”
Aesea 41:10—“Yu No Fraet, Mi Mi Stap Wetem Yu”
“Mi mi stap wetem yu.” Jehova i talem long ol man blong hem se oli no nid blong fraet, from we oli no stap olgeta nomo. Hem i luk evri samting we i hapen long olgeta mo i harem ol prea blong olgeta, taswe i olsem we hem i stap wetem olgeta.—Ol Sam 34:15; 1 Pita 3:12.
“Mi mi God blong yu.” Jehova i kwaetem tingting blong ol man blong hem taem hem i talem se nomata wanem i hapen long olgeta, hem i God blong olgeta, mo hem i glad long wosip blong olgeta. Oli save gat strong tingting se i no gat wan samting we i save blokem God, blong i no tekem aksen blong givhan long olgeta.—Ol Sam 118:6; Rom 8:32; Hibrus 13:6.
“!Mi bambae mi mekem yu yu strong! !Bambae mi givhan long yu! !Bambae mi holemtaet yu, mo mi yusum raet han blong mi blong lidim yu long stret fasin.” Jehova i yusum tri defren fasin blong talem se hem bambae i sapotem olgeta. Hem i soemaot samting we hem i save mekem taem wan man blong hem i foldaon. Hem i save pusum raet han blong hem, mo givhan long hem blong i stanap bakegen.—Aesea 41:13.
Wan impoten rod we God i yusum blong givhan long ol man blong hem mo mekem olgeta oli strong, hemia Tok blong hem Baebol. (Josua 1:8; Hibrus 4:12) Baebol i givim gudfala advaes long olgeta we oli kasem ol trabol olsem sot long mane, sik, wan fren o famle i ded. (Proveb 2:6, 7) God i save yusum tabu spirit o paoa blong hem tu, blong mekem ol man blong hem oli tingting klia mo oli no harem nogud bitim mak taem oli kasem ol trabol ya.—Aesea 40:29; Luk 11:13.
‘!Yu No Fraet! !Mi Bambae Mi Givhan Long Yu!’
Ol toktok ya blong Jehova oli mekem yumi harem gud. Yu traem tingbaot samting we Jehova i promes blong mekem long yumi. Vas blong Aesea i no talem se yu stap wokbaot long saed blong Jehova mo yu holem han blong hem. Sipos yu stap wokbaot long saed blong hem, bambae raethan blong hem i holem lefhan blong yu. Be Jehova i pusum ‘raethan blong hem’ mo i holemtaet “raethan blong yu,” i olsem we hem i stap pulumaot yu long wan bigfala trabol. Jehova i mekem yu yu strong taem hem i holemtaet raethan blong yu, mo i talem se: “!Yufala i no fraet! !Mi bambae mi givhan long yufala!”
?Yu yu luksave Jehova olsem wan papa no wan fren we i lavem yu tumas? ?Yu yu bilif se bambae hem i givhan long yu taem yu fesem ol hadtaem? Jehova i rili kea long yu mo hem i wantem givhan long yu. Taem yu kasem ol hadtaem, Jehova i wantem se yu harem gud mo yu sef. ?From wanem? From we hem i lavem yu tumas. I tru nomo se “oltaem, hem i rere blong givhan long yumi long taem blong trabol.”—Sam 46:1.
Ol Gudgudfala Samting
?Wanem Mining Blong Stap Tru Long God?
Jeova i bin talem long fren blong hem Ebraham se: “Mi stap blokemgud yu, blong i nogat wan samting i save kam spolem yu.” (Jenesis 15:1; Aesea 41:8) Jeova i no jes talem toktok olsem nomo, be i tekem aksin tu folem wanem we hem i talem. Hem i protektem Ebraham wetem famle blong hem mo i mekem oli kam fri long han blong Fero mo long han blong Abimelek tu. Hem i halpem Ebraham blong i sevem Lot long han blong ol ami blong fo king. Jeova i mekem bodi blong Ebraham, we i gat 100 yia, mo Sera, we i gat 90 yia, i gat paoa bakegen blong wokem pikinini, nao promes Laen i save kamaot tru long tufala. Oltaem Jeova i toktok long Ebraham tru long ol vison, ol drim, mo ol enjel we hem i sanem. Tru ya, Jeova i stap tru long Ebraham, taem we hem i laef mo tu, longtaem afta we Ebraham i ded. Blong plante handred yia, Jeova i holemtaet ol promes blong hem long ol pikinini blong Ebraham, hemia nesen blong Isrel, nating we oli stronghed. Fasin fren blong Jeova wetem Ebraham i soemaot trufala fasin blong stap tru—hem i filing blong lav we i jenis i kam aksin.—Jenesis, japta 12 kasem 25.
9-15 MAJ
OL SAS SAMTING LONG BAEBOL AESEA 43-44
Wan Profet Tok We Oli Raetem 200 Yia Bifo
gm 123-124 ¶16-17
Ol Profet Tok We Oli Kamtru
16 Long 539 B.K.T., rul blong wol paoa ya Babilon i kam long en blong hem, taem Saeras we i strongfala rula blong Pesia i kam wetem ol ami blong Media blong agensem taon ya. Be Saeras i makem sam samting we i mekem se i had blong oli go insaed long taon ya. Hem i luk se taon ya i gat bigfala stonwol i raonem, mo i strong gud. Mo tu, bigfala reva ya Yufretes i pastru long taon ya, mo hemia i mekem se i had moa blong ol enemi oli atakem taon ya.
17 Herodotus we i wan man Gris we i stap raetem histri, i tokbaot olsem wanem Saeras i naf blong winim problem ya: “Hem i putum sam ami long ples we reva i ron blong go insaed long taon ya, mo i putum sam narafala ami long ples we reva ya i ron blong goaot long hem. Mo hem i givim oda se taem oli luk we wota blong reva ya i godaon, bambae oli maj i go insaed long taon ya . . . Hem i jenisim rod blong Yufretes, taem hem i digim wan kanal i go long wan hol [wan lek we wan rula blong Babilon bifo i bin digim], we long taem ya i wan swam, mo hem i mekem se level blong reva ya i godaon we man i save wokbaot i gokros. Nao wantaem nomo, ol ami blong Pesia we oli stap rere finis long Babilon, oli go insaed long reva ya we level blong hem i kasem samwe antap long ni blong olgeta, mo oli go insaed long taon ya.”4
it “Saeras” ¶7
Saeras
Babilon i Lus. Naoia Saeras i redi blong go faet agensem strongfala taon ya Babilon. Long taem ya, hem i mekem wan impoten haf blong profet tok long Baebol i kamtru. Taem Aesea i talemaot profet tok ya se bambae oli bildim Jerusalem mo tempol bakegen, hem i talemaot nem blong rula ya tu blong Pesia we Jehova God i jusumaot blong i winim Babilon mo i mekem ol man Jiu oli go fri. (Aes 44:26–45:7) Nating se oli talemaot profet tok ya bitim 150 yia bifo we Saeras i kasem paoa, mo bifo we oli spolem Juda we hemia bifo we Saeras i bon, be Jehova i talemaot finis se Saeras bambae i “man blong lukaot long ol sipsip” we i givhan blong lidim ol man Jiu. (Aes 44:28; skelem wetem Ro 4:17.) Jehova i jusumaot longtaem finis se Saeras nao bambae i mekem profet tok ya i kamtru, taswe Baebol i singaotem Saeras se “man ya we [Jehova] i makemaot” (we i kamaot long Hibru tok ya ma·shiʹach we i minim mesaea, mo long Grik tok ya khri·stos, we i minim kraes). (Aes 45:1) Taem Baebol i talem se God i ‘singaot hem long nem blong hem,’ (Aes 45:4) hemia i no min se Jehova i givim nem ya Saeras long hem taem hem i bon. Be i min se Jehova i save finis se bambae wan man we nem blong hem Saeras i kasem paoa, mo bambae Jehova i no singaotem hem long ol narafala nem be i yusum stret long nem blong hem.
it “Saeras” ¶17
Saeras
Saeras i givhan long ol man Jiu long wan fasin we i defren long ol hiten rula we oli bin rulum ol man Jiu. Hem i givimbak ol tabu samting blong tempol we Nebukadnesa II i bin tekem i go long Babilon, hem i givim oda long ol man Jiu blong oli tekem ol timba blong sida we i kam long Lebanon, mo hem i givim raet blong oli yusum mane we i kamaot long haos blong king blong pem ol samting we oli nidim blong bildim bak Jerusalem. (Esr 1:7-11; 3:7; 6:3-5) Ol toktok we i stap long ston ya Ston Blong Saeras (PIJA, Vol. 2, pej 332), i soemaot se king blong Pesia i mekem i gud mo i kaen long ol man we hem i winim olgeta mo we oli stap aninit long rul blong hem. Long ston ya oli raetem se: “Mi mi givimbak long [hem i talem nem blong olgeta finis] ol tabu taon we oli stap narasaed long Taegris. Longtaem finis ol haos prea long ol taon ya wetem ol aedol we oli (bin) stap insaed long olgeta, oli brobrok mo mi bildim bak ol ples blong wosip blong olgeta. Mi mi hivimap (tu) ol man we oli stap long ol ples ya (bifo) mo mi letem (olgeta) oli gobak long ol ples blong olgeta.”—Ancient Near Eastern Texts, pej 316.
Ol Gudgudfala Samting
Kwestin
Seken eksampol, hemia profet tok we i talem se Saeras bambae i win long faet, mo i letem ol man Jiu we oli stap kalabus oli go fri, mo i givim oda blong oli bildim bak tempol blong Jehova. (Aes. 44:26–45:4) Nating se King Saeras blong Pesia i no wosipim Jehova, be hem i mekem profet tok ya i kamtru. (Esra 1:1-4) Jehova nao i yusum Saeras blong mekem samting ya, be hem i no fosem hem blong wosipim Hem.—Prov. 21:1.
16-22 MAJ
OL SAS SAMTING LONG BAEBOL AESEA 45-47
“Mi Mi God, Mo i No Moa Gat Wan We i Olsem Mi”
“Plis Yu Mekem We Nem Blong Yu i Tabu”
14 Bakegen mo bakegen, Setan i traehad blong blokem samting we Jehova i wantem. Be hem i no win. Baebol i tokbaot ol samting we Jehova i mekem, mo i soemaot se i no gat wan narafala we i olsem hem. I tru se Jehova i harem nogud tumas taem Setan i agensem hem mo plante narafala oli joen wetem Setan. (Sam 78:40) Be Jehova i mekem samting we i soemaot waes, longfala tingting, mo stret fasin. Mo tu, hem i soemaot paoa blong hem long plante rod. Antap moa, hem i soemaot lav long evri samting we hem i mekem. (1 Jon 4:8) Oltaem Jehova i stap wok blong mekem nem blong hem i tabu, hem i neva stop.
cl 42 ¶14
“Jehova . . . i Gat Bigfala Paoa”
14 Olsem we bambae yumi luk, God i yusum paoa blong hem blong wokem, distroem, protektem, mo mekem wan samting i kam gud bakegen. Narafala rod blong talem, hemia se hem i save mekem eni samting we hem i wantem, blong stamba tingting blong hem i kamtru. (Aesea 46:10) Samtaem, Jehova i yusum paoa blong hem blong soemaot ol impoten fasin blong hem mo ol loa blong hem. Be samting we i moa impoten, hemia se hem i yusum paoa blong hem blong mekem wil blong hem i kamtru, taem hem i yusum Kingdom blong Mesaea blong mekem nem blong hem i tabu mo pruvum se rul blong hem nomo i beswan. I no gat wan samting i save blokem Jehova blong i mekem stamba tingting blong hem i kamtru.
it “Oli Aot Long Babilon” ¶1
Oli Aot Long Babilon
LONG 607 B.K.T., Juda we bifo i gat plante gudfala samting long hem, naoia i kam “emti, we i no gat man long olgeta,” from we bighaf blong ol man Jiu oli go kalabus long Babilon mo samfala oli ronwe i go long Ijip. (Jer 9:11) Be God ya we i gat lav mo i kaen, bambae i no letem ol man blong hem oli stap kalabus blong olwe. Longtaem finis, hem i bin talemaot se “bambae oli mas wok blong king blong Babilon blong 70 yia,” mo biaen bambae hem i letem olgeta we oli holemstrong long hem oli gofri. (Jer 25:11, 12; 29:10-14) Nating se Babilon i wol paoa long taem ya, be hem i no naf blong blokem stamba tingting blong God. Taem ol man Jiu oli gofri, hemia i soemaot se oltaem ol profet tok we Jehova i talem oli kamtru.
Letem Jeova i Soem Rod Blong Hem Long Yumi
18 Tede, i sem mak olsem bifo, yumi nidim fasin blong stap tru long Jeova oltaem, sipos yumi wantem wokbaot long rod blong hem. Yumi mas gat strong tingting blong mekem wosip long Jeova nomo. Yumi nidim fasin blong trastem hem mo bilif fulwan se ol promes blong hem oli no save jenis, bambae oli mas kamtru. Blong wokbaot long rod blong Jeova, yumi nidim fasin obei—yumi mas folemgud ol loa mo ol hae rul blong hem. “Hae God, hem i stret olgeta, mo hem i laekem ol gudfala wok.”—Ol Sam 11:7.
19 Ahas i lukluk i go long ol god blong ol man Siria blong faenem sefples. Ol man Isrel long Ijip oli ting se “kwin blong Heven”—wan woman god we fulap man long Medel Is oli wosip long hem—bambae i mekem oli kam rij. Tede, plante god oli no rili stap olsem ol aedol we man i wokem. Jisas i givim woning agensem fasin ya we man i no wosip long Jeova, be i wosipim ol ‘Rij Samting.’ (Matiu 6:24) Aposol Pol i talem se ‘fasin ya blong wantem evri samting i sem mak long fasin blong wosip long ol narafala god.’ (Kolosi 3:5) Hem i tokbaot olgeta ya tu we “kakae nomo i god blong olgeta.” (Filipae 3:19) Yes, tede plante man oli stap wosip long mane mo ol samting long laef. I tru se bighaf blong ol man—ol man blong jos tu—oli “putum tingting blong olgeta long ol mane blong olgeta.” (1 Timoti 6:17) Plante man, oli strong blong wosip long ol kaen god ya, mo samfala oli kasem gudfala frut from—oli gat ol naesfala haos, oli harem gud long plante sas samting, mo oli kakae ol nambawan kakae. Be, i no evriwan we oli harem gud long ol gudfala samting olsem. Mo nomata we samfala oli kasem ol samting ya, be biaen oli faenem se oli no rili haremgud fulwan. Ol samting ya oli save kam nogud, oli blong smoltaem nomo, mo oli no givhan long olgeta long saed blong spirit.—Matiu :3.
Ol Gudgudfala Samting
?God i Bin Save Se Adam Mo Iv Bambae i Mekem Sin?
Mo tu, Baebol i tokbaot se Jehova “nomo i waes.” (Rom 16:27) Ol enjel blong God long heven oli luk plante samting we i soemaot waes blong God. Taem oli luk we Jehova i wokem olgeta samting long wol, oli stat blong “singaot from oli glad.” (Job 38:4-7) I sua se ol enjel ya oli stap lukluk mo oli intres long samting we i stap hapen long garen blong Iden. Yes, God i waes we i waes. Taswe, ?yu ting se afta we hem i wokem ol nambawan samting long yunives mo long wol, bambae hem i wokem wan man mo woman we hem i save finis se bambae tufala i mekem sin? Nogat, God i neva save mekem wan nogud plan olsem.
Be maet samfala oli talem se: ‘?Olsem wanem God ya we i gat bigfala waes i no bin save samting ya?’ I tru, Jehova i gat bigfala waes mo hem i naf blong “talemaot samting we bambae i kamtru.” (Aesea 46:9, 10) Nating se i olsem, hem i save jusum tu blong no mekem, sem mak olsem we hem i save jusum blong no yusum paoa blong hem fulwan. Yes, Jehova i jusum nomo blong faenemaot samting we bambae i kamtru long fiuja, sipos hem i luk se i stret mo i folem situesen we i stap.
23-29 MAJ
OL SAS SAMTING LONG BAEBOL AESEA 48-49
Lesin Gud Long Jehova Mo Kasem Blesing
it “Tija, Tijim” ¶2
Tija, Tijim
Jehova, God Ya We i Wokem Olgeta Samting, hem i Bigfala Tija blong ol man blong hem. (1 King 8:36; Sam 27:11; 86:11; 119:102; Aes 30:20; 54:13) Kriesen i tijim ol man se i gat wan God i stap we i waes, mo taem oli stadi long ol kriesen ya, oli save lanem plante samting. Be kam kasem tede, ol man oli faenem nomo wan smol haf blong kriesen. (Job 12:7-9) Mo tu, Jehova God i mekem sam samting blong tijim ol man long saed blong nem blong hem, stamba tingting blong hem, mo ol loa blong hem. (Skelem wetem Eks 4:12, 15; 24:12; 34:5-7.) Yu save faenem ol samting ya long Tok Blong God, Baebol, mo oli save givhan long yu blong tijim ol stret save long saed blong wil blong God. (Rom 15:4; 2Ti 3:14-17) Tabu spirit tu i wok olsem wan tija.—Jon 14:26.
?Baebol i Talem Wanem Long Fasin Ya We Man i Fri Blong Jus? ?God i Kontrolem Evri Samting Long Laef Blong Yu?
● God i mekem ol man blong oli tekem fasin blong hem. (Jenesis 1:26) Yumi no olsem ol anamol we oli mekem ol samting folem fasin we oli bon wetem. Yumi, yumi olsem God ya we i mekem yumi, yumi naf blong soemaot ol fasin olsem lav mo stret fasin. Mo olsem God blong yumi, yumi fri blong jusum samting we yumi wantem.
● Bigfala samting se, yumi naf blong save fiuja blong yumi. Baebol i pulum yumi blong yumi jusum ‘laef mo obei long God.’ Hemia i min se yumi jusum blong obei long ol loa blong hem. (Dutronome 30:19, 20) Sipos yumi no fri blong jusum samting we yumi wantem, bambae yumi harem se samting we Baebol i talem i no gat mining, mo i no stret nating. God i no fosem yumi blong mekem samting we hem i talem, be hem i talem se: “Sipos yufala i bin obei long ol tok blong mi, ol gudgudfala samting we mi mi save mekem long yufala, bambae oli save kam long yufala, olsem wan gudfala reva we i stap ron.”—Aesea 48:18.
‘Wok Strong Blong Mekem Bilif Blong Yu i Kam Strong Moa’
8 Long ples ya Jeova i mekem yumi tingbaot se sipos yumi obei long hem, yumi mekem i gud long yumi wan bakegen. Hem i promes blong givim tu blesing. Faswan se, pis blong yumi bambae i kam olsem wan reva, i min se tingting blong yumi bambae i kwaet, pis we yumi gat bambae i fulap mo bambae i gohed olwe. Namba tu blesing se, stret fasin blong yumi bambae i kam olsem ol wef blong solwota. Sipos yu stanap klosap long solwota mo yu lukluk ol wef we oli stap kam brok oltaem long sanbij mo rif, yu no save ting se ol wef ya bambae oli finis samtaem. Yu save se long ol yia we oli kam, ol wef ya bambae oli gohed nomo, bambae oli kamkam kasem we oli brok long sanbij mo rif. Jeova i talem se stret fasin blong yu i save gohed olwe olsem ol wef ya. !Sipos yu traehad oltaem blong holemstrong long hem, hem i no save lego yu! (Ridim Ol Sam 55:22) Ol promes ya we oli mekem yumi harem gud tumas, oli mas mekem bilif blong yu long Jeova mo ol stret fasin we hem i wantem yu blong folem, i kam strong moa
Ol Gudgudfala Samting
it “Stret Taem” ¶1-3
Stret Taem
Long 2 Korin 6:2, aposol Pol i tokbaot profet tok blong Aesea 49:8 we i se: “Hemia samting we Jehova i talem, i se: ‘Long taem blong kaen long man, mi mi ansa long yu, mo long dei blong sevem man, mi mi halpem yu, mi mi gohed blong lukaot gud long yu, blong mekem yu yu kam olsem wan kontrak we mi mi mekem wetem ol man, blong mekem ol man oli go stap long graon ya bakegen, mo blong mekem we oli tekem ol ples blong olgeta we oli stap nating nomo.’” Ol tok ya, Jehova i bin talemaot long Aesea, we hem i representem nesen blong Isrel. (Aes 49:3) I klia se profet tok ya i stap tokbaot ol man Isrel we bambae oli gobak long ples blong olgeta. Faswan taem we profet tok ya i kamtru, hemia taem toktok i goaot long ol man Isrel we oli stap kalabus long Babilon se: “!Yufala i kamaot!” Mo hemia nao samting we i hapen, ol man Isrel oli gobak laef long ples blong olgeta we i stap nating nomo.—Aes 49:9.
Be tok ya we i se, “yu yu kam olsem wan kontrak we mi mi mekem wetem ol man” we i stap long vas 8, mo tok bifo we i stap long vas 6, we i se “man blong wok” blong Jehova bambae i “kam olsem laet blong ol nesen tu, blong [God i] save sevem ol man long olgeta ples long wol,” i wan profet tok long saed blong Mesaea, mo i stap tokbaot Kraes Jisas se hem i “man blong wok” blong God. (Skelem wetem Aes 42:1-4, 6, 7 mo Mt 12:18-21.) From we “taem blong kaen long man” i taem ya we Jehova bambae i “ansa” mo i “halpem” ol man blong wok blong hem, i klia se samting ya i hapen taem Jisas i stap long wol. Long taem ya, Jisas “i stap prea long God ya we i naf blong tekemaot hem long ded. Hem i stap askem ol samting long God long bigfala voes, mo i krae i go long hem blong i givhan long hem, we wota blong ae blong hem i stap ron, mo God i harem hem from we hem i fraet long God.” (Hib 5:7-9; skelem wetem Jon 12:27, 28; 17:1-5; Lu 22:41-44; 23:46.) Mo tu, God i yusum Jisas blong ‘sevem ol man,’ from we Jisas i soemaot finis se hem i holemstrong long God. Nao long rod ya, Jisas “i kam prapa man blong sevem man blong olwe, blong hem i sevem olgeta we oli obei long hem.”—Hib 5:9.
Be tu, taem Pol i tokbaot profet tok ya, hemia i soemaot se profet tok ya i go tu long ol Kristin ya we hem i talem long olgeta se: “God i kaen long yufala, be yufala i no mas letem fasin ya blong hem i go blong nating nomo.” Mo hem i talem tu se (afta we i tokbaot Aes 49:8): “!Yufala i luk! Naoia i stret taem blong hem i givhan. !Mo yufala i luk! Naoia i dei blong sevem man.” (2Ko 6:1, 2) Ol Kristin ya oli kam “Isrel blong God” long saed blong spirit, stat long Pentekos long yia 33 K.T. (Ga 6:16) Nating se i olsem, oli mas gohed blong pruvum se i stret blong God i kaen long olgeta, olsem nao long “stret taem” God bambae i save sevem olgeta long “dei blong sevem man.”
6-12 EPREL
OL SAS SAMTING LONG BAEBOL AESEA 50-51
Lesin Long Man Ya We God i Tijim Hem
Trenem Ol Man Blong Talemaot Kingdom
5 Long stret taem, Jehova i tijim Pikinini blong hem long wok we bambae hem i mekem long wol. Yu traem tingbaot samting we profet Aesea i talem. (Ridim Aesea 50:4, 5.) Profet ya i talem se “evri moning” Jehova i mekem rere Pikinini blong hem blong tijim hem. Maet yumi tingbaot wan tija we i wekemap studen blong hem evri moning blong tijim hem. Wan buk we i eksplenem Baebol i talem se: “Jehova i tijim Pikinini blong hem olsem wan tija i tijim ol pikinini long skul. Hem i tijim hem long ol tok we hem i mas talemaot, mo long fasin we hem i mas folem blong talemaot.” Yes, long “skul” long heven, Jehova i tijim Pikinini blong hem long ‘ol tok we bambae hem i talem.’ (Jon 12:49) Mo tu, Jehova i tijim Pikinini blong hem long fasin we hem i mas folem blong tijim ol narafala. Taem Jisas i stap prij long wol, hem i folem trening we Papa blong hem i givim. Mo hem i trenem ol man blong hem tu, blong oli save tijim ol narafala.
cf 133 ¶13
“Mi Mi Lavem Papa”
13 Bifo we Jisas i kamdaon long wol, hem i lanem plante samting long Papa blong hem. Profet tok we i stap long Aesea 50:4-6, i tokbaot se Jehova i tijim gud Boe blong hem long saed blong wok blong Mesaea. Taem God i stap tijim Jisas, hem i tokbaot tu se Man We God i Makemaot Hem, bambae i mas fesem sam hadtaem. Nating se i olsem, Jisas i wantem tumas blong lanem ol samting ya. Samtaem biaen, afta we Jisas i kamdaon long wol mo i gruap i kam bigwan, hem i gohed blong soemaot semfala fasin ya. Hem i wantem tumas blong go long haos blong Papa blong hem mo mekem wosip, mo lanem ol samting we i kamaot long Jehova. Baebol i pruvum samting ya taem i tokbaot se, oltaem Jisas i stap go long tempol mo long sinagog. (Luk 4:16; 19:47) Sipos yumi wantem se lav we yumi gat long Jehova i gohed blong gru, yumi mas go oltaem long ol Kristin miting blong wosipim Jehova, mo lanem ol samting we i givhan long yumi blong savegud hem mo tinghae moa long hem.
Ol Gudgudfala Samting
it “Ples Blong Digim Ston” ¶2
Ples Blong Digim Ston
Jehova i yusum profet Aesea blong i tokbaot wan pijatok long saed blong wan ples blong digim ston mo wok we oli mekem long ples ya. (Aes 51:1) Ol vas we oli kam biaen, oli soemaot se “bigfala ston ya” hemia Ebraham we i stamba blong ol nesen, mo “ples blong ston we oli digimaot” o ‘bigfala ples we ol ston ya oli kamaot long hem’ hemia Sera, we laen blong Isrel i kamaot long hem, taem hem i bonem Aesak. (Aes 51:2) Be from we Jehova nao i mekem merikel blong Aesak i save bon, hemia i soemaot se pijatok ya i gat wan narafala impoten mining long saed blong spirit. From samting ya, Dutronome 32:18 i tokbaot Jehova olsem “Bigfala Ston ya we i papa” blong Isrel, mo we hem nao i “bonem yu [hemia semfala veb we oli yusum blong tokbaot Sera long Aes 51:2].”
13-19 EPREL
OL SAS SAMTING LONG BAEBOL AESEA 52-53
!Jisas i Soemaot Bigfala Lav!
Ol Yangfala, Yufala i No Letem Ol Narafala Yangfala Oli Pulum Yufala
2 ?Olsem wanem? ?Ol fren mo ol yangfala raonabaot long yu, oli gat bigfala paoa long yu? Sipos yes, ?from wanem i olsem? Ating yu wantem se oli glad long yu. Samting ya i no rong. Ol bigman tu oli wantem se ol fren mo ol man raonabaot long olgeta, oli glad long olgeta. Nating se yumi yangfala no yumi olfala, be yumi evriwan i harem nogud taem narafala i no laekem yumi. I tru se, taem yumi strong blong mekem samting we i stret, bambae i gat sam man we oli no glad long yumi. Samting ya i hapen long Jisas tu. Be nating, oltaem Jisas i mekem samting we i stret. Samfala oli biaen long Pikinini blong God mo oli kam man blong hem, be sam narafala oli lukluk nogud long hem, mo oli mekem long hem “olsem we hem i nating nomo.”—Aes. 53:3.
ip-2 205 ¶25
Jehova i Leftemap Mesaea We i Man Blong Wok Blong Hem
25 ?Olsem wanem? ?Mesaea i rere nomo blong safa mo ded? Aesea i talem se: “Ol man oli mekem i strong tumas long hem, mo hem i letem nomo we ol man oli mekem hem i harem nogud, be hem i no save openem maot blong hem. Oli tekem hem i go olsem wan sipsip blong kilim hem i ded, mo olsem wan woman sipsip we i stap kwaet nomo taem oli stap katemaot hea blong hem, mo hem i no save openem maot blong hem.” (Aesea 53:7) Long naet bifo we Jisas i ded, Jisas i save singaot “plante taosen enjel” blong oli kam givhan long hem. Be hem i talem se: ‘?Sipos mi mekem olsem, Ol Tok ya Blong Baebol we i talem se oli mas hapen, bambae oli kamtru olsem wanem?’ (Matiu 26:53, 54) Defren olgeta, “Smol Sipsip Blong God” i no traem blokem trabol ya blong i no kasem hem. (Jon 1:29) Taem ol jif pris mo ol elda oli stap talem ol giaman poen agensem hem long fored blong Paelat, Jisas “i no talem wan samting.” (Matiu 27:11-14) Hem i no wantem talem eni samting we maet i save blokem hem blong i no moa mekem wil blong God i kamtru. Jisas i rere nomo blong ded olsem wan smol sipsip blong sakrefaes. Hem i save se ded blong hem bambae i sevem ol stret man mo i finisim sin, sik, mo ded.
Ol Gudgudfala Samting
it “Ol Samting” ¶2
Ol Samting
Plante taem oli yusum tok ya keliʹ blong tokbaot ol samting we oli yusum long haos blong Jehova. Hemia i minim ol samting olsem ol plet, ol jag, ol savel, ol bol, ol fok, ol faea holda, ol sisis blong katem wik blong laet, samting blong holem wik blong laet, ol besin, mo ol kap. (Eks 25:29, 30, 39; 27:3, 19; 37:16, 23; 38:3; 1Ki 7:40-50; 2Kr 4:11-22) From we oli yusum ol tul ya blong mekem ol tabu wok, ol tul ya oli “tabu.” (1Ki 8:4) Long 537 B.K.T., ol man Jiu we oli aot long Babilon oli gat privilej blong tekembak ol tabu tul ya, we King Nebukadnesa i bin tekemaot long Jerusalem. Be blong mekem olsem, ol man ya oli mas stap klin long saed blong spirit mo bodi. Taswe profet tok ya blong Aesea i go stret long olgeta, we i se: “Yufala we i stap karem ol samting blong yusum long haos blong Jehova, !yufala i tanraon, yufala i tanraon, yufala i kamaot long ples ya, yufala i no tajem ol samting we oli no klin! Yufala i kamaot long medel blong hem, yufala i mas lukaot gud blong yufala i stap klin.” (Aes 52:11) Tok ya i no minim nomo se oli mas stap klin long bodi, be oli mas mekem hat blong olgeta tu i klin. Taem aposol Pol i raet i go long ol Kristin long Korin, hem i yusum ol tok blong Aesea 52:11 blong soemaot se ol Kristin oli mas stap longwe long ol samting we i save mekem oli kam doti long saed blong bodi mo spirit.—2Ko 6:14-18; 7:1.
20-26 EPREL
OL SAS SAMTING LONG BAEBOL AESEA 54-55
?Yu Yu Rere Blong Mekem Sam Sakrefaes?
Tijing We God i Givim i Beswan Edukesen
3 Jeova i gud tumas, mo from samting ya, hem i glad blong tijim ol sinman. Long Aesea 54:13, yumi ridim wan profet tok long saed blong ol Kristin we tabu spirit i makemaot olgeta. Jeova i talem long olgeta se: “Mi nomo bambae mi tijim yufala, mi mekem we yufala i gat pis, mo yufala i gat gudfala laef.” Tok ya i stret tu long “ol narafala sipsip” blong Kraes. (Jon 10:16) Yumi save samting ya from profet tok blong Aesea we i stap kamtru long taem blong yumi. Aesea i luk wan vison blong fulap man blong olgeta neson we oli stap wokbaot i go blong joen long trufala wosip. Ol man ya oli stap taltalem long olgeta se: “Yumi go antap long hil ya blong hem [“Jeova,” NW]. Yumi go mekem wosip long haos blong hem. Hem bambae i tijim yumi long ol fasin we hem i wantem blong yumi folem, nao bambae yumi save folem ol rod we hem i jusumaot.” (Aes. 2:1-3) !Tru ya, i wan bigfala ona blong kasem tijing we God i givim!
‘Pemaot Trutok Mo No Salemaot’
6 Ridim Aesea 55:1-3. Samting we Jehova i talem i halpem yumi blong save mining blong tok ya, pemaot trutok. Hem i se tok blong hem i olsem wota, melek, mo waen. Kol wota i mekem man we i tosta i haremgud, sem mak olsem we trutok i mekem yumi haremgud. Mo melek i mekem wan pikinini i gru i kam strong, sem mak long trutok we i mekem yumi frengud moa wetem Jehova. Mo tu, Jehova i se tok blong hem i olsem waen. ?From wanem? Baebol i talem se waen i mekem man i glad. (Ol Sam 104:15) Taswe taem Jehova i talem long yumi blong ‘pem waen,’ hem i soemaot se sipos yumi folem tok blong hem, bambae yumi glad. (Ol Sam 19:8) Ol samting ya oli mekem yumi kasemsave se, yumi save haremgud taem yumi lanem mo folem trutok. Naoia bambae yumi tokbaot faef samting we maet yumi lego blong pemaot trutok.
?YU YU LEGO WANEM BLONG PEMAOT TRUTOK?
7 Taem. I tektaem blong wan man i lesin long mesej blong Kingdom, ridim Baebol mo ol buk we oli tokbaot Baebol, stadi Baebol wetem ol Witnes, rerem miting, mo go long ol miting. Blong mekem olgeta samting ya, yumi mas yusumgud taem blong yumi mo lego ol samting we oli no impoten. (Ridim Efesas 5:15, 16 mo futnot.) ?I tekem hamas taem blong lanem ol stamba trutok blong Baebol? Hemia i dipen long wanwan man. I nogat en long ol save we yumi lanem long saed blong Jehova, ol plan blong hem, mo ol wok blong hem. (Rom 11:33) Faswan Wajtaoa we oli wokem i talem se: “Trutok i olsem wan smol flaoa we i naes. Be yu no mas glad from wan flaoa ya nomo. God i wokem plante moa. Yu mas gohed blong lukaot mo traem faenem moa.” Taswe, i gud yu askem se: ‘?Mi mi savegud Jehova?’ Nating sipos yumi laef olwe, be oltaem bambae yumi gohed blong save Jehova. Tede, i impoten we yumi yusumgud taem blong yumi blong lanem moa long saed blong Jehova. Hemia stori blong wan woman we i mekem olsem
‘Lesin Gud Long Ol Tok We Yu Harem’
Plante samting oli save mekem se yumi no lesin gud. Maet yumi stap tingting long sam trabol we yumi fesem. Maet i gat noes insaed no afsaed long ples blong miting, no maet ol man oli stap gokam. Sipos yumi sik lelebet, i hadwok blong putum tingting blong yumi i stap long wanem we yumi harem. Olgeta we oli gat pikinini, oli luk se plante taem oli no stap lesin gud. ?Wanem i save givhan long yumi blong yumi putum tingting blong yumi i stap long ol tok we yumi lesin long hem?
Samting we yumi lukluk, hemia nao samting we bambae yumi tingting long hem. Taswe, i gud yu lukluk i go nomo long brata we i stap givim tok, nao bambae i isi moa blong yu yu putum tingting blong yu i stap long wanem we yu harem. Taem brata ya i talem wan vas blong Baebol, i gud yu faenem vas ya mo yu folem long Baebol blong yu, nating se yu save gud vas ya. Sipos i gat wan noes, yu no mas tanem hed blong yu i go long ples we noes ya i stap kamaot long hem. Sipos ae blong yu i stap pulum tingting blong yu i go olbaot, bambae yu mestem fulap save we i stap kamaot long miting.
Sipos i gat wan samting we i mekem se yu stap “tingting tumas,” bambae i had blong yu yu putum tingting blong yu i stap long ol tok we yu harem. I gud yu prea mo yu askem long Jehova blong i mekem tingting mo hat blong yu i kam kwaet, nao yu save lesin gud. (Sam 94:19; Fil. 4:6, 7) Maet yu mas prea olsem bakegen mo bakegen, sipos yu luk se i gat nid. (Mat. 7:7, 8) Jehova nao i mekem plan ya se yumi gat ol miting blong kongregesen. Yu save gat strong tingting se hem i wantem we yu yu kasem olgeta gudfala samting long ol miting ya..—1 Jon 5:14, 15.
Ol Gudgudfala Samting
“!Yu No Wari, Mi Mi God Blong Yu!”
14 Fas samting: Yumi ol man blong Kraes, yumi save se bambae ol man oli agensem yumi. (Mat. 10:22) Jisas i talem long ol disaepol blong hem se long ol las dei, ol man bambae oli mekem bigfala trabol long olgeta. (Mat. 24:9; Jon 15:20) Seken samting: Profet tok blong Aesea i givim woning se bambae ol enemi oli go moa i bitim we oli no laekem yumi. Bambae oli yusum ol tul blong faet agensem yumi. Sam long ol tul ya, hemia se oli giaman, oli talem ol tok we i saon olsem se i tru be i giaman nomo, mo oli kilim mo ronem yumi. (Mat. 5:11) Jehova bambae i no blokem ol enemi blong oli no yusum ol tul blong faet ya agensem yumi. (Efes. 6:12; Rev. 12:17) Be yumi no nid blong fraet. ?From wanem?
15 Namba tri samting we yumi mas tingbaot: Jehova i talem se “eni tul blong faet” we oli yusum agensem yumi, ‘bambae i no save win.’ Olsem wan stonwol we i protektem yumi long bigfala win mo ren, Jehova i save protektem yumi long ‘ol enemi we oli no gat sore.’ (Ridim Aesea 25:4, 5.) Bambae oli no save mekem wan samting blong spolem yumi blong olwe.—Aes. 65:17.
27 EPREL–3 MEI
OL SAS SAMTING LONG BAEBOL AESEA 56-57
Yumi Glad Se Jehova i God Blong Yumi
ip-2 269 ¶14-16
Jehova i Givim Paoa Long Olgeta We Oli No Gat Nem
14 Nating se i olsem, longfala tingting blong God i gat en blong hem. Jehova i tokbaot taem ya i se: “Bambae mi mekem ol man oli save ‘stret fasin’ blong yu mo ol wok blong yu, mo bambae oli no givhan long yu. Taem yu krae blong man i givhan long yu, ol aedol we yu hivimap olgeta bambae oli no sevem yu. Wan win bambae i karemaot olgeta i gowe, win blong maot nomo bambae i blu long olgeta i gowe.” (Aesea 57:12, 13a) Juda i stap giaman se hem i gat stret fasin, be Jehova bambae i soemaot samting ya long klia ples. Ol giaman wok blong hem bambae oli no givhan nating. “Ol aedol we [hem i] hivimap,” bambae oli no sevem hem. Taem trabol i kasem hem, ol god ya we hem i trastem olgeta, bambae win blong maot nomo i blu long olgeta i gowe.
15 Ol tok ya blong Jehova oli kamtru long 607 B.K.T. Long taem ya, Nebukadnesa we i king blong Babilon i distroem Jerusalem, i bonem tempol, mo i tekem plante man oli go kalabus. “Long rod ya, oli tekemaot ol man Juda long kantri blong olgeta, mo oli tekem olgeta i go long wan narafala kantri.”—2 King 25:1-21.
16 Long sem fasin, ol giaman skul we oli talem se oli Kristin (Krisendom), ol aedol blong olgeta bambae oli no save sevem olgeta long dei blong kros blong Jehova. (Aesea 2:19-22; 2 Tesalonaeka 1:6-10) Long taem ya, Krisendom bambae i lus wetem olgeta narafala giaman skul we oli pija blong “Bigfala Babilon.” Wael animol ya we kala blong hem i laet red mo ol ten hon blong hem, “bambae oli tekemaot olgeta samting we [Bigfala Babilon] i gat, mo oli livim hem i stap neked nomo. Mo bambae oli kakae ol mit blong hem, mo bambae oli bonem hem fulwan long faea.” (Revelesen 17:3, 16, 17) Yumi glad tumas se yumi bin obei long tok ya we i se: “Ol man blong mi, yufala i mas kamaot long hem sipos yufala i no wantem joen wetem hem long sin blong hem, mo sipos yufala i no wantem kasem ol trabol we bambae hem i kasem.” (Revelesen 18:4, 5) Yes, i gud yumi gat strong tingting blong neva gobak long hem o folem ol fasin blong hem.
“Kingdom Blong Mi i No Blong Wol Ya”
16 !I impoten tumas blong mekem ol jenis ya! Baebol i talem se ol man oli olsem solwota we i raf. (Aesea 17:12; 57:20, 21; Revelesen 13:1) Politik i mekem rao mo faet i kamaot, mo i seraotem ol man. Be ol man blong Jehova oli gat pis mo oli joen gud. Taem Jehova i skelem olgeta wetem ol man blong wol we oli seseraot, hem i mas glad tumas.—Ridim Sefanaea 3:17.
it “Wol” ¶21
Wol
Tok ya wol, oli yusum tu blong tokbaot ol man we oli gat paoa o hae posisen blong mekem se laef blong ol man i kwaet. Be ol man we oli stap mekem trabol, oli olsem solwota we i muvmuv oltaem.—Aes 57:20; Jem 1:6; Jud 13; skelem wetem Re 12:16; 20:11; 21:1.
it “Pis” ¶3
Pis
Gat Pis. Jehova i God blong pis (1Ko 14:33; 2Ko 13:11; 1Te 5:23; Hib 13:20) mo i Stamba blong pis (Na 6:26; 1Kr 22:9; Sam 4:8; 29:11; 147:14; Aes 45:7; Ro 15:33; 16:20), mo pis i wan frut blong spirit blong hem. (Ga 5:22) From samting ya, olgeta nomo we oli gat pis wetem God, oli save kasem trufala pis ya. Bigfala sin we wan man i mekem, i save spolem frensip blong hem wetem God mo i save mekem se tingting blong hem i trabol. Man blong raetem ol sam, i se: “Sin blong mi i mekem se ol bun blong mi oli no gat pis.” (Sam 38:3, fut.) Olgeta we oli stap lukaotem mo oli traehad blong gat pis, oli mas “tanem baksaed long samting we i nogud, mo . . . mekem samting we i gud.” (Sam 34:14) Sipos fasin blong man i no stret, bambae hem i no save gat pis. (Sam 72:3; 85:10; Aes 32:17) Hemia nao from wanem ol man nogud oli no gat pis. (Aes 48:22; 57:21; skelem wetem Aes 59:2-8.) Defren olgeta, pis i blong olgeta we oli ona fulwan long Jehova, oli lavem loa blong hem (Sam 119:165), mo oli stap obei long ol komanmen blong hem.—Aes 48:18.
Ol Gudgudfala Samting
Ol Bigfala Poen Long Buk Blong Aesea—Haf 2
56:6—?Hu ya “ol man blong ol narafala kantri,” mo olsem wanem oli “holem ol tok blong promes blong [Jeova]”? “Ol man blong ol narafala kantri” hemia ol “narafala sipsip” blong Jisas. (Jon 10:16) Oli holem ol tok blong promes ya, hemia niufala kontrak, taem oli obei long ol loa blong kontrak ya, sapotem fulwan ol plan we i kamaot long hem, kakae ol semfala kakae long saed blong spirit olsem ol tabu Kristin, mo joen wetem ol tabu Kristin long wok ya blong talemaot Kingdom mo pulum ol man oli kam disaepol.
Tinghae Long Ol Tabu Miting Blong Yumi
JEOVA i hivimap ol man blong hem, hemia ol tabu Kristin mo ol fren blong olgeta, blong oli wosipim hem long ‘hil blong hem we i tabu.’ Hem i mekem olgeta oli glad long ‘haos blong hem we i ples blong prea.’ Hemia haos blong God long saed blong spirit, we i “haos blong prea blong olgeta man blong evri kantri long wol.” (Aesea 56:7; Mak 11:17) Ol samting we Jeova i mekem blong hivimap ol man blong hem, oli soem se wosip we yumi mekem i go long Hem i wan samting we i tabu, i klin, i hae moa long ol narafala samting. Taem yumi tinghae long ol miting we yumi mekem blong stadi mo blong wosipim God, yumi soemaot se yumi gat tingting blong Jeova long ol samting we oli tabu.